Lukas 12

Ondodomono i Tulun di Mamamalid

(Mat. 10:26-27; Mar. 8:15, 22)

1Om untunno dii tongodiri piipiro noribu i tulun gosob do kopoiulok-ulok iolo do oguu marong i tongotulun. Om timpuunno dii i Yisus monuduk di tongotulunJo do ka, “Ondodomo mujuno iri poudor di kumpulan Porisi, komoionKu nopo nga puupura iolo. 2Kasaangkat diri poinlosok nga pointalangoni laaid, om oilaani do laaid iri komoion si saralom ginavo. 3Om onuu nopo i tinangar muju saralom totuvong, nga oilaani siri tanavau. Om onuu nopo i niburung muju di tulun siri saralom do bilik diri pointutup, om popiabar-abaron inombo-nombo pantok,” kadi Yisus.

Iri Apatut do Rosijan

(Mat. 10:28-31)

4Om kadi Yisus kavagu, “Oou kosusuladanKu, mitangar Oku dikovu do ada kouno rumosi diri tulun mamatai do kojuvan#12:4 kojuvan: tinan muju, do irino oilaan diolo om ausono araat mantad diri do panansara diolo dikovu insan tadau. 5Nga tudukanKu ikovu diri apatut do rosijan muju, irino korosi kouno di Kinoringan, do Isidono i kadapat mamatai do kojuvan, om kikuasa parapug siri tapui naraka. Om patangaronKu marong dikovu iti do korosi kouno Disido! 6Okonko duvoi siin bato i torogo di limo tinan pirit? Nga insan irad dino komura, songinanpo nga aui oolingan do Kinoringan. 7Om insan koguuo dino tobuk do tulu muju nga noijapJoi laaid. Irino do ada kouno korosi, do ikovu nopo nga kitorogo marong mantad di panon do pirit,” kadi Yisus.

Mangakun ko Mongolim di Koristus

(Mat. 10:19-20, 32-33; 12:32)

8Om kadi Yisus kavagu, “Mitangar Oku dikovu do isaai nopo i tulun do mangakun do nasanganuKu isido siri gotuvang di tongotulun toguu, Ioku nogi i Sinumiliu do Tulun nga mangakun do manansanganu Oku disido siri gotuvang di moloikat do Kinoringan. 9Nga isai-isai nopo i tulun do mongolim siri gotuvang do tulun toguu do songonuvonKu isido, om Ioku nogi nga mongolim do manansanganu Oku disido siri gotuvang di moloikat do Kinoringan. 10Om isai-isai nopo tulun mitangar do lumavan Dogo, i Sinumiliu do Tulun, om bulipo ompunan. Nga isai-isai nopo i mangararaat di Tatod Tolidang om auno oompunan.

11Om sombia nopo do oviton kou do bisarawon siri sasambayangan ko siri gotuvang do porinta ko isaai nopo i kikuasa, om ada kouno kosurau do minsoromo nong potingkukuro kou jumawap ontok diri om onu i patangaron muju, 12do tudukan kovi di Tatod Tolidang nong onu iri apatut do tangaron muju do ontok diri,” kadi Yisus do minonuduk.

Poiradan diri Tulun di Takaya nga Obudui

13Om pitangarno dii iri iso tulun do mantad siri di tulun toguu di Yisus do ka, “Guru, suuopo dogo iakaku do mamaagi dogo di arata nawaris mantad si di tamaja,” kadiadijo.

14Nga jawapno dii i Yisus disido, “Apa, ausoi minangangkat Dogo sumiliu do momumutus dino arata nawaris mantad di tama muju misulod,” kadi Yisus. 15Om pitangarno kavagu Isido di tongotulun toguu do ka, “Antatangai mujuno kaandai-andai om ondodomo mujuno supaya aui atamaa kou do onuu nopo, do okoniko kinakayaan do barang kovijau do tulun,” kadi Yisus.

16Jadi minaganu i Yisus do iso poiradan do minonuduk di tongotulun toguu do ka, “Kivaro iso tulun takaya do okonko nokukuyak tuva do naanu disido siri tanajo. 17Om monoromono dii isido do, ‘Potingkuro oku diti do auso dii poijananku diti paraiku?’ kadi ginavojo.

18Nga kadisido do mitangar si ginavojo kondiri, ‘Iti nopo bala, nga gaampo do uyasonku kasangkat iti kukubku, om mamaal oku nogi dino di agajo mantad diti, om siri nono i poijananku diti parai om i tongoporomponku. 19Om oopodku nopo iri poijanan nga kangkuno diti ginavoku, “Oguuno dii iti poromponku potiuntun om kabagalkuno ilo do piipirono toun, nga asanang okuno diti maino mangakan om mongiup om mogramai-ramai okuno,” kangku dino gia diti ginavoku,’ kadi tulun takaya.

20Nga kadi Kinoringan disido, ‘Ou tulun do obudu! Sodopno maino koovian dino umurnu, om isaipo dii sumanganu di porompon nountunnu?’ kadi Kinoringan.

21Om iri nopo tulun di monguntun di arata do pakajon noopo disido kondiri om aui akaya siri gotuvang do Kinoringan nga irad diri tulun takaya i au maja di kouvangan di Kinoringan,” kadi Yisus.

Ada Kou Kosurau Diri Kosimpitan Muju

(Mat. 6:25-34)

22Om pitangar nogi dii i Yisus di tongotulunJo do ka, “Sabap diri mitangar Oku dikovu do ada kouno kosurau do minsoromo do kosimpitan dino kovijaan do kojuvan muju, irad do auso akanon, om auso pakaian. 23Do irino kovijaan do tatod kiguna mantad di taakanon, om i kojuvanno kiguna mantad di pakaian. 24Soromono gia i mangkaak nga okoniko mongumo, om okoniko kivaro poijanan do kokorui ko paraipo, nga iolo nogi nga paakanoni do Kinoringan. Lobi-lobipo ikovu tongotulun do ikovuno oorogo mantad do tombolog! 25Insan osurau koupo, nga aui moilo i kosuraan muju do palanggau diri umur muju. 26Jadi nong au kovi kadapat palanggau diri umur muju, nokuro do sumurau kou diri tongovokon?

27Soromono marong ilo bunga nong sumurau do auso pakaian. Au iolo kumaraja om aui manabid do banang nga ino pun aandai kaantangan. Nga mitangar Oku dikovu do antangaino i Raja Suliman do songkuropo kinakayaanjo nga aui koirad di tongobunga kaandaio di pakaianjo. 28Antangaino ilo sakot iri sumobul si dumo, do sumobul tadau maino, om lumonotno irad suvab om sorobon pun piarawoni di Kinoringan. Om ikovu nogi nga makinpo dii do onuan kou Disido do pakaian. Nokuroi do au aparsaya kou marong?

29-30Sabap diri do ada kou sumugut di tongotulun siti vonuvo, iri au kotutun do Kinoringan, do sumurau do minsoromo mogium do akanon ko iuponpo. Do itino marong kosurau diolo do mogium, nga oilaani bo di Tama tokou iri kosimpitan muju. 31Nga podulio mujupo do i Kinoringan monguasa dikovu, om mantad diri onuu nopo i kosimpitan muju nga onuan Disido kosukupan,” kadi Yisus.

Untuno Porompon soi Suruga

(Mat. 6:19-21; 19:21; Mar. 10:21; Luk. 18:22)

32Om kadi Yisus kavagu, “Oou dikovu kinopurukan do tulun di okuyak i aparsaya Dogo, ada kou korosi do ikovuno kouvangan do Kinoringan, do onuan kou di kuasa saralom di Kopomorintaan Disido soi suruga. 33Pojualo mujuno kasangkat i nunuu nopo i siri dikovu, iri aratanu om pataakono i torogo siri tongotulun do miskin. Nong irad dino gaagaya muju nga irad do vaalon muju i poijanan do siin di au rumusak, om potoouon iri arata muju silo suruga, do silo nopo nga auno kumurang, au aasu do manakau om auso dii lipos silo do mongorobuk. 34Do inombo nopo pantok di arata muju om sirino i ginavo muju,” kadi Yisus.

Tongoturipon i Mangajaga

(Mat. 24:45-51)

35-36Om minaganu i Yisus do iso poiradan di korikatanJo kavagu do ka, “Jaajagawo mujuno mantad, om sumugut kouno di tongoturipon do mangandad di tuanjo koguli mantad siri kawin. Do nokosodiano iolo manangkambot om puango dii diolo iri lampu. Om korikot nopo i tuanjo nga pangatukno dii di pintu nga turus dii iolo mongivang disido. 37-38Ososogitno i tongoturipon di naantangan di tuanjo do songinsodiano mangandad marong do korikatanjo, insan tanga sodoppo korikatan disido ko minanavaupo. Do mitangar Oku dikovu do kapanangkambotpo dino i tuanjo om suuonjo i tongoturiponjo poogom om surunganjo nogi dino iolo diri taakanon. 39Soromono mujuno marong, nong irad di tulun sanganu di valai do koilo do korikatan di tulun taraat do mongoi manakau, nga au dii modop isido om auno kobojou i tulun do monguyas om masu siri valaijo. 40Om sabap diri aandai do poinsodia kou laaid do rumikot Oku, do Iokuno i Sinumiliu do Tulun, om au muju oilaan nong sombia i korikatanKu kavagu,” kadi Yisus.

41Jadi kadi Pitrus, “Tuhan, ikoi naku tangaronNu dino poiradanNu, ko kasaangkatpo tongotulun?” kadi Pitrus.

42Nga kadi Tuhan, “Isaai nopo i mandur di rumalan do kumaraja om opintar mangajaga do barang di tuanjo, om irino onuon di tuanjo do kotua monguasa kasangkat di tongoturipon saralom valaijo, do papaakan diolo do taakanon ontok do kapangakanan. 43Ososogitno i turipon diri okosupan di tuanjo do papanau diri nipakaraja disido ontok do korikatan di tuanjo. 44PatangaronKu marong dikovu iti do nong irad diri kaandai iri karajajo om arapon nogi dino isido di tuanjo do mangajaga kasangkat di tongoporomponjo. 45Nga nong minsoromo noopo i ginavo di turipon diri do, ‘Alaidpo bo korikatan di tuanku dii,’ ka, om pinlalapasaino dii disido i susuuon vokon om poginakanno dii om misingavukno, 46om auno dii aandaman disido iri tadau korikatan di tuanjo. Om tadau di au noilalaanjo do nokorikot i tuanjo, om naantangan dii do irad diri gaagaya di turiponjo, om pinrutadaino dii di tuan i turiponjo diri, om porundunono dii isido diri tongotulun miirad di au rumalan maja di isuu do Kinoringan.

47Iri nopo turipon di koilono laaid diri kouvangan di tuanjo, om aui sumodia do maja di kouvangan di tuanjo nga irino oolian marong loposon. 48Nga iri nopo i au koilo laaid di nisuu di tuanjo, om au maja di kouvangan di tuanjo nga iri nogi nga loposon, nga insan pun irad dino aui sampai do pokorualan maamarong. Do isai-isai nopo i tulun di inonuan di oguu, om iri nogi pokionuon kavagu do oguu. Om ii nopo tulun di poinlobi-lobi koguu di nipaarap, nga poinlobi-lobi nogi koguuo di pokigulion kavagu mantad siri disido,” kadi Yisus.

Okonko Popiandai nga Popiodu

(Mat. 10:34-36)

49Om kadi Yisus kavagu, “KorikatanKu nopo nga mangarakit do tapui siti vonuvo, irino ukuman, om kouvanganKu daa do nakarakitno iri tapui. 50Misti do obotisan Oku do iso pombotisan.#12:50 pombotisan: pomboptoisan Nga atuk, sumurau Okuno marong salaid do aupo katalib iri kasansaraanKu. 51Panantaman mujupo daa do mongovit Oku do kopoiandaian di tongotulun siti vonuvo do kinorikatanKu? Okon! Nga oinomodno om okoniko poiaandaian ovitonKu siti vonuvo, nga iri poiooduan. 52Do mantadno maino diti do moiodu-odu irad do iso sampaganakan do kivaro limo tulun, tolu tulun i lumavan di duvo tulun, ko i duvo tulun lumavan di tolu tulun sabap kivaro maja om kivaro au maja Dogo. 53Om kivaro pioduan miamo#12:53 miamo: miapa om pioduan miino om pioduan miivan,” kadi Yisus.

Au Kotutun di Pongintutunan di Vaalon di Yisus

(Mat. 16:2-3)

54Om pitangar nogi dii i Yisus di tulun toguu do ka, “Koontong kou nopo dilo tavan#12:54 tavan: langit do tumuvong ponong silo kotonobon, om mitangar kouno do, ‘Dumarunno maino,’ kamuju, om oinomodi do dumarun iri. 55Om sumarup nopo mantad si salatan, om mitangar kouno do, ‘Magadauno iti maino,’ kamuju, om oinomodi do magadau marong. 56Nga ikovuno tulun do puupura. Kotutun kou nong potingkuro iti vonuvo om ilo tavan do magadau ko gumompus. Om nokuro do au kou kotutun nong onu iti pongintutunan di vaalonKu diti maino?” kadi Yisus.

Misti Kumiandai diri Kumibisara Dika

(Mat. 5:25-26)

57Om itino poiradan di Yisus do i tulun kiduso irad diri kitutang, do kaDisido, “Apatut do sompori-pori kou momutus si ginavo muju nong onu iri aandai. 58Irad do iso tulun dikovu nong angatan do tulun kumibisara si gotuvang do Kotua Anak Nogori, om kinampo kumiandai diri tulun ontok do manau-panau koupo do aupo korikot siri poibisaraan. Nong au kumiandaiko, olombusan disido gajaton do momisara siri momumutus do bisara. Om i momumutus do bisara polombus dika siri pulis do pojiilon. 59Mitangar Oku dikau, nong nokojiilko, aupo polobusonko nong aupo noopusannu marong mamarai iri tutangnu,” kadi Yisus.

Currently Selected:

Lukas 12: LabukPKV

Highlight

Copy