Ro i Som Muro 13
13
Si Ben Barnabas hu Sool ɗak si Rohus
1Ta Antyok, suɓut i som koltifai ai sin ti som shit shini hu som kofiti ta. A hu Barnabas, hu Simyon ima si lai ii makyawi, hu Lushyos ta Sairin, hu Manayen ima ngye ta rai Makai Herod, hu Sool. 2Myan ima sin cwai ti Deembai afut hu ka'ti foya tasi cwa hai, unai Rin Masapai nyus, “Kang huna Barnabas hu Sool ya, ɓurti ro ima i laiyus ɓa si masi.”
3Si hum ka'ti fo ya tasi cwa hai, sin fwal ti DeeƁwe. Unai si kin Barnabas hu Sool ra hai, ɗak si ti'us ya.
Barnabas hu Sool ta Saiprus
4Rin Masapai ro Barnabas hu Sool, si ɗor wa Selushya, ta kyeli si lang kwang i ham wa Saiprus. 5Myan ima si ru ta Salamis, si mba findel i DeeƁwe ta mare i Ju. Jwon yis akul hu sin, wis sus ti roi.
6Takfai tima si nggaar ta' tima ham nggarut ya shak, si ru ta ashwa ti Pafos. Si wis maɗufal i Judya mburu nin ta, yis a mashit i fyarat, si laiyus ii Bar-Yeso. 7A maro akul hu makunggul Serjyus Pool, ima mati shingat. Unai lai hu Barnabas hu Sool ɓurti ma ɓweti ɓa u hal findel i DeeƁwe. 8Unai Elimas mburui, (a asum ames nai hwak ti foi Girik), zan wei ti sin, ɓweng sai ɓweng ti makungguli ya tasi fati mulut. 9Unai Sool ima si lai ii Pool, hya ti Rin Masapai, ɗing Elimas fo ryau, ɗak nyus, 10“Ha a al i Shatan, mazan ti wei ti shak aɗeng ima ma ndere, ha hya ti dang hu fyaratat. Ha wa honti rafat ti fiselal i mwawei i Deembai ya kwa haa? 11Mwashi futut i Deembai masi ha hai. Ha wa mute ii manzyau, ha wa zan ti myan kaciwa' ha ɗing kweneng i ɓwe.”
Fo abet mutɓwar hu maɓing si vohus ya, unai fur tambahan ti kyel far ti ɗeng, ɓa u ka'us ra u kofus fisel. 12Myan ima makungguli ɗing aɗeng ima ma wa mai, unai fa mwawei, ɓurti shok na fo ti kofiti tasi Deembai hai.
Pool hu Barnabas ta Antyok ti Pisidiya
13Unai Pool hu myayus i ma'at si lang kwang i ham ta Pafos, si wa Pega ta ta' ti Pamfilya. Jwon honus ta kyeli humus ta Yerushalima. 14Unai si cu wei ta Pega si wa ta Antyok ti ta' ti Pisidya. Mwen mupyoron, Mwen ti Lafos si lang ta mare si te amun ta. 15Takfai ti mbe'i ta kaada i anggut i Mosis hu i som shit, unai mbayai i marei si ro muro wa kyel ames nyai, “A shunun, na hun ti findel i taɓak wa kyel i ɗufal, kabuk lak hun.”
16Unai Pool luk fit, zan ra ta fit, fur findel ni, “A som i Isar'ila, hu Ramam ima si mwen DeeƁwe fo na saa yuti, shuhun mwal hu halun! 17DeeƁwe i som Isar'ila ben washash amukan i ɓele, kin si wis ramwayat hu ngye myan ima sin mute ta Masar, ti mbaitat manjengi langtus ya ta ta'i. 18Mas wilyal hure ɓaras yis ka'ti agung ti sin ta ya. 19DeeƁwe mai fot ramam pyoron ya ndarak ta Kainan, fa ɗufal ames ta'i ii kop ames. 20Shak ɗamamii zan wilyal ndik ɓaras ta hure harai.
“Takfai ti mai, DeeƁwe fas som i totti puɓwarai, yes myan i Samwel mashit. 21Unai ɗufali si lul ɓa si fas makai, unai DeeƁwe fas Sool ali Kish, maɗufal ta gung i Benjamen, ima mas kaitat wilyal hure ɓaras. 22Takfai tima DeeƁwe re' Sool ya ta kaitati wi, no' Devid i makai ames. DeeƁwe findel si yis hai ni, ‘I wis Devid ali Yese a malis amen ima mulut asun ti zanus, ma wa masti shak ɗamam ima i ɓweti.’ 23Ii na gung i maɗufal mai DeeƁwe kol Isar'ila mabum Yeso, fota ngga' ima fas kintiɓwi ta. 24Kaciwa' Yeso tuu yes, Jwon mba findel i DeeƁwe wa kyel i shak ɗufal i Isar'ila, ɓa si fwal shwaiya, si masus batisma. 25Myan ima Jwon kat ndyong i mbit ti ro ames ni, ‘Hu ma ɗingi yin aweya? Ayin ayis kwa. Ɗeng ma yes na fai amen, ima i ndok i hwet mwinggya' i kpakasak ames ya kwa.’
26“Hun shunun, washash i Ibirai, hun Ramam ima si mwen DeeƁwe fo na saa yuti, si tuk kan a kan muro i abum mai. 27Som i Yerushalima hu kaya si shang Yeso kwa. Myan ima si lef Yeso ɓur i mot hai, si hya findel i som shit ima si mbya'ani shak Mwen ti Lafos. 28Si wisus ti mafwashi ima ka' ɓa si lefus ɓur hai kwa. Shak ta andi, si wa si fwal Pailet ɓa si forus. 29Myan ima si hya shak ɗamam ima ai si worong si yis hai, unai si jakus kyel tasi Shanggam, ɗak si kinus ta fiyai. 30Shak ta andi, DeeƁwe luktus fit ta mot wi. 31Mukonan hyang yis kwafan ti haisus wa kyel i som ima si koltifai ames ta Galili wa Yerushalima. A sin si mii som ima si ɗing ɗamam mii ti shishat ames, ɓa si lak som mukan. 32Nin hwak ni kolu muro maɗesi nyai, findel i kintiɓwi mai ima DeeƁwe mas washash amukani, 33hya kani, kan ima ka mii femes, myan ima zan Yeso fit ta mot wi. Fota ngga' ima si worong ta Nakwai mupil nyai,
“ ‘Ha a al amen,
i te ii dya kwai.’#13:33 Ɗing huni hwak: Nak 2:7.
34“DeeƁwe zan Yeso fit ta mot wi hai ta nyai, Yeso ma wa mot u rut kwa fweng. Fota ngga' ima si worong ta nyai,
“ ‘I wa fasa muɗesani mii
ima si ti sapai,
Ima sima mangrai
ima i fa Devid kintiɓwi i hai.’#13:34 Ɗing huni hwak: Ish 55:3.
35“Si lak ta kyel nin hwak si ni,
“ ‘Ha wa honti Masapai ama u rut kwa.’#13:35 Ɗing huni hwak: Nak 16:10.
36“Takfai tima Devid mas ro ima DeeƁwe fas ta myan ames, mot si laiyus hu washash ames, lo' ames rut. 37Ɗak ima DeeƁwe zanus fit ta mot wi, rut kwa.
38“Ɓurti andi a shunun, ima laksu findel mai ɓa hu shangi nyai, a Yeso ma wa shwaisu mafwashani amu ya. 39Ii ta kyel ames shak maɗufal ima fa mwawei, DeeƁwe laiyus ii manderei. A aɗeng ima anggut i Mosis ndok u masi kwa nai fweng. 40Ɓurti andi kol huni loo, kandok aɗeng ima DeeƁwe lak ta kaadaha i som shit, u wis su. Nyai,
41“ ‘Hal huni, hun som i gbaf!
Shok hun na fwai, hu mwat!
Ɓurti iwa masti ro nin na mukonan amu,
ro ima hu wa fati mwawei i hai kwa,
na ɗing ɗeng tuu laku ti atini.’#13:41 Ɗing huni hwak: Hab 1:5. ”
42Myan ima Pool hu Barnabas si te mulangya ta marei, ɗufali si fwalus nyai ɓa si hum yes findelsus si ɗamam mii hai Mwen ti Lafos muwei. 43Myan ima ɗufal si maɓaas ta marei, Ju hyang hu Ramam ima si fa mwawei si Ju, si kolfai ti hu Pool hu Barnabas. Si findelus si fas njeng i mulut ɓa si cu wei ta maɗesi i DeeƁwe wi.
44Mwen ti Lafos nin ti hum yes, fota shak ashwai si suɓut ɓa si hal findel i Deembai. 45Myan ima som Ju si ɗingi suɓut i ɗufal hyang, si langus nadon hu findelal i se' i zan ti wei ti aɗeng ima Pool ma laki. 46Unai Pool hu Barnabas si humuskyel ti findel ti njeng, si ni, “A kpang ni tong laksu hun Ju findel i DeeƁwe. Fota ngga' ima hu nggyu ti, hu kof haisu hu ɗat wis ti mupwet i myan hu myan kwa. Ɓurti andi, ni nin wa kyel i som ima a Ju kwa. 47Aɗeng ima Deembai lak nin mai,
“ ‘I kinu ɓa hu te ii kweneng
ta kyel i som ima a Ju kwa,
ɓa ha yes ti bum i mupwet
wa anggwe' i naya.’#13:47 Ɗing huni hwak: Ish 49:6. ”
48Ti hal ti mai som ima a Ju kwa, si pipel ti mulwat hu fati ngye si findel i Deembai. Shak som ima DeeƁwe ben ɓa si wis mupwet i myan hu myan, si fa mwawei.
49Findel i Deembai but ta ɓwaiyi ani shak. 50Unai som Ju si shuk shini arof ima si mwen DeeƁwe fo, ima ɗufal si fasus ngye, hu shini mbayai i mashwai. Si ro ɓin ta si Pool hu Barnabas hai, si nggaas ta ɓwaiyi. 51Unai si tabwat ɓura i sisai ames ya ɓa u te i ale' si sin hai, ɗak si wis Ikonyum. 52Som koltifai si jakak fwet, si hya ti Rin Masapai hwak.
Currently Selected:
Ro i Som Muro 13: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
