Zone 5

Va Litona Pagahaina: Ira Noni Di Huhai Ia Tuunamane God 5:1–12:50

Maneri Di Huhai Ka Ia Mahai Varighara Ani Zerusalemu 5:1-47

Zisas Ne Va Vehai Ia Mane Ta Memelu Ghaghahe.

1Leghuna iahi, Zisas neke vona leghu lao Zerusalemu ka kaike ravata beana ira noni Ziu. 2Ka giliona Zerusalemu ka gheremena ia leghahai makatanana malau leghaha iahi, ia ta va kudo ghini Makatanana Sipisipi, e au kaike loka ta va kudo ghini Betizata#5:2 Keha kakangavara ka Giriki edi kahei, “Betizata” nia kehara gedi kahei ghu “Betiseida” e ghua. ka ungene Erameiki, ta au lilohi gaha koloina suga ta sodu mala adihi.#5:2 Ia lokana Betizata mu e rodana gheremena nia kaike fofotaina hoata, e ghua. Ia lokana Betizata mu neke 95 mita (315 fiti) sodunana nia 50 mita (165 fiti) bobonana ka keha pelona ani nia 65 mita (220 fiti) ka keha pelona ani mo, e ghua. Babaolo iahi mu “Sugana Dudumana” e ghua fafahakanana. 3Tehina noni dike kivi, melu ghaghahe, nia ira taka boka ngalimu ghu ira tinidi e ghua, dike epuepura aianimu ka ira koloidi suga.#5:3 Keha kakangavara ka Giriki edi nai hagheleri papaguaidi 3b-4: v3b Maneri dike afa ghini ia kolo ta rizuna, v4 vununa keha fafatara kaike engizeli ka ia Lod e fani hinae lao ka giliona lokana e la va ngalimui ghu kolo ani. Ia kusu noni ta fogara ta laona ka giliona loka ani ka ia leghuna tato pitoho vonaio kolo ani mu e ke age veha ghena ka heve lelemeana neke auina manei 5Kaike ghu ka ira mane ta libo aianimu, neke to fogari ma neke au ghu giliodi litofulu hana komuhu. 6Zisas ka ia fini laoi mane iahi, neke avohi neke to sepa fuluduna fogara iahi ka manei, neke notohi ghu, “?Agho mu no kabai ke veha gheu mo?” neke ghua ghini ghu.

7“Na deo bokaguna Faghina Agho,” neke ghua ungene tughuna ia mane ta fogari, “vununa e deo hei noni neke toka ghinaguna laona ka loka ani ka ia tataniga rizuna kolo ani. A va sisiva haghele lao ngama ara, to kusu haghele ghedi lao ghu kehara aianimu.”

8Va kahe ghini tuna neke ghua Zisas, “!Tetu vona o hio vonai ghu nou natu mala epu nia, o ghaghahe ghu!” neke ghua ghini.

9Ka fafata ianimu lama, neke to veha ghena ghu ia mane ta fogara. Pipidu vonai tuna ia nona natu, ge tatanigai ghaghahe ghu, neke ghua. Hahaima iahi mu neke au ka ia Ravata Mala Maghoso ira Ziu. 10Ira ta babatu ka ira Ziu dike kahe ghua lao iahi ka ia mane neke va vehaio ka fogara, “!Ghatunaina mu Ravata Mala Maghoso, e beana ghu ka ia vetula ta hureina agho natu mala epu iamu!” dike ghua ghini.

11Ghe manei neke ungene tughuri, “la mane neke va vehauo ka ia fogara mo neke va kahe ghinaguna ta hio vonaina nogu natu mala epu ini ta ghaghahena ghu,” neke ghua ghidi.

12“?Hei ghu mu mane neke kahe ghinighona agho mala riva ghinina iahi?” dike ghua notohina.

13Ghe ia mane neke age veha ghenao e deo geke avohi ghena ghu hei mo mu Zisas na, vununa Zisas neke to kave, neke haghele lao ghu ka ia varigharana noni.

14Leghunana, Zisas neke la dufui manei ka giliona ia Sugana God, neke va kahe ghini ghu, “Ghatunaina mu agho noto ke age veha gheu, oka ke rivai puhi ta muko la ghu, ghatu keha leghutau ta muko fuludu laoni e boka dufuigho mo,” neke ghua ghini. 15Ianimu tuna ghe, neke ghahe nga ia mane, neke la va kahe ghidi ghu ira ta babatu ka ira Ziu, ghinina Zisas lamu neke va vehaina taghonai, ta ghuana.

16Vununa Zisas neke riva ghidi irahi ka ia Ravata Mala Maghoso ira Ziu, dike age tatanigai ngovangovali ghu manei ira ta babatu ka ira Ziu. 17Ghe Zisas neke ungene tughuri, “Nogu Mama e deo ge nodo ghu rivana, e deo ghu molamo ara ga nodo ghu rivana,” neke ghua ghidi. 18Ngengene irahi neke va gigima laorini ira ta babatu ka ira Ziu ta va sisiva atungina Zisas. Manei e deo ge suna huhughuri ghu ma ira puhi mala leghuri ghinina ia Ravata Mala Maghoso, nga vununa manei neke to kahei haro molamo ta nona Mamana taghonai God, va varifataina taghonai ka God.

Ia Mana Mala Kopu Ka Ia Tuunamane

19Zisas neke ungene tughuri, “Ara a va kahe ghini ghau ghu ia hohoghona, ara ia Tuuna e deo heve leghutau ta boka riva ghini kakaikena taghogu. Ara a boka riva ghidi ma heve ira ta finiri riva ghidira nogu Mama lama. Heve tei ta riva ghinina ia Mama, ara, ia Tuuna a riva ghini haro molamo. 20Vununa ia Mama e namaha ghinagu ara, ia Tuuna, e va podolo vanagu ghu ira vahina leghutau ta riva ghidi nga taghonai. Manei e age va podolo vanagu ara ghatu leghutau iranimu mala riva ghidira, ira ta faa fuludu laoini iahi, o age nomu fere ghu ghau haroharo. 21Taghe ta ghua la ia Mama ia ta va tetu leghuri ira ta leme ta vanadi ghu ia doli, a ghua molamo ara, ia Tuuna, a vanadi ghu ia doli heiri ta kabai vanadina ara. 22Ia Mama e deo ge fatei ghu hei noni, vununa manei ne vanagu mana mala kopu ara ia Tuuna mala faterira ira noni haroharo. 23Ne riva ghini nga ianimu ia Mama mu, vununa manei ne kabai ghidi ira noni ta heluhelu ghinaguna ara ia Tuuna, taghe ta heluhelu ghini ani la maneri taghonai. Hei ia ta deo ge heluhelu ghinagu ghu ara ia Tuuna mu, manei e deo ge heluhelu ghini ghu ia Mama neke tuhu mehauo ara.

24“A va kahe ghini ghau ghu ia hohoghona, heiri ta nomohori nogu ngengene idi nia ta va hohoghonai God neke tuhu mehauo ara e ghua mu, e aui doli soduai. Maneri mu e deo ge age fateri ghu ghatu ka ira sasake maneri, vununa maneri dito ke kalahui ia leme to hagheli ghu ia doli.

25“A va kahe ghini ghau ghu ia hohoghona, ka ia fafata ta la meha ghatu mu, heiri ira ta leghui ia hangana ta vai lao ka ia leme fuludai, edi age nomohi ghatu ia leogu ara ia Tuuna God. Heiri ka maneri ta age nomohoauna nia leghuauna ara edi age hioi ia doli soduai. To sabara ghu mu fafata ianimu. 26Ia Mama e aui mana mala vanadi doli soduaina ira noni. Nia manei neto ke vanagu mana ara ia Tuuna ta mala vanadi doli soduaina molamo ira noni. 27Ia Mama neke vanagu molamo ara ia mana ta mala faterina ira noni, vununa ara mu ia Tuuna Noni nake sipa mehao ka taghonai God.

28“!Oka nomu ferei ghu iahi! Hohoghona fuludu, ia fafata e la meha mo ghatu ka ta age nomohio ia leogu ara ia Tuuna God, ira noni haroharo ta au ka ira bekudi, 29ta age tetu leghu haro ghu maneri ghatu. Heiri ira dito ke riva va veharo mu, edi age tetu leghu edi hioi ghu ia doli soduai, nia heiri ira dike au tuduro ka ia muko mu, edi age tetu leghu a fateri ghu ghatu ara ia Tuuna God va ghahe laorira ka ia malau ta mala vavahagala fuludai. 30Ara e deo heve ta boka riva ghini kakaikena taghogu. Ara a fateri ira noni leghuina ia ta va kahe ghinagu God. Ia ghaghahena fateri ara maneri mu e totonu ghu, vununa ara e deo ga ghorevaha ghu riva ghinina heve ia ta kabai ghini taghogughi, nga heve ia ta kabai ghini manei neke tuhu mehauo lama.”

Ira Dike Fini Hibadiro Ka Ira Riva Zisas

31“Nato turi ghinagu la ara taghogughi, e deo hae ta va dedekena mu ne hohoghodi mamu turi idi ka ara, ta ghuana. 32Ghe keha nonina mo ne tuturi zuka ghinaguna ara, na avohi mo ghu ara tuturi ari ka manei ghinaguna ara mu di hohoghona mamu, ta ghuana. 33Ghau mu noto ke kusu tuhu laori keha noni mala la nonomohona ka Zone ia ta rivai seselebeana. Ira leghutau ta turi ghidi manei ghinaguna ara mu edi hohoghodi ghu. 34Ara mu na va ghighiu ka ia keha noni mala tuturi ghinagu kavena eka ghua ghu, nga ara mu a kahei iahi ge boka age hio va doli ghau la na ghua. 35Zone mu taghe kaike zuta ta toraina fegala pelara neke ghua, va podolo kaveina heve ia ta hohoghona ghinaguna ara, noke lao hihingomu ghu ghau va ghazaghaza ghinina ia fegala ka manei kaike fafata.

36“Ghe tehi leghutauni mu to kusu aura aianimu ta turi ghini kavena ia mala zuka ghinagu ara, edi gigima fuludu lao ghu ka heve neke turi ghinina Zone ghinaguna ara. Iranimu lamu riva neke vanagura ia Mama neke tuhu mehauo, ta mala riva ghidira ara. Riva iranimu lamu na riva ghidira ghu ara ghatunaina. Riva iranimu ne va podolo kavei neke tuhu mehauna ara ia Mama. 37Nia taghonai nogu Mama haro neke tuhu mehauo molamo, neto tuturi ghinaguna ara. Ghau mu toraina deo nga goke nomohi ghu leonana manei, ba fininina ia hihilina, 38nia ghau e deo goke va hohoghonari ghu ira nona ngengene. Na avohi nga ara ianimu, vununa ghau noke deo go va hohoghonau ghu ara, ia neke tuhu mehauno God aiahi.

39“Ghau no toraina izumu va vehari ira Kakangava Ta Maduana, vununa ka ira nganganamu, maneri edi age vanamu ia doli soduai no ghua. !Ghe Kakangava Ta Maduana irahi mu edi toraina tuturi ghinagu ma ara, e ghua! 40Ghe ghau go pake ghemu ghu mehana ka ara, mala vanamuna ia doli soduai, no ghua.

41“Ara e deo ga ghorevaha ghini ghu ta mala helahela ghinaguna noni, 42vununa ara na avoho ghau mo ta deona ge au ghu ia namaha ka God ka hihingomu nira ghau. 43Ara nato ke meha taremehana ia nona mana mala kopu nogu Mama, ghe ghau deo go kabai hio namahau ghu, nga neto la meha la keha nonina mo ka ia babaolona taghonai mu, ghau o hio namahi manei. 44?Heve ghe go boka va hohoghona nga ghau, noto kabai hioi lama ia helahela ka vari taghomughi, nia deo tuna go ghorevaha ghini ghu ia helahela ta meha ka God, ta ghuana?

45“Oka nganai ghu ta age tetuna ara ghatu ka kenuna ia Mama ta makutu ghauna ghu ghatu. Mosese ka neke hoto laono ia rangerange ka ghau mo ta age makutu ghauna ghatu. 46Goke va hohoghonai la ghau Mosese, geala ghau toke va hohoghonau ara, vununa manei neke toraina kakangava ghinagu ma ara. 47?Ghe vununa ghau no deo go va hohoghonai ghu heve neke kangavio manei, heve o ghua ghe go age va hohoghonai nga heve ta kaheina ara?”

Currently Selected:

Zone 5: kji

Highlight

Copy