Luka 9
9
Yeso Ro Hure Mulang apili
(Mat 10:5-15; Mak 6:7-13)
1Myan ima Yeso lai hure mulang apili ta kyel andek, fas mbaitat hu andok ɓa si ngga rin mafwashi ya, hu si fa shak ɗufal cala ta mwatanan wi. 2Ɗak rohus ɓa si but muro i kaitat i DeeƁwe sin fati ɗufal cala hwak. 3Unai lakus ni, “Ka hu ha' ɗama ta ra ti wa mai ɗa'ati kwa, ka hu ha' yal, hu rukul, hu cwa, hu cef kwa, ka hu ha' arom apil kwa. 4Shak wur tima hu lang ta, na si matu ti ra apil, hu te ta yes mwen tima hu wa honti ashwai. 5Shak kyel ima ɗufal si nggwetu ta, tabwathun ɓura i sisai amu ya ta, ɗak hu honus ashwai ɓa u te ii ɗama laki ta kyeli.”
6Unai langya si cu wei ti ati ti ashwahai sin but ti muro maɗesi hu fati ɗufal cala, shak kikyal ima si lang ta.
Ambe' i Herod Ring
(Mat 14:1-12; Mak 6:14-29)
7Myan ima Herod makai i Galili, hal shak ɗamam ima sima wa, ambe' ames ringus hyang, ɓurti shini ɗufali si nyai, “A Jwon Mabatisma lukus fit ta fiyai!” 8Shini si ni a Iliya hum yes na, shini si nyai a nin mashit ima ai i ɓele lukus fit ta fiyai. 9Unai Herod ni, “Ai i lef hai ti Jwon ya ɗak awe mai ima i hal ti findelal si yis hai mai ya?” Unai wop far ti ngga' ima naɗin u ɗing Yeso ta.
Yeso fa Ɗufal Nggal Hara Cwa
(Mat 14:13-21; Mak 6:30-44; Jwn 6:1-14)
10Myan ima fe muroi si humkyel, si lak Yeso shak aɗeng ima si masi. Unai harus cakat wisti ta ya nin ta Betsaida sin ahwes. 11Ti hal ti kyel ima si humta, suɓut i ɗufal si kolfai, unai yis hwak shwaiyus ti yes, kofus ti muro maɗesi i kaitat i DeeƁwe. Unai fa som ima si ti mwatanan cala.
12Myan ima ɓwe ti kat ndyong i ndak, unai fe muro ames si yesus nggas, si ni “Naɗin ha ti' ɗufal a mii ya ɓa si lang na ashwa hu wurai i ɗufal si far cwa hu kikyal i mukon ɓurti kyel ima ka mana mai a ya.”
13Unai Yeso nyus, “Fahun ɗufal cwa si cu.”
Unai si matussi nyai, “Ni ti a folok hara hu gushe apil je, na andi kwa a kpang ni wa ni juwil cwa ɓurti shak ɗufal mii. 14Ɗufal muryai kyek si kol nggal hara.” Unai lak fe i ro amessi ni, “Lak hun ɗufal si te amunan ti kikyal hure hara-hara.” 15Unai si masi ta ngga' ima lakus ta, si kin ɗufal shak si te amun. 16Unai Yeso mat folok harai hu gushe apili, ɗing kyel ta fit palang, ɗak nggyal fa fe i ro ames ɓa si kaar ɗufali. 17Unai shak ɗufali si cu si kaf si gwishil. Fe i ro ames, si suɓut puɓus ima kat, si hya cetat hure mulang apil.
Pita Lak ni Yeso a Kristi
(Mat 16:13-19; Mak 8:27-29)
18Myan nin Yeso yis fwal ti DeeƁwe ahwesi, unai fe i ro ames si yes kyel ames, unai lulus ni, “Ɗufal si nyai yin aweya?”
19Unai si nyus, “Shini si ni, a Jwon Mabatisma, shini si ni, a Iliya, shini hwak si ni, a mashit nin ima ai i ɓele lukus fit ta fiyai.”
20Unai Yeso lakus ni, “Hun hee, hu nyai yin aweya?”
Pita matussi ni, “Ha, a Kristi i DeeƁwe.”
Yeso Lak Musut i Mot ima Ma Wa Masi
(Mat 16:20-28; Mak 8:31-38)
21Unai Yeso zulus mwal fwet ni, kan si lak ɗeng mai findeli kwa. 22Ɗak hum laksus nyai, “A kanggang yis, Al i Maɗufal u wo shum si ɗamam hyang. Kaya hu mbayai i kocok hu som kofiti si anggut hai si tus wa munggwya, a kpak si forus ya. Shak ta andi, u lukus fit ta fiyai takfai ti mukonan ataat.”
23Unai lakus shak ni, “Na ɗeng yis ɓweti koltifai asuni, a kpak u nggwes ti haisus, u ha' Shanggam i shum ames ngang ɗak kolfai asuni. 24Shak maɗufal ima ɓwet mupwet asus, ma wa duni. Shak maɗufal ima dun mupwet asus ɓursun, ma wa wisi. 25Ami a ɗat ames ya, maɗufal u wis ɗamam i naya mii shak, ɗak tos u dun mupwet ames ya? 26Shak maɗufal ima ma shusho i dor sun, hu findel amen ta kyel i ɗufal, Yin Al i Maɗufal i wa shusho i dorsus myan ima yes ta cinjangat ames, hu cinjangat i Dee hu i som lu' musapai. 27I laksu mwawei, shini ima si mangrai nati si wa ɗing ti kaitat i DeeƁwe tawe ɗak si mot.”
Mushen na lo' i Yeso
(Mat 17:1-8; Mak 9:2-8)
28Mukonan myarfu' takfai tima Yeso lak mai findeli, unai har hu Pita, hu Jemis, hu Jwon watus ta fwere ɓa si fwal DeeƁwe. 29Yeso te fwal ti DeeƁwe ndai, unai shak mute asus ti shenut, arom ames si pipelus syak fota nzilwit i bara. 30Fo abet ɗufal apil, a hu Mosis hu Iliya. 31Si pwak ya ti cinjangat sin findel hu Yeso. Sin lak ti ngga' ima ma wa honti naya ta, ima kat ndyong i hya ta Yerushalima. 32Pita hu myayus sin raki, ti ɓushwat ames, unai si ɗing cinjangat hu mbaitat i Yeso hwak hu ɗufal apil mangrai akul hu yis. 33Myan ima ɗufal apili sin honti Yeso ndai, Pita nyus, “A Dee, ɗat naɗin ka tyai kan nanati, ka mas bukak ataat, andek ɓursa, andek ɓurti Mosis, andek ɓurti Iliya hwak.” Shang aɗeng ima ma laki kwa.
34Pita yis saa ti findel unai ri' mapeli nin ɗor ta fit vos ya shak, myanat ti ka'us myan ima ri'i vos ya. 35La nin ti findel ta wi i ri'i nyai, “Mai a Al amen, ima i ben, hal hun yus!”
36Myan ima findeli mbit, Yeso kat ahwesi. Sin ima si wa akuli si ka'i ta mulut cakat kaciwa' lak ti ɗeng aɗeng ima si ɗingi yes myan hyang.
Yeso Fa Al Ma Rin Mafwashi Cala
(Mat 17:14-18; Mak 9:14-27)
37Wasan myan ima si ɗor ya ta fwere, ɗufal hyang si yes si wis Yeso. 38Maɗufal nin ta saa ti ɗufali mat raafo ni, “A Makofiti, ɗinga shum ti al amen mai, ayis mai ɗwyat. 39Rin mafwashi ndwak u yes sus hai, u kinus raafo, u kinus maɓyar mabwatat i lyau yis murangya ta fo. Haa'us u patikyel ta fisha, u nggwes i waksus i ra, u ɓyar ya, u mbulwat lo' ya hyang. 40I fwal fe i ro ama ɓa si nggasi ya, si mbai wet.”
41Unai Yeso matussi ni, “Hun waya mii, ima hu fa mwawei kwa, som i masti mafwashi! I wa mute akul hu hun wa anggi myani ya? I wa ka'ti mulut ti hun wa anggi myani ya? Yehun ti ali nati.”
42Myan ima ali te yes kyel i Yeso ndai, rin mafwashi ha'us patikyel ta fisha, lo' ames roos. Unai Yeso lak rin mafwashi ɓin, ɓa u lang ya, fa ali cala, ɗak ha'us fa Deehi. 43Aɗengi fa ɗufal ima si ta kyeli shok na fwai, ti ngga' ima si ɗing mbaitat i DeeƁwe ta.
Yeso Hum Findel ta si Mot Ames Hai
(Mat 17:22-23; Mak 9:30-32)
Myan ima sin ɗiri findelal si ɗamam i shok na fo ima Yeso masi, unai lak fe i ro ames ni, 44“Kin hun mwal hu hal findel mai ima i wa laksu. Si wa fati Al i Maɗufal ta ra i ɗufal.” 45Shak ta andi, si shang aɗeng ima malaki kwa, ɓurti fotus ti fo, sin hwak si mwenus i lulsus hai i findeli.
Awe Ɓin Nge Ya?
(Mat 18:1-5; Mak 9:33-37)
46Unai uɓet ti lang ta saa ti fe i ro amesi nyai, awe ma wa mute ii mbai ya? 47Yeso shang ambe' ames, unai ka' ra i al al nin hyer ti ta nggas yusti. 48Ɗak nyus, “Shak maɗufal ima mat al mai ti asum amen, ayin ma mati, shak maɗufal ima matun yin, mat ayis ima roon. Maɗufal ima mii mavaati na saa asu, ayis ɓin mute ii mbai shak.”
Shak Maɗufal ima Nggwetu kwa a Yis mii Amu
(Mak 9:38-40)
49Jwon lak ni, “A Dee, ni ɗing maɗufal nin yis nggati rin mafwashi ya ti asum asa, ni shaas, ɓurti ma akul hu kan kwa.”
50Unai Yeso matussi ni, “Ka hu shaas kwa, ɓurti shak maɗufal ima nggwetu kwa, ayis mii amu.”
Som i Samarya si Nggwes ti Yeso
51Myan ima muhumkyel asus ta fit si kat ndyong, unai kin hai, ka' fisel mangra wa Yerushalima. 52Unai ro fe muro ames ta wei, si wa ta foti ashwa ti Samarya nin ɓa si ɗakus ti kyel ta. 53Unai som i mashwai si nggwes i matsus, ɓurti si ɗingi tuu kinus hai wa Yerushalima. 54Ti hal ti findeli ta kyel i fe muroi, Jemis hu Jwon si lul ta Yeso nyai, “A Deembai, ha ɓwet ni lai man ta fit ti yes ti ngyeshsus ya shak waak?”
55Unai Yeso hatat lakus ɓin.#9:55 Shini kaadahai, “Hu shang musut i Rin ima hu ti kwa. Al i Maɗufal yes ɓa u fwaar a ɗufal ya kwa, yes ɓa u fas a mupwet.” 56Unai si wa ta ashwa nin.
Shum i Koltifai ti Yeso
(Mat 8:19-22)
57Sin yus ta fisel i wa ɗa'at, unai maɗufal nin lak Yeso ni, “I wa koltifai asai ku wa shak kyel ima ha wa ta.” 58Yeso matussi ni, “Kyara i fyarai si ti siswyai i mute, avyash si ti siwit, yin Al i Maɗufal i mati kyel ima ɓa i kin hai ta kwa.” 59Unai lak nin maɗufali ni, “Kolafai asuni.” Unai maɗufali nyus, “A Deembai, hona i humkyel ta wur i lai Deen tawe.”
60Unai Yeso matussi ni, “Hona funat si lai funat ames. Ha ɓwa ha but kaitat i DeeƁwe.”
61Maɗufal nin hwak lak Yeso ni, “A Deembai, i wa koltifai asai, hona na i wa i lak som i wur amen matkaar tawe.”
62Unai Yeso nyus, “Shak maɗufal ima ha' huɓeng i mahan ta ra ɗak ɗyangus kyel takfai, ndok u mas ro i kaitat i DeeƁwe kwa.”
Currently Selected:
Luka 9: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
