Chhòng-sè-kì 30

1 Lúi-kiat khòaⁿ-kìⁿ ka-kī bô kā Ngá-kok siⁿ-kiáⁿ, chiū oàn-tò͘ i ê tōa-chí. I tùi Ngá-kok kóng, “Lí tio̍h kiáⁿ hō͘ góa; nā bô, góa beh sí.”

2 Ngá-kok tùi Lúi-kiat siū-khì, kóng, “Hō͘ lí bōe siⁿ--ê sī Siōng-tè, góa kiám ōe-tàng tāi-thòe Siōng-tè?”

3 Lúi-kiat kóng, “Góa ê lú-pī Phek-la tī chia; lí khì kap i tâng-pâng, hō͘ i thòe góa siⁿ-kiáⁿ; góa chiū thang tùi i tit-tio̍h kiáⁿ.” 4Lúi-kiat chiong i ê lú-pī Phek-la hō͘ Ngá-kok chòe bó͘; Ngá-kok chiū kap i tâng-pâng. 5Phek-la hoâi-īn, kā Ngá-kok siⁿ chi̍t ê kiáⁿ. 6Lúi-kiat kóng “Siōng-tè thòe góa chú-chhî kong-tō, thiaⁿ góa ê kî-tó, hō͘ góa ū kiáⁿ”, chiū kā i hō-miâ kiò-chòe Tān#30.6 “Tān” ì-sù sī “thòe góa sin-oan”.. 7Lúi-kiat ê lú-pī Phek-la koh hoâi-īn, kā Ngá-kok siⁿ tē-jī ê kiáⁿ; 8Lúi-kiat kóng “Góa kap góa ê tōa-chí saⁿ-chiⁿ, góa khah iâⁿ”, chiū kā i hō-miâ kiò-chòe Ná-hut-tha-lī#30.8 “Ná-hut-tha-lī” ì-sù sī “tò͘-cheng”..

9 Lē-a khòaⁿ-kìⁿ ka-kī bô koh siⁿ, chiū chiong i ê lú-pī Sek-phà hō͘ Ngá-kok chòe bó͘. 10Lē-a ê lú-pī Sek-phà kā Ngá-kok siⁿ-kiáⁿ. 11Lē-a kóng, “Hó-ka-chài!” I chiū kā gín-á hō-miâ kiò-chòe Ka-tek#30.11 “Ka-tek” ì-sù sī “hēng-ūn”.. 12Lē-a ê lú-pī Sek-phà koh kā Ngá-kok siⁿ tē-jī ê kiáⁿ. 13Lē-a kóng, “Góa ū hok-khì! Chèng lú-chú ōe kóng góa sī ū hok-khì ê cha-bó͘-lâng.” I chiū kā gín-á hō-miâ kiò-chòe A-siat#30.13 “A-siat” ì-sù sī “hok-khì”..

14Siu-koah sió-be̍h ê sî, Lū-piān tī hn̂g--ni̍h tit-tio̍h chhui-chêng-kó#30.14 “chhui-chêng-kó” ū chòng-iông ê kong-hāu, lâng chia̍h liáu-āu, ōe kiông-hòa sèng-ki-lêng., the̍h-lâi hō͘ i ê lāu-bú Lē-a. Lúi-kiat tùi Lē-a kóng, “Chhiáⁿ chiong lí ê kiáⁿ ê chhui-chêng-kó hō͘ góa.”

15 Lē-a tùi i kóng, “Lí chhiúⁿ góa ê tiōng-hu, kiám iáu bô-kàu? Beh koh chhiúⁿ góa ê kiáⁿ ê chhui-chêng-kó sī--bô?”

Lúi-kiat kóng, “Ūi-tio̍h lí ê kiáⁿ ê chhui-chêng-kó, kim-mî hō͘ Ngá-kok kap lí chòe-hé khùn.”

16Ji̍t àm, Ngá-kok tùi hn̂g--ni̍h tò--lâi; Lē-a chhut-khì chiap i, kā i kóng, “Lí tio̍h kap góa khùn, in-ūi lí sī góa ēng góa ê kiáⁿ ê chhui-chêng-kó kau-ōaⁿ--lâi-ê#30.16 “kau-ōaⁿ--lâi-ê” goân-bûn sī “chhiàⁿ--lâi-ê”..” Hit-mî Ngá-kok chiū kap i chòe-hé khùn.

17Siōng-tè thiaⁿ Lē-a ê kî-tó, i chiū hoâi-īn, kā Ngá-kok siⁿ tē-gō͘ ê kiáⁿ. 18Lē-a kóng “Siōng-tè pò-siúⁿ góa, in-ūi góa chiong lú-pī hō͘ góa ê tiōng-hu”, chiū kā i hō-miâ kiò-chòe Í-sat-ka#30.18 “Í-sat-ka” ì-sù sī “chhiàⁿ-kang” á-sī “tit-tio̍h pò-siúⁿ”.. 19Lē-a koh hoâi-īn, kā Ngá-kok siⁿ tē-la̍k ê kiáⁿ. 20Lē-a kóng, “Siōng-tè siúⁿ-sù góa pó-kùi ê lé-mi̍h; góa ê tiōng-hu beh khòaⁿ-tāng góa, in-ūi góa kā i siⁿ la̍k ê kiáⁿ.” Lē-a chiū kā i hō-miâ kiò-chòe Se-pò͘-lûn#30.20 “Se-pò͘-lûn” ì-sù sī “chiap-siū” á-sī “lé-mi̍h”.. 21Āu-lâi, Lē-a siⁿ chi̍t ê cha-bó͘-kiáⁿ, kā i hō-miâ kiò-chòe Tí-ná.

22Siōng-tè siàu-liām Lúi-kiat, thiaⁿ i ê kî-tó, hō͘ i ōe siⁿ. 23I chiū hoâi-īn siⁿ-kiáⁿ; kóng “Siōng-tè tû-khì góa ê kiàn-siàu”, 24chiū kā i hō-miâ kiò-chòe Iok-sek#30.24 “Iok-sek” ì-sù sī “Siōng Chú ke-thiⁿ” á-sī “Siōng Chú tû--khì”., kóng, “Goān Siōng Chú koh ke-thiⁿ góa chi̍t ê kiáⁿ.”

Ngá-kok kap La-pan Tâm-phòaⁿ

25 Lúi-kiat siⁿ Iok-sek liáu-āu, Ngá-kok tùi La-pan kóng, “Chhiáⁿ hō͘ góa tò-khì góa ê kò͘-hiong, 26mā chhiáⁿ lí chiong góa ho̍k-sāi lí só͘ tit--tio̍h ê bó͘-kiáⁿ lóng hō͘ góa, hō͘ goán tò--khì; góa án-chóaⁿ chhut-la̍t ho̍k-sāi lí, lí lóng chai.”

27 La-pan kā i kóng, “Lí nā khòaⁿ góa ū-kàu-tāng, chhiáⁿ kè-sio̍k kap góa tòa, in-ūi góa tùi pok-kòa chai, Siōng Chú in-ūi lí ê iân-kò͘ ū sù-hok góa.” 28I koh kóng, “Chhiáⁿ kā góa kóng, góa tio̍h hō͘ lí jōa-chōe kang-chîⁿ, góa chiū hō͘ lí.”

29 Ngá-kok kā i kóng, “Góa án-chóaⁿ ho̍k-sāi lí, góa án-chóaⁿ chiàu-kò͘ lí ê cheng-siⁿ, lí lóng chai. 30Góa iáu-bē lâi í-chêng, lí só͘-ū--ê chin chió, hiān-chāi ke-thiⁿ chin chōe; góa bô-lūn khì tó-ūi, Siōng Chú lóng tè teh kā lí chiok-hok#30.30 “góa bô-lūn...chiok-hok” mā thang e̍k-chòe “Siōng Chú sī in-ūi góa ê iân-kò͘ chiah sù-hok hō͘ lí”.. Taⁿ, tī-sî góa chiah ōe-tàng ūi-tio̍h góa ka-kī ê ka-têng kiàn-tì ke-gia̍p?”

31 La-pan kóng, “Góa tio̍h sím-mi̍h hō͘ lí?”

Ngá-kok kóng, “Lí sím-mi̍h lóng m̄-bián hō͘ góa. Ū chi̍t hāng tāi-chì lí nā tah-èng, góa chiū iû-goân kò͘-siú, chhī lí ê iûⁿ-kûn. 32Kin-á-ji̍t hō͘ góa sûn lí só͘-ū ê iûⁿ-kûn, chiong mî-iûⁿ tiong-kan ū-tiám ū-pan--ê, kap o͘-sek ê mî-iûⁿ-á, í-ki̍p soaⁿ-iûⁿ tiong ū-pan ū-tiám--ê, lóng pun chhut-lâi chòe góa ê kang-chîⁿ. 33Í-āu lí lâi khòaⁿ góa só͘ tit ê kang-chîⁿ, nā soaⁿ-iûⁿ bô-pan bô-tiám--ê, mî-iûⁿ-á m̄-sī o͘-sek--ê, chiū sǹg sī góa thau--ê; ēng án-ni lâi chèng-bêng góa ê sêng-si̍t.”

34 La-pan kóng, “Hó, chiàu lí kóng--ê.” 35Hit-ji̍t, La-pan chiū chiong ū-pan ū-tiâu-bûn ê soaⁿ-iûⁿ-káng, ū-pan ū-tiám chhap-tio̍h pe̍h-sek ê soaⁿ-iûⁿ-bú, í-ki̍p o͘-sek ê mî-iûⁿ-á, lóng pun chhut-lâi kau hō͘ i ê kiáⁿ. 36I hō͘ ka-kī kap Ngá-kok saⁿ-lī ū saⁿ ji̍t ê lō͘-thêng; Ngá-kok chiū kò͘ La-pan kî-tha ê iûⁿ.

37 Ngá-kok the̍h iông-chhiū, hēng-chhiū, kap png-chhiū chhiⁿ koh nńg ê ki, pak chi̍t-pō͘-hūn ê phê, hō͘ lāi-bīn pe̍h-sek ê tiâu-bûn lō͘-chhut. 38I chiong pak-phê ê ki chhah tī iûⁿ lim-chúi ê chúi-kau kap chúi-chô, hō͘ in kap iûⁿ saⁿ-tùi; iûⁿ lâi lim-chúi ê sî, kang-bú kau-ha̍p. 39Iûⁿ tī ki ê tùi-bīn kau-ha̍p, chiū siⁿ ū-pan, ū-tiám, ū-tiâu-bûn--ê.

40 Ngá-kok chiong mî-iûⁿ-á pun--chhut-lâi, hō͘ in bīn ǹg La-pan ū-tiâu-bûn kap o͘-sek ê iûⁿ. I chiong ka-kī ê iûⁿ lēng-gōa pàng tī chi̍t ê só͘-chāi, bô kap La-pan ê iûⁿ chham-chhap.

41Ióng-chòng ê iûⁿ kau-ha̍p ê sî, Ngá-kok ēng chhiū-ki chhah tī chúi-kau lāi, hō͘ iûⁿ bīn-tùi chhiū-ki kau-ha̍p. 42M̄-kú siau-sán ê iûⁿ kau-ha̍p ê sî, i chiū bô chhah chhiū-ki; án-ni, siau-sán--ê kui La-pan, ióng-chòng--ê kui Ngá-kok. 43Tùi án-ni, Ngá-kok hui-siông hó-gia̍h, ū chin chōe iûⁿ-kûn, lú-pī, po̍k-jîn, lo̍k-tô, kap lû.

Currently Selected:

Chhòng-sè-kì 30: TTVR

Highlight

Copy