Markus Kopoilaan
Kopoilaan
Ngaran nopo di minonulis diti buuk nga i Markus, tanak di Moria, irino iso tongondu do akaya si Bandar Yorusalim (Susuuon 12:12). Koguuo nopo tulun do koilo manapsir di Kitab nga mitangar do i Markus nopo diti nga kosusulod di Banabas, om ponguranan isido do i Yaya Markus si Kolusi 4:10. Minaja isido di Banabas om i Poulus ontok do tinumongkop iolo do mongoi mangaabar di Abar do Aandai (Susuuon 12:25; 13:5). Om oilaan tokou nogi do kinumoruang i Markus di Pitrus (1 Pitrus 5:13). Koguuo nopo tulun di manapsir nga mitangar do minokituduk i Markus di Pitrus om irino dii do koilo isido pasal di karaja om i ponudukan di Yisus.
Pinonimpuunan nopo diti Abar do Aandai do Tinulis di Markus om irad diti, “Itino kotimpuunan di Abar do Aandai pasal di Yisus Koristus, i Tanak do Kinoringan,” ka. Om saralom do buuk diti popoilo do i Yisus nopo nga songulun do olombus kakarajawo om kikuasa Isido. Om nokointalang marong i kuasa Disido do mantad di gaagayaJo do monuduk, om mantad di kosunduvan Disido diri asavat mantad di rogon, om mantad nogi diri kuasaJo do mangampun di duso do tulun. Om vinantang marong di Yisus do Isido nopo nga i Sinumiliu do Tulun. Om korikatan nopo Disido nga irad do iso turipon di papataak do kojuvanJo gosob do apatai supaya koidu i tongotulun do mantad di duso diolo.
Sorita nopo pasal di Yisus saralom do buuk diti nga atarang marong om olombus ponorita. Om pinoinggajo di Markus iri gaagaya di Yisus lobi mantad di tangarJo om i ponudukanJo. Di timpuuni kivaro okuyak sorita pasal di Yaya Mamamatis#1:0 Mamamatis: Momomonsu om pasal di binotisan#1:0 binotisan: binoptoisan i Yisus om i pinonsubaan Disido, om baru soritawo dii di Markus pasal do karaja di Yisus, do irino do minongolingos Isido do tulun di kitoruol om monuduk Isido di tongotulun. Maid-laid muang-ruang i toilaan di tongotulun di Yisus pasal Disido. Nga insan irad diri makin nogi do orongit i musu di Yisus do sipamatai Disido. Iri nopo piro-piro pasal siti koovion diti buuk nga minonorita diri nongojadi ontok do minggu di koovionno do ovijaupo i Yisus siti vonuvo, om makin nogi pasal di kinosoliban Disido om i kinovijaan kavagu Disido do mantad di kapatajanJo.
Iri nopo boogian di pongovian do Buuk di Markus diti, i kinurung do tanda kurung tagajo nga kogumuan do tulun minsoromo do okoniko i Markus minonulis diri, nga i tulun vokon.
Suvang diti Buuk
1. Kotimpuunon diri Abar do Aandai 1:1-13
2. Karaja di Yisus si gotuvang di tongotulun toguu soi Vonuvo Golilia om i tongobandar misoliput 1:14-9:50
3. Mantad soi Vonuvo Golilia mongoi soi Bandar Yorusalim 10:1-52
4. Minggu di koovionno do soi Yorusalim om soi misorili di pantok diri 11:1-15:47
5. Novijau i Yisus mantad si tulun napatai 16:1-8
6. I kointalangan di Yisus si di tongotulun di aparsaya Disido om i kinoinsavatan Disido soi suruga 16:9-20
Nong kivaro tanda bintang (*) siri tinangaran, nga obuli iumon i komoion diri tinangaran si Kamus Kadajan.
Currently Selected:
Markus Kopoilaan: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.