Luka 8
8
Wake weluo wekemwirima Jesu
1Nao nyuma ya agha, Jesu kaita kele mizi mizi kechila Ilagho lyaloli lya Uzuri ghwa Mlungu. Naye wokezanye na wairimi ikumi na waili, 2na wake wamoju awaboese pepo na manyongi. Mariamu (aitogho Magdalene) afunyilo pepo mfungate 3na Joana, muke wa Kuza, eluo mtumishi wa Herode, na Susana na wazima wengi, weluo wekewatumikila na mali zawe zenyi.
Ikataniso lya mwandi mbeu
(Matayo 13:1-9; Marko 4:1-9)
4Nao ilyi makoghano weluo wekemjila kufuma mizi mizi, Jesu kaghora ikataniso ilyi; 5Mwandi oghendile kuwanda mbeu, na ilyi eluo kewanda, zimoju zikapotoka ngileni zikalatilo ni wandu, nazo zikaduo ni nyonyi. 6Zimoju zikapotoka kele lwala, zikafuma na kwa kusowa meji zikaoma. 7Zimoju zikapotoka miyeni na miya ikazeguanya nazo ikazisira. 8Zimoju zikapotoka kele msanga ghwaloli, zikazeguwa, zikavala kila moju ighana, Naye aghenda kughora hung'u, kaghamba, “Uyu ewo na masikilo ghesikila asikile.”
Kutambula chausa cha Ikataniso
(Matayo 13:10-17; Marko 4:10-12)
9Nao wairimi wakamkotela kutambula kwa ilyi ikataniso, 10Naye Jesu kaghora, “Inyo mwanahawilo kumanya ngasu za Uzuri ghwa Mlungu, ela wazima ni kwa makataniso, eri hata wakalola siwaone na wakanasikile siwatambukilo.
Jesu kutambula ikataniso lya mwandi mbeu
(Matayo 13:18-23; Marko 4:13-20)
11“Uku niko kutambula kwa ikataniso: Mbeu ni ilagho lya Mlungu. 12Zilya zepotoke ngileni, ni wandu wesikilagha ilagho, na Shetani eje alyifunye ilagho ngoloni kwawe, eri siwejedumusa wakile. 13Na zilya zipotoke lwaleni ni walye wesikilagha ilagho na kulyihokera kwa kuboelo, ela siwawesi miriginga, wadumusa kwa ngelo, ela ngelo ya matimo ikeja wasigha idumusi. 14Na zilya zepotoke miyeni ni walye wesikilagha ilagho, ela ngelo weghenda ngila yawe wasiro ni malagho na mali na mabwelo gha ughu umana, nawo walemo ni kuvala mavalo. 15Na zilya zepotoke kele msanga ghwaloli ni walye wesikilagha ilagho na kulyiwata ngoloni na kulyidea. Nawo wavala mavalo kwa kurumaghia.
Kubula taa ibamba
(Marko 4:21-25)
16“Sikwesi mundungi awashagha taa na kuibula ibamba, ango kuika ulilini mwenimweni, ela wanaiikagha ighulu ya andu koika taa, eri wandu wengilagha waone mlangazi.
17“Kwani sikwesi kindu chingi chivisilo sicheonekagha, hata chio kivisoni sichemanyogho na kuleto mlangazini.
18“Kwa hung'u kulindeni na selyi musikizilagha. Kwani uyu ewo navo ujejuzilo na uyu sewesi hata ichi ewo nacho ujesoko.”
Mee Jesu na wana wakwawe
(Matayo 12:46-50; Marko 3:31-35)
19Nao mee Jesu na wana wakwawe wekeja kwake, ela siwadimile kumfikila kwa undu ghwa makoghano. 20Naye kaghorero, “Meo na wana wakwenyu weo kimusi shighati, nawo wanashaile kukuona.” 21Ela Jesu kawauza, “Mawe na wana wakwetu ni walye wesikilagha ilagho lya Mlungu na kulyidea.”
Jesu kunyamaza mbeo mbwaa
(Matayo 8:23-27; Marko 4:35-41)
22Nao ijua imoju Jesu kajoka kele mashua ngila mojori na wairimi wake, naye kawauza, “Tiwambuke chambuko cha bahari.” Nao wakadyowa kuwambuka. 23Nao ilyi weluo wekeghenda baharini, Jesu kawato ni haring'a. Nao kukeja mbeo mbwaa baharini, na mashua ikadyowa kungilo ni meji hata wakakala ndengweni. 24Nawo wakaghenda wakamunula, wekemuza, “Bwana Bwana tendehaita!” Nao kauka na kuikemela mbeo na mivomivo ya meji, nayo ikanyamala na kukanyamala chwi. 25Naye kawauza, “Lyio hiyo idumusi lyenyu?” Nawo kwa kungilo ni wogha na kushinika wakauzana wenyi, “Nani uyu ado, hata eghoranyagha na mbeo na meji navo vimusikile?”
Jesu kuboesa mundu wa pepo
(Matayo 8:28-34; Marko 5:1-20)
26Nao wakafika pwani ya isanga lya Wagerasi, yeluo chambuko cha Galilaya. 27Naye ilyi eluo keselela pwani, kakoghana na mundu wa pepo kufuma kele muzi. Naye kwa ngelo ndele seluo kerwara nguo ingi, na seluo kekala nyumba, ela oluo kekala mbireni. 28Naye aghenda amwona Jesu, kakema na kumugwila hambiri, keghora na lwaka lubwaa, “Nini udeagha nemi, Jesu Mwana wa Mlungu wa Ighulu? Nakulomba swanitirire.” 29Kwani woluo aiuza pepo imufume ulya mundu. Kwani ngelo nyingi yemwatile, na kwa kumulinda, wakamfunga na minyororo na vigogo, ela kaivunja kakimbizo ni pepo kireti. 30Nao Jesu kamukotela, “Izina lyako nuwe ani?” Naye kaghora, “Legioni” kwani wongililo ni pepo nyingi. 31Nao pepo zikamlomba sazighenze andu kuwase.
32Nao anyalye lughongoni koluo na uranu ghwa nguluwe ghukelisa. Nazo zikamlomba azidumusile zighende zizingile. Naye kazidumusila. 33Nao zilya pepo zikamufuma ulya mundu zikangila kele nguluwe, na uranu ghose ghukadoromoka lughongoni lukangila kele bahari, zikafwa mejini.
34Nao walisa waghenda waona agha, wakakimbila, wakaghenda kuwaghorera wandu wa muzi na lyilya isanga. 35Nao wandu wekeja eri waone ghalye ghadeika, nawo wakamjila Jesu, na kumwona ulya mundu afumo ni pepo ewo kitembo avui na Jesu, arwara nguo na ewo na akili zake, nawo wakangilo ni wogha. 36Nao walye waonile wakawaghorera selyi ulya mundu wa pepo aboeso. 37Nao wandu wose wa isanga lya Gerasi wakamlomba afume mzawe, kwani wengililo ni wogha mubwaa. Kwa hung'o Jesu kajoka mashua kauya. 38Ulya mundu eluo na pepo kamlomba waghendanye, ela Jesu kamuuja kemuza, 39“Gala kaya na uwaghorere wandu agha Mlungu akudeila.” Nao kaghenda keeresa uvoro kele muzi ghose gha ghalye Jesu amdeilile.
Mchana wa Jairo na muke awatile nguo ya Jesu
(Matayo 9:18-26; Marko 5:21-43)
40Nao Jesu aghenda auya, makoghano wakamuhokera kirani, kwani weluo wekemdafwa. 41Nao keja mundu mumoju aitogho Jairo, eluo mubwaa wa sinagogi, kagwa maghuluni kwa Jesu, kamlomba aghende nyumba kwake, 42woluo na mwana wake mumojori, eluo na miaka ikumi na mili, naye woluo avui na kufwa.
Nao ilyi eluo keghenda wandu wakamtindirira. 43Na koluo na muke mumoju eluo kefumo ni bighati kwa miaka ikumi na mili, naye katumia mali yake yose kwa waghanga na hata sikwesi ungi wawe adimile kumuboesa. 44Nao keja nanyuma ya Jesu, kapeta hemu ya nguo yake, na iyo ngelo yenyi bighati yake ikaoma. 45Nao Jesu kakotela, “Nani aniwata?” Nao wandu wose waghenda wakana, Petro na walye wekezanye wakamuza, “Bwana, makoghano wakumara na kukutindirira!” 46Ela Jesu kaghora, “Kuo na mundu anipeta, kwani namanyiso ni ndighi kunifuma.” 47Nao ulya muke aghenda aona wamanyo, keja kesukosuko, kagwa hambiri ya Jesu, kamghorera ghose hambiri ya wandu wose ni kudani amwata na selyi aboa iyo ngelo yenyi. 48Naye Jesu kamuza, “Mwanwangu, Idumusi lyako lyakuboesa, ghenda na sere.”
49Nao ilyi Jesu eluo keghora, mundu mumoju kufuma nyumba kwa Jairo keja kamuza, “Mwana wako wafwa, swamusirimise Mwalimu.” 50Ela Jesu aghenda kusikila katumbulila, “Swawoghe; uwe dumusa tu, na ubowagha.”
51Nao aghenda afika nyumba, semudumusile mundungi kungilanya naye, sala Petro, Johana na Jakobo na mee na tatie ulya mwanake. 52Nawo wandu wose weluo wekelila na kushighira. Ela Jesu kawauza, “Simwalile, kwani mwana safwile kungi, ondetungura.” 53Ela wakamseka, kwani wemanyile wafwa. 54Ela Jesu kamwata mkonu, kamupang'a, “Mwanwangu, uka.” 55Nao roho yake ikamuila, kauka iyo ngelo yenyi, naye Jesu kaghora ahawo kindu chelya. 56Wavali wake wakashinika, ela Jesu kawauza “Siwamghorere mundungi ghalye ghadeika.”
Currently Selected:
Luka 8: SAGALLANT
Highlight
Share
Copy
Want to have your highlights saved across all your devices? Sign up or sign in
(C) The Bible Society of Kenya, 1993
Luka 8
8
Wake weluo wekemwirima Jesu
1Nao nyuma ya agha, Jesu kaita kele mizi mizi kechila Ilagho lyaloli lya Uzuri ghwa Mlungu. Naye wokezanye na wairimi ikumi na waili, 2na wake wamoju awaboese pepo na manyongi. Mariamu (aitogho Magdalene) afunyilo pepo mfungate 3na Joana, muke wa Kuza, eluo mtumishi wa Herode, na Susana na wazima wengi, weluo wekewatumikila na mali zawe zenyi.
Ikataniso lya mwandi mbeu
(Matayo 13:1-9; Marko 4:1-9)
4Nao ilyi makoghano weluo wekemjila kufuma mizi mizi, Jesu kaghora ikataniso ilyi; 5Mwandi oghendile kuwanda mbeu, na ilyi eluo kewanda, zimoju zikapotoka ngileni zikalatilo ni wandu, nazo zikaduo ni nyonyi. 6Zimoju zikapotoka kele lwala, zikafuma na kwa kusowa meji zikaoma. 7Zimoju zikapotoka miyeni na miya ikazeguanya nazo ikazisira. 8Zimoju zikapotoka kele msanga ghwaloli, zikazeguwa, zikavala kila moju ighana, Naye aghenda kughora hung'u, kaghamba, “Uyu ewo na masikilo ghesikila asikile.”
Kutambula chausa cha Ikataniso
(Matayo 13:10-17; Marko 4:10-12)
9Nao wairimi wakamkotela kutambula kwa ilyi ikataniso, 10Naye Jesu kaghora, “Inyo mwanahawilo kumanya ngasu za Uzuri ghwa Mlungu, ela wazima ni kwa makataniso, eri hata wakalola siwaone na wakanasikile siwatambukilo.
Jesu kutambula ikataniso lya mwandi mbeu
(Matayo 13:18-23; Marko 4:13-20)
11“Uku niko kutambula kwa ikataniso: Mbeu ni ilagho lya Mlungu. 12Zilya zepotoke ngileni, ni wandu wesikilagha ilagho, na Shetani eje alyifunye ilagho ngoloni kwawe, eri siwejedumusa wakile. 13Na zilya zipotoke lwaleni ni walye wesikilagha ilagho na kulyihokera kwa kuboelo, ela siwawesi miriginga, wadumusa kwa ngelo, ela ngelo ya matimo ikeja wasigha idumusi. 14Na zilya zepotoke miyeni ni walye wesikilagha ilagho, ela ngelo weghenda ngila yawe wasiro ni malagho na mali na mabwelo gha ughu umana, nawo walemo ni kuvala mavalo. 15Na zilya zepotoke kele msanga ghwaloli ni walye wesikilagha ilagho na kulyiwata ngoloni na kulyidea. Nawo wavala mavalo kwa kurumaghia.
Kubula taa ibamba
(Marko 4:21-25)
16“Sikwesi mundungi awashagha taa na kuibula ibamba, ango kuika ulilini mwenimweni, ela wanaiikagha ighulu ya andu koika taa, eri wandu wengilagha waone mlangazi.
17“Kwani sikwesi kindu chingi chivisilo sicheonekagha, hata chio kivisoni sichemanyogho na kuleto mlangazini.
18“Kwa hung'u kulindeni na selyi musikizilagha. Kwani uyu ewo navo ujejuzilo na uyu sewesi hata ichi ewo nacho ujesoko.”
Mee Jesu na wana wakwawe
(Matayo 12:46-50; Marko 3:31-35)
19Nao mee Jesu na wana wakwawe wekeja kwake, ela siwadimile kumfikila kwa undu ghwa makoghano. 20Naye kaghorero, “Meo na wana wakwenyu weo kimusi shighati, nawo wanashaile kukuona.” 21Ela Jesu kawauza, “Mawe na wana wakwetu ni walye wesikilagha ilagho lya Mlungu na kulyidea.”
Jesu kunyamaza mbeo mbwaa
(Matayo 8:23-27; Marko 4:35-41)
22Nao ijua imoju Jesu kajoka kele mashua ngila mojori na wairimi wake, naye kawauza, “Tiwambuke chambuko cha bahari.” Nao wakadyowa kuwambuka. 23Nao ilyi weluo wekeghenda baharini, Jesu kawato ni haring'a. Nao kukeja mbeo mbwaa baharini, na mashua ikadyowa kungilo ni meji hata wakakala ndengweni. 24Nawo wakaghenda wakamunula, wekemuza, “Bwana Bwana tendehaita!” Nao kauka na kuikemela mbeo na mivomivo ya meji, nayo ikanyamala na kukanyamala chwi. 25Naye kawauza, “Lyio hiyo idumusi lyenyu?” Nawo kwa kungilo ni wogha na kushinika wakauzana wenyi, “Nani uyu ado, hata eghoranyagha na mbeo na meji navo vimusikile?”
Jesu kuboesa mundu wa pepo
(Matayo 8:28-34; Marko 5:1-20)
26Nao wakafika pwani ya isanga lya Wagerasi, yeluo chambuko cha Galilaya. 27Naye ilyi eluo keselela pwani, kakoghana na mundu wa pepo kufuma kele muzi. Naye kwa ngelo ndele seluo kerwara nguo ingi, na seluo kekala nyumba, ela oluo kekala mbireni. 28Naye aghenda amwona Jesu, kakema na kumugwila hambiri, keghora na lwaka lubwaa, “Nini udeagha nemi, Jesu Mwana wa Mlungu wa Ighulu? Nakulomba swanitirire.” 29Kwani woluo aiuza pepo imufume ulya mundu. Kwani ngelo nyingi yemwatile, na kwa kumulinda, wakamfunga na minyororo na vigogo, ela kaivunja kakimbizo ni pepo kireti. 30Nao Jesu kamukotela, “Izina lyako nuwe ani?” Naye kaghora, “Legioni” kwani wongililo ni pepo nyingi. 31Nao pepo zikamlomba sazighenze andu kuwase.
32Nao anyalye lughongoni koluo na uranu ghwa nguluwe ghukelisa. Nazo zikamlomba azidumusile zighende zizingile. Naye kazidumusila. 33Nao zilya pepo zikamufuma ulya mundu zikangila kele nguluwe, na uranu ghose ghukadoromoka lughongoni lukangila kele bahari, zikafwa mejini.
34Nao walisa waghenda waona agha, wakakimbila, wakaghenda kuwaghorera wandu wa muzi na lyilya isanga. 35Nao wandu wekeja eri waone ghalye ghadeika, nawo wakamjila Jesu, na kumwona ulya mundu afumo ni pepo ewo kitembo avui na Jesu, arwara nguo na ewo na akili zake, nawo wakangilo ni wogha. 36Nao walye waonile wakawaghorera selyi ulya mundu wa pepo aboeso. 37Nao wandu wose wa isanga lya Gerasi wakamlomba afume mzawe, kwani wengililo ni wogha mubwaa. Kwa hung'o Jesu kajoka mashua kauya. 38Ulya mundu eluo na pepo kamlomba waghendanye, ela Jesu kamuuja kemuza, 39“Gala kaya na uwaghorere wandu agha Mlungu akudeila.” Nao kaghenda keeresa uvoro kele muzi ghose gha ghalye Jesu amdeilile.
Mchana wa Jairo na muke awatile nguo ya Jesu
(Matayo 9:18-26; Marko 5:21-43)
40Nao Jesu aghenda auya, makoghano wakamuhokera kirani, kwani weluo wekemdafwa. 41Nao keja mundu mumoju aitogho Jairo, eluo mubwaa wa sinagogi, kagwa maghuluni kwa Jesu, kamlomba aghende nyumba kwake, 42woluo na mwana wake mumojori, eluo na miaka ikumi na mili, naye woluo avui na kufwa.
Nao ilyi eluo keghenda wandu wakamtindirira. 43Na koluo na muke mumoju eluo kefumo ni bighati kwa miaka ikumi na mili, naye katumia mali yake yose kwa waghanga na hata sikwesi ungi wawe adimile kumuboesa. 44Nao keja nanyuma ya Jesu, kapeta hemu ya nguo yake, na iyo ngelo yenyi bighati yake ikaoma. 45Nao Jesu kakotela, “Nani aniwata?” Nao wandu wose waghenda wakana, Petro na walye wekezanye wakamuza, “Bwana, makoghano wakumara na kukutindirira!” 46Ela Jesu kaghora, “Kuo na mundu anipeta, kwani namanyiso ni ndighi kunifuma.” 47Nao ulya muke aghenda aona wamanyo, keja kesukosuko, kagwa hambiri ya Jesu, kamghorera ghose hambiri ya wandu wose ni kudani amwata na selyi aboa iyo ngelo yenyi. 48Naye Jesu kamuza, “Mwanwangu, Idumusi lyako lyakuboesa, ghenda na sere.”
49Nao ilyi Jesu eluo keghora, mundu mumoju kufuma nyumba kwa Jairo keja kamuza, “Mwana wako wafwa, swamusirimise Mwalimu.” 50Ela Jesu aghenda kusikila katumbulila, “Swawoghe; uwe dumusa tu, na ubowagha.”
51Nao aghenda afika nyumba, semudumusile mundungi kungilanya naye, sala Petro, Johana na Jakobo na mee na tatie ulya mwanake. 52Nawo wandu wose weluo wekelila na kushighira. Ela Jesu kawauza, “Simwalile, kwani mwana safwile kungi, ondetungura.” 53Ela wakamseka, kwani wemanyile wafwa. 54Ela Jesu kamwata mkonu, kamupang'a, “Mwanwangu, uka.” 55Nao roho yake ikamuila, kauka iyo ngelo yenyi, naye Jesu kaghora ahawo kindu chelya. 56Wavali wake wakashinika, ela Jesu kawauza “Siwamghorere mundungi ghalye ghadeika.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
(C) The Bible Society of Kenya, 1993