Fagsigadan 16
16
Abram Daduwa nu Kawat at Faran Laman Umke Unga
1-3Abram fag fulan glugo wa nu gbanwan sis talun Kanaan. Safulu wak banwa at kadugayan. Ay dewa katanya, Abram ay Saray wa gugat e unga.
Ay sayginan, Saray inkakbang sat mangama ay glong te, “Yaya, Diyus wa siring kaumsig nu mke unga aw, madyay wa ta gugat e unga anggan katsi. Ay at masine siring ta fagbulun, gfon kwemu ku fanuguwan fag baguyna. Ay sai wa anya laman kanya nu nke unga, lumong ta te, kanya ta unga wan.”
Ay Abram nafaning at mangena longan. Namangenaan at fanuguwan fag baguyna, at ngayan Agar. Kanya sik taw Iptu. 4Ay Abram nu namangenaan wan, bandi ataw at fanuguwan gfafiyon wan. Ay kanya nu nasaful te, gfafiyon wa mangaro, gfasigad wa gfalingun at fun.
5Ay nu katanya, Saray inkakbang sat mangama ay glong te, “Katsi gatakan kway dawdaw, teway kanya ku nafon emu fag baguyna ebi laman am mangena, kanya gfafiyon wan. Ay gfalingun dawdaw angku. Nu katanya, aw gatakan kway dawdaw. Ay ku nasaful, ku fagatakanun dawdaw katsi, bunwa long aw at fanlonganan. O wadi. Diyus long gsaful wa te, o wadi at nafe natakan angku. Bunwa aw.”
6Ay at mangama gbalus te, “Lagi. Lag dawdaw gatakan. O tuwa ngani at fun. Fagbuluni wa nus nga setaw am fakaumsigun sa anya.” Ay Saray nu nadungug katanya, gfasigad wa gfauri at fanuguwan.
Ay nu katanya, at fanuguwan sayginan nalagyu at fun. Nalo wan. 7Sa wa sik dalan, at dalan tagsas Sur. Ay nu glo wa gugat, indasug sa sik ke fagfanaguban, tigyangan dalan. Ay sanya yay Agar. Ay nu sanya wa gugat, Yawi at tagbukngan fag falad insure. 8Ay glong te, “Agar. Taw ro am fagsteun daw, am faginyayuun am fun? Ay o wan Saray fanuguwan. Dada ro o?” Ay Agar gbalus te, “Ku fagsteun, glagyu akwa ku fun.”
9Ay Yawi tagbukngan gbalus te, “Lagi. Lag lagyu am fun. Afolii way sa anya. Fangkabat, katsi ban baliwa faningi tuwa at ngay suguwan.
10“Ay glong aw emu te, igfaayu kwa ban dawdaw am ngay fufu sat dagat daga. Ngayu wa ban fag taw. Wa ban e mangatap at kayuwan.
11“Ay kanya ngani am fagfafiyonun katsi, kanya ban sik ama. Ay dewa gina nu nsalug wa ban, fangayani anya Ismael, teway fakatanyaun, Diyus infalbak tuwa emu katsi, gina o dawdaw gatakan.#16:11 Sis Fangebriyu, galay glong te, Ismael, at masuwad, Diyus igdungug tuwa, ate ro, Diyus kafalbak tuwa. 12Ay kanya ban am ngenge, kata way sik asnu mela. Kanya gfabarangyan ban gugat tiba. Ay tiba gfabarangyan yangay anya. At kalongan oma, kalimata wadi. Katanya ban am baguwama at ugali.”
13Ay Agar nu nadungug Yawi tagbukngan nu gelongan, intuyan te, “E, aro ginan mangaro, ku fasulitanan, Diyus wan. Diyus nalag tuwa mangaro angku nu gatakan aw. Ay nus tuwa ma, anggan aw glag aktuwa anya.” Nu katanya, Agar glong sas Diyus te, “O wa mangaro at madaragang fag Taglag.” Ay siginan ginanya, katanya wan Agar nu gngayan Diyus. Anwa at magadaragang fag Taglag. Ay Agar nafaning wa fiya at longan. Kanya infoli wa fiya sat fun.
14Ay gina Diyus igfasulitanan Agar, kanya si yays ke fagfanaguban. Ay nu bandi wan, at ngay taw nu gngayan sanya fag fagfanaguban, anwa Ber-Lakay-Ruy.#16:14 Sis Fangebriyu, galay glong te, Ber-Lakay-Ruy, at masuwad, sanya fag ke fagfanaguban sik fagsegan nalag angku. Kanya fag fagfanaguban, sis buknga duwak fulan, fulan Kadis ay fulan Bered.
15Ay Agar nu nauli wan, bandi ataw, gfasalug wa at ngenge. Ay sik ama wa fiya. Ay Abram nafangayan wa fiya at unga te Ismael. 16Ginanya Abram at kadugayan, anwa 86k banwa.
Currently Selected:
Fagsigadan 16: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
