Jwon 4

Yeso hu Mbor Nin ta Samarya

1Farisiyawa si hali nyai, Yeso ma wis ti fe i ro ames yis masus batisma hyang si ɓin i Jwon. 2(Ai a Yeso yis masti batismai ti haisus kwa, a fe i ro ames.) 3Myan ima Deembai wis shangi nyai Farisiyawa si hali, unai hon Judya humuskyel ta Galili.

4Tyos hai kpang ɓa u sata Samarya. 5Unai ru ta nin ashwai ta Samarya ima si lai i Saikar, ta nggas ti kyel ima ai Jakop fa al ames Josep hweer. 6Hum i ham manggyongi i Jakop mata kyeli. Myan ima kyel ti han Yeso ti ɗa'at, unai tyos amun ta foi humi. Aɗeng mai fur asai ren.

7Unai mbor nin al ti Samarya ti wa nang ti ham, unai Yeso nyut, “Fashina ham ta ɓa i wo.” 8(Som koltifai ames ai si lang ta wii i ashwai ɓa si juwil cwa.)

9Unai moti Samarya ti lak Yesoi ti ni, “Ami kin ha maɗufal i Ju ha lul ti ham i woi na kyel amen, yin mbor ti Samarya ya?” (Ɓurti ɗama fwat som Ju hu Samarya kwa.)

10Unai Yeso humut kyel ti findel ni, “Naɗin shi shang mal i DeeƁwe, hu maɗufal ima ma nyai shush, ‘Fashina ham i wo,’ naɗin shi yus wa fwali yis ma wa fashush ham i mupwet.”

11Unai mbori ti nyus, “A Dee, hati ɗam i nang ti ham kwa humi kinggyong. Ha wa wisti ham i mupwet aleya? 12Ha ha ɓin deeminin Jakop ima hon nin hum i woti ham na, yis haisus wo na hu fe ames hu sufat ames haa?”

13Yeso humut kyel ti findel ta, ni, “Shak maɗufal ima wo ham mai ma wa muhum halti myaf hwak. 14Shak maɗufal ima wo ham ima i fas ma wa muhum halti myaf kwa fweng. Ham ima i fasi ma wa mute i ham, yis ɓwirikya fati mupwet i myan hu myan.”

15Unai mbori ti nyus, “A Dee, Faha na ham ani, ɓurti ka i hum halti myaf kwa, ɓurti kan i hum yes nang ti ham nanati kwa.”

16Unai Yeso nyut, “Ɓwish shi lai re amesh hu yes nanati akul.”

17Unai ti humuskyel ti findel ta tini, “I ti re kwa.”

Unai Yeso nyut, “Shi lak mwawei, ima shini shiti re kwa, 18ɓurti mwawei ayis nai, shi kunggo arya hara, ima hu akul mwashi a re amesh kwa. Aɗeng ima shi lak mwashi i mwawei!”

19Unai mbori ti nyus, “A Dee, i ɗingi ha a mashit. 20Hu Demukan i ɓele si fwal DeeƁwe nasi afung mai, ɗak hun Ju hu ni a ta Yerushalima ɗat ka fwal DeeƁwe ta.”

21Unai Yeso humut kyel ti findel ta ni, “A mbor, fashi mwawei, si aɗeng ima i laki, myan ma yes ima ɗufal si wa fwal ti Dee nasi afung mai, hu i Yerushalima kwa. 22Hun ɗufal i Samarya hu fwal ti aɗeng ima hu shangi kwa, nin, ni shang aɗeng ima ni fwali, ɓurti abum yes ii ta kyel i som Ju. 23Myan si yes, u mai ti si yes, ima som i fwal i mwawei si wa fwal ti Deembai saa ti Rin hu mwawei, ɓurti a sin a musut i som i fwal i mwawei ima Deembai ma fari. 24DeeƁwe a Rin, som i fwalsus a kpang si fwalsus ta saa ti Rin hu mwawei.”

25Unai mbori ti ni, “I shangi Kristi ma yes ima si nitus a Kristi. Na yes ma wa piris sikan ɗamam shak.”

26Unai Yeso nyut, “Yin ima i findel ti shish mai, ayin ima ii yisyi.”

Fe i Ro si Hum Kyel

27Tasi myan ima sin hai findel ndai, unai fe i roi si hum kyel, si shok na fwai ti ɗingsus yis findel hu mumbori, ɗeng ames wis njeng ɓa u lul nyai, “Ami shi ɓweti ya,” ahun u lulu nyai, “Ami kin ha findel ti yit ya?” kwa.

28Unai mbori ti hon ɗya amet ta kyeli ti wa ta wii i ashwai ti lak ɗufal ti ni, 29“Yehun, hu ɗing maɗufal ima lakun shak ɗamam ima i masi! Ahun ayis mii Kristi ya?” 30Unai ɗufal si rangya ta ashwai si ka' fisel wa kyel ames.

31Saa ti andi, fe i ro ames si nyus, “Makofti shangi, cwa ɗama.”

32Unai nyus, “I mati cwa nin ima i wa cwai, ima hu shang ɗama ii hai kwa.”

33Unai fe i ro amesi si lul ta ɗiyai nyai, “Ahun ɗeng kolus cwa ya?”

34Unai Yeso ni, “Cwa amen ayis nai, i mas aɗeng ima mata mulut i yis ima rohun, i mbit ro ames. 35I ni ahun hu ni, ‘Kat ture ɓaras ɓa myan i karat ti cwa u mas wa?’ I laksu ha' hun shit fit hu ɗing yangang ndere, ti si nung, si ndok karati. 36Ma karati ma wisti mwat ames, mwashi ma karat ti macwa i mupwet i myan hu myan#4:36 macwa i mupwet i myan hu myan Ayis mii Ma suɓut ti ɗufal ɓurti mupwet i myan hu myan., ɓurti ɓa ma layi hu ma karati si pipel na mulut akul. 37Na kyel mai, laki nyai, ‘Ɗeng lai ɗeng karat’ a mwawei. 38I ro hu ɓa hu karat aɗeng i ma wa' hu mas ro i hai. Shini si mas rai, ɗak hun hu cwai ti mwat i shum amesi.”

Ɗufal Hyang ta Samarya si Fa Mwawei

39Ɗufal hyang ta ashwa ti Samarya, si fa mwawei ɓurti findel ima mbori ti lak nyai, “Lakun shak ɗamam ima i masi.” 40Myan ima ɗufal i Samaryai si yes kyel i Yeso, si fwalus ɓa u te ta akul hu sin, unai mas mukon apil ta ashwai. 41Ɗufal hyang si fa mwawei ɓurti findel i Yeso.

42Unai ɗufal i Samaryai si lak mbori si ni, “Mwashi ni fa mwawei a ɓurti aɗengi ma shi lak kek kwa, a ɓurti nin hwak ni hali ti haisinin, ni shangi awei nyai, maɗufal mai a Mabum i naya.”

Yeso Fa Al i Mbai Nin Cala

43Takfai ti mukon apili, Yeso lang ta Samarya ka' fisel wa Galili. 44(Ai Yeso ti haisus tuu lak nyai, “Si ɗyang mashit ti ɗat ta ashwa ames kwa.”) 45Myan ima ru ta Galili, unai ɗufal i Galili si matus ra apil, ɓurti sin hwak ai si wa Got i Pissihai ta Yerushalima, ta kyeli si ɗing shak ɗamam ima Yeso masi.

46Unai Yeso hum wa ta Kana ta Galili, kyel ima ai hat ti ham ii ham i manggɓu'. Ta kyeli maɗufal nin yis ta maro ta wur i makai, ima al ames ta Kapanahum yis ti cala kwa. 47Myan ima hali nyai Yeso hon Judya, hum kyel ta Galili, unai wa kyel ames fwalus ɓa u wa u fa al ames cala, ɓurti mayus ta foi mot. 48Unai Yeso nyus, “Na hu ɗing ɗamam i shok na fo kwa, hu wa fati mwawei kwa fweng.”

49Unai maro ta wur i makaii lak Yeso ni, “A Deembai, ndakun ta akul kandok al amen motus.”

50Yeso nyus, “Ha ya wa. Al ama ma wa mupwet.”

Maɗufali fa mwawei si aɗeng ima Yeso lakus, unai ka' fisel wis. 51Yis ta fisel wa wur ndai, unai yarai ames si wisus si nyus, “Al amai pwetus.” 52Unai lulus myan ima fur wis ti calai, si nyus, “Akon shitam andek ti ren mwatan i nzami akus ii ra.” 53Unai dees i ali mbe' nyai a si myani kiga' Yeso nyus, “Al ama ma wa mupwet.” Unai maɗufali hu shak wur ames si fa mwawei wa kyel i Yeso. 54A ɗama i shok na fo mapil ima Yeso masi takfai tima hon Judya wa Galili.

Currently Selected:

Jwon 4: AlisIRonNT

Highlight

Copy