Luka 23

Yeso ta Wei i Pailet

(Mat 27:1-2; Mak 15:1-5; Jwn 18:28-38)

1Unai shak suɓuti si lukfit si langti Yeso tawei i Pailet, makunggul i Rom. 2Unai si fur lak ti findelal i tinder nyai, “Ni wis maɗufal mai yis ring ti shak ɗufal aminin ya. Mas wei ti tal ti cef i wufen wa kyel i Makai, yis zan haisus a Kristi, hu makai hwak.”

3Unai Pailet lul ta Yeso ni, “A ha ha mii makai i som Ju haa?”

Yeso matussi ni, “Hei, aɗeng ima ha lak a andi.”

4Unai Pailet lak mbayai i kocokak hu anggum i ɗufali ni, “Yin i wis maɗufal mai ti mafwashi nin kwa.”

5Shak ta andi, si ɓweng sai sin nyai, “Kofiti ames ma ring ti ɗufal na Judya shak. Aɗeng ima ka'i ta Galili u mai ru nanati.”

6Myan ima Pailet hal mai, lul lul ni, “A maɗufal i Galili ani?” 7Myan ima shangi nyai Yeso lang ii ta ta' ti kaitat ti Herod, unai tukus wa kyeli Herod, yis ta Yerushalima. 8Herod pipel na mulut fwet ti ɗing ti Yeso, ɓurti yash yis ɓweti ɗing ti Yeso, kinɓwi ɓa u ɗingus yis masti ɗama i shok na fo ya. 9Unai Herod lulus lulal hyang, Yeso tyos cakat. 10Unai mbayai i kocokak hu som kofiti anggut hai sin mangrai ta kyeli, si ɓweng sisai ti njeng fasus mafwashi. 11Unai Herod hu som i ɓwol ames si totus gbaf hai sin komsus ya. Si ru'us mbai fagin, ɗak si humtus kyel ta kyeli Pailet. 12A mweni Herod hu Pailet si mas myatat, ai sin ha' ti wei ti ɗiyai.

Si Lef Yeso Ɓur i Mot

(Mat 27:15-26; Mak 15:6-15; Jwn 18:39)

13Pailet lai suɓut i mbayai i kocokak, hu kaya, hu ɗufal shak, 14Unai nyus, “Hu kolun maɗufal ima hu ni ma ring ti ɗufal ɓa si njeng na hihai. Mwashi, u mai i benes na wei yuti, i wisus ti mafwashi ima hu lak na hai yusti kwa. 15Herod hwak wisus ti mafwashi kwa, ti'us yes kyel aminin hwak. Ngga' ima hu ɗingi ta, maɗufal mai mas ɗama ima ndok si forus kwa. 16Ɓurti andi, i wa saramansus i catus ii ra.”#23:16 Shini kaadahai si ti 17 Mwashi ai yis ɓweti waksus maɗufal andek ii ra ta kyel i got.

18Unai shak si ha' la ta fit ti fo andek, si ni, “Ha' hun nin maɗufal mai ya na ti! Hu ak nin Barabas ii ra!” 19(Ai si kin Barabas ta wur i shitam ɓurti njeng ti hai ta ashwai, hu for maɗufal.)

20Pailet yis ɓweti ɓa u ak Yeso ii ra, unai hum findel ti ɗufali. 21Unai si cuus wei ti taanja hu rafo nyai, “Nggwak hun yus! Nggwak hun yus!”

22Pailet hum findel mataat ni, “A ɓurti mi ya? Anggi mafwashi maɗufal mai masi ya? Yin i wisus ti mafwashi ima ndok si forus kwa. I wa kini si ndashus, si akus ii ra.”

23Unai si tyos mangrai jiir sin yus ta jai kaciwa' nyai reket sin raafo nyai a kpang si nggwakus. Unai si wo hai ames ti raafo. 24Unai Pailet lef ɓuri ta ngga' ima si ɓweti. 25Unai kin si ak Barabas ii ra ngga' ima si ɓweti, yis ima wa mano' ta wur i shitam, ɓurti njeng ti hai ta ashwai, hu for maɗufal. Unai Pailet fa Yesoi ta ra ames ngga' ima si ɓweti.

Si Nggwak Yeso Tasi Kunggul

(Mat 27:32-44; Mak 15:21-32; Jwn 19:17-27)

26Som i ɓwol sin wa ti Yesoi, unai si shwai hu maɗufal nin ima si lai ii Siman, maɗufal i Sairin, yis yes ta ya. Si lyamus si kinus kpang ɓa u ha' Shanggami u koltifai ti Yeso.

27Ɗufal hyang si kolfai asussi, ta saa yusti shini arofi sin tifai sin kawayai sin gwa'an ti raafo ɓursus. 28Unai Yeso hatat ta kyel ames, nyus, “A arof i Yerushalima, ka hu kawa ɓursun kwa, kawa hun ɓurti haisu hu femu. 29Ɓurti myan si yes ima ɗufal si wa nyai, ‘Disyo' arof ima wa' si al, si ngguriyatus, ima wa' fe si wo fufwaf ames!’ 30A myani,

“ ‘Ɗufal si wa nyai anggashash,

“Fwaar hun nin hai!”

Si wa lak ti fwereha nyai, “vo hun nin ya!” ’#23:30 Ɗing huni hwak: Hos 10:8.

31‘Na ɗufal si mas mai aɗengi myan ima gung i yiti yit ii muɗyayi, si wa masi atini myan ima ti shokut ya?’ ”

32Unai si wa ti shini ɗufal apili ima si mas mafwashi, ɓa si forus akul hu Yeso. 33Myan ima si kol ta kyel ima si lai ii “Kyasas i Hihai” unai si nggwakus si kunggul hai, akul hu som ima si mas mafwashi, andek ta rai ucwa mandeki ta rai ukutyal.

34Unai Yeso ni, “A Dee, shwa yusi ya, ɓurti si shang aɗeng ima si masi kwa.”

Unai si kar arom amesi, ta fisel ti hwiti aben.

35Ɗufal sin mangrai sin ɗingi, som i kaitat si gbafus ya, sin nyai, “Bum shini, hon hun u bum haisus, na ni yis a Kristi i DeeƁwe, ima si Ben!”

36Som i ɓwol hwak si yes si gbafus ya, si ti'us ham i manggɓu' macani. 37Si nyus, “Na ha mii makai i Ju, buma haisa.”

38Si nggwak worong ta fit i hai ames, ima ni, “MAI A MAKAI I JU.”

39Andek ta saa ti asher ima si nggwakus, masus findel i gbya', nyai, “A ha ha mii Kristi kwa haa? Buma haisa, ha bum nin hwak!”

40Asher mapili lakus ɓin ni, “Ha mwen DeeƁwe fo kwani? Si lefa ɓur kiga' hu yis hoo? 41Si lef kun ɓur a kiga' ɓurti ku muhum ti aɗeng ima ku masi. Anggi mafwashi mai maɗufali masi ya?” 42Unai yis ni, “A Yeso! Mbe'a ti yin myan ima ha ka' kaitat ama!”

43Unai Yeso nyus, “I laksa mwawei, kwai ha wa mute akul hu yin ta Wur i Fit.”

Mot i Yeso

(Mat 27:45-56; Mak 15:33-41; Jwn 19:28-30)

44Sai i ren, maɓing vo wufen ya shak, yes shitam ataat ti ango. 45Ɓwe ti nggwet i fati kweneng. Fagir ima si voti wii kyel i Wur i DeeƁwe hwak, matkar apil. 46Yeso taanja ti la mbai ni, “A Dee i fa rin amen ta ra ama.” Myan ima lak mai, dul lafos i dala. 47Mbai i som ɓwol, ɗing ɗamam ima si fur, fa DeeƁwe mbaitat ni, “Aweii maɗufal mai a ma manderei!”

48Myan ima ɗufal shak ima si suɓut ɓa si ɗingi ti shishat ames ɗamam ima ma wa, si shu ra ta hihai ames, si humkyel ti kikyauwat na mulwat. 49Unai shak ɗufal ima si shang Yeso, shak ta arof ima si kolfai asussi ta Galili, si te mangrai ta maleng sin ɗingi.

Lai i Yeso

(Mat 27:57-61; Mak 15:42-47; Jwn 19:38-42)

50Maɗufal nin ma asum Josep, ima ma andek ta saa ti Suɓut i Kaya. A maɗufal manderei, ma myanat ti DeeƁwe fo, 51ima nggwes ti ka'ti man ima si masi tasi i Yeso hai. A maɗufal i Judya ta ashwa i Arimatya, yis shwaiti yes i kaitat i DeeƁwe.

52Wa kyel i Pailet fwalus ɓa si fas funat i Yeso. 53Unai jak funati kyel, ɗak nggi'us ta wii i lukul wi. Wa kin ta fiyai ima si yong ta ɗafyai wi, ima wa' si lai ɗeng ta. 54A Mwen ti Sinzam ti kyel hu Mwen ti Lafos ti kat vaat ɓa si furi.

55Arof ima si kolfai ti Yeso ta Galili, si kolfai ti Josep si ɗing fiyaiyi, hu ngga' ima si kin funat i Yeso ta. 56Si humkyel ta wurai si ɗak ti ɗamam mafyongi hu mbarai mafyongi i fyali. Si fi wur ɓa si hya anggut ti Mwen ti Lafos.

Currently Selected:

Luka 23: AlisIRonNT

Highlight

Copy