Luke 1
1
Sema Kapoanan Na Solat
1Afo Theophilus, chakel iriy toon engisolat maypangkep na epasamak nonta gwares Jesus cha si-kawi. 2Sema insola-solat cha, inges to ma iyay-istoriyed si-kawi. Sema iren iyan-istoriya iren man, mita ra ngon mismoy epasamak a iyanchogid timpon inchogin Jesus a mantoro et iyanbalin ira na bagaen Afo Chiyos a mankasaba maypangkep Jesus. 3Et si-kak ngo, timpeg kon chili ira man a iyanchogid kapoanan cha, isonga niyemnem ko i mapteng emo no may-olnos ira ma in-istoriya cha say isolat kod si-kam. 4Inpasing ko man say amtaen mo i podnon emiin i iyaytorod si-kam.
Iyaypadtoy Ingkay-anak John A Naemonjag
5Nonta timpon si Herod i arid Judea, gwariy parin iyanngaran na Zechariah. Iyayka-chom cha gropon paparin polin Abijah a pari. Sema imbaliy ton iyanngaran na Elizabeth, polin Aaron a pari. #1:5 Si Abijah, poli ngon Aaron. Isonga, si Zechariah tan si Elizabeth, poli iren Aaron a chegwa. 6Maronong ired nemnem Afo Chiyos tep koston napiyati ren emiin i bilin tan dinteg to. 7Nem nagwariy anak cha tep ebasig si Elizabeth. Tan eba-kol mes Elizabeth tan aama ngo wes Zechariah.
8Mimothok miy timpo na risponsibilidad na gropon Zechariah a mansilbid Afo Chiyos cha timplo. 9Sema ogadi na papari, manbobonot ira say amtaen chiy obdaen na sa-ki tan sa-ki. Et epispis si Zechariah a onsekep cha timplon Afo Chiyos a memool na insinso. 10Et idi mimothok i koston oras, piyoolan Zechariah i insinsod sekep na timplo iy maramen mankakararag iriy chakel a toon esa-sa-nop cha bo-dayan na timplo.
11Et iyanparang i anghil Afo Chiyos cha Zechariah, et imakgwat cha gwanan na altar a naepoolan na insinso. 12Iyalchos si Zechariah nonta mita thoy anghil, et timahot a chili. 13Nem kigwan na anghil cha si-katho i “Enog i tahot, Zechariah tep inki-ngelan Afo Chiyos i inkararag mo. Isonga, si Elizabeth a imbaliy mo, on-anak na dahi, et si John aliy ingaran mod si-katho. 14Banay aliy chadsak mo, et chakel ngo diy toon maradsak kagol na kay-anak to. 15Tep seta anak mon si John, epateg alid nemnem Afo Chiyos. Et mesepol a nat menginom na chanom na grape tan kompormin mainom a onbotheng. Et angken aneng pay may-anak, mepno wala na panakabalin na Ispirito Santo. 16Et chakel i poli-polin Israel a paoli thod Afo Chiyos a Afo ra. 17Si-kathoy maydegwas cha Cristo. Sema ogadin John, ingesen toy ogadin Elijah a profita nontan da. Tan sema ngon panakabalin to, ingesen toy panakabalin Elijah. Pan-inawat John i san-aamen mansosongbat. Sa-dathan to ngoy nemnem na tothoon nat naimag chiy piyan Afo Chiyos say sema nemnem cha, ingesen toy nemnem na tothoon maronong. Si-katho diy a-magen John say mansaganay tothoo para cha ikowan alin Cristo.”
18Et kigwan Zechariah cha anghil i “Ahow, nem nengoy pesing kon mengamta i mepesamak ira man? Tep aamaak ma tan eba-kol ngos imbaliy ko.”
19Insongbat na anghil i “Si-kak si Gabriel a naimakgwat cha sangoanan Afo Chiyos. Into-no thoak alin menbal cha si-kam say ipaamtak cha si-kam iya mapteng a chamag. 20Nem nat piyatim i kigwan ko, isonga maomel ka tan nat mahaesel ka ingkathod akow a mepesamak iyay. Tep seja kigwan ko, sigoradon metongpal no onmothok aliy koston timpo.”
21Sema iren toon gwared bo-dayan na timplo, chiyan seke-sekeres Zechariah, et iyasdaaw ira tep ebayag a gwared sekep na timplo. 22Idi imawas si Zechariah, nat mahaesel. Iyanchingjas bengat ired ma tothoo. Isonga, iyamtaan cha i gwariy inpasi-neng Afo Chiyos cha si-kathod sekep na timplo. Et manipod nontan, agpayson aomel.
23Idi iyakcheng i timpo na inpansilbin Zechariah cha timplo, bimetik. 24Idi epalabas i piyen akow, iyabchel si Elizabeth a imbaliy to, et iyanpohok cha baliy cha na dimen bolan a kigwan to i 25“Sejay i inpasing Afo Chiyos a engibiybiy na kaasi thod si-kak tep ingkal toy baing kod tothoo tep gwara waliy anak ko.”
Iyaypadtoy Ingkay-anak Jesus
26Nonta mayka-nem a bolan na bechel Elizabeth, into-non Afo Chiyos i anghil ton si Gabriel cha Nazareth a siyodad na Galilee. 27Kimowan i anghil cha marikit a eg ekicharo-charog cha dahin iyaykarin mekiimbaliy cha dahin iyanngaran na Joseph a polin David. Si Maria i ngaran niwa marikit. 28Simekep i anghil cha kad-an Maria a kigwan to i “Komosta ken binindisjonan Afo Chiyos? Gwares Afo Chiyos cha si-kam.” 29Nat igwathan Maria no niyana si-kathoy kigwan niwa anghil, et towan nemnemnema no ngoy piyan ton a-seden. 30Et kigwan na anghil i “Enog i tahot, Maria. Mabindisjonan ka tep pinispis token Afo Chiyos. 31Mebchel ka di et on-anak ka na dahi, et si Jesus aliy ingaran mod si-katho. 32Mechejaw, tan sema titolo tho, sema Anak na Kahejangan a Chiyos. Et si Afo Chiyos, panbalin to na ari a inges toy afo tho len David. 33Et seta anak mo, mantoray ired ma poli-polin Jacob na ingked ingka, et nagwariy pengingkaan na pantorayan to.” #1:33 Si Jacob i sa-kin ngaran Israel.
34Et kigwan Maria cha anghil i “Ahow, nem nengoy pesing to iy nagwariy imbaliy ko?”
35Insongbat na anghil i “Onmothok aliy Ispirito Santod si-kam et mesiroman ka na panakabalin Afo Chiyos a Kahejangan. Isonga, sema nga-ngen ianak mo, esantoan ali, tan sema titolo tho, sema Anak Afo Chiyos. 36Nemnem moy ahim a si Elizabeth. Angken eba-kol ma, iyabchel ngo. Et niman i mayka-nem a bolan ton bechel iy kigwan cha i ebasig. 37Tep si Afo Chiyos, gwariy panakabalin ton mengemag na emiin a piyan ton a-magen.”
38Et kigwan Maria i “Bagaen toak Afo Chiyos. Sapay koma metongpal i kigwan mo maypangkep cha si-kak.” Et bintihan mala na anghil.
Binisiten Maria Si Elizabeth
39Idi epalabas i piyen akow, iyansaganes Maria et imagag a kimowan cha siyodad cha chonchontog na Judea. 40Idi mimothok chiwan, simekep cha baliy Zechariah et kiyomostaan tos Elizabeth. 41Et idi inki-ngelan Elizabeth i esel Maria, kimiykiy na mapkes i nga-nged ekes to. Iyapno wes Elizabeth na panakabalin na Ispirito Santo, 42et inpekes toy esel ton kigwan to i “Si-kam i kagesathan cha emiin a bibii, tan magesat ngo ma nga-ngen ianak mo! 43Echayawak a chili tep kimowan alis nanang na Afok a manbisited si-kak! 44Tep idi inki-ngelan koy esel mo, kimiykiy na mapkes i nga-nged ekes ko na imdeng to. 45Magesat ken emati i metongpal i kigwan Afo Chiyos cha si-kam.”
Sema Kansiyon Maria Nonta Chijaw Tos Afo Chiyos
46Et kigwan Maria i:
“Chejawen kos Afo Chiyos,
47et manchadsahak
kagol cha si-kathon
engisalakan cha si-kak.
48Tep niyemnem toak a ebaben bagaen to.
Et manipod niman, konen na emiin a too i magesathak.
49Tep si Afo Chiyos a manakabalin,
gwariy imag tod si-kak.
Agpayson esantoan.
50Mahaasis Afo Chiyos cha emiin a toon
entahot cha si-katho
tan nachijaw chen iyanchogid ma pilmiron afo-afo ingked ingka.
51Inbiyby toy panakabalin to.
Sinida-sidak to ira ma toon pahi-tek a nainbilang chiy angel chen
mas ekayang iy say
echom cha.
52Inbaba tho ira ma iyangkekayang a
naiyantoray,
et inkayang to ngo ira ma iyangkebaba.
53Sema iren iyangkaofa, inni-kanan to ira na mapteng a mekan
ingkathod iyapsel ira,
et sema ngon babaknang, inpabtik to iren diwas.
54Tiyolongan Afo Chiyos ira ma bagaen ton
poli-polin Israel.
Nat diningding toy kari thon
ibiybiy toy kaasi thod
si-katho.
55Tep inkari tho ired ma
afo-afo thayo len
si Abraham
tan poli-poli tho i
ibiybiy toy kaasi thod
si-kathayo
na ingked ingka.”
56Et ekiiyan si Maria cha Elizabeth na tedon bolan asan onbetik.
Sema Ingkay-anak John A Naemonjag
57Mimothok i timpon on-anak si Elizabeth, et iyan-anak na dahi. 58Sema iren kaaroba tho tan bobonat to, idi inki-ngelan cha i maypangkep na banay a kaasin inbiybiy Afo Chiyos cha Elizabeth, ekichadsak ired si-katho.
59Idi maykagwalon akow na ingkay-anak niwa nga-nga, kimowan iriy kaaroba tan bobonat tod baliy Zechariah say kogithen cha. Niyemnem cha i ngaranan cha ma nga-nga na Zechariah tep si-kathoy ngaran na aweto. 60Nem kigwan na ineto i “Enchi, manngaran na John.”
61Kigwan cha i “Niyana? Nagwariy bobonat mon iyanngaran nithan.” 62Et inchingjas ched aweto say amtaen cha i piyan ton ingaran na nga-nga tho.
63Inchingjas Zechariah say i-kan ched si-kathoy pansolathan to, et insolat to i “Si John i ngaran to.” Et sema emiin a toon gwared man, iyasdaaw iren pasiya. 64Apaman a insolat Zechariah iwan, iya-kal men chakos i omel to, et inchogi tho mowan a on-esel a iyanchaya-chayaw cha Afo Chiyos.
65Sema emiin a kaaroba ra, timahot ira, et sema emiin a epasamak ired Zechariah, iyaychama-chamag cha emiin a siyodad cha chonchontog na Judea. 66Et emiin a toon engi-ngel niwa epasamak, niyemnemnem chen engowan i “Nengoy panbalinan niwa nga-nga no onbadeg ma?” Tep mafoot i gwared si-kathoy panakabalin Afo Chiyos.
Sema Inpadton Zechariah
67Et si Zechariah a awa niwa nga-nga, iyapno wa na panakabalin na Ispirito Santo, et inpadto thon engowan i:
68“Si-kathayon poli-polin Israel,
mechejaw si Afo Chiyos a Afo thayo.
Tep kimowan alin
mengibiybiy na kaasi tho ired ma too tho,
et idibchi tho ira.
69Tep into-non Afo Chiyos i
manakabalin a
mengisalakan cha si-kathayo.
Sema mengisalakan,
si-kathoy polin Ari David a
bagaen Afo Chiyos.
70Inpapadton Afo Chiyos ired ma esantoan a profita tho nonta bayag da i
71sa-dinan to kiya ired ma naengontra tan mahaowes cha si-kathayo.
72Kigwan to pay i ibiybiy toy kaasi tho ired ma afo-afo thayo la,
tan sigoradon tongpalen toy esantoan a tolagan tod si-kara.
73Intolag Afo Chiyos iwan cha Abraham a afo thayo len
74engowan i sa-dinan to kiya ired ma naengontred si-kathayo
say mebedin a mansilbi
kiyed si-kathon
nagwariy tekothan tayo
75tan say sema pesing tayon
mansilbid si-katho,
esantoan tan mapteng
cha nemnem to
ingkathod kaonoran na
panbiyag tayo.”
76Et kigwan pay Zechariah chiwa anak ton si John i:
“Niman, si-kam ngon
anak ko,
si-kam miy mengaranan a
profiten Afo Chiyos a Kahejangan.
Tep medebas ka iy say
si Cristo
say isaganam i chedanen to.
77Ipaamtam ired ma tothoo
to i maysalakan ira
babaen na pemekawan
Afo Chiyos na basol cha.
78Tep aanos tan mahaasis Afo Chiyos tayo.
Isonga, ito-no thod si-kathayos Criston
medepod dangit,
tan may-arig si Cristod akow a manbobosak.
79Tep no onmothok alis
Cristo,
silowan toy tothoon
man-iiyan cha kawad-an na enbolinget a
entahot iren metiy.
Et itoro thod si-kathayoy chalan a
ontorong cha talna.”
80Et sema anak Zechariah, bimadeg, tan dima-da-toy daing to. Kimowan a man-iyan chiwa dogad a nagwariy toon naiyan-iya-iyan ingkathod mimothok i akow a iyanparang ired ma poli-polin Israel et inchogi thon mantorod si-kara.
Currently Selected:
Luke 1: KAR
Highlight
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.
Luke 1
1
Sema Kapoanan Na Solat
1Afo Theophilus, chakel iriy toon engisolat maypangkep na epasamak nonta gwares Jesus cha si-kawi. 2Sema insola-solat cha, inges to ma iyay-istoriyed si-kawi. Sema iren iyan-istoriya iren man, mita ra ngon mismoy epasamak a iyanchogid timpon inchogin Jesus a mantoro et iyanbalin ira na bagaen Afo Chiyos a mankasaba maypangkep Jesus. 3Et si-kak ngo, timpeg kon chili ira man a iyanchogid kapoanan cha, isonga niyemnem ko i mapteng emo no may-olnos ira ma in-istoriya cha say isolat kod si-kam. 4Inpasing ko man say amtaen mo i podnon emiin i iyaytorod si-kam.
Iyaypadtoy Ingkay-anak John A Naemonjag
5Nonta timpon si Herod i arid Judea, gwariy parin iyanngaran na Zechariah. Iyayka-chom cha gropon paparin polin Abijah a pari. Sema imbaliy ton iyanngaran na Elizabeth, polin Aaron a pari. #1:5 Si Abijah, poli ngon Aaron. Isonga, si Zechariah tan si Elizabeth, poli iren Aaron a chegwa. 6Maronong ired nemnem Afo Chiyos tep koston napiyati ren emiin i bilin tan dinteg to. 7Nem nagwariy anak cha tep ebasig si Elizabeth. Tan eba-kol mes Elizabeth tan aama ngo wes Zechariah.
8Mimothok miy timpo na risponsibilidad na gropon Zechariah a mansilbid Afo Chiyos cha timplo. 9Sema ogadi na papari, manbobonot ira say amtaen chiy obdaen na sa-ki tan sa-ki. Et epispis si Zechariah a onsekep cha timplon Afo Chiyos a memool na insinso. 10Et idi mimothok i koston oras, piyoolan Zechariah i insinsod sekep na timplo iy maramen mankakararag iriy chakel a toon esa-sa-nop cha bo-dayan na timplo.
11Et iyanparang i anghil Afo Chiyos cha Zechariah, et imakgwat cha gwanan na altar a naepoolan na insinso. 12Iyalchos si Zechariah nonta mita thoy anghil, et timahot a chili. 13Nem kigwan na anghil cha si-katho i “Enog i tahot, Zechariah tep inki-ngelan Afo Chiyos i inkararag mo. Isonga, si Elizabeth a imbaliy mo, on-anak na dahi, et si John aliy ingaran mod si-katho. 14Banay aliy chadsak mo, et chakel ngo diy toon maradsak kagol na kay-anak to. 15Tep seta anak mon si John, epateg alid nemnem Afo Chiyos. Et mesepol a nat menginom na chanom na grape tan kompormin mainom a onbotheng. Et angken aneng pay may-anak, mepno wala na panakabalin na Ispirito Santo. 16Et chakel i poli-polin Israel a paoli thod Afo Chiyos a Afo ra. 17Si-kathoy maydegwas cha Cristo. Sema ogadin John, ingesen toy ogadin Elijah a profita nontan da. Tan sema ngon panakabalin to, ingesen toy panakabalin Elijah. Pan-inawat John i san-aamen mansosongbat. Sa-dathan to ngoy nemnem na tothoon nat naimag chiy piyan Afo Chiyos say sema nemnem cha, ingesen toy nemnem na tothoon maronong. Si-katho diy a-magen John say mansaganay tothoo para cha ikowan alin Cristo.”
18Et kigwan Zechariah cha anghil i “Ahow, nem nengoy pesing kon mengamta i mepesamak ira man? Tep aamaak ma tan eba-kol ngos imbaliy ko.”
19Insongbat na anghil i “Si-kak si Gabriel a naimakgwat cha sangoanan Afo Chiyos. Into-no thoak alin menbal cha si-kam say ipaamtak cha si-kam iya mapteng a chamag. 20Nem nat piyatim i kigwan ko, isonga maomel ka tan nat mahaesel ka ingkathod akow a mepesamak iyay. Tep seja kigwan ko, sigoradon metongpal no onmothok aliy koston timpo.”
21Sema iren toon gwared bo-dayan na timplo, chiyan seke-sekeres Zechariah, et iyasdaaw ira tep ebayag a gwared sekep na timplo. 22Idi imawas si Zechariah, nat mahaesel. Iyanchingjas bengat ired ma tothoo. Isonga, iyamtaan cha i gwariy inpasi-neng Afo Chiyos cha si-kathod sekep na timplo. Et manipod nontan, agpayson aomel.
23Idi iyakcheng i timpo na inpansilbin Zechariah cha timplo, bimetik. 24Idi epalabas i piyen akow, iyabchel si Elizabeth a imbaliy to, et iyanpohok cha baliy cha na dimen bolan a kigwan to i 25“Sejay i inpasing Afo Chiyos a engibiybiy na kaasi thod si-kak tep ingkal toy baing kod tothoo tep gwara waliy anak ko.”
Iyaypadtoy Ingkay-anak Jesus
26Nonta mayka-nem a bolan na bechel Elizabeth, into-non Afo Chiyos i anghil ton si Gabriel cha Nazareth a siyodad na Galilee. 27Kimowan i anghil cha marikit a eg ekicharo-charog cha dahin iyaykarin mekiimbaliy cha dahin iyanngaran na Joseph a polin David. Si Maria i ngaran niwa marikit. 28Simekep i anghil cha kad-an Maria a kigwan to i “Komosta ken binindisjonan Afo Chiyos? Gwares Afo Chiyos cha si-kam.” 29Nat igwathan Maria no niyana si-kathoy kigwan niwa anghil, et towan nemnemnema no ngoy piyan ton a-seden. 30Et kigwan na anghil i “Enog i tahot, Maria. Mabindisjonan ka tep pinispis token Afo Chiyos. 31Mebchel ka di et on-anak ka na dahi, et si Jesus aliy ingaran mod si-katho. 32Mechejaw, tan sema titolo tho, sema Anak na Kahejangan a Chiyos. Et si Afo Chiyos, panbalin to na ari a inges toy afo tho len David. 33Et seta anak mo, mantoray ired ma poli-polin Jacob na ingked ingka, et nagwariy pengingkaan na pantorayan to.” #1:33 Si Jacob i sa-kin ngaran Israel.
34Et kigwan Maria cha anghil i “Ahow, nem nengoy pesing to iy nagwariy imbaliy ko?”
35Insongbat na anghil i “Onmothok aliy Ispirito Santod si-kam et mesiroman ka na panakabalin Afo Chiyos a Kahejangan. Isonga, sema nga-ngen ianak mo, esantoan ali, tan sema titolo tho, sema Anak Afo Chiyos. 36Nemnem moy ahim a si Elizabeth. Angken eba-kol ma, iyabchel ngo. Et niman i mayka-nem a bolan ton bechel iy kigwan cha i ebasig. 37Tep si Afo Chiyos, gwariy panakabalin ton mengemag na emiin a piyan ton a-magen.”
38Et kigwan Maria i “Bagaen toak Afo Chiyos. Sapay koma metongpal i kigwan mo maypangkep cha si-kak.” Et bintihan mala na anghil.
Binisiten Maria Si Elizabeth
39Idi epalabas i piyen akow, iyansaganes Maria et imagag a kimowan cha siyodad cha chonchontog na Judea. 40Idi mimothok chiwan, simekep cha baliy Zechariah et kiyomostaan tos Elizabeth. 41Et idi inki-ngelan Elizabeth i esel Maria, kimiykiy na mapkes i nga-nged ekes to. Iyapno wes Elizabeth na panakabalin na Ispirito Santo, 42et inpekes toy esel ton kigwan to i “Si-kam i kagesathan cha emiin a bibii, tan magesat ngo ma nga-ngen ianak mo! 43Echayawak a chili tep kimowan alis nanang na Afok a manbisited si-kak! 44Tep idi inki-ngelan koy esel mo, kimiykiy na mapkes i nga-nged ekes ko na imdeng to. 45Magesat ken emati i metongpal i kigwan Afo Chiyos cha si-kam.”
Sema Kansiyon Maria Nonta Chijaw Tos Afo Chiyos
46Et kigwan Maria i:
“Chejawen kos Afo Chiyos,
47et manchadsahak
kagol cha si-kathon
engisalakan cha si-kak.
48Tep niyemnem toak a ebaben bagaen to.
Et manipod niman, konen na emiin a too i magesathak.
49Tep si Afo Chiyos a manakabalin,
gwariy imag tod si-kak.
Agpayson esantoan.
50Mahaasis Afo Chiyos cha emiin a toon
entahot cha si-katho
tan nachijaw chen iyanchogid ma pilmiron afo-afo ingked ingka.
51Inbiyby toy panakabalin to.
Sinida-sidak to ira ma toon pahi-tek a nainbilang chiy angel chen
mas ekayang iy say
echom cha.
52Inbaba tho ira ma iyangkekayang a
naiyantoray,
et inkayang to ngo ira ma iyangkebaba.
53Sema iren iyangkaofa, inni-kanan to ira na mapteng a mekan
ingkathod iyapsel ira,
et sema ngon babaknang, inpabtik to iren diwas.
54Tiyolongan Afo Chiyos ira ma bagaen ton
poli-polin Israel.
Nat diningding toy kari thon
ibiybiy toy kaasi thod
si-katho.
55Tep inkari tho ired ma
afo-afo thayo len
si Abraham
tan poli-poli tho i
ibiybiy toy kaasi thod
si-kathayo
na ingked ingka.”
56Et ekiiyan si Maria cha Elizabeth na tedon bolan asan onbetik.
Sema Ingkay-anak John A Naemonjag
57Mimothok i timpon on-anak si Elizabeth, et iyan-anak na dahi. 58Sema iren kaaroba tho tan bobonat to, idi inki-ngelan cha i maypangkep na banay a kaasin inbiybiy Afo Chiyos cha Elizabeth, ekichadsak ired si-katho.
59Idi maykagwalon akow na ingkay-anak niwa nga-nga, kimowan iriy kaaroba tan bobonat tod baliy Zechariah say kogithen cha. Niyemnem cha i ngaranan cha ma nga-nga na Zechariah tep si-kathoy ngaran na aweto. 60Nem kigwan na ineto i “Enchi, manngaran na John.”
61Kigwan cha i “Niyana? Nagwariy bobonat mon iyanngaran nithan.” 62Et inchingjas ched aweto say amtaen cha i piyan ton ingaran na nga-nga tho.
63Inchingjas Zechariah say i-kan ched si-kathoy pansolathan to, et insolat to i “Si John i ngaran to.” Et sema emiin a toon gwared man, iyasdaaw iren pasiya. 64Apaman a insolat Zechariah iwan, iya-kal men chakos i omel to, et inchogi tho mowan a on-esel a iyanchaya-chayaw cha Afo Chiyos.
65Sema emiin a kaaroba ra, timahot ira, et sema emiin a epasamak ired Zechariah, iyaychama-chamag cha emiin a siyodad cha chonchontog na Judea. 66Et emiin a toon engi-ngel niwa epasamak, niyemnemnem chen engowan i “Nengoy panbalinan niwa nga-nga no onbadeg ma?” Tep mafoot i gwared si-kathoy panakabalin Afo Chiyos.
Sema Inpadton Zechariah
67Et si Zechariah a awa niwa nga-nga, iyapno wa na panakabalin na Ispirito Santo, et inpadto thon engowan i:
68“Si-kathayon poli-polin Israel,
mechejaw si Afo Chiyos a Afo thayo.
Tep kimowan alin
mengibiybiy na kaasi tho ired ma too tho,
et idibchi tho ira.
69Tep into-non Afo Chiyos i
manakabalin a
mengisalakan cha si-kathayo.
Sema mengisalakan,
si-kathoy polin Ari David a
bagaen Afo Chiyos.
70Inpapadton Afo Chiyos ired ma esantoan a profita tho nonta bayag da i
71sa-dinan to kiya ired ma naengontra tan mahaowes cha si-kathayo.
72Kigwan to pay i ibiybiy toy kaasi tho ired ma afo-afo thayo la,
tan sigoradon tongpalen toy esantoan a tolagan tod si-kara.
73Intolag Afo Chiyos iwan cha Abraham a afo thayo len
74engowan i sa-dinan to kiya ired ma naengontred si-kathayo
say mebedin a mansilbi
kiyed si-kathon
nagwariy tekothan tayo
75tan say sema pesing tayon
mansilbid si-katho,
esantoan tan mapteng
cha nemnem to
ingkathod kaonoran na
panbiyag tayo.”
76Et kigwan pay Zechariah chiwa anak ton si John i:
“Niman, si-kam ngon
anak ko,
si-kam miy mengaranan a
profiten Afo Chiyos a Kahejangan.
Tep medebas ka iy say
si Cristo
say isaganam i chedanen to.
77Ipaamtam ired ma tothoo
to i maysalakan ira
babaen na pemekawan
Afo Chiyos na basol cha.
78Tep aanos tan mahaasis Afo Chiyos tayo.
Isonga, ito-no thod si-kathayos Criston
medepod dangit,
tan may-arig si Cristod akow a manbobosak.
79Tep no onmothok alis
Cristo,
silowan toy tothoon
man-iiyan cha kawad-an na enbolinget a
entahot iren metiy.
Et itoro thod si-kathayoy chalan a
ontorong cha talna.”
80Et sema anak Zechariah, bimadeg, tan dima-da-toy daing to. Kimowan a man-iyan chiwa dogad a nagwariy toon naiyan-iya-iyan ingkathod mimothok i akow a iyanparang ired ma poli-polin Israel et inchogi thon mantorod si-kara.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.