Chhòng-sè-kì 50

1 Iok-sek phak tī i ê lāu-pē Ngá-kok ê bīn thî-khàu, kā i chim. 2Iok-sek hoan-hù sū-hāu i ê i-seng, ēng hiuⁿ-liāu boah i ê lāu-pē; i-seng chiū boah Ngá-kok. 3I-seng chiàu kui-tēng ēng hiuⁿ-liāu boah Ngá-kok ê sin-si sì-cha̍p ji̍t kú. Ai-ki̍p-lâng ūi Ngá-kok ai-khàu chhit-cha̍p ji̍t.

4Ūi-tio̍h Ngá-kok ai-khàu ê ji̍t-kî kè-liáu, Iok-sek tùi Ai-ki̍p-ông tiâu-têng ê koaⁿ-oân kóng, “Góa nā tùi lín tit-tio̍h un-tián, chhiáⁿ tùi Ai-ki̍p-ông choán-ta̍t, 5góa ê lāu-pē kiò góa chiù-chōa, tio̍h tī i sí liáu-āu, chiong i an-chòng tī Ka-lâm-tōe, tī i ūi-tio̍h ka-kī chún-pī ê bōng. Chhiáⁿ thòe góa chhéng-kiû ông ún-chún góa chiūⁿ-khì bâi-chòng góa ê lāu-pē, āu-lâi góa ōe koh tò-tńg--lâi.”

6 Ai-ki̍p-ông kóng, “Lí thang chiàu lí chiù-chōa--ê khì an-chòng lí ê lāu-pē.”

7 Iok-sek chiū khì bâi-chòng i ê lāu-pē; kap i chòe-hé khì--ê ū Ai-ki̍p-ông ê jîn-sîn, Ai-ki̍p-ông tiâu-têng ê goân-ló, kap Ai-ki̍p-kok só͘-ū ê tiúⁿ-ló, 8koh ū Iok-sek choân-ke, i ê hiaⁿ-tī, í-ki̍p i ê lāu-pē ê ka-koàn; chí-ū in ê gín-á, kap gû-kûn iûⁿ-kûn lâu tī Ko-san tōe-khu. 9Lēng-gōa ū chin chōe chiàn-chhia kap bé-peng chòe-hé khì. Sàng-chòng ê tiûⁿ-bīn hui-siông sēng-tāi.

10In kàu Iok-tàn-hô tang-pêng A-ta̍t ê ngó͘-kok-tiûⁿ, chiū tī hia tōa thî-khàu, tōa ai-siong; Iok-sek ūi-tio̍h i ê lāu-pē ai-siong tui-tō chhit ji̍t. 11Ka-lâm-tōe ê chū-bîn khòaⁿ-tio̍h A-ta̍t ngó͘-kok-tiûⁿ ê ai-khàu, chiū kóng, “Che sī Ai-ki̍p-lâng chi̍t tiûⁿ sēng-tāi ê chòng-sek.” Hit-ê só͘-chāi chiū kiò-chòe A-pek Be̍k-se#50.11 “A-pek Be̍k-se” ì-sù sī “Ai-ki̍p-lâng ê ai-khàu”; “Be̍k-se” sī Ai-ki̍p ê im-e̍k., sī tī Iok-tàn-hô ê tang-pêng.

12 Ngá-kok ê kiáⁿ chiàu in ê lāu-pē ê hoan-hù, 13chiong i ūn kàu Ka-lâm-tōe, an-chòng tī Bān-lī ê tùi-bīn, Be̍k-pí-la chhân-iá ê tōng-hia̍t, chiū-sī A-pek-la-hán tùi Hek-lâng Í-hut-lûn bóe lâi chòe bōng-tōe ê sán-gia̍p. 14Iok-sek an-chòng i ê lāu-pē liáu-āu, chiū kap i ê hiaⁿ-tī, í-ki̍p só͘-ū kap i chòe-hé khì bâi-chòng i ê lāu-pē ê lâng, lóng tò-tńg-khì Ai-ki̍p.

Iok-sek An-ùi I ê Hiaⁿ-tī

15 Ngá-kok sí liáu-āu, Iok-sek hiah-ê hiaⁿ-ko chiū kóng, “Iok-sek nā iáu oàn-hūn lán, it-tēng ōe chiàu lán í-chêng án-chóaⁿ pháiⁿ khoán-thāi i kā lán pò-ho̍k.” 16In chiū pài-thok lâng khì kā Iok-sek kóng, “Lí ê lāu-pē teh-beh sí í-chêng ū kau-tài kóng, 17‘Lín tio̍h kā Iok-sek án-ni kóng: Í-chêng lí ê hiaⁿ-ko pháiⁿ khoán-thāi lí, lí tio̍h sià-bián in ê kè-sit kap chōe-ok.’ Taⁿ, goán sī lí ê lāu-pē ê Siōng-tè ê po̍k-jîn, kiû lí sià-bián goán ê chōe-ok.” In tùi Iok-sek kóng chiah-ê ōe, Iok-sek chiū khàu--chhut-lâi.

18I ê hiaⁿ-ko koh lâi phak tī i ê bīn-chêng kóng, “Goán sī lí ê po̍k-jîn.”

19 Iok-sek tùi in kóng, “M̄-bián kiaⁿ; góa ná ōe-tàng tāi-thòe Siōng-tè? 20Í-chêng lín tùi góa ê ì-liām sī pháiⁿ, m̄-kú Siōng-tè ê ì-sù sī hó, kin-á-ji̍t chiah ōe-tàng ū chiah chōe lâng oa̍h--teh. 21Taⁿ lín m̄-bián kiaⁿ; góa ōe chiàu-kò͘ lín kap lín ê kiáⁿ-jî.” Iok-sek ēng jîn-chû ê ōe an-ùi in, hō͘ in an-sim.

Iok-sek Sí

22 Iok-sek kap i ê lāu-pē ê ka-koàn lóng tòa tī Ai-ki̍p. Iok-sek chia̍h pah-it hè. 23Iok-sek ū khòaⁿ-tio̍h Í-hoat-liân tē-saⁿ tāi ê sun, mā jīn Má-ná-se ê sun Má-kiat ê kiáⁿ chòe kè-sêng-jîn. 24Iok-sek tùi i ê hiaⁿ-tī kóng, “Góa koh chia̍h bô-jōa-kú lah; m̄-kú Siōng-tè it-tēng ōe chiàu-kò͘ lín, chhōa lín tùi chia chiūⁿ-khì kàu I li̍p-sè èng-ún beh hō͘ A-pek-la-hán, Í-sat, Ngá-kok ê tōe.” 25Iok-sek kiò Í-sek-lia̍t ê kiáⁿ-sun chiù-chōa, Iok-sek kóng, “Siōng-tè it-tēng ōe chiàu-kò͘ lín, lín tio̍h chiong góa ê kut-hâi ūn tò-tńg-khì Ka-lâm-tōe.”

26 Iok-sek sí, tú-á pah-it hè; lâng ēng hiuⁿ-liāu kā i boah, chiong i khǹg tī koan-bo̍k, thêng tī Ai-ki̍p.

Currently Selected:

Chhòng-sè-kì 50: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版