Juan 4

Jesús len nguul Samaria

1Bënni fariseo gulanëëz'de ki Jesús rtuub'tekze bënni useed kie' len rkiil're nis bunach ka Juan 2(zala keg Jesús rkiile nis bunach'a, bënni useed kie'a tukiile nis bunach). 3Kati Jesús gnëëz'de le ni burooje Judea naar wëëje Galilea.

4Len run bayuudx tëëde gia'a yeego ki Samaria. 5Bdxiine tu yëdz ki Samaria nazi' lei' Sicar, ga'la ga de tu yu pka'ane Jacob kie' bënni xi'ine le' José. 6Na' zua' yeru nis le nuchë'ë'ne Jacob. Jesús tzka chi rajxaki'de yu'e nëëz grë'e rui'i yeru nis'a. Lau'i dza nak, 7-8ati bënni useed kie' zajë'u'ke le la'we lu yëdz'a. Tzal'za tuunu nguul Samaria bdxin'nu ni' zduliaj'nu nis, ati Jesús gudxe'nu:

—Ben kia' tzarua'a nis.

9San bënni Judea len bënni Samaria ti tadzaage, ati nguul ni guudx'nu'ne

—¿Bixhkia' li' rnaab'du neda nis xhki naku bënni Judea ati neda naka nguul Samaria?

10Jesús bubi'e kieenu diidza:

—Nar'la nëëz'du bixh'le nak le ruzalaadxe'e Dios len nuxha' rnaabi li' nis, li'l gnaab'du'ne ati le' gunne kiu' nis ban.

11Nguul ni guudx'nu'ne:

—Xan, keg de bixh kuij'du nis ni len yeru nis ni ga're' narë'ën'tzka: ¿Gaxhkz tzajxi'u nis ban gunnu kia'? 12Xuuz'xhtau'tu guul Jacob pka'ane kietu yeru nis ni, ni gli'aj'ke nis le', bi kie' len bua' gixi kieke. ¿Naru nakr'ru li' xhën ka le'?

13Jesús bubi'e kieenu diidza:

—Yugute'ke bënni li'aj'ke nis ni, ulabiidxe yubl; 14san bënni gi'i'je nis le neda gnëëdzja, tzalzu udua yëla rbiidx kie'. Koma nis le neda gnëëdzja kie' ueaki tu nis le raalj len gnëëdzj kie' yëla naban tzalzu.

15Nguul ni guudx'nu'ne:

—Xan, benn kia' nis'a, naar tzalzu udua yëla rbiidx kia' ati tir giida ni' duliija nis.

16Jesús gudxe'nu:

—Yajliidze bënni kiu' len chi nak ka wëëdu ni.

17Nguul ni bubi'i'nu kie' diidza:

—Ti zue' bënni kia'.

Jesús gudxe'nu:

—Bliidu rnou' ka, nutunu bënni kiu' zue'; 18koma ga'yu'e bënni chi gzua'leen'ku'ne ati bënni'a zua'leenu'ne na'a keg bënni kiu'a. Bliidu ka rnou'a.

19Kati nguul ni byëëni'nu le ni, guudx'nu'ne:

—Xan, leel naku bënni rue'e diidza ulaaz kie' Dios. 20Xuuz'xhtau'tu guul bënni Samaria gulayiijilaadxi'ke Dios lu gia'a ni; san lbi'ili bënni Judea rnaali ki Jerusalén nak ga rala tziijilaadxi'ru'ne Dios.

21Jesús bubi'e kieenu diidza:

—Nguul gyajle' le gie'a li', rdxin dza kati ti guuni bayuudx giid'li gia'a ni u tziaj'li Jerusalén ki tziijilaadxi'li'ne Xuuz'ru Dios. 22Lbi'ili ti nëëzi'li nuxha' riijilaadxi'li; san netu nëëzi'tu nuxha' riijilaadxi'tu koma yëla ruslá za' lu naa'ke bënni Judea. 23San za' dza, len na'a nak dza'a, kati bënni tayiijilaadxi'ke Dios luune ley gdu laadxi'ke, ka ryaazlaadxe'e Bë' La'ay kie' Dios. Koma bunach ka'a rgiilje Xuuz'ru layiijilaadxi'ke Le'. 24Dios nake Bë', len bënni tayiijilaadxi'ke le' luune ley gdu laadxi'ke ka ryaazlaadxe'e Bë' La'ay kie' Dios.

25Nguul ni guudx'nu'ne:

—Nëëz'da ki rala giide Cristo; len kati le' giide useedx'la'a'ne kietu yugute' le ni.

26Jesús gudxe'nu:

—Neda naka bënni'a, kuin'kze rui'leena li' diidza.

27Tzal'za guludxin'te'ke bënni useed kie' len gulubaan'de koma Jesús rui'leene'nu diidza tuunu nguul. San nutunu buaaxhji gnaabi le' bixh rnaab'de'nu u bixh diidza rui'leene'nu. 28Nguul ni pka'an'nu na' rë'ë kieenu len zuwaj'nu lu yëdz len guudx'nu bunach'a:

29—Gultza' ki gle'i'li'ne tue' bënni chi gudxe neda yugute' le chi beena. ¿Keg'tza le' nake Cristo?

30Na' gularooje ki yëdz'a len yajake ga zue' Jesús. 31Tzal'za bënni useed kie' tatayui'de le':

—Bënni Useed, gdaagu'tza tzarua'a.

32San le' gudxe leke:

—Lbi'ili ti nëëzi'li le rala ga'wa neda

33Bënni useed kie' gulazulau'e tunaabi lza'a'ke:

—¿Ku nu dujua'tza le ga'we?

34Ati Jesús gudxe leke:

—Xuuza nusë'le'e neda ati la'wa'gu kia' nak guuna le ryaazlaadxe'e Le' len ksiuudxa xhchiine. 35Lbi'ili rnaali: “Ryaadzj'r tap beu' naar tzajlap'ru”; san neda rea' lbi'ili ki gyuuli gap naduuz, chi nak tzajlap'ru. 36Bënni rlape rzi'e laaxhje, len lea rlape'a nak ki yëla naban tzalzu, naar bënni'a raaze len bënni'a rlape tudziij'de. 37Koma dekz xhtiidzi'i, ki “La'ke taaze len bënni yubl talap'ke.” 38Len neda psë'la'a lbi'ili dulap'li le ti gyui'i'li dxin guuz'li; bënni yubl gluune dxin'a ati lbi'ili ruzi'li xhbei xhchin'ke'a.

39Zian'ke bënni yëdz ki Samaria gulayajle'ke Jesús ka nak diidza be'nu nguul'a: «Chi gudxe neda yugute' le chi beena.» 40Kati bënni Samaria guladxiine, glatayui'de Jesús jga'an'leene leke ati bga'ane na' chop dza, 41len bënni zian gulayajle'ke ka nak le be'e diidza 42Ati gle'ke'nu nguul ni: «Na'a rajle'tu, keg ki le guudx'zu netu li', rajle'tu lekz'ka' koma kuin'kz'tu chi byëëni'tu'ne len nëëzi'tu ki leel le' nake Bënni Usle' yëdz'lyu.»

Jesús ru'uune'bi bi kie' bënni riije gdil ki Roma

(Mt 8:5-13; Lc 7:1-10)

43Guladëëd chop dza'a, Jesús burooje ki Samaria len bugie'le'e xhnëëze zga Galilea. 44Koma kuin'kze gne', tue' bënni rue'e diidza ulaaz kie' Dios ti tui'ke le' bala'an laadze. 45Kati bdxiine Galilea, bënni yëdz'a gulazi'ke le' dxia'a koma lekz'ka' yajake lni ki Pascua le gyu'u Jerusalén len gulale'i'de le beene.

46Jesús zuwëëje Caná yëdz ki Galilea ga beene ki nis ueaki nup uva. Ati tue' bënni rnabe'e bënni raja'ke gdil ki Roma zue' Cafarnaúm len bi kie' re'i'bi. 47Kati gnëëz'de ki Jesús gze'e Judea ati bdxiine Galilea, yajyue le' len gutayui'de le' ki tziije liidxe len uune'bi bi kie'a chik'z re'e'ni gat'bi. 48Jesús bubi'e kie' diidza:

—Lbi'ili ti rajle'li xhki ti rle'i'li le tunn'be' len yëla wak xhën.

49San bënni rnabe' ni gudxe le';

—Xan, dia'te, ka gna gat'bi bi kia'.

50Na' Jesús gudxe le':

—Buaj liidxu: bi kiu' yu'u yëla naban kieebi.

Bënni ni gyajle'e le gne' Jesús len zuwëëje. 51Tzal zuwëëje liidxe, bënni wendxin kie' yajtzaag'ke le' len gle' le':

—¡Bi kiu' yu'u yëla naban kieebi!

52Le' bnaab'de leke batxh gzulau'bi rnëëzi kuimi dxia'a, ati gulubi'ke diidza:

—Niij lau'i dza buroj'bi tuxhla.

53Xuuz'bi bi'i ni guk'be'i'de ki le ni guk larakz ur'a kati Jesús gudxe le': «Bi kiu' yu'u yëla naban kieebi»; ati le' len yugute'ke bënni nakua'ke liidxe gulayajle'ke Jesús.

54Le ni guk le burop beene Jesús ki runn'be' yëla wak xhën, kati gze'e Judea ati bdxiine Galilea.

Currently Selected:

Juan 4: PZD

Highlight

Copy