Jwon 17

Yeso Fwal Ɓurti Haisus

1Yeso lak andi, unai ha' hai fit ni, “A Dee, myan si mas zana al ama fit ɓurti al ama u zana fit. 2Ɓurti ha fas andok tasi shak ɗufal, ɓa u fa mupwet i myan hu myan ta kyel i shak maɗufal ima ha fas. 3A mupwet i myan hu myan, a yis nai si shanga, DeeƁwe andek ɗwyat i mwawei, hu Yeso Kristi ima ha roti. 4I fa ngye na naya ta fisel ti masti ro ima ha fan ɓa i masi. 5Mwashi, a Dee, fa yun ngye na wei ama, ngye ima ai kunti kaciwa' ti ha mas naya.

Yeso Fwal Ɓurti Fe i Ro Ames

6“I ɓu som ima ha fan na naya shishat ya ɓa si shanga. Sin a ama, ha kinus na ra amen si koltifai ti findel ama ndere. 7Mwashi si shang shak aɗeng ima ha fan ii ta kyel ama. 8Ɓurti findel ima ha lakun i lakus, sin hwak si mat, si shangi a awei i yes ii ta kyel ama, si fa mwawei hwak a ha ha rohun. 9I fwal a ɓur sus. I ma fwal a ɓurti naya kwa, a ɓurti som ima ha fan, ɓurti sin ama. 10Shak aɗeng ima i mati ama, shak aɗeng ima hu mati amen, si kof ngye amen ta saa yusti. 11Mwashi i wa muhum mute na naya kwa, sin mii si mana naya, yin ima muhumkyel ta kyel ama ndai. A Dee Masapai, fwangayus ti mbaitat i asum ama, ima ha fan, si te andek fota ngga' ima ku mata. 12Myan ima yin akul hu sin, i fwangus ti asum ama ima ha fan. I fwangus, ɗeng ta saa yusti fot kwa, a yis male'i ani je, ɓurti Findel i DeeƁwe ima si worong u hya.

13“Mwashi i ma yes kyel ama ndai. I ma lak ti findelal mii yin ɗiri na naya, ɓurti si wis pipelat na mulut amen kyalak ta mulwat ames. 14I fas findel ama, naya ti nggwetus, ɓurti sin ii naya kwa, fota ngga' ima yin hwak ii naya kwa. 15Fwal amen kan ha zanus ya na naya kwa, a ɓurti ɓa ha fwangus ta kyel i Shatan. 16Sin ii naya kwa, fota ngga' ima yin ii naya kwa. 17Sapa hayus ya ta saa ti mwawei. Findel asa ayit a mwawei. 18Ngga' ima ha rohun na naya, angga'i nai yin hwak i ros na naya. 19A ɓursus ima fati haisun, ɓurti si sapasya hwak saa ti mwawei.

Yeso Mas Fwal Ɓurti Shak Som Koltifai

20“Fwal amen a ɓurti mi je kwa. I ma fwal hwak a ɓurti som ima si fati mwawei na hai yunti ta findel ames. 21Fwal amen a ɓurti ɓa shak asussi si te andek, fota angga ima ha a Dee, ha mana wii yunti, yin hwak i ta wii yati. I ma fwal nyai ɓa sin hwak si tena wii kunti, ɓurti ɓa naya ti fa mwawei nyai, a ha ha ron. 22Ngye ima ha fan i fas, ɓurti ɓa si te andek fota ngga' ima ku ma andek ta. 23Yin ta wii yusti, ha hwak na wii yunti. Fwal amen ɓa si bam haisus ya si te andek, ɓa naya ti shangi a ha ha ron, ti shangi hwak ha ɓwetus fota ngga' ima ha ɓwetun ta.

24“A Dee, ima ɓweti som ima ha fan mii ɓa si te akul hu yin hwak ta kyel ima i mata, si ɗing ngye amen, ngye ima ha fan ɓurti ha ɓwetun kaciwa' ha mas naya.

25“A Dee manderei, njyal naya a mot ti shanga kwa, yin i shanga, si shangi a ha ha ron. 26I kin si shanga, si wa cwai ti wei ti shangsa ɓurti ɓweti ima ha masuni ɓa u te ta wii yusti. Yin hwak i te ta wii yusti.”

Currently Selected:

Jwon 17: AlisIRonNT

Highlight

Copy