Jwon 6

Yeso Fa Ɗufal 5,000 Cwa

1Takfai ti myan ndyong, Yeso pis Yiir i Galili (Yiir i Tiberyas ndai), 2unai ɗufal hyang si koltifai ames, ɓurti si ɗing ɗama i shok na fo ima ma masti som i mwatan ni. 3Unai Yeso ɗu tasi afung, te amun ta akul hu fe i ro amesi. 4Myan i Got i Pissihai i Ju yes anggasi.

5Myan ima Yeso ha' shit fit, ɗing ɗufal hyang sin yes kyel ames, lak Filip ni, “Ka wa juwil ti cwa ima u ndok ɗufal mii i ta leya?” 6Yeso lul a ɓurti ɓa u mba Filip kek, ɓurti Yeso tuu shang aɗeng ima ma wa masi ta mulut ames.

7Filip humuskyel ti findel ta ni, “Mwai i ture myarfu' ma wa juwil ti folok ima ma wa ndoksus wisi ndyong ti ndyong kwa.”

8Unai andek ta saa ti fe i ro ames, ma asum Andru, nusus i Siman Pita lak Yeso ni, 9“Al nin mai mati folok#6:9 Folok Si mas folok mai ti han ima si layani ii bali. hara hu gushe apil. Mii si wa ndok ti ɗufal muhyangi mii haa?”

10Yeso lak fe i roi ni, “Lak hun ɗufali si te amun.” Ta kyeli, falan mata hyang, arya ima si te amunan si kol nggal hara. 11Unai Yeso ha' foloki, kof palang, kaar ɗufal ima si te amuni ngga' ima ndokus ta shak. Masi andi hwak ti gushei.

12Takfai tima si cu si kaf, unai lak fe i ro ames ni, “Suɓut hun ngguturai ima si kati, kan hu hon ɓa u rafat kwa.” 13Unai si suɓut ngguturai i foloki si hyai ta cetat hure mulang apil, ii ta folok hara ani ɗufal si cu kat.

14Takfai tima ɗufal si ɗing ro i shok na fo ima Yeso masi, si fur nyai, “A aweiyi, a mai mii mashit ima ma yes na naya.” 15Yeso yis shang nyai si kin hai ɓa si yes si ha'us ti njeng si fas kaitat, unai si farus wet ɗus tasi anggash hai.

Yeso At si Ham Hai

16Ango ti mas, unai fe i ro i Yeso si ɗor wa ta fo i yiir, 17kyel ima si lang ta kwang i ham si fur pis ti yiir wa Kapanahum. Mwashi, kyel ti mas maɓing, Yeso tuu yes kwa. 18Unai yiiri furus gicik fota wangan ɓurti se manjengi fur ɗafu' ta kyeli. 19Takfai ima si tuk kwang i hami i mel ataat ahun a ataat ta ɓwayi ɗak, unai si ɗing Yeso yis muru ta nggas ti kwang i hami, yis ati tasi hami hai, unai fe i ro amesi si mwen fweng. 20Unai Yeso nyus, “Ayin, kan hu mwen kwa.” 21Unai si ɓwet ɓa si matus ta wii i kwang i hami. Unai abet si ru ta kyel ima si watai.

22Mwen ti ɓu unai anggum i ɗufal ima si kat ta fit i yiiri si ɗingi nyai, a kwang i ham andek je yis ta kyeli, si ɗingi hwak Yeso lang ta kwang i hami akul hu fe i ro ames kwa, si yus ahwes. 23Unai kwangang i ham shini si yes ta Tiberyas, sin mangrai ta kyel ima ɗufal si cu folok ta takfai tima Yeso palang DeeƁwe. 24Abet suɓut i ɗufali si ɗingi nyai Yeso hu fe i ro ames si ta kyeli kwa, unai si rang ta kwangang i hami wi si wa Kapanahum sin far ti Yeso.

Yeso a Folok Ma Fati Mupwet

25Ti wisus ta fit i yiiri, si nyus, “A makofti shangi ha yes nati atami ya?”

26Unai Yeso humuskyel ti findel ni, “I laksu mwawei, hu farsun a ɓurti hu ɗing ɗamam i shok na fo ima i masus kwa, a ɓurti hu cu folok ani hu kafti. 27Ka hu kin hai si far ti cwa ima rwaat kwa, far hun cwa ima ma fati mupwet i myan hu myan, ima Al i Maɗufal ma wa fasu. Ɓurti a tasi Al i Maɗufal hai DeeƁwe nggwak asum asus i hai, kof nyai, ɓwet aɗeng ima ma masi.”

28Unai si lulus nyai, “Ni wa masi atini ni mas roha i ma DeeƁwe ma ɓweti ya?”

29Yeso humuskyel ti findel ni, “Aɗeng ima DeeƁwe ma ɓweti ɓa hu masi a yis nai hu fa mwawei wa kyel i maɗufal ima rous.”

30Unai si humus luli nyai, “Anggi aɗeng i shok na foi ha wa masi ɓa ni ɗingi ni fa mwawei wa kyel ama ya? Ha wa masti amiya? 31Si deemukan i ɓele si cu mana ta ya, fota ngga' ima si worong ta nyai, ‘Fas folok ta fit ɓa si cu.’#6:31 Ɗing huni hwak: Mul 16:4; Neh 9:15; Nak 78:24-25.”

32Unai Yeso nyus, “I laksu mwawei, a Mosis fu folok ta fit kwa, a Deen mafayansu folok i mwawei ta fit. 33Ɓurti folok i DeeƁwe a yis ima ɗwar ta fit u fa mupwet na naya.”

34Unai si nyus, “A Dee, nasi mwashi wa wei, Faha nin musut i folok mai.”

35Unai Yeso lakus ni, “Ayin a folok i mupwet. Maɗufal ima yes kyel amen ma wa muhumkyel ti hwem kwa, maɗufal ima fa mwawei yes kyel amen ma wa muhum halti myaf kwa. 36Fota ngga' ima i laku ta, hu ɗingun, shak ta andi, hu fa mwawei kwa. 37Shak ɗamam ima Deen fan si wa yes kyel amen, maɗufal ima yes kyel amen, i wa nggasus ya kwa. 38I ɗor ta fit ɓa i mas a ɗama i haisun kwa, a ɓurti ɓa i mas a aɗeng ima yis ima rohun. 39Aɗeng ima yis ima rohun ɓwet ɓa i masi, a yis nai kan i fot andek ya na saa ti shak ɗamam ima fan kwa, a ɓurti ɓa i luktus fit mwen ti dala. 40Ɓurti aɗeng ima Deen ma ɓweti ayis nai, shak maɗufal ima ɗing Ali, fa mwawei si yis hai, mati mupwet i myan hu myan, yin i wa ha'sus fit mwen ti dala.”

41Unai som Ju si fur rumung si Yeso hai ɓurti ni, “Ayin a folok ima ɗor ta fit.” 42Si ni, “Ka nyai ahun a Yeso, al i Josep, ima ka shang dees hu nasus wa? Ɗak ami kin mwashi ma nyai, ‘I ɗor ta fit’ ya?”

43Yeso humuskyel ti findel ta ni, “Hon hun rumung ti ɗiyai amu. 44Ɗeng ndok u yes kyel amen kwa, na yis ima rohun dulus tawe. Yin hwak i wa ha' ti maɗufal fit mwen ti dala. 45Si worong ta kaadaha i som i shit, nyai, ‘A DeeƁwe ma wa kofsus shangi shak.’#6:45 Ɗing huni hwak: Ish 54:13. Shak maɗufal ima hal Deen, wis shangi ta kyel ames, yes kyel amen. 46Ɗeng tuu ɗing Deehi kwa, yis ima yes ta kyel i DeeƁwe, a yis je ɗing Deehi. 47I laksu mwawei, shak maɗufal ima fa mwawei si yin hai, mati mupwet i myan hu myan. 48Ayin a folok ma fati mupwet. 49Hu deemu i ɓele si cu mana ta ya, shak ta andi, si mwat. 50Folok ima ɗor ta fit mai, shak maɗufal ima cu folok mai ma wa mot kwa. 51Ayin a folok i mupwet ima ɗor ta fit. Shak maɗufal ima cu folok mai, ma wa mupwet na i myan hu myan. Mai foloki a lo' amen ima i wa fai ɓurti mupwet i naya.”

52Unai som Ju si lang uɓet manjengi ti ɗiyai ames, nyai, “Maɗufal mai ma wa masi atini u fa lo i lo' ames ka cu ya?”

53Unai Yeso nyus, “I laksu mwawei, na hu cu lo i lo' i Al i Maɗufal, hu wo wash ames kwa, hu ti mupwet ta wii yuti kwa. 54Shak maɗufal ima cu lo i lo' amen, wo wash amen mati mupwet i myan hu myan, i wa ha'sus fit mwen ti dala. 55Ɓurti lo i lo' amen a cwa mwawei, wash amen a ɗama i woi mwawei. 56Shak maɗufal ima ma cwai ti lo i lo' amen, yis woti wash amen ma wa mupwet na wii yunti, yin ta wii yusti. 57Fota ngga ima Dee mapweti rohun, a ɓursus i mupwet na, angga'i nai hwak maɗufal ima cuun ii fo i cwa ames, ma wa mupwet na ɓursun. 58Ayin a folok ima ɗor ta fit. Si deemu i ɓele si cu mana, si mwat, shak ta andi, maɗufal ima cu mai foloki ma wa mupwet na yes myan hu myan.” 59Yeso lak mii ɗamami shak a myan ima yis kofti shangi ta mare ta Kapanahum.

A Rin Fai Mupwet

60Ti hali andi, hyang ta fe i ro ames si ni, “Mai findeli mati shum, awe ma wa mati ya?”

61Ti shangi nyai fe i ro ames si rumung si findel amesi hai, Yeso nyus, “Mai findeli rafatu mulwat ya ani? 62Atini na hu ɗing Al i Maɗufal yis muɗu yis yus wa ta kyel ima yesta ya? 63A Rin fai mupwet, lo' mati mbaitat i ɗama kwa. Findel ima i laku a Rin hu mupwet. 64Shak ta andi, shini na saa yuti si fa mwawei kwa.” Tasi bya' Yeso shang ima si fa mwawei kwa, hu ima ma wa mengsus. 65Unai Yeso nyus, “Ayis kin i laku nyai, ɗeng ndok u yes kyel amen kwa, na a Dee fas njeng i yes kwa.”

66Takfai tima Yeso lak mai i findeli, unai hyang ta saa ti fe i ro ames, si humuskyel takfai si hatus tifai, si hon koltifai ames.

67Unai Yeso lul ta hure mulang apili ni, “Hu ɓweti hu honun hwak ani?”

68Siman Pita humuskyel ti findel ta ni, “A Deembai, ni wa wa a kyel i we ya? A ha hati findel ma fati mupwet i myan hu myan. 69Nin ni fa mwawei, ni shangi hwak nyai a ha a Masapai i DeeƁwe.”

70Unai Yeso humuskyel ti findel ta ni, “I benu hure mulang apil kwaa? Andek na saa yuti a Shatan.” 71(Ma findel si a Judas al i Siman ta ta' ti Iskaryot, ɓurti shak ta ngga' ima ma andek ta saa ti hure mulang apili ayis ma wa juwilsus ya.)

Currently Selected:

Jwon 6: AlisIRonNT

Highlight

Copy