Matius 18
18
Pongoduatan nong Isai Agajo Pangkat
(Mar. 9:33-41; Luk. 9:46-48)
1Om ontok diri rikotno dii ikoi i tongotulun di Yisus mongoduat Disido do ka, “Isai naku agajo pangkat siri Kopomorintaan do Kinoringan?” kanja.
2Nga loovono dii di Yisus iri iso tanak di opoyokpo, om poingkokotono dii si gotuvangonja, 3om pitangarno dii Isido, “PatangaronKu marong dikovu iti, nong au gumuli i ginavo muju sumugut irad do tanak diti, au kadapat kou masu si Kopomorintaan do Kinoringan. 4Irad nogi dino do isaai nopo iri minsuribak i ginavojo gumuli sumugut irad do tanak diti, isidono iri agajo pangkat siri Kopomorintaan do Kinoringan. 5Isaai nopo monorima irad diti iso tanak sabap aparsaya Dogo nga irino monorima Dogo,” kadi Yisus.
Ponudukan pasal di Tulun Mamamalid
(Mar. 9:42-48; Luk. 17:1-2)
6Om kadi Yisus kavagu, “Nga isaai nopo mamajajat irad diti iso tanak mamaal do duso do aparsaya i tanak Dogo, gaam nogi do kagasan do tali om limbagatan do vatu tagajo i liou di tulun diri, om polosodon nogi dino si laut di taralom mantad do mamajajat diri tanak mamaal do duso. 7Adii, osusano i tulun siti vonuvo do kivaro nontodon do ponsubaan iri kapalid do tulun. Mimang kivaro ponsubaan rumikot, nga araatno marong nasip i tulun do i nontodon do ponsubaan diri,” kadi Yisus.
8Om minaganu i Yisus do iso poiradan do, “Irad nopo diri nong longon ko takodnupo i mongovit dika mamaal do duso, totokono pataam. Gaam nogi do pukung i longon ko takodnu sampaping do masu siri kovijaan di auso koovion mantad do oulit ino longon om takodnu do potunuvon siri tapui do auso kopisakan. 9Om nong matonu mongovit dika mamaal do duso sungkitono#18:9 sungkito: suvilo i linsou matonu om pataamon. Gaam nogi do bolou sampaping matonu do masu siri kovijaan di auso koovion mantad do oulit ino matonu do potunuvon siri tapui naraka,” kadi Yisus.#Antangai Matius 5:29-30.
Poiradan do Iso Kambing Biri-biri Napalid
(Luk. 15:3-7)
10Om ponudukno dii kavagu i Yisus do kaDisido, “Ondomo mujuno, ada muju pagaano#18:10 pagaano: pagaawo ino ginavo muju do posuribak di tanak irad diti, do mitangar Oku dikovu do kimoloikat kasangkat iolo siri gotuvang diAmoKu#18:10 diAmo: diApa soi suruga. 11[Do Iokuno i Sinumiliu do Tulun nga rinumikot mogium di tulun di napalid.]#18:11 Kivaro piipiro solinan di poguluupo popioput diti ayat 11. Antangai Luk. 19:10.
12Potingkuro bato kaandaman muju? Nong i tulun do kikambing biri-biri do aatus tinan om napalid iso mantad diri, om kukuroyonjo dii iri? Tantuno do iduan nopo disido iri sivoi nopulu om sivoi siri kulud#18:12 kulud: kotud do mampanau mongoi pogium di iso kambing napalid. 13Om patangaronKu marong dikovu iti, do aandaianpo marong iri ginavojo nong naayanganjo iri iso napalid mantad diri kambing sivoi nopulu om sivoi iri au napalid. 14Irad nogi dino i Tama tokou#18:14 i Tama tokou: kivaro piipiro solinan di poguluupo do nokotulis do: iAmoKu. soi suruga do au uvang do kivaro iso mantad do tongotangaanak diti do obinasa,” kadi Yisus.
Ponudukan Potingkuro Monosiat do Sulod i Kiduso
(Luk. 17:3-4)
15Om kadi Yisus kavagu, “Nong kivaro nopo kosuladannu do kasala si dika,#18:15 si dika: kivaro piipiro solinan di poguluupo do auso nokotulis do “si dika”. apatutko do mongoi sosoiso gumotuvang disido potuduk diri kasalaanjo. Nong uvang nopo isido mongkinongou om mokiampun, aui atatak pisuladan muju. 16Nga au nopo isido mongkinongou dika, pangangatno do iso ko duvo tulun koruangnu do rumongou di pitatangaran muju om onuonnu saksi do popoinomod dika.#Antangai Gulion 19:15. 17Nong au nopo mongkinongou, apatut do iabar muju siri poiuntunan di tulun i aparsaya Dogo. Nong auno mongkinongou di tulun siri poiuntunan di tulun i aparsaya Dogo, anggapon muju nopo isido irad di tulun do kaapir om irad di tulun momumumpung do sukai,” kadi Yisus.
Popotingkod om Popolila
18Om kadi Yisus kavagu, “PatangaronKu marong dikovu iti, do onuu nopo potingkodon muju siti vonuvo nga potingkodon nogi do Kinoringan soi suruga laid. Om onuu nopo ilila muju siti vonuvo, nga ilila di Kinoringan soi suruga laid.
19Om mitangar Oku nogi dikovu, do insan duvoo kouno tulun siti vonuvo do mokianu do onuu nopo, nong miiso ginavo muju misti onuan kovi diAmoKu#18:19 diAmo: diApa soi suruga. 20Do nombo nopo pantok untunon muju sumambayang insan duvo ko toluui tulun sabap aparsaya kou Dogo, sino Okui poirunggum dikovu,” kadi Yisus.
Poiradan di Tulun Gogojian i Au Mangampun
21Nga insomokno dii i Pitrus om pongoduat, kadisido, “Tuhan, impiro naku kasala i sulodku do obulipo ompunanku, inturu oku naku mangampun disido?” kadi Pitrus.
22Nga kadi Yisus, “Okoniko gosob do inturu noo, nga inturu iri turu nopulu#18:22 inturu iri turu nopulu: siri solinan vokon pinotulis do: inturu nopulu om turu mangampunko diri tulun.#Antangai Lukas 17:3-4.
23Sabap nopo diri, i Kinoringan monguasa di tongotulunJo do irad di iso raja do mongijap kasangkat di tongotutang nga pokibarajan daa di tongotulunjo. 24Om nokotimpuun nopo dii isido mongijap diri tutang, om pootodono dii di tulun si di raja iri iso tulun gaji di kitutang do piipiro nojuta pirok. 25Nga auso nopo dii siin pamarai disido, ukumaino dii daa di raja do padagangon i tulun gaji om tanak savojo om onuu nopo iri arata disido nga onuon do pamarai di tutangjo.
26Jadi singkotudno dii i tulun gaji siri gotuvangon di tuanjo do minokiinsisian marong, kadisido, ‘Ompunai okupo, tuan, barajankui daa iri kasangkat,’ ka. 27Nga kosianai nopo dii i raja di tulun gaji diri, na polijotono dii di raja i tutangjo om polobusoi dii.
28Nga kalabus nopo dii i tulun gaji diri om kasamung di tulun koruangjo kumaraja di nokopongutang disido do siin aatus pirok, turus kuutai om okogo dii do kadisido, ‘Barajaino dogo iri inutangnu siti dogo,’ ka.
29Nga singkotudno dii i koruangjo kumaraja do minokiinsisian marong daa disido, om kadisido, ‘Ompunai okupo do barajankui daa iri,’ ka.
30Nga au nogi noompunan disido, om ongoio nogi dii pojiilo gosob do abarajan i tutangjo. 31Nga linumudus dii i koruangjo kumaraja vokon do nokoontong do irad diri, om ongoiono dii paabaro si di raja.
32Om loovono dii diri raja iri tulun gaji diri, om kadisido, ‘Uu tulun gaji taraat, pinolijotkuno kasangkat iri tutangnu sabap minokiinsianko gia dogo, 33om nokuro bala do au osiananko di koruangnu kumaraja? Antangai oku nga osianan okui dika,’ ka. 34Nga karaatai nopo dii i raja om poovitaino dii do pataakon si di tulun jaga do jiil do posusawon iri tulun gumaji diri taraat gosob do abarajan kasangkat i tutangjo.
35Irad nogi dino iAmoKu#18:35 Amo: Apa silo suruga do kooyon kou, nong au ovi-ovion muju ino ginavo mangampun do kasalaan di kosuladan muju,” kadi Yisus.
Currently Selected:
Matius 18: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.
