Rom 5
5
Mute Cala hu Jakak
1Ɓurti andi, ka wis mute manderei ta fisel ti fati mulut, ɓa ka mas mute cala akul hu DeeƁwe saa ti Deembai amukan Yeso Kristi, 2ii ta kyel ames, ka wis fisel i fati mulut nasi mal ima mwashi ka ma mangra ii hai mai. Ka jakak si kintiɓwi i cinjangat i DeeƁwe. 3Andi kyek kwa, ka jakak hwak saa ti shum amukan, ɓurti ka shangi shum ti kwal ka'ti agung, 4Ka'ti agung ti yas ti asum maɗesi, asum maɗesi yas ti kintiɓwi. 5Kintiɓwi fai kan shusho kwa, ɓurti DeeƁwe shukan matɓwet ames na mulwat, ta Rin Masapai ima yis fa kan.
6Hal huni, tasi myani ndyas, kan ɗiri kaciwa' ti ka wis bum, Kristi mot ɓurti ɗufal ima si shang DeeƁwe kwa. 7Mati shum ɓa ɗeng u mot ɓurti maɗufal manderei. Nan ɗeng u rwish ya u mot ɓurti maɗufal ma maɗesi. 8DeeƁwe mba matɓwet ames yes kyel amukan nasi mai, myani kan ɗiri ii som i masti mafwashi, Kristi mot ɓur sikan.
9Mwashi ima ka wis mute manderei ta saa ti wash ames, ka wa wis ti bum gbum ta futut i DeeƁwe ta kyel ames. 10Myan ima kan ii som i ha' ti wei ti DeeƁwe, DeeƁwe tot kan ɗor ya ta fisel ti mot i Al ames. Mwashi ima si hat ti kan ii myayus i DeeƁwe, andi hwak si wa bum sikan ti mupwet i Ali! 11Andi kyek kwa, ka wa jakak hwak saa ti DeeƁwe ta kyel i Deembai amukan Yeso Kristi, ima ii ta fisel asus mwashi tot kan ɗor ya.
Mot Ti Yes ii ta Kyel Damu Mupwet Ti Yes ii ta Kyel i Kristi
12Ɓurti andi, ta ngga' ima mafwashi lang na naya tasi maɗufal andek, hu mot ii ta mafwashi wi. Ii ta fisel moti, mot yes kyel i ɗufal shak, ɓurti a shak si mas mafwashi. 13Mafwashi ai yis na naya ɗak anggut yes, si mbya' ii mafwashi myan ima wa' anggut tuu yes kwa. 14Shak ta andi, mot ti mas kaitat si ɗufal hai tasi myan i Damu yes myan i Mosis, hu som ima mafwashi ames a nggyel ti anggut ya kwa hwak, fota ngga' ima ai Damu masi ta. Ayis ma fota ima ma wa yes.
15Ɗak mali ma fota mafwashi kwa. Ɓurti na mafwashi i maɗufal andek kin ɗufal hyang si mot, andi hwak maɗesi hu mal i DeeƁwe ima yes ta maɗesi i maɗufal andek, Yeso Kristi, ma wa kukwol wa kyel i ɗufal hyang! 16Maɗesi i DeeƁwe ma akat tasi mafwashi i maɗufal andek ani. Ɓur ima kolfai ti mafwashi andek yas ti andash, ɗak mal ima DeeƁwe fai, kin ka te kaciwa' mafwashi ta mabel i DeeƁwe, shak ta mafwashani ima ka masi hyangi. 17Ɓurti na mafwashi i maɗufal andek mai, Damu, mot ti mas kaitat ta fisel ti maɗufal andek ani, ma wa mute atini tasi som ima si mat mal mahyangi i DeeƁwe hu mal i mute manderei ima mas kaitat ta mupwet, ta kyel i maɗufal andek, Yeso Kristi ya?
18Ɓurti andi, fota ngga' ima mafwashi i maɗufal andek kin ɗufal shak si kpa, andi hwak ɓurti ro manderei i maɗufal andek, DeeƁwe fa mute manderei ima yes ti mupwet ta kyel i ɗufal shak. 19Fota ngga' ima ɓurti njeng na hai i maɗufal andek, ɗufal hyang si mas mafwashi, andi hwak ɓurti hal ti findel i maɗufal andek, ɗufal hyang si wa mute kaciwa' mafwashi. 20Anggut yes, ɓa andok i mafwashi u matkof rasman. Shak ta ngga' ima mafwashi cu wei ta hyang, mal i DeeƁwe ɓin cwai ti wei. 21Ɓa fota ngga' ima mafwashi mas kaitat ta fisel ti mot, andi hwak mal i DeeƁwe ma masti kaitat ta fisel ti mute manderei, yis kol sikan ta mupwet i myan hu myan ta fisel ti Yeso Kristi Deembai amukan.
Currently Selected:
Rom 5: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
