Chhòng-sè-kì 13

A-pek-lân kap Lô-tek Hun-khui

1 A-pek-lân chhōa i ê bó͘ kap i só͘-ū--ê, tùi Ai-ki̍p khì Nî-kek-hu, Lô-tek mā chòe-hé khì. 2A-pek-lân ê cheng-siⁿ, kim, gûn chin chōe. 3I tùi Nî-kek-hu chiām-chiām ǹg Pek-te̍k-lī chhian-sóa, kàu Pek-te̍k-lī kap Ai ê tiong-kan, chiū-sī i í-chêng tah pò͘-pîⁿ, 4khí chè-tôaⁿ ê só͘-chāi. A-pek-lân tī hia kiû-kiò Siōng Chú ê miâ.

5Kap A-pek-lân chòe-hé khì ê Lô-tek mā ū gû-kûn, iûⁿ-kûn, pò͘-pîⁿ, 6tì-kàu hit-ê tōe-khu bô-kàu thang hō͘ in chòe-hé khiā-khí; in-ūi in ê châi-bu̍t chin chōe, bōe-tàng chòe-hé khiā-khí. 7A-pek-lân ê bo̍k-chiá kap Lô-tek ê bo̍k-chiá siông-siông oan-ke. Tng-sî Ka-lâm-lâng kap Pí-lī-sé-lâng tòa tī hit-ê tōe-khu.

8 A-pek-lân kā Lô-tek kóng, “Lán m̄-thang oan-ke, lí ê bo̍k-chiá kap góa ê bo̍k-chiá mā m̄-thang oan-ke, in-ūi lán sī chi̍t-ke-lâng. 9Choân-tōe lóng tī lí ê ba̍k-chiu-chêng, chhiáⁿ lí lī-khui góa; lí nā khì tò-pêng, góa chiū khì chiàⁿ-pêng; lí nā khì chiàⁿ-pêng, góa chiū khì tò-pêng.”

10 Lô-tek gia̍h-thâu khòaⁿ Iok-tàn-hô ǹg Só-ní hong-hiòng it-phiàn ê pêng-goân, chúi-goân chhiong-chiok, hit-ê tōe tī Siōng Chú húi-bia̍t Só͘-to-má kap Gô-mô͘-la í-chêng, chhin-chhiūⁿ Siōng Chú ê hn̂g#13.10 “Siōng Chú ê hn̂g” mā thang e̍k-chòe “I-tiân-hn̂g”., chhin-chhiūⁿ Ai-ki̍p ê tōe. 11Lô-tek chiū kéng Iok-tàn-hô hit-phiàn pêng-goân, chhian-sóa khì tang-pêng; in nn̄g ke chiū hun-khui. 12A-pek-lân tòa tī Ka-lâm-tōe; Lô-tek tòa tī pêng-goân chiah-ê siâⁿ, chiām-chiām chhian-sóa khì kàu Só͘-to-má. 13Só͘-to-má-lâng hui-siông siâ-ok, tōa-tōa tek-chōe Siōng Chú.

A-pek-lân Chhian-sóa Khì Hi-pek-lûn

14 Lô-tek lī-khui liáu-āu, Siōng Chú tùi A-pek-lân kóng, “Lí gia̍h-thâu, tùi lí khiā ê só͘-chāi ǹg tang sai lâm pak khòaⁿ. 15Lí só͘ khòaⁿ--tio̍h it-chhè ê tōe, góa beh éng-oán sù hō͘ lí kap lí ê hō͘-tāi. 16Góa mā beh hō͘ lí ê hō͘-tāi chhin-chhiūⁿ tōe-chiūⁿ ê thô͘-soa hiah chōe; lâng nā ōe-tàng sǹg tōe-chiūⁿ ê thô͘-soa, chiah ōe-tàng sǹg lí ê hō͘-tāi. 17Lí khí-lâi kiâⁿ-thàu chit-ê tōe ta̍k só͘-chāi, góa beh chiong chit-ê tōe sù hō͘ lí.” 18A-pek-lân chiū chhian-sóa khì Hi-pek-lûn, kàu óa-kūn Bān-lī hiah-ê siōng-chhiū ê só͘-chāi khiā-khí; tī hia i ūi-tio̍h Siōng Chú khí chi̍t chō chè-tôaⁿ.

Currently Selected:

Chhòng-sè-kì 13: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版