Luka 5

Yeso Lai Fe i Ro Ames ti Bya'

(Mat 4:18-22; Mak 1:16-20)

1Mwen nin, Yeso yis mangra ta fo i yiir i Jenesaret. Ɗufal si ka' hyaransus fo, sin hal ti findel i DeeƁwe. 2Unai ɗing kwangang i ham shini apil ta foi yiiri, ima som i ka'ti gushe si honta sinyus sati takalal i ka'ti gushe ames ya. 3Unai lang ta nin kwangi ima i Siman, ɗak fwalus ɓa u tukus ta wi i ham ndyong. Unai te amun ta si kwangi hai yis kofti ɗufal ti findel i DeeƁwe.

4Myan ima mbit findeli, unai lak Siman ni, “Huma tuk ti kwangi u her ta kyel manggyongi, hu hum hwiti takal i gong ti gushe amui ɓa hu ka' gushei.”

5Siman nyus, “A Dee, ni kon ro yes mwen ti ɓwai ni ka' ɗama kwa fweng. Na ha lak andi, i wa masi.” 6Myan ima si hwiti takal i ka'ti gushei ta ham wi, unai si ka' male' i gushei kol ima takali mayus ɗwakan. 7Ti ɗing ti mai aɗengi, unai si lai myayus ta kwang mandeki ɓa si yes si bumus. Unai si yes si hya kwangang apili ti gushe, si kat ndyong si mbwish ta ham wi.

8Myan ima Siman Pita ɗing aɗeng ima Yeso masi, unai shu i mafwaran ta mabel i Yeso, ni, “Ha wa na kyel amen a Deembai, i yun ii ma mafwashi!”

9Siman Pita hu som ima sima akul si shok na fwai fwet ɓurti male' i gushe ima si ka'i. 10Myayus, Jemis hu Jwon fe i Zebedi, sin hwak si shok na fwai.

Unai Yeso lak Siman ni, “Kan ha mwen kwa, mwashi a ɗufal ha wa yaasan ti, ha wa gong ti gushe kwa.”

11Unai si dul kwang ames wa ta ɓwai i yiiri, si hon ɗamam shak, si kolfai ti Yeso.

Yeso Fa Nggeter Cala

12Mwenin, Yeso yis ta ashwa nin, unai maɗufal nin yes ima nggeterat ti vo lo' i ya shak. Ti ɗing ti Yeso, shu mafwaran fwalus, yis nyai, “Deembai, na ha ɓwet fa sun cala, ha sapan ya hwak.”

13Yeso ti' ra ames ngge'us ti, ni, “I ɓwet, ɓi sapa ha ya.” Fo abet nggeterati honus.

14Unai Yeso lakus ni, “Kan ha lak ɗeng kwa, ɓwa ha kof haisa ta kyel i makocok, ha fa mal ima si fayani ta ngga' ima anggut i Mosis ni ɓa si masi, ɓurti ha wis sapa. Masai andi ɓurti ha kof ɗufal nyai ha wis njeng.”

15Shak ta andi, findel i Yeso but ta ashwai, ɗufal hyang si ka' yes ɓa si halus, sin far ti cala tasi mwatanan ames shak. 16Yeso tyai u wa kyel nin i mufot, ɓurti fwal ti DeeƁwe.

Yeso Fa Mashok na Lo' Cala

(Mat 9:1-8; Mak 2:1-12)

17Nin mweni ndai, Yeso yis saa ti kofti shangi, shini Farisiyawa, hu som kofiti si anggut i Mosis, ima si yes ta hwenan i Galili hu Judya hu ta Yerushalima hwak, sin amun ta kyeli. Mbaitat i Deembai yis akul hu yis ɓa u fa som ima si ti mwatanan cala. 18Shini ɗufali si yes ti mashoki lo' nin, si kin tasi lapan hai. Sin twakan ti ɗufal ɓa si langtus ta wii i wur, ɓurti si kinus ta mabel i Yeso. 19Si wis fisel i mulang kwa, ɓurti ɗufal si ɓal. Unai si ɗu ta hai i wur, si ɓo swai si jakus kyel ta tasi lapan hai, ta saa ti ɗufal wi ta mabel i Yeso. 20Ti ɗing ti ngga' ima si fa mulwat ta, lakus ni, “A mwen, i shwa mafwashani ama ya.” 21Farisiyawa hu som kofiti si angguti hai si lak ɗiyai nyai, “Anggi maɗufali mai u lak findel i ale' wa kyel i DeeƁwe ya? Awe shwai mafwashi ya na a DeeƁwe kwa ya?”

22Yeso shang ambe' i mulwat ames, lulus ni, “Ami kin hu maas ti musut i ambe' mai ta mulwat amu ya? 23Anggi ɓin mbwesh ya, ɓi si ni, ‘I shwa mafwashani ama ya’ ahun ɓi si ni, ‘Lukka fit, ha wa ya?’ 24Ɓa hu shangi nyai yin, Al i Maɗufal, i mati mbaitat na naya, ɓa i shu mafwashi ya.” Unai Yeso lak mashok lo'i ni, “I lak sa, luka fit, zana lapan ama, ha wa wur.” 25Fo abet luk fit ɗufal sin ɗingi, ha' lapan ima ai si kinus i hai, ka' fisel wis wur, yis palang ti DeeƁwe. 26Ɗufal shak si shok na fwai, myanat ka'us, sin fati DeeƁwe mbaitat nyai, “Kwai ni ɗing aɗeng i lum ti fo ya.”

Yeso Lai Lawi

(Mat 9:9-13; Mak 2:13-17)

27Takfai ti andi, Yeso lang ya unai ɗing ma mati cef i wufen ma asum Livai, yis mute ta kyel i ro ames. Unai Yeso lakus ni, “Kolafai asuni.” 28Unai Livai hon ɗamam shak, lang kolfai asussi.

29Unai Livai ɗi mbai got ta wur ames ɓurti Yeso. Som i mati cef i wufen hu shini hyang sin ta, sin cwai ti cwa akul. 30Farisiyawa, hu som kofiti si anggut hai ima si tikul, si lak tirim ames ta kyel i fe i ro i Yeso nyai, “Ami kin huma cwai hun woi hu som i mati cef i wufen hu som mufwashi ya?”

31Unai Yeso matussi ni, “Macala wai kyel i mamanda kwa, a mamwatan. 32I yes ɓa i lai a som munderei kwa, a mufwashani.”

Si Mas Yeso Lul Tasi Ka'ti Fo ya

(Mat 9:14-17; Mak 2:18-22)

33Unai si lak Yeso si ni, “fe i ro i Jwon si ka'an ti fo ya, ti myan ti myan, sin fwal ti DeeƁwe, hu som Farisiyawa hwak, ama ngang si yus cwai ta woiyi.”

34Yeso matussi ni, “Hu wa sha ti myayus i makunggo cwa, na sin akul hu makunggoi haa? 35Myan sima yes ima si wa ha' ti makunggoi ya, si kat ahwesi, a ta myan ani, si wa ka'ti fo ya.”

36Unai kaanus findel nin nyai, “Maɗufal zan ɓwai i fagin mamwai, u tor tasi hai i fagin mawili kwa. Na masi andi, te ndai gwyak ti fagin mumwai ima masi ɓa u lis ti fagin muwiliyi ma wa ɗat kwa. 37Maɗufal shwai ham i manggɓu' ta wii i rukul mawili kwa. Na masi andi, hami na can ma wa taɗas ti rukuli ya, u wis ya, rukuli hwak u rafatus. Wayou, maɗufali ma wa shwaiti ham i manggɓu' ta rukul mamwai wi. 38A kpak ka shu ham i manggɓu' mamwayi ta rukul mamwayi. 39Ɗeng waa ham i manggɓu' mawili ɗak humkyel uni ma ɓweti mamwai kwa, ma wa nyai, ‘Mawilii ɓin mamwaiyi mimyat.’ ”

Currently Selected:

Luka 5: AlisIRonNT

Highlight

Copy