M. Mattayo 14

1NSITA yamene iyo Herode mfumu echimvwa mbili ya Yesu, 2eŵauzya alumbwana ŵake, Uyu ni Yohana Mbatizi; ezyuka kwa akufwa, ni pavuchitika mwake vyampamvu ivi. 3Pakuti Herode emkata Yohana, emmanga nomuŵika mkambolimboli mlandu wa Herodiya, mkazi wa Filipo mkwaŵo. 4Pakuti Yohana emnenera, Ni chosazomereka kwanu kunkala naye. 5Nipo akasakompaya eliyopa liumba, chifukwa emlinga nga ni muŵirizi. 6Sembe pelichiza siku lovyalikwa kwake Herode mwana mwanakazi wa Herodiya evina apo pakati nomtemwesya Herode. 7Pamene apo epangana naye chilapo chakuti ampe chonse chati asenge. 8Nipo yeve akapimfyiwe na anyina echiti, Munipere pa mbazilo mutu wa Yohana Mbatizi. 9Nayo mfumu ivukuma mtima, sembe chikomo cha vilapo vyake na cha aŵo ŵenzenkezi nayo pakulya isuzula kuti upewe; 10itumizya imgwambulisya mutu wa Yohana mkambolimboli. 11Mutu wake wiletewa pa mbazilo nopewa ku msimbi: naye eutwala kwa anyina. 12Nipo asambili ŵake echiza echiula chitanda, nomuŵika pa msitu, na kuyomuuzya Yesu.

13Lomba akamvwe Yesu efumako kulakwa mu wato kuya mmalambo yeka: naŵo maumba pechimvwa emsenselela na mendo kufumila mminzi. 14Naye akafume eŵona liumba likuru, elichitira chifundo nopolesya alwele ŵaŵo. 15Nipo chikaze chingulo asambili ŵala emzila echiti, Muno ni mmalambo: zuŵa laya; asuzuleni maumba ŵaye ku minzi akalisitire ŵeka nkana. 16Sembe Yesu eŵanenera, Aliye chikomo choira; ŵapeni mweo ŵalye. 17Ŵeve emnenera, Seo tiliye kantu pano sembe mitanda isano na masaŵi aŵiri. 18Naye echiti, Izani navyo kuno kwangu. 19Nipo eŵauzya maumba ankale pansi pa msipu; naye eula mitanda isano iyo na masaŵi aŵiri, elola kumulu eshukisya noisunasuna noŵapa iyo mitanda asambili, na asambili ku maumba. 20Ŵonse echilya ekuta: naŵo efusa manyenyenswa esalapo maluŵango kumi na aŵiri ŵozula. 21Ŵala ŵechilya ŵenze analume nga ni myanda makumi asano, mpuzyo ni anakazi na ŵana.

22Nipo lomba pano apa eŵakulumizya asambili kuyoloŵa mu wato uyo nomtangulila kusilya limbi, mpaka pati aŵasuzule maumba. 23Nipo akaŵasuzule maumba ekwera umo mlupiri padera kulomba: naye zuŵa likati pyuu enze mwamene umo yeka. 24Sembe lomba wato wenze pakati pa chimana notenukatenuka na magapigapi, pakuti mpepo yenze kuntanzi. 25Nipo usiku pa nsita yakane yopokezyana eŵazila aŵo, enzoyenda pamulu pa manzi. 26Asambili naŵo akamuŵone oyenda pamulu pa manzi emwazika mitima echiti, Ni mzyuka; naŵo elilisya na mwezo. 27Sembe lomba pano apa Yesu enena naŵo echiti, Nkazikani mitima; ni neo; msayopa. 28Petro eyasuka echiti, Asikuru, kati nimwe muniuzye nize kwanu pamulu pa manzi. 29Echiti, Iza. Nipo Petro akafume mu wato eyenda pamulu pa manzi kuya kwa Yesu. 30Sembe yeve akaŵone mpepo eyopa; akayambombila elilisya kuti, Asikuru, nipuzumusyeni. 31Nipo lomba pano Yesu etambikizya kwanja kwake emkata nomnenera, We mtonto mvwano, wakaikiranji? 32Nipo akaloŵe ŵeve mu wato mpepo ileka. 33Amene ŵala ŵenze mu wato emlambila echiti, Ni chendi nimwe Mwana wa Mlungu.

34Nipo ŵeve akatauke efwika kusilya, ku Genesarete. 35Pamene ŵantu a palapa pechimvwa etumizya ku chitwa icho chonse chozunguluka, eŵaleta kwake ŵonse enzelwele; 36amene emtetelela kuti aikumye mpomponje yeka ya chovwala chake; naŵo ŵonse amene ekumya epuzumushiwa.

Currently Selected:

M. Mattayo 14: MA23

Highlight

Copy