मत्ती 12

ईशु सब्त चो परबु

1हुन समय ईशु सब्त चो दिने बेड़ामन बाटले होऊन भाती जाते रलो, आउर हुनचो चेलामन के भूक लागली तेबे हुनमन खेड़ टुटाऊन-टुटाऊन भाती खाऊक मुरयाला। 2फरीसीमन ऐ दकुन भाती हुनचो ले बल्ला, “दक, तुचो चेलामन हुन काम करे सोत, जोन सब्त चो दिने करतोर ठीक नुआय।” 3हुन हुनमन ले बल्लो, “काय तुमी नी पड़लासास, कि दाऊद, जिदलदाय हुन आउर हुनचो संगवारी भूके होला तेबे काय करलो? 4हुन कसन माहापुरू चो घर ने गेलो, आउर भेट चो रोटीमन खादलो, जोन के खातोर ना तो हुनके आउर ना हुनचो संगवारीमन के मान्तर मात्र याजकमन के ठीक रली? 5नाहले काय तुमी नियम ने नी पड़लास कि याजक सब्त चो दिने मंदिर ने सब्त चो दिन चो बिदी के टुटातो थाने बले बेकसूर ठेबु आत? 6मान्तर मय तुमचो ले बलें सें कि ऐथा हुन आसे जोन मंदिर ले बले बड़े आय। 7अगर तुमी ऐचो अरत जानतास, ‘मय दया ले हरिक होऊ आय, बलिदान ले नाई,’ तेबे तुमी बेकसूर के दोषी नी ठेबातास। 8माने चो बेटा तो सब्त चो दिन चो बले परबु आय।”

सुकलो हाथ बिता माने

9हुता ले जाऊन भाती हुन हुनमन चो आराधना घर ने ईलो। 10हुता गोटक माने रलो, जेचो हाथ सुकुन रये। हुनमन ईशु उपरे दोष लगातो काजे हुनचो ले पचारला, “काय सब्त चो दिने चेंगा करतोर ठीक आय?” 11हुन हुनमन ले बल्लो, “तुमचो थानले असन कोन आसे जेचो गोटक मेंडा रओ, आउर हुन सब्त चो दिने खोदरा ने घसरो, तेबे हुन हुनके धरून भाती नी निकराओ? 12अच्छा, माने चो कीमत मेंडा ले कितलो बडुन भाती आय! ऐईकाजे सब्त चो दिने अच्छा करतोर ठीक आय।” 13तेबे ईशु हुन माने ले बल्लो, “आपलो हाथ लमाव।” हुन लमालो, आउर हुन फेर दुसर हाथ चो असन अच्छा होली। 14तेबे फरीसीमन बाहरे जाऊन भाती हुनचो बिरूद ने सलाह करला कि हुनके कसन परकार नष्ट करवां।

माहापुरू चो छांटलो दास

15ऐ जानुन भाती ईशु हुता ले गेलो। आउर खुबे लोग हुनचो पाट-पाट गेला, आउर हुन सपाय के चेंगा करलो, 16आउर हुनमन के जनालो कि मोके उजागर नी करा, 17बल्ले जोन बचन यशाया अगम गिआनी चो दुवारा बोला जाऊ रली, हुन पुरा होओ:

18“दका, ऐ मोचो सेवक आय, जोन के मय चुनले से; मोचो लाड़रा, जेचो ले मोचो मन हरिक आंसे: मय आपलो आत्मा हुनचो उपरे डालेंदे; आउर हुन दुसर जातिमन के नियाय चो खबर देयदे। 19हुन ना झगड़ा करेदे, आउर ना धुम मचायदे,

आउर ना हाटमन ने कोनी हुनचो शब्द सुनदे।

20हुन रमन्दलो बिती राज बड़गीमन के नी टुटायदे,

आउर कुमरा देतो बिती बाती के नी लिबायदे,

जिदलदाय तक हुन नियाय के परबल नी कराये।

21आउर दुसर जातिमन हुनचो नाव थाने आशा संगादे।”

ईशु आउर दुष्टआत्मामन चो राजकरू

22तेबे लोग गोटक काना-कोंदा के जेचो थाने दुष्टआत्मा रली, हुनचो लगे आनला; आउर हुन हुनके चेंगा करलो, आउर हुन कोंदा बोलुक आउर दकुक मुरयालो। 23ऐ थाने सपाय लोग भकवा होऊन भाती बोलुक मुरयाला, “ऐ काय दाऊद चो पिला आय!” 24मान्तर फरीसीमन ऐ सुनुन भाती बल्ला, “ऐ तो दुष्टआत्मामन चो सरदार शयतान चो सायता चो बिना दुष्टआत्मामन के नी निकरातो।” 25हुन हुनमन चो मन चो गोठ जानुन भाती हुनमन ले बल्लो, “जोन कोनी राज ने फुट होऊ आय, हुन उजरुन जाऊ आय; आउर कोनी नंगर नाहले घरमन जोन थाने फुट होऊ आय, बनु नी रये। 26आउर अगर शयतान ची शयतान के निकराये दे, तेबे हुन आपली ची बयरी होलो से; फेर हुनचो राज कसन बनुन रये दे? 27अच्छा, अगर मय शयतान चो सायता ले दुष्टआत्मामन के निकराऊ आंय, तेबे तुमचो बंश काचो सायता ले निकराऊ आत? ऐईकाजे हुनीमन ची तुमचो नियाय कर दे। 28मान्तर अगर मय माहापुरू चो आत्मा चो सायता ले दुष्टआत्मामन के निकराऊ आंय, तेबे माहापुरू चो राज तुमचो लगे ऐऊन अमरली से। 29नाहले कसन कोनी माने कोनी बलबीता चो घर ने ओलुन भाती हुनचो माल जुरूक सके जिदलदाय ले कि पयले हुन-हुन बलबीता के नी बान्दे? तेबे हुन हुनचो घर के जुरे दे। 30जोन मोचो संगे निआय हुन मोचो बिरूद ने आसे, आउर जोन मोचो संगे नी सकले हुन बिखरु आय। 31ऐईकाजे मय तुमचो ले बलेंसें कि माने चो सपाय परकार चो पाप आउर निन्दा छमा करा जायेदे, मान्तर पवितर आत्मा चो निन्दा छमा नी करा जाये। 32जोन कोनी माने चो बेटा चो बिरूद ने काई गोठ बले दे, हुनचो ऐ अपराध छमा करा जायेदे, मान्तर जोन कोनी पवितर आत्मा चो बिरूद ने काई बले दे, हुनचो अपराध ना तो ऐ लोग ने आउर ना उपरपुर ने छमा करा जाये दे।

गोटक रूक आपलो फर ले चिताय होऊ आय

33“अगर रूक के अच्छा बोला, तेबे हुनचो फर के बले अच्छा बोला, नाहले रूक के खराप बोला, तेबे हुनचो फर के बले खराप बोला; कसनबल्लोने रूक आपलो फर ची ले चिताया जाऊ आय। 34हे सांप चो पिलामन, तुमी खराप होऊन भाती कसन अच्छा गोठमन बोलुक सकास? कसनबल्लोने जोन मन ने भरली से, हुनी मुंह थाने ऐऊ आय। 35अच्छा मानेमन चो अच्छा भण्डार ले अच्छा गोठमन निकराऊ आय, आउर खराप माने खराप भण्डार ले खराप गोठमन निकराऊ आय। 36आउर मय तुमचो ले बलेंसें कि जोन-जोन बेकार गोठमन मानेमन बोल दे, नियाय चो दिने हुनमन सपाय झान हुन गोठ चो लेखा देदे। 37कसनबल्लोने तुय आपलो गोठमन चो लागुन बेकसूर, आउर आपलो गोठमन ची चो लागुन दोषी ठेबाया जासे।”

ईशु ले चिना मांगतोर

38ऐ थाने कितलो शास्तरीमन आउर फरीसीमन हुनचो ले बल्ला, “हे गुरू, आमी तुचो ले गोटक चिना दकुक मन करूं से।” 39हुन हुनमन के जबाप दिलो, “ऐ जुग चो खराप आउर बेबीचारी लोग चिना डगराऊ आत, मान्तर योना अगम गिआनी चो चिना के छांडुन काई आउर चिना हुनमन के नी दिया जाये। 40योना तीन रात दिन बड़े मछरी चो पेट ने रलो, असने ची माने चो बेटा तीन रात दिन धरतनी चो भीतरे रये दे। 41निनवे चो लोग नियाय चो दिने ऐ जुग चो लोगमन चो संगे उठून भाती हुनमन के दोषी ठेबा दे, कसनबल्लोने हुनमन योना चो परचार सुनुन भाती मन फिराला; आउर दका, ऐथा हुन आसे जोन योना ले बले बड़े आय। 42इस्राएल देश चो दक्षिण ने शेबा चो रानी नियाय चो दिने ऐ जुग चो लोगमन चो संगे उठून भाती हुनमन के दोषी ठेबाये दे, कसनबल्लोने हुन सुलेमान चो गिआन सुनतो काजे धरतनी चो कोना ले ईली; आउर दका, ऐथा हुन आसे जोन सुलेमान ले बले बड़े आय।”

अशुद्ध आत्मा के घर चो खोज

43“जिदलदाय अशुद्ध आत्मा माने थानले निकरून जाऊ आय, तेबे सुका जगामन ने आराम डगराते फिरू आय, आउर पाऊ नुआय।” 44तेबे बोलु आय, “मय आपलो हुनी घर ने जोन थानले निकरून रले, आपस जायें दें। आउर लेवटून भाती हुनके चिम-चाम, झाड़लोर बड़ालोर आउर तिआर करलोर पाऊ आय। 45तेबे हुन जाऊन भाती आपलो ले आउर खराप सात दुष्टआत्मामन के आपलो संगे धरून ऐऊ आय, आउर हुनमन हुन थाने ओलुन भाती हुता डेरा करू आत, आउर हुन माने चो पाटे चो हालत पयले ले बले खराप होऊन जाऊ आय। ऐ जुग चो घिन-घिना लोगमन चो हाल बले असने ची होये दे।”

ईशु चो सत परिवार

46जिदलदाय हुन भीड़ ले गोठयाते रलो, तेबे हुनचो आया आउर भाई बाहरे उबा रवत आउर हुनचो ले गोठयाऊक चाहते रवत। 47कोनी हुनचो ले बल्लो, “दक, तुचो आया आउर तुचो भाई बाहरे उबा आसोत, आउर तुचो ले गोठयाऊक चाहाय सोत।” 48ऐ सुनुन भाती हुन बोलतो बितामन के जबाप दिलो, “कोन आय मोचो आया? आउर कोन आय मोचो भाई?” 49आउर आपलो चेलामन चो बाटे आपलो हाथ बड़ाऊन भाती बल्लो, “दका, मोचो आया आउर मोचो भाई ऐ मन आत। 50कसनबल्लोने जोन कोनी मोचो सरग चो बुआ चो इच्छा थाने चले दे, हुनी मोचो भाई, आउर मोचो भईन, आउर मोचो आया आय।”

Currently Selected:

मत्ती 12: HLBNT

Highlight

Copy