Chhòng-sè-kì 32

Ngá-kok Chún-pī kap Í-sò Kìⁿ-bīn

1 Ngá-kok kè-sio̍k i ê hêng-thêng, Siōng-tè ê sù-chiá tú-tio̍h i. 2Ngá-kok khòaⁿ-tio̍h in, chiū kóng, “Chia sī Siōng-tè ê iâⁿ-tōe.#32.2 “Chia sī Siōng-tè ê iâⁿ-tōe.” mā thang e̍k-chòe “Che sī Siōng-tè ê kun-tūi.”” I chiū kā hit-ê só͘-chāi kiò-chòe Má-hap-liām#32.2 “Má-hap-liām” ì-sù sī “nn̄g ê iâⁿ-tōe” á-sī “nn̄g tūi kun-tūi”..

3 Ngá-kok phài lâng seng khì Í-tong tōe-khu, chiū-sī Se-ní, kìⁿ i ê hiaⁿ-ko Í-sò. 4Ngá-kok kau-tài in kóng, “Lín tio̍h kā góa ê chú Í-sò kóng, ‘Lí ê po̍k-jîn Ngá-kok án-ni kóng: Góa tī La-pan hia kià-ku, tòa kàu kin-á-ji̍t. 5Góa ū gû, lû, iûⁿ-kûn, po̍k-jîn, lú-pī. Taⁿ góa phài lâng lâi tùi góa ê chú pò-kò, ǹg-bāng tùi lí tit-tio̍h un-tián.’”

6Phài--khì ê lâng tò-lâi kā Ngá-kok pò-kò, “Goán ū khì lí ê hiaⁿ-ko Í-sò hia, i í-keng lâi beh khòaⁿ lí, koh chhōa sì-pah ê lâng chòe-hé lâi.” 7Ngá-kok tōa kiaⁿ koh hoân-ló. I chiong kap i chòe-hé ê lâng, í-ki̍p iûⁿ-kûn, gû-kûn, lo̍k-tô pun-chòe nn̄g tūi, 8siūⁿ-kóng, “Í-sò nā lâi kong-kek chit-tūi, chhun--ê hit-tūi iáu thang tô-cháu.”

9I kî-tó kóng, “Góa ê a-kong A-pek-la-hán ê Siōng-tè, góa ê lāu-pē Í-sat ê Siōng-tè, Siōng Chú ah, lí bat kā góa kóng, ‘Lí tio̍h tò-khì lí ê pún-tōe pún-cho̍k, góa it-tēng beh hó khoán-thāi lí.’ 10Lí ê po̍k-jîn chin pi-bî, bōe-kham-tit niá-siū lí ê chû-ài kap sìn-si̍t. Góa í-chêng kan-ta gia̍h koáiⁿ-á kè Iok-tàn-hô, taⁿ góa í-keng tòa nn̄g tūi jîn-má tò--lâi. 11Kiû lí kiù góa bián siū góa ê hiaⁿ-ko Í-sò ê siong-hāi; góa chin kiaⁿ i lâi thâi-sí góa kap góa ê bó͘-kiáⁿ. 12Lí mā bat kóng, ‘Góa it-tēng beh hó khoán-thāi lí, hō͘ lí ê hō͘-tāi chhin-chhiūⁿ hái-piⁿ ê soa chōe kah sǹg bōe liáu.’”

13Hit-àm Ngá-kok tī hia hioh-mî, chiū tùi i ê cheng-siⁿ kéng lé-mi̍h, beh sàng i ê hiaⁿ-ko Í-sò: 14Soaⁿ-iûⁿ-bú nn̄g-pah chiah, soaⁿ-iûⁿ-káng jī-cha̍p chiah, mî-iûⁿ-bú nn̄g-pah chiah, mî-iûⁿ-káng jī-cha̍p chiah, 15lo̍k-tô-bú kap in chia̍h-lin ê lo̍k-tô-kiáⁿ saⁿ-cha̍p chiah, gû-bú sì-cha̍p chiah, gû-káng cha̍p chiah, lû-bú jī-cha̍p chiah, lû-káng cha̍p chiah. 16I chiong chiah-ê cheng-siⁿ pun-chòe chi̍t-tūi chi̍t-tūi, kau-tài i ê po̍k-jîn; i kā po̍k-jîn kóng, “Lín choh-chêng khì, hō͘ ta̍k-tūi pó-chhî kū-lī.” 17I koh hoan-hù chhōa-thâu ê po̍k-jîn, kóng, “Góa ê hiaⁿ-ko Í-sò tú-tio̍h lín ê sî, i nā mn̄g kóng, ‘Lí sī sím-mi̍h-lâng ê po̍k-jîn, beh khì tó-ūi? Lí thâu-chêng hiah-ê cheng-siⁿ sī sím-mi̍h-lâng ê?’ 18Lí tio̍h kóng, ‘Chiah-ê sī lí ê po̍k-jîn Ngá-kok ê, sī beh sàng góa ê chú Í-sò ê lé-mi̍h. I pún-sin mā tī goán āu-bīn.’” 19Ngá-kok koh hoan-hù tē-jī tē-saⁿ, kap só͘-ū kóaⁿ ta̍k-tūi cheng-siⁿ ê po̍k-jîn, kóng, “Lín tú-tio̍h Í-sò ê sî, mā tio̍h chiàu án-ni kā i kóng. 20Koh lín mā tio̍h kóng, ‘Lí ê po̍k-jîn Ngá-kok tī goán āu-bīn.’” Ngá-kok ka-kī phah-sǹg kóng, “Góa ēng thâu-chêng hiah-ê lé-mi̍h lâi kái i ê oàn-hūn, āu-lâi góa chiah kìⁿ i, khó-lêng i ōe chiap-la̍p góa.” 21Āu-lâi, i hō͘ hiah-ê po̍k-jîn tòa lé-mi̍h seng kiâⁿ; hit-mî Ngá-kok hioh tī iâⁿ-tiong.

Ngá-kok kap Siōng-tè ê Sù-chiá Sio-ián

22 Ngá-kok mî--sî khí--lâi, chhōa i nn̄g ê bó͘, nn̄g ê lú-pī, kap cha̍p-it ê kiáⁿ, lóng kè Ngá-phok-hô ê tō͘-thâu. 23I tāi-seng hō͘ in kè-hô, mā hō͘ i kî-tha só͘-ū--ê kè--khì; 24chí-ū chhun Ngá-kok ka-kī lâu tī hia.

Hit-sî ū chi̍t ê lâng lâi kap i sio-ián, ián kàu thiⁿ phú-kng. 25Hit-ê lâng khòaⁿ ián bōe iâⁿ Ngá-kok, chiū siàn i ê tōa-thúi-khū; sio-ián ê sî, Ngá-kok ê tōa-thúi-khū thu̍t-lûn. 26Hit-ê lâng kóng, “Thiⁿ beh kng lah, tio̍h pàng góa khì.”

Ngá-kok kóng, “Lí nā bô kā góa chiok-hok, góa m̄ pàng lí khì.”

27Hit-ê lâng kóng, “Lí hō-chòe sím-mi̍h miâ?”

I kóng, “Góa kiò-chòe Ngá-kok.”

28Hit-ê lâng kóng, “Lí bô beh koh kiò-chòe Ngá-kok, beh kiò-chòe Í-sek-lia̍t#32.28 “Í-sek-lia̍t” ì-sù sī “kap Siōng-tè sio-ián”., in-ūi lí kap Siōng-tè kap lâng piàⁿ su-iâⁿ lóng khah iâⁿ.”

29 Ngá-kok kā i kóng, “Chhiáⁿ kā góa kóng lí ê miâ.”

Hit-ê lâng ìn kóng, “Lí bô eng-kai mn̄g góa ê miâ.” I chiū tī hia kā Ngá-kok chiok-hok.

30 Ngá-kok chiū kā hit-ê só͘-chāi kiò-chòe Pí-ló͘-i-le̍k#32.30 “Pí-ló͘-i-le̍k” ì-sù sī “Siōng-tè ê bīn”., kóng, “Góa tng-thâu-tùi-bīn kìⁿ-tio̍h Siōng-tè, góa iáu bô sí.” 31Ngá-kok lī-khui Pí-ló͘-i-le̍k ê sî, ji̍t-thâu chiò-tio̍h i. Ngá-kok pái-kha, in-ūi tōa-thúi í-keng thu̍t-khū. 32Só͘-í Í-sek-lia̍t-lâng kàu kin-á-ji̍t bô chia̍h tōa-thúi-khū ê kun, in-ūi hit-ê lâng kā Ngá-kok siàn tōa-thúi-khū ê kun.

Currently Selected:

Chhòng-sè-kì 32: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版