Matyu 14

Mot ti Jwon Mabatisma

1Ta myan ani, Makai Herod Antipas hal jam si mangga' i Yeso, 2lak som i ro ames ni, “Mai a Jwon Mabatisma, luk fit ta fiyai. Ayis nai kin mati mbaitat i masti ɗamam i shok na fo mii.”

3Ai, Herod tuu ka' Jwon no'us, kinus ta wur i shitam, ɓurti Uhirodya mbor ti nusus Filip. 4Ai, Jwon lak Herod nyai, “A kiga' ha kol Uhirodya ii mbor kwa.” 5Herod yis ɓweti for ti Jwon ya, shak ta andi mwen ɗufal fo, ɓurti si zan Jwon a mashit.

6Myan ima Herod yis ti got i mbe'i ti mwen tima si alus, al ti Uhirodya ti lang ador ima ɗat Makai Herod ta si ɓwi fwet. 7Kol ima fat kintiɓwi ta shiɗati nyai, ma wa fasut shak aɗeng ima ti lul. 8Nasut ti tufut lyau ta fo si mangga' i aɗeng ima ti lak, unai ti ni, “Faha na hai ti Jwon Mabatisma na wii ɓeleng.” 9Makai Herod tirim ti ambas, shak ta andi, ɓurti shiɗat ima masi hu mwalmwat ames, unai ni ɓa si fat aɗeng ima ti ɓweti. 10Tuk muro si wa wur i shitam, si tel hai ti Jwon ya. 11Si yes ti haiyi ta ɓeleng si kol yamwani, ɗak yit ti kol nasut. 12Fe i ro i Jwon si yes si zan funat ti si lai. Ɗak si wa si lak Yeso.

Yeso Cu Ti Nggal Hara

13Myan ima Yeso hal aɗeng ima fur, lang ta kwang i ham wis kyel nin ima ɗeng mata kwa. Ti hal ti mai, suɓut i ɗufal si kolfai asussi i sisai ta ashwaha. 14Myan ima ɗor ya ta kwang i hami, ɗing suɓut i ɗufal i hyang, ɗing shum asussi, fa som mwatan cala.

15Ango ti mas, fe i ro ames si yes kyel ames si nyus, “Kyel mai a ya, myan ti si langus ta. Cat ta ɗufal ii ra si wis, ɓa si wa fe ashwaha si far cwa si pwak.”

16Yeso matussi ni, “Ɗat si wa kyel nin kwa, hun fa hu yus ɗama si cu.”

17Si matussi si ni, “Ni mati a folok hara hu gushe apilal je.”

18Unai nyus, “Kol huna nati.” 19Lak ɗufali ni ɓa si te amun ta si shala' hai. Mat foloki ta gushei, ɗak ɗing kyel ta fit, palang DeeƁwe, nggyal foloki, fa fe i ro ames, si cu wei ti kaar ti ɗufali. 20Shak asussi si cu si kaf, fe i ro ames si suɓut ngguturai yi, kol cet hure mulang apilal. 21A arya nggal hara si cu, si mbe' arof ta fei kwa.

Yeso At si Ham Hai

22Fo abet Yeso lak fe i ro ames ɓa si rang ta kwang i ham, si cu wei ti wa ɓa si pis si fiti hai, yis kat ti' ti ɗufal ya. 23Takfai tima ti' suɓut i ɗufali ya, unai ɗu ta ɗanggash yis ahwes ɓa u fwal DeeƁwe. Myan ima ango ti mas, yis ta kyeli ahwes, 24kwangi rus ta saa ta yiiri, se manjengi lang gucuk ti hami ɓin ti njeng ames.

25Myan ima shitam ataat ti foi mwen ti mas, Yeso yis ati tasi ham hai wa kyel i fe i ro ames. 26Unai fe i ro ames si ɗingus yis ati tasi ham hai, myanat ka'us, si gwa' rafo, si ni, “A malu'!”

27Fo abet, Yeso findelus ni “Ka hu tirim kwa! Ayin. Ka hu mwen kwa.”

28Pita ni, “A Deembai, na a ha, kina ɓa i yes kyel ama nasi ham hai.”

29Yeso nyus, “Yaa.”

Unai Pita jik ya ta kwangi, at si ham hai yis yes kyel i Yeso. 30Myan ima ɗing se yis hwirish ti ambas, myanat ka'us, unai langus mbwish ta ham wi, ɗak mat shaat ni, “A Deembai, buma na!”

31Fo abet Yeso ti' ra ka'us. Nyus, “Ha ma fati mulut ndyong, ami kin ha ma mulut apil-apil ya?”

32Myan ima si rang ta wii kwang i hami wi, sei kat ya. 33Unai ima si ta wii kwang i hami si cus afut, si ni, “A awei, ha a Al i DeeƁwe.”

34Myan ima si pis si fiti hai, si ɗor ya ta ta' ti Jenesaret. 35Myan ima ɗufal i ashwai si shangi a Yeso, unai si lai ɗufal ta kikyal shak. Ɗufal si yes ti shak som mwatanan ta kyel ames, 36sin fwalsus ɓa u hon som i mwatanani si ngge' fagin ames kyek. Shak som ima si ngge'us si wis cala.

Currently Selected:

Matyu 14: AlisIRonNT

Highlight

Copy