लूका 19
19
जक्कई चो घरे ईशु
1हुन यरीहो ने ओलुन भाती जाते रलो। 2हुता जक्कई नाव चो गोटक माने रलो जोन कर धरतो बितामन चो सरदार रलो आउर सवकार रये। 3हुन ईशु के दकुक चाहते रलो कि हुन कोन आय। मान्तर भीड़ चो लागुन दकुक नी सकते रलो, कसनबल्लोने हुन खुजा रलो। 4तेबे हुनके दकतो काजे हुन पुरे पराऊन भाती गोटक डुमर चो रूक ने चेगलो, कसनबल्लोने ईशु हुनी बाटले जातो बिता रये। 5जिदलदाय ईशु हुन जगा अमरलो, तेबे उपरे नंजराऊन भाती हुनचो ले बल्लो, “हे जक्कई, झटके उतरून आव; कसनबल्लोने आजी मोके तुचो घर ने रतोर जरूरी आय।” 6हुन तुरते उतरून भाती हरिक ले हुनके आपलो घरे धरून गेलो। 7ऐ दकुन भाती सपाय लोग गुरमुराऊन भाती बोलुक मुरयाला, “हुन तो गोटक पापी माने चो थाने जाऊन उतर लो से।” 8जक्कई उबा होऊन भाती परबु ले बल्लो, “हे परबु, दक, मय आपलो आदो धनमाल कंगालमन के देयें दें, आउर अगर काचीई काई बले अनियाय करून धरले से तो हुनके चार दुना लेवटाऊन देये दे।” 9तेबे ईशु हुनचो ले बल्लो, “आजी ऐ घर ने मुक्ति ईली से, ऐईकाजे कि ऐ बले अब्राहाम चो गोटक बेटा आय। 10कसनबल्लोने माने चो बेटा हाजलो बितामन के डगराऊक आउर हुनमन चो मुक्ति करूक ईलो से।”
दस मोहरमन
11जिदलदाय हुनमन ऐ गोठमन सुनते रवत, तेबे हुन गोटक कहनी बल्लो, ऐईकाजे कि हुन यरूशलेम चो लगे रलो, आउर हुनमन समजते रवत कि माहापुरू चो राज ऐबे उजागर होतो बिती आय। 12आउर हुन बल्लो, “गोटक सवकार माने दूर देश ने गेलो बल्ले राजपद पाऊन भाती बाहडून ऐओ।” 13हुन आपलो दासमन थानले दस झान के हाग देउन भाती हुनमन के दस मोहरमन दिलो आउर हुनमन ले बल्लो, मोचो बाहडून ऐवत ले लेन-देन करा। 14मान्तर हुनचो नंगर चो रतो बितामन हुनचो ले बईर संगाते रवत, आउर हुनचो पाटे दूतमन चो बाटले खबर पठाला, आमी नी चाहाऊं कि ऐ आमचो उपरे राज करो।
15“जिदलदाय हुन राजपद पाऊन भाती बाहड़लो, तेबे असन होली कि हुन आपलो दासमन के जोनमन के रकम देऊ रये आपलो लगे हाग दियालो बल्ले जाच करो कि हुनमन लेन-देन ले काय-काय कमाला। 16तेबे पयला ऐऊन भाती बल्लो, ‘हे मालिक, तुचो मोहर ले दस आउर मोहर कमाले।’ 17हुन हुनचो ले बल्लो, ‘धन्य, हे बड़ीया दास! तुय खुबे थोड़े ने बिश्वास लायक निकरलीस अदायं दस नंगर थाने अधिकार संगाव।’ 18दुसर ऐऊन भाती बल्लो, ‘हे मालिक, तुचो मोहर ले पांच आउर मोहरमन कमाले।’ 19हुन हुनचो ले बले बल्लो, ‘तुय बले पांच नंगरमन थाने हाकिम हो।’ 20तीसर ऐऊन भाती बल्लो, ‘हे मालिक, दक तुचो मोहर ऐ आय, जेके मय ओंगची ने बान्दुन संगाऊन रये। 21कसनबल्लोने मय तुमचो ले डरते रये, ऐईकाजे कि तुय कठर माने आस: जोन तुय नी संगाली सीस हुनके बिनु आस, आउर जोन तुय नी बुनलीस, हुनके काटु आस।’ 22हुन हुनचो ले बल्लो, ‘हे दुष्ट दास, मय तुची मुंह ले तुके दोषी ठेबायें सें। तुय मोके जानते रलीस कि कठर माने आय, जोन मय नी संगाले से हुनके बिनु आय, आउर जोन मय नी बुनले हुनके काटु आय; 23तो तुय मोचो रूपया कन्तर ने देतो बिता चो लगे केंव नी संगालीस कि मय ऐऊन भाती कन्तर संगे धरते?’ 24आउर जोन लोग लगे ऊबु रवत, हुन हुनमन ले बल्लो, ‘हुन मोहर हुनचो ले धरा, आउर जेचो लगे दस मोहरमन आसे हुनके देऊन दिआस।’ 25हुनमन हुनचो ले बल्लो, ‘हे मालिक, हुनचो लगे तो दस मोहरमन तो आसे।’ 26‘मय तुमचो ले बलें सें कि जेचो लगे आसे हुनके दिया जाये दे; आउर जेचो लगे निआय, हुनचो ले हुन बले जोन हुनचो लगे आसे धरा जाये दे। 27मान्तर मोचो हुन बयरीमन के जोन नी चाहते रवत कि मय हुनमन उपरे राज करे, हुनमन के ऐथा आनुन भाती मोचो पुरे घात करा’।”
यरूशलेम ने जीत ओलतोर
28ऐ गोठमन बोलुन भाती हुन यरूशलेम चो बाटे हुनमन चो पुरे-पुरे हिन्ड़लो। 29जिदलदाय हुन जैतून नाव चो डोंगरी थाने बैतफगे आउर बैतनिय्याह चो लगे अमरलो, तेबे हुन आपलो चेलामन थानले दुय झान के ऐ बोलुन भाती पठालो, 30“पुरे चो गाँव ने जाहा; आउर हुता अमरते ची गोटक गदही चो पिला जेचो उपरे केबीई कोनी सवार नी होला, बान्दलोर तुमके मिरे दे, हुनके ढ़िलुन भाती धरून ईआ। 31अगर कोनी तुमके पचार दे कि केंव ढ़िलेसास, तेबे ऐ बोलुन दिआस कि परबु के ऐचो जरूरत आसे।”
32जोन पटाया जाऊ रवत, हुनमन जाऊन भाती जसन हुन हुनमन ले बोलु रलो असने ची पावला। 33जिदलदाय हुनमन गदही चो पिला के ढिलते रवत, तेबे हुनचो मालिकमन हुनमन ले पचारला, “ऐ पिला के केंव ढ़िलेसास?” 34हुनमन बल्ला, “परबु के ऐचो जरूरत आसे।” 35हुनमन हुनके ईशु लगे धरून आनला, आउर आपलो फटीई हुन पिला थाने लतुन भाती ईशु के हुनचो उपरे बसाला। 36जिदलदाय हुन जाते रलो, तेबे हुनमन आपलो फटीई बाट ने ओचाते जाओत। 37लगे ऐते-ऐते जिदलदाय हुन जैतून डोंगरी चो उतरानी थाने अमरलो, तेबे चेलामन सपाय मण्डली हुन सपाय सामरत चो काममन चो कारन जोन हुनमन दकुन रवत, हरिक होऊन भाती बड़े जोर ले माहापुरू चो स्तुति करूक मुरयाला:
38“धन्य आय हुन राजा, जोन परबु चो नाव ले ऐऊ आय!
सरग ने शान्ति आउर बादरी भुभन ने महिमा होओ!”
39तेबे भीड़ थानले कितलो फरीसी हुनचो ले बोलुक मुरयाला, “हे गुरू, आपलो चेलामन के खिज।” 40हुन जबाप दिलो, “मय तुमचो ले बलें सें, अगर ये ओगाय रला तो पकना चिचयाऊन उठ दे।”
यरूशलेम काजे बिलखतोर
41जिदलदाय हुन लगे ईलो तेबे नंगर के दकुन भाती हुन थाने गागलो 42आउर बल्लो, “काय ची नुकु होती कि तुय, हव, तुय ची, ऐई दिन ने हरिक चो गोठमन जानतीस, मान्तर अदायं हुन तुचो आँईकमन ले लुकुन गेली से। 43कसनबल्लोने हुन दिन तुचो उपरे ऐये दे कि तुचो बयरी जुलूस बान्दुन भाती तुके घेर दे, आउर चारो बाट ले तुके चेपा दे; 44आउर तुके आउर तुचो लेकामन के जोन तुचो थाने आसोत, माटी ने मिसा दे, आउर तुचो थाने पकना उपरे पकना बले नी छांड़ दे; कसनबल्लोने तुय हुन मवका के जिदलदाय तुचो उपरे दयाधरम करा गेली नी चितालीस।”
मंदिर चो सफाई
45तेबे हुन मंदिर ने जाऊन भाती बिकतो बितामन के बाहरे निकराऊक मुरयालो, 46आउर हुनमन ले बल्लो, “लिकलोर आसे, ‘मोचो घर पारथना चो घर होये दे,’ मान्तर तुमी हुनके डाकुमन चो डेरा बनाऊन दिलासास।” 47हुन रोजे दिना मंदिर ने उपदेश करते रलो; आउर परधान याजक आउर शास्तरी आउर लोगमन चो मुखिया हुनके नष्ट करतोर मवका डगराते रवत। 48मान्तर काई उपाय नी निकराऊक सकला कि ऐ कसन परकार करवां, कसनबल्लोने सपाय लोग बड़े चाव ले हुनचो सुनते रवत।
Currently Selected:
लूका 19: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
