Juan 6

Jesús rga'we bunach zian

(Mt 14:13-21; Mr 6:30-44; Lc 9:10-17)

1Gdëëd le ni, Jesús gyiije tzala'a nis Galilea, larakz ley nak nis ki Tiberias. 2Bunach zian zjak'leene le' koma le zian le runn'be' yëla wak xhën chi gulale'i'de beene kati ru'uune bënni we'. 3Na' Jesús greene tu gia'a len grë'leene bënni useed kie'. 4Chi za' ga'la lni ki Pascua, lni kieke bënni Judea. 5Kati Jesús byue' ble'i'de bunach zian zjak'leene le', gudxe Felipe:

—¿Gaxh tzajë'u'ru yët'xhtiil kieke yugute' bunach ni?

6San gudxe ka' le' naar gnëëz'de bixh ubi'e diidza Felipe, koma Jesús chik'z nëëz'de bixh guune. 7Felipe bubi'e diidza:

—Ti gaki laaxhj'ru ki chop gayua' dza ga'awi'ru yajlí yët'xhtiil naar tu tu'ke la'la'ke tzarua'a ueaj.

8Na' Andrés bënni bë'che'e Simón Pedro tue' bënni useed kie' Jesús, gudxe le':

9—Ni zuaabi tuubi bi'dau' bi de kieebi ga'yu' yët'xhtiil len chop'ba bël; san, ¿Gaxhkz nak le ni tzka'ti'ga bunach zian ni?

10Jesús bubi'e diidza:

—Guudx'ke yugute'ke labë'ke.

Rë'tzka gixi lu latj'a len gulabë'ke. Ka ga'yu' mil'ke bënni nak'ke. 11Jesús gde'le'e lu ne'e yët'xhtiil'a len buudx be'e yëla dexhken Dios, gulagis'ke kieke bënni'a rë'ke'a. Lekz'ka' beene len bël'a, bnëëdzje tzka te'en'de. 12Kati chi glëëlj'de, Jesús gudxe bënni useed kie':

—Guluzi' tzka buga'an, naar tibi gak'ditji.

13Leke guluzi'e ley len chin'nu bdë'ë guk tzka le buga'an ki ga'yu' yët'xhtiil'a. 14Bunach'a kati gulale'i le runn'be' yëla wak le beene Jesús, gulanake:

—Leel bënni ni nake bënni'a rue'e diidza ulaaz kie' Dios len rala giide yëdz'lyu ni.

15Ati Jesús guk'be'i'de ki te'en'de luche'ke le' naar gnabe'i'de leke, buze'e yubl zuwëëje lu gia'a naar sue' tuuze.

Jesús rze'e lu nis

(Mt 14:22-27; Mr 6:45-52)

16Kati chi kchul, bënni useed kie' Jesús guladinie lu nis, 17gulabeene lu barku len guladëëde lu nis naar ladxiine Cafarnaúm. Chul'biaj chi nak len Jesús ti rudxin'de. 18Tzal'za, nis ni rbixh'rtul nia'a ki tu bë' xhën le gyas na'. 19Kati chi gulayu'u'ke ka tu ur nëëz, gulale'i'de Jesús ze'e ga'la ra barku rze'e lu nis'a len glaadxi'de. 20Jesús gudxe leke:

—¡Needa'a, ti gaadxi'li!

21Gdu laadxi'ke gulazi'e le' lu barku len guladxin'te'ke yëdz ga zjake.

Bunach tugiilje Jesús

22Bueikj dza'a, bunach nakua'ke tzala'a nis gulak'be'i'de ki bënni useed kie' Jesús zawake lu lazdui barku le rë'a, ati Jesús ti ziaj'leene leke. 23Tzal'za, ye la' barku guladxin Tiberias ga'la ga gla'we yët'xhtiil'a gdëëd be'e yëla dexhken Xan'ru. 24Lena'a, kati gulale'i'de ki Jesús len bënni useed kie' ti nakua'ke na', bunach'a gulabeene lu barku len zjake Cafarnaúm, zajdiilj'ke le'.

Jesús nake yët'xhtiil ki yëla naban

25Kati guladxiine leke tzala'a nis, guludzëël'de Jesús len gulunaab'de Le':

Bënni Useed, ¿Batxh bdxiinu niil?

26Jesús gudxe leke:

—Le nak'te, lbi'ili ti rugiilj'li neda koma gyajni'i'li le runn'be' yëla wak, rugiilj'li neda koma gdaag'li tzka bdza' le'e'li. 27Ti gun'li dxin ki la'wa'gu le rak'ditji, gulgun dxin ki la'wa'gu le ti rak'ditji len runn yëla naban tzalzu. La'wa'gu ni gunne kieeli Xi'ine Bënni, koma Xuuz'ru Dios, chi nuun'de Le' kie'.

28Gulunaab'de le':

—¿Bixh nayaadzji'tu naar gunn gun'tu xhchiine Dios?

29Jesús bubi'e kieke Diidza:

—Le re'enz'de Dios nak ki tzajle'li'ne bënni'a Le' nusë'le'e

30Na' gulunaab'de le':

—¿Bixh le runn'be' gunn guunu kietu naar kati gle'i'tu ley gun tzajle'tu li'? ¿Bixh nak le ruunu li'? 31Xuuz'xhtau'tu guul gla'we maná lu yu biidx, ka rna Diidza La'ay: “Bnëëdzje yët'xhtiil za' yewayuba gla'we.”

32Jesús bubi'e kieke diidza:

—Le nak'te rea' lbi'ili, keg Moisés benne kieeli yët'xhtiil le za' yewayuba, Xuuza runne yët'xhtiil'a le za' yewayuba. 33Koma yët'xhtiil'a lea Dios runne nak le za' yewayuba len rnëëdzj yëla naban ki yëdz'lyu.

34Leke gulunaab'kde Le':

—Xan, benn'tekz kietu yët'xhtiil'a.

35Ati Jesús gudxe leke:

—Neda naka yët'xhtiil le runn yëla naban. Bënni riid'leene neda, tir tëëde yëla rdun; len bënni rajle'e neda, tir tëëde yëla rbiidx. 36San ka chi guudx'kza lbi'ili, zala chi ble'i'li neda lbi'ili ti rajle'li. 37Yugute'ke bënni'a Xuuza benne kia' tiid'leene neda; ati bënni tiid'leene neda, ti yulaag'ka'ne. 38Koma neda ti za'a yewayuba ki guuna le ryaazlaadxa'a, Xuuza psë'le'e neda len guuna le ryaazlaadxe'e le'. 39Le' nusë'le'e neda len le ryaazlaadxe'e le' nak ki ti lanitie' bënni'a nunne kia' san yuspan'ka'ne lu yëla gut dza zia'a za'. 40Koma le ryaazlaadxe'e Xuuza nak ki yugute'ke bënni tuyu'ke Xi'ine Dios len layajle'ke le', lape yëla naban tzalzu; len neda yuspan'ka'ne lu yëla gut dza zia'a za.

41Lena'a bënni Judea gulazulau'ke tanéke kie' Jesús: Koma gne': «Neda naka yët'xhtiil'a le za' yewayuba.» 42Ati gulane':

—¿Naru keg Jesús bënni ni, bënni xi'ine José? Ro'u numbe'ru'ne xuuz'xhne'e. ¿Bixhkia' rne' na'a ki ze'e yewayuba?

43Na' Jesús gudxe leke:

—Ka'az gneeli kia'. 44Xuuza nusë'le'e neda len nutunu bënni gunn giid'leene neda xhki Le' ti kche'e le'; len neda yuspaana'ne lu yëla gut dza zia'a za'. 45Lu diidza la'ay le guluzooje bënni glui'ke diidza ulaaz kie' Dios rna: “Dios gzeajni'i'de yugute'ke.” Lena'a yugute'ke bënni layëën'de Xuuz'ru len luseede kie', tiid'leene neda.

46«Nutunu bënni nale'i'de Dios; tuuze bënni chi ble'i'de Le' nake bënni ze'e ga zue' Dios. 47Le nak'te rea' lbi'ili ki bënni rajle'e, nape yëla naban tzalzu. 48Neda naka yët'xhtiil le runn yëla naban. 49Xuuz'xhtau'li guul gla'we maná lu yu biidx, len zala gla'we ley, glat'kze; 50san neda rui'a diidza ki yët'xhtiil za' yewayuba; bënni ra'we ley, ti ratie'. 51Neda naka yët'xhtiil'a za' yewayuba; bënni ra'we yët'xhtiil ni, tzalzu sue'. Yët'xhtiil'a lea neda rnëëdzja nak xhpeela'kza. Rnëëdzja ley nia'a ki yëla naban ki yëdz'lyu.»

52Bënni Judea gulazulau'ke tadil'e diidza:

—¿Nakxh guune bënni ni gunne xhpeele'e gaag'ru?

53Jesús gudxe leke:

—Le nak'te rnia' ki xhki lbi'ili ti gaag'li xhpeele'e Xi'ine Bënni len gia'aj'li xhchëëne, ti gap'li yëla naban len lbi'ili. 54Bënni ra'we xhpeela'a len ri'i'je xhchëëna, nape yëla naban tzalzu; len neda yuspaana'ne lu yëla gut dza zia'a za'. 55Koma xhpeela'a nak la'wa'gu dxia'a len xhchëëna nak le rdui'i dxia'a. 56Bënni ra'we xhpeela'a len ri'i'je xhchëëna, nak'leene neda tuuz len neda nak'leena'ne tuuz Le'. 57Xuuza psë'le'e neda, Le' nape yëla naban ati neda yu'u yëla naban kia' nia'a kie' Le'; lekz'ka' nak, bënni ra'we xhpeela'a yu'u yëla naban kie' nia'a kia'. 58Rui'a diidza ki yët'xhtiil'a le za' yewayuba. Yët'xhtiil ni ti nak ka nak maná le gla'we xuuz'xhtau'li guul, koma zala gla'we glatie'; bënni ra'we yët'xhtiil ni, tzalzu sue'.

59Jesús pseed'de le ni lu yu'u useed ki yëdz Cafarnaúm.

Diidza nua' yëla naban tzalzu

60Kati gulayëën'de diidza ni, zian'ke bënni zjak'leene Jesús gulanake:

—Nak'tzka baniig si'ru xhtiidze'e ni; ¿nuxh bënni saki'de guune ley?

61Jesús guk'be'i'de ki tanéke kie', ati bnaab'de leke:

—¿Naru ruuni lbi'ili zi' diidza ni? 62¿Bixh'gaar gun'li ka nak gle'i'li'ne Le' Xi'ine Bënni ubeene ga zue' zia'a? 63Bë'a nak le runn yëla naban; le nak ki yëdz'lyu ni gat'ga zuakz ga run. Ati diidza le chi be'leena lbi'ili nakgak bë' len yëla naban. 64San ni zuaar'li la'li' ti rajle'li.

Koma Jesús chik'z nëëz'de zia'a nuxh bënni'a ti tayajle'ke, ati nëëz'de nuxh bënni'a rala gdëëde le' lu naa'ke bunach. 65Ati gne':

—Lena'a chi guudxa lbi'ili ki nutunu bënni gunn giid'leene neda xhki Xuuz'ru ti gue'e le' latj.

66Ni' gde'la', zian'ke bënni zjak'leene Jesús guluka'ane Le' len tir yajak'leene Le'.

67Jesús bnaab'de chin'nu'ke bënni useed kie':

—¿Ba re'eni'li waj'li lbi'ili lekz'ka'?

68Simón Pedro bubi'e diidza:

—Xan, ¿Nuxhkz tziaj'leen'tu? Le Li' rnou' nak yëla naban tzalzu. 69Netu chi gyajle'tu len nëëzi'tu ki Li' naku Bënni La'ay kie' Dios.

70Jesús bubi'e kieke diidza:

—Neda grëa' lbi'ili chin'nu'li, san tuuli lbi'ili nak'li bënni xëwi.

71Jesús rue'e diidza kie' Judas bënni xi'ine Simón Iscariote, koma Judas rala gdëëde le' lu naa'ke bunach zala nake tue' kieke chin'nu'ke bënni useed kie' Jesús.

Currently Selected:

Juan 6: PZD

Highlight

Copy