Chhòng-sè-kì 22

A-pek-la-hán Hiàn Í-sat

1Chiah-ê tāi-chì liáu-āu, Siōng-tè khó-giām A-pek-la-hán, kiò i kóng, “A-pek-la-hán.” I ìn kóng, “Góa tī chia.”

2Siōng-tè kóng, “Lí chhōa lí to̍k-it ê kiáⁿ, lí só͘ thiàⁿ ê Í-sat, khì Mô͘-lī-a tōe-khu, tī góa beh chí-sī lí ê chi̍t chō soaⁿ chiong i hiàn-chòe sio-hòa-chè.”

3Keh-ji̍t thàu-chá, A-pek-la-hán kā lû-á pa̍k oaⁿ, chhōa nn̄g ê po̍k-jîn kap i ê kiáⁿ Í-sat, kā sio-hòa-chè beh ēng ê chhâ phòa hó-sè, chhut-hoat khì Siōng-tè chí-sī i ê só͘-chāi. 4Kàu tē-saⁿ ji̍t, A-pek-la-hán gia̍h-thâu khòaⁿ-tio̍h hn̄g-hn̄g hit-ê só͘-chāi. 5A-pek-la-hán tùi i ê po̍k-jîn kóng, “Lín kap lû-á tiàm chia thèng-hāu, góa kap góa ê kiáⁿ khì hia kèng-pài, āu-lâi ōe tńg-lâi lín chia.”

6 A-pek-la-hán chiong sio-hòa-chè ê chhâ hō͘ i ê kiáⁿ Í-sat phāiⁿ, ka-kī chhiú the̍h to kap hé-chéng; jiân-āu nn̄g ê lâng chòe-hé khì. 7Í-sat kā i ê lāu-pē A-pek-la-hán kóng, “A-pa.”

I kóng, “Góa ê kiáⁿ, góa tī chia.”

Í-sat kóng, “Hé-chéng kap chhâ lán lóng ū, m̄-kú hiàn sio-hòa-chè ê iûⁿ-á tī tó-ūi?”

8 A-pek-la-hán kóng, “Góa ê kiáⁿ, Siōng-tè ōe ka-kī chún-pī sio-hòa-chè ê iûⁿ-á.” Nn̄g ê lâng chiū koh chòe-hé kiâⁿ.

9In kàu Siōng-tè chí-sī i ê só͘-chāi. A-pek-la-hán tī hia khí chè-tôaⁿ, chiong chhâ pâi tī chè-tôaⁿ téng. I kā i ê kiáⁿ Í-sat pa̍k--teh, hē tī chè-tôaⁿ hiah-ê chhâ ê téng-bīn. 10A-pek-la-hán chiū kā to gia̍h--khí-lâi, beh thâi i ê kiáⁿ. 11Siōng Chú ê sù-chiá tùi thiⁿ-téng kiò i kóng, “A-pek-la-hán! A-pek-la-hán!”

I ìn kóng, “Góa tī chia.”

12Sù-chiá kóng, “M̄-thang hē-chhiú, m̄-thang siong-hāi chit-ê gín-á. Taⁿ góa chai lí kèng-ùi Siōng-tè, bōe chiong lí to̍k-it ê kiáⁿ lâu--teh, m̄ hō͘ góa.”

13 A-pek-la-hán gia̍h-thâu khòaⁿ, khòaⁿ-tio̍h āu-bīn ū chi̍t chiah iûⁿ-káng, kak tîⁿ tī kui-phō ê chhiū-á. A-pek-la-hán chiū khì kā hit-chiah iûⁿ-káng lia̍h--lâi, tāi-thòe i ê kiáⁿ hiàn chòe sio-hòa-chè. 14A-pek-la-hán kā hit-ê só͘-chāi hō-miâ chòe “Siōng Chú Í-le̍k”; kàu kin-á-ji̍t lâng iáu-teh kóng, “Tī Siōng Chú ê soaⁿ I ōe khòaⁿ-kò͘#22.14 “khòaⁿ-kò͘” mā thang e̍k-chòe “kiong-kip”..”

15Siōng Chú ê sù-chiá tē-jī piàn tùi thiⁿ-téng kiò A-pek-la-hán, kóng, 16“Siōng Chú kóng, ‘Lí í-keng chòe chit-ê tāi-chì, bô lâu lí to̍k-it ê kiáⁿ m̄ hō͘ góa, só͘-í góa li̍p-sè, 17góa it-tēng beh ka-pē sù-hok lí, hō͘ lí ê kiáⁿ-sun lâng-gia̍h ke-thiⁿ chin chōe, chhin-chhiūⁿ thiⁿ-téng ê chhiⁿ, hái-piⁿ ê soa; lí ê hō͘-tāi beh chiàm-léng tùi-te̍k ê siâⁿ. 18Tōe-chiūⁿ bān-kok beh tùi lí ê hō͘-tāi tit-tio̍h hok-khì, in-ūi lí thiaⁿ-thàn góa ê ōe.’” 19A-pek-la-hán tò-lâi i ê po̍k-jîn hia, in chiū chòe-hé chhut-hoat khì Pia̍t-sī-pa. A-pek-la-hán chiū tòa tī Pia̍t-sī-pa.

Ná-ho̍k ê Hō͘-tāi

20Chiah-ê tāi-chì liáu-āu, ū lâng kā A-pek-la-hán kóng, “Bi̍t-ka kā lí ê sió-tī Ná-ho̍k siⁿ-kiáⁿ: 21Tōa-kiáⁿ O͘-su, tē-jī kiáⁿ Pò͘-su, A-lân ê lāu-pē Ki-bō͘-lī, 22Ki-siat, Hap-só, Pit-ta̍t, Ek-la, 23kap Lē-pek-ka ê lāu-pē Pí-thó͘-lī; chit poeh ê lóng sī Bi̍t-ka kā A-pek-la-hán ê sió-tī Ná-ho̍k siⁿ--ê. 24Ná-ho̍k ê sòe-î Liû-má siⁿ Thê-pat, Ka-hâm, Tha-hat, kap Má-ka.”

Currently Selected:

Chhòng-sè-kì 22: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版