Rom 3
3
A DeeƁwe je Ka wa Kintiɓwi si Yis Hai
1Ami a ɗat i mute ii ma Ju ya, ahun anggi ɗati mukwen mati ya? 2Hei angga'i nai, mute ii ma Ju mati ɗat ta fiselal hyang! Ti bya', DeeƁwe fa a som Ju muro ames ta ra.
3Na shini sin ti fati mulut kwa hee? Kof ndai ɓurti si ti fati mulut kwa, ka kinɓwi si DeeƁwe kwa haa? 4Wayou! DeeƁwe a ma mwawei, ɗufal shak a som i fyaratat. Fota ngga' ima si worong ta nyai,
“Ɓurti na si mba ha
si wisa kiga' ta findel ama,
ha wis mulangya ta puɓwar wi.”#3:4 Ɗing huni hwak: Nak 51:4.
5Na to amukan kof nyai DeeƁwe a manderei rasman, ka wa nyai amiya? Ka ni DeeƁwe masi a ndyas kwa, ima yes ti futut ames na hai kan ti haa? (I ma findel ti a ambe' i maɗufal.) 6Andi kwa fweng! Na yis a andi, DeeƁwe ma wa tot ti naya moti puɓwar atini ya? 7Ɗeng ma wa masti uɓet, “Na halngyat amen kin mwawei ti DeeƁwe ti ngye, ɗak cinjangat ames ngye hwak, ami kin si lef sun ɓur hai fota ma mafwashi ya?” 8Hu ɗufal shini hwak si rafat kan asum ya ti nyai, ka ni, “Ka cu wei ti masti mafwashi ɓa maɗesi u ngye!” Som ima si lak musut i ɗamam mii asus ti pun.
Ɗeng a Manderei Kwa
9Ka wa dala ti findeli atini ndai ya? Kan Ju ka ɓin anggumi ani? Andi kwa fweng! Ti ka kof nyai, Ju hu Ramam shak si mata ra i mafwashi. 10Fota ngga' ima mata worong,
“Ɗeng a manderei kwa,
si wis andek kwa fweng.
11Ɗeng ames ka'i kwa,
ɗeng far DeeƁwe kwa.
12Shak si hat DeeƁwe ti mas,
shak si tehus ii ɗama i gbya'.
Ɗeng mas maɗesi kwa,#3:12 Ɗing huni hwak: Nak 14:1-3; Nak 53:1-3; Maɓ 7:20.
si wis andek kwa fweng.”
13“Woorong ames a fiyai ima ma awuri
alisas ames ma shang ti ro i dang.”#3:13 Ɗing huni hwak: Nak 5:9.
“Mwatan i anggor i ɗamafwashi
mata fwai yusti.”#3:13 Ɗing huni hwak: Nak 140:3.
14“Fwai ames hya ti findel i ale' hu maɓol.”#3:14 Ɗing huni hwak: Nak 10:7.
15“Sisai ames te randal si shwaiti wash ya.
16Rafati ya hu shum kwalfai asussi ngang.
17Si shang fisel ti mute cala kwa.”#3:17 Ɗing huni hwak: Ish 59:7-8.
18“Si mwen DeeƁwe fo kwa fweng.”#3:18 Ɗing huni hwak: Nak 36:1.
19Mwashi ka shang aɗeng ima anggut lak, lak a som ima si ta ra i anggut, ɓa fwai i som shak si kat cakat, hu shak naya ti fa ambe' ta wei i DeeƁwe. 20Ɓurti andi, ɗeng ma wa mute ii manderei ta shishat ames ta fisel ti masti ro ti anggut kwa, fo i mandi, tasi anggut hai ka shang mafwashi.
Mute Manderei ta Fisel ti Fati Mulut
21Mwashi si kof kan ti mute manderei ta kyel i DeeƁwe, kaciwa' masti ro ti anggut, ima Anggut hu worong i som shit i DeeƁwe si lak. 22Mute manderei mai yes ii ta kyel i DeeƁwe, ta fisel ti fati mulut saa ti Yeso Kristi wa kyel shak som ima si fa mwawei. Kaciwa' ɓweti hai, 23ɓurti shak ɗufal si mas mafwashi, si to ta cinjangat i DeeƁwe. 24DeeƁwe kinus mute manderei ti mal ames, ta fisel ti dumi ya, ima yes ta kyel i Yeso Kristi. 25DeeƁwe fa Yeso ɓa u te fota kuna i ha' ti mafwashani ya, ta fisel ti fati mulut saa ti wash ames. Mas mai ɓa u kof mwawei ames, ɓurti saa ti ka'ti agung ames hon mafwashi ima si masi kaciwa' andash. 26Masi andi ɓa u kof mwawei ames nasi myan ti mwashi, ɓa yis u mas mwawei hu ima cat sin ima si fa mulut si Yeso hai ii ra.
27Ka wa pati ajin nyai ka mas ɗama nin ima DeeƁwe ma ɓweti haa? Wayou, ɓurti DeeƁwe mat kan ii ta fisel ti masti ro ti anggut kwa, ii ta fati mulut. 28A ɓurti ka ka'i kporong nyai, DeeƁwe kin maɗufal mute manderei ii ta fisel ti fati mulut kaciwa' masti ro ti anggut. 29DeeƁwe a DeeƁwe i som Ju je haa? Ayis a DeeƁwe i Ramam hwak kwa haa? Hei, ii Ramam hwak. 30Ɓurti DeeƁwe ma andek je, ma wa masti mwawei wa kyel i som ima si masus mukwen ta fisel ti fati mulut, hu ima si masus mukwen kwa ta si i fati mulut ani. 31Ka wa fot ti angguti ya ndai ɓurti fati mulut si mai haa? Andi kwa fweng! Fo i mandi, ka wa hya ti angguti.
Currently Selected:
Rom 3: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
