ꤛꤥ꤭ꤟꤢ꤬ 21
21
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤥ꤬ꤜꤥ꤭ꤓꤢꤧ꤬ ꤕ꤫ꤢꤩ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤞꤥ꤭ꤞꤝꤢꤒꤣ꤬ꤖꤚꤢꤩ꤬꤯
1ꤘꤣꤋꤛꤢ꤭ ꤑꤢ꤭ꤒꤢꤧ꤬ꤒꤥ꤬ ꤔꤣꤧ꤬, ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤥ꤬ꤜꤥ꤭ꤓꤢꤧ꤬ ꤕ꤫ꤢꤩ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤘꤣ ꤒꤤꤙꤢꤩ꤬ꤚꤤ ꤓꤣꤧ꤭ꤢꤪ꤬ꤘꤢꤨ꤬ꤒꤣꤧ꤬ꤠꤢꤪ꤬ꤓꤢꤦ꤭꤯ ꤢ꤬ ꤥ꤬ꤜꤥ꤭ꤓꤢꤧ꤬ ꤕ꤫ꤢꤩ꤬ ꤜꤢꤨ꤭ ꤟꤢꤨꤒꤢꤩ꤭ ꤟꤢꤩꤚꤣꤧ꤬, 2ꤋꤢꤨ꤭ꤏꤛꤤꤗꤥ꤬ ꤕꤢꤩ꤬ꤒꤢ꤬ꤚꤢꤨ, ꤋꤢꤨ꤭ꤞꤥꤗꤢ ꤘꤣ ꤢꤨ꤭ ꤢꤩꤕ꤫ꤥ꤬ ꤜꤢꤨ꤭ꤗꤝꤤ꤭ ꤔꤢꤧ ꤋꤢꤨ꤭ꤘꤤꤘꤤ꤬ꤗꤢꤨ,#21:2 ꤘꤤꤘꤤ꤬ꤗꤢꤨ ꤢ꤬ꤍ꤫ꤥ꤬ꤜꤣꤧ꤬ꤏꤢ ꤗꤢ꤬ ꤥ꤬ꤘꤤ꤭ꤋꤛꤢ꤭꤯ ꤔꤢꤧ ꤊꤢꤧꤜꤢ꤬ꤜꤤ꤬ꤊ꤫ꤢꤩ꤬ ꤠꤤ꤭ꤊꤢ꤬ꤔꤢꤖꤢꤨ ꤋꤢꤨ꤭ꤔꤢ꤬ꤞꤢ꤬ꤔꤢꤩꤜꤢ ꤔꤢꤧ ꤖꤢꤩ꤭ꤞꤢꤩꤙꤢꤩ꤬ꤘꤢꤧ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤞꤤꤔꤣꤧ꤭ ꤔꤢꤧ ꤛꤢꤩ꤬ꤏꤛꤢꤨ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤘꤣ ꤢ꤬ꤚꤥ꤬ ꤞꤤꤔꤣꤧ꤭ ꤡꤝꤢ ꤥ꤬ꤕꤜꤢꤪ ꤚ꤫ꤥ꤬ꤜꤢꤪ꤭ ꤜꤢꤨ꤭꤯ 3ꤋꤢꤨ꤭ꤏꤛꤤꤗꤥ꤬ ꤕꤢꤩ꤬ꤒꤢ꤬ꤚꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤠꤢꤧ꤭ ꤡꤝꤢꤕ꤫ꤢꤦ꤬ꤢꤩ꤬ ꤒꤢꤩ꤭ꤟꤢꤨ,” ꤢ꤬ ꤟꤢꤩ ꤚꤣꤧ꤬, ꤛꤢꤩ꤬ꤞꤤ꤭ ꤟꤢꤩ ꤜꤢꤨ꤭ ꤔꤢꤧ, “ꤕꤢꤩ꤬ ꤡꤝꤢꤊꤣꤧ꤭ ꤔꤢꤧ ꤔꤢꤧ꤬,” ꤢ꤬ ꤟꤢꤩ ꤜꤢꤨ꤭ ꤟꤢꤨꤔꤣꤧ꤬꤯ ꤟꤢꤨꤔꤣꤧ꤬ꤚꤣꤧ꤬ ꤛꤢꤩ꤬ꤞꤤ꤭ ꤘꤢꤧꤔ꤫ꤤ꤬ ꤞꤢꤪ꤬ꤊꤜꤣꤧ꤭ ꤚꤣꤧ꤬ ꤓꤢꤩ꤬ꤡꤝꤢ ꤕ꤫ꤢꤦ꤬ꤢꤩ꤬ ꤜꤢ꤭ꤋꤢꤧ꤭ ꤒꤢꤩ꤭ꤟꤢꤨ ꤒꤣꤧ꤬ꤘꤢꤦꤚꤣꤧ꤬ ꤒꤣ꤬ꤞꤢꤩ꤭꤮ ꤒꤣ꤬ꤞꤢꤩ꤭ ꤢ꤬ ꤔ꤫ꤤ꤬ ꤒꤣ꤬ꤙꤢꤩ꤬꤮ ꤒꤥ꤬꤯#ꤜꤢꤨꤊꤢ꤬ ꤅:꤅
4ꤗ꤫ꤢꤪ꤬ꤜꤤ꤭ꤙꤢꤨ꤭ꤟꤣꤧ ꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤊꤣꤧ꤬ꤓꤢꤪ꤬ꤥ꤬ ꤘꤣ ꤓꤣꤧ꤭ꤓꤢꤦ꤭ ꤔꤣꤧ꤬, ꤗꤢ꤬ꤔꤢꤧꤚꤣꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤞꤤꤑꤢꤩ꤭ ꤔꤢꤧ ꤛꤢꤩ꤬ꤏꤛꤢꤨ ꤗ꤫ꤢ꤬ꤒꤥ꤬꤯
5ꤢ꤬ ꤘꤣꤧꤟꤣꤧ꤭ ꤛꤢꤩ꤬ꤞꤤ꤭ ꤔꤢꤧ, “ꤋꤥ꤭ꤙꤢꤧꤞꤝꤢ ꤞꤤ꤭, ꤒꤢꤩ꤭ꤟꤢꤨ ꤔ꤫ꤤ꤬ ꤏꤢꤜ꤫ꤢꤩ꤬ ꤟꤢꤧ꤭?”
ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤢ꤬ꤔ꤫ꤤ꤬ ꤒꤣ꤬ꤙꤢꤩ꤬꤮ ꤒꤥ꤬꤯”
6ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤠꤤ꤭ꤒꤢ꤭ ꤞꤤ꤭ꤒꤣꤧ꤬ꤠꤤ꤭ ꤘꤣ ꤞꤤ꤭ ꤞꤢꤪ꤬ꤊꤜꤣꤧ꤭ ꤡꤢꤓꤝꤢ ꤔꤣꤧ꤬ꤒꤣ꤬ꤊꤛꤢ꤭, ꤒꤢꤩ꤭ꤟꤢꤨ ꤔ꤫ꤤ꤬ꤘꤢꤦ꤬ ꤕꤢ꤭꤯” ꤚꤣꤧ꤬ ꤙꤣꤧ ꤛꤢꤩ꤬ꤞꤤ꤭ ꤗꤢꤩ꤬ꤟꤢꤨ ꤢ꤬ ꤟꤢꤩ ꤢ꤬ꤋꤢꤩ꤭ꤔꤣꤧ꤬, ꤒꤢꤩ꤭ꤟꤢꤨꤔ꤫ꤤ꤬ ꤢꤩꤔꤢꤧ꤬ꤡꤣꤧ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢ꤬ ꤡꤝꤤ꤬ꤓꤢꤧ꤬ ꤕ꤫ꤢꤩ꤬ ꤚꤣꤧꤘꤢꤦ꤬ ꤕꤢ꤬ ꤡꤣꤧ ꤢ꤬ ꤒꤣꤧ꤬ꤠꤤ꤭#21:6 ꤢ꤬ꤗꤢꤪ ꤘꤣ ꤞꤢꤪ꤬ꤊꤜꤣꤧ꤭ꤊꤢꤨ꤭ ꤒꤥ꤬꤯#ꤜꤢꤨꤊꤢ꤬ ꤅:꤆
7ꤣꤧ꤭ꤒꤣ꤬ꤖꤥꤚꤣꤧ꤬ ꤛꤢꤩ꤬ꤏꤛꤢꤨ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤘꤣ ꤢ꤬ ꤗꤥ꤬ ꤚꤣꤧꤘꤢꤦ꤬ ꤣꤧ꤭ꤒꤣ꤬ꤖꤚꤢꤩ꤬ ꤟꤢꤩ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤔꤢꤧ, “ꤢ꤬ ꤗꤢ꤬ ꤙꤢꤧ꤬ꤡꤢꤩ꤬ ꤔꤣꤧ꤭꤮” ꤢ꤬ ꤟꤢꤩ ꤕ꤫ꤢꤩ꤬ ꤜꤢꤨ꤭ ꤟꤢꤨꤔꤣꤧ꤬꤯ ꤙꤣꤧ ꤋꤢꤨ꤭ꤏꤛꤤꤗꤥ꤬ ꤕꤢꤩ꤬ꤒꤢ꤬ꤚꤢꤨ ꤔ꤫ꤤ꤬ꤟꤥ꤭ ꤜꤢꤨ꤭ ꤟꤢꤩ ꤔꤢꤧ, “ꤢ꤬ ꤗꤢ꤬ ꤙꤢꤧ꤬ꤡꤢꤩ꤬ ꤔꤣꤧ꤭꤮,” ꤟꤢꤨꤔꤣꤧ꤬ ꤢ꤬ꤋꤢꤩ꤭, ꤒꤣ꤬ꤖꤥꤒꤥ꤬ ꤢ꤬ ꤞꤢꤧꤓꤢꤧ꤬ ꤋꤛꤢ꤭ꤞꤢꤧ ꤢ꤬ꤡꤢ꤬ ꤘꤣ ꤢ꤬ ꤕꤜꤥꤊꤢꤧ꤭ ꤜꤢꤨ꤭ ꤔꤣꤧ꤬ꤒꤣ꤬ꤙꤢ꤬ ꤓꤥ꤭ꤚꤣꤧ꤬ ꤢ꤬ ꤤ꤬ꤏꤢ꤬ꤒꤢ꤭ ꤘꤣ ꤓꤣꤧ꤭ꤊꤢꤨ꤭꤯ 8ꤢ꤬ ꤋꤥ꤭ꤙꤢꤧꤞꤝꤢ ꤘꤣ ꤢ꤬ ꤥ꤬ꤊꤢꤧ꤭ ꤘꤣ ꤞꤢꤪ꤬ꤊꤜꤣꤧ꤭ꤊꤢꤨ꤭ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤋꤚꤝꤢ꤭ꤋꤢꤧ꤭ꤊꤢ꤬ ꤊꤣꤧ꤭ ꤜꤢꤨ꤭꤯ ꤛꤢꤩ꤬ꤞꤤ꤭ ꤋꤢꤧ꤭ ꤡꤝꤤ꤬ꤒꤣꤧ꤬ꤚ꤫ꤢꤨ꤬ ꤊꤢ꤬ꤔ꤫ꤤ꤬ ꤒꤣꤧ꤬ꤠꤤ꤭ ꤘꤣ ꤢ꤬ ꤔ꤫ꤤ꤬ꤙꤢ꤭ ꤔꤢꤧ ꤒꤢꤩ꤭ꤟꤢꤨ ꤣꤧ꤭ꤔꤣꤧ꤬ꤒꤣ꤬ꤙꤢ꤬ ꤘꤣ ꤓꤣꤧ꤭ꤓꤢꤦ꤭꤯ ꤛꤢꤩ꤬ꤞꤤ꤭ ꤥ꤬ꤛꤢ꤬ ꤜꤢ꤭ ꤔꤢꤧ ꤓꤣꤧ꤭ꤓꤢꤦ꤭ ꤒꤥ꤬, ꤢ꤬ ꤥ꤬ꤛꤢ꤬ ꤖꤢꤧ ꤢ꤬ꤕꤜ꤫ꤢꤩ꤬ ꤔꤣꤧ꤭ꤛꤢꤩ꤬ ꤖꤢꤧ꤯ 9ꤙꤣꤧ ꤛꤢꤩ꤬ꤞꤤ꤭ ꤊꤢ꤬ꤙꤢ ꤥ꤬ꤟꤣꤧ ꤢ꤬ꤞꤢꤪ꤬ꤊꤜꤣꤧ꤭ ꤘꤣ ꤊꤣꤧ꤬ꤜꤥ꤭ꤋꤢꤨ꤬ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤗꤢꤧꤓ꤫ꤣꤧ꤬ ꤢꤨ꤭ ꤏꤢꤦꤢꤩ꤬ ꤒꤢꤩ꤭ꤟꤢꤨ ꤘꤣ ꤗꤤ꤬ꤊꤜꤝꤢꤋꤢꤨ꤬ ꤓꤥ꤭ꤔꤢꤧ ꤋꤢꤪꤗꤢꤨ꤭ ꤒꤣꤧ꤬ꤟꤢꤩ꤬꤯
10ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨꤋꤚꤤ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤖꤛꤢꤟꤢꤧ꤭ ꤕ꤫ꤢꤩ꤬ꤗꤢꤧ ꤠꤢꤧ꤭ ꤒꤢꤩ꤭ꤟꤢꤨ ꤘꤣ ꤞꤤ꤭ ꤕ꤫ꤢꤦ꤬ꤔ꤫ꤤ꤬ ꤔꤣꤧ꤬ꤒꤣ꤬ꤊꤜꤢꤪ ꤙꤣꤧꤣꤧ꤭ ꤒꤣꤧ꤬ꤟꤢꤩ꤬꤯”
11ꤚꤣꤧ꤬ ꤋꤢꤨ꤭ꤏꤛꤤꤗꤥ꤬ ꤕꤢꤩ꤬ꤒꤢ꤬ꤚꤢꤨ ꤡꤝꤢꤓꤢꤧ꤬ꤔꤥ꤭ ꤘꤣ ꤞꤢꤪ꤬ꤊꤜꤣꤧ꤭ꤊꤢꤨ꤭ ꤚꤣꤧ꤬ ꤢ꤬ ꤡꤝꤤ꤬ꤒꤣꤧ꤬ꤚ꤫ꤢꤨ꤬ꤓꤢꤧ꤬ ꤒꤣꤧ꤬ꤠꤤ꤭ ꤘꤣ ꤢ꤬ ꤔ꤫ꤤ꤬ꤙꤢ꤭ ꤔꤢꤧ ꤒꤢꤩ꤭ꤟꤢꤨꤣꤧ꤭ ꤘꤣ ꤊꤣꤧ꤬ꤜꤥ꤭ꤋꤢꤨ꤬꤯ ꤜꤢꤪ꤭ ꤒꤢꤩ꤭ꤟꤢꤨ ꤙꤢꤩ꤬ꤘꤢꤨ꤬ ꤘꤣ ꤢ꤬ ꤔ꤫ꤤ꤬ ꤔꤣꤧ꤬ꤗꤢ꤬ ꤢ꤬ ꤥ꤬ ꤒꤣ꤬ꤛꤢꤩ꤬ ꤔꤢꤧ ꤍꤢꤧ꤭ꤏꤣꤧ꤭ ꤔꤢꤧ ꤞꤥ꤭ꤙꤢꤩ꤬꤯ ꤒꤢꤩ꤭ꤟꤢꤨ ꤔ꤫ꤤ꤬ ꤢꤩꤔꤢꤧ꤬ꤡꤣꤧ ꤒꤣꤧ꤬ꤘꤢꤦꤚꤣꤧ꤬ ꤒꤣꤧ꤬ꤠꤤ꤭ ꤜꤣꤧ꤬ꤛꤢꤩ꤭ ꤒꤣ꤬ꤡꤣ꤬꤮ ꤒꤥ꤬꤯ 12ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤟꤢꤧ꤭ ꤢꤩ꤬ꤗꤣꤧ꤭ ꤜꤢ꤭ꤋꤢꤧ꤭꤯” ꤛꤢꤩ꤬ꤞꤤ꤭ ꤞꤤꤑꤢꤩ꤭ꤟꤣꤧ ꤜꤢ꤭ꤋꤢꤧ꤭ ꤔꤢꤧ ꤢ꤬ ꤗꤢ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ꤋꤝꤢ꤬ꤢ꤬ꤋꤛꤢ꤭, “ꤔꤢꤧ꤬ ꤗꤢ꤬ ꤢꤨ꤭ꤕꤢꤩ꤭?” ꤛꤢꤩ꤬ꤞꤤ꤭ ꤘꤣꤧꤟꤣꤧ꤭ ꤙꤢꤦ꤬ ꤜꤢ꤭ꤋꤢꤧ꤭ ꤜꤢꤨ꤭ ꤒꤣ꤬ꤖꤚꤢꤩ꤬꤮ ꤒꤥ꤬꤯ 13ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤖꤛꤢꤔ꤫ꤤ꤬ ꤋꤢꤪꤗꤢꤨ꤭ ꤚꤣꤧ꤬ ꤢ꤬ ꤡꤝꤢꤒꤥ꤭ ꤛꤢꤩ꤬ꤞꤤ꤭ ꤚꤣꤧ꤬ ꤢ꤬ ꤛ꤫ꤢꤨ꤬ꤢꤩ꤬ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤚꤣꤧ꤬ ꤢ꤬ ꤖꤛꤢꤔ꤫ꤤ꤬ ꤒꤢꤩ꤭ꤟꤢꤨ ꤚꤣꤧ꤬ ꤢ꤬ ꤡꤝꤢ ꤛ꤫ꤢꤨ꤬ꤢꤩ꤬ ꤕ꤫ꤢꤩ꤬ꤊꤣꤧ꤭ ꤛꤢꤩ꤬ꤞꤤ꤭ ꤟꤢꤨꤔꤣꤧ꤬ꤔꤣꤧ꤬꤯ 14ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤞꤣꤧ꤭ ꤞꤣꤧ꤭ꤖꤚꤢꤩ꤬ꤊꤣꤧ꤬ꤓꤢꤪ꤬ ꤊꤢ꤬ꤋꤛꤢ꤭ ꤓꤥ꤭ꤚꤣꤧ꤬ ꤢ꤬ ꤘꤣꤧꤜꤥ꤭ ꤕ꤫ꤢꤩ꤬ ꤢ꤬ꤔ꤫ꤢꤩ꤬ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤣꤧ꤭ ꤗꤢ꤬ ꤞꤥ꤭ꤖꤥꤒꤣ꤬ꤖꤥ ꤟꤣꤧ꤯
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤢꤧ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ
15ꤛꤢꤩ꤬ꤞꤤ꤭ ꤢꤩ꤬ ꤓꤥ꤭ꤚꤣꤧ꤬, ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤘꤣꤧꤟꤣꤧ꤭ ꤋꤢꤨ꤭ꤏꤛꤤꤗꤥ꤬ ꤕꤢꤩ꤬ꤒꤢ꤬ꤚꤢꤨ ꤔꤢꤧ, “ꤖꤢꤩ꤭ꤛꤥ꤭ꤟꤢ꤬#21:15 ꤒꤣꤧ꤬ꤟꤢꤩ꤬ꤟꤢꤩ꤬ꤔꤣꤧ꤬, ꤢ꤬ ꤢꤩ ꤜꤢꤨ꤭ꤗꤝꤤ꤭ ꤔꤢꤧ ꤙꤢ꤬ꤡꤛꤥ꤬ꤔꤢ꤯ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤋꤢꤨ꤭ꤏꤛꤤꤗꤥ꤬, ꤔꤢꤧ꤬ ꤗꤥ꤬ꤜꤣ ꤗ꤫ꤢ꤬ꤔꤤꤔꤢꤧ꤬ ꤠꤢꤧ꤭ ꤔꤢꤧ ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤗꤥ꤬ ꤠꤢꤧ꤭ ꤔꤣꤧ꤬ ꤟꤢꤧ꤭?” ꤢ꤬ ꤘꤣꤧꤟꤣꤧ꤭ ꤜꤢꤨ꤭ ꤚꤣꤧ꤬,
ꤋꤢꤨ꤭ꤏꤛꤤꤗꤥ꤬ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤢꤪ꤬, ꤙꤢꤧ꤬ꤡꤢꤩ꤬, ꤠꤢꤧ꤭ ꤗꤥ꤬ ꤔꤢꤧ꤬ ꤔꤣꤧ꤬ꤗꤢ꤬ ꤔꤢꤧ꤬ ꤞꤤꤑꤢꤩ꤭ꤘꤢꤦ꤬ ꤟꤣꤧ,” ꤢ꤬ ꤟꤢꤩ ꤜꤢꤨ꤭ ꤟꤢꤨꤔꤣꤧ꤬꤯
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩ ꤜꤢꤨ꤭ ꤔꤢꤧ, “ꤗꤢꤧ ꤙꤥ꤬ꤢꤩ꤬ꤚꤣꤧ ꤠꤢꤧ꤭ ꤞꤤꤗꤤ꤬ꤖꤢꤨ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤤ꤮꤯”
16ꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤘꤣꤧꤟꤣꤧ꤭ ꤋꤛꤢ꤭ꤞꤢꤧ ꤜꤢꤨ꤭ ꤔꤢꤧ, “ꤖꤢꤩ꤭ꤛꤥ꤭ꤟꤢ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤋꤢꤨ꤭ꤏꤛꤤꤗꤥ꤬, ꤔꤢꤧ꤬ ꤗꤥ꤬ ꤗ꤫ꤢ꤬ꤔꤤꤔꤢꤧ꤬ ꤠꤢꤧ꤭ ꤟꤢꤧ꤭?” ꤢ꤬ ꤘꤣꤧꤟꤣꤧ꤭ ꤜꤢꤨ꤭ ꤚꤣꤧ꤬,
ꤢ꤬ ꤟꤢꤩꤏꤢꤦ꤬ ꤙꤢꤧ꤬ꤡꤢꤩ꤬ ꤔꤢꤧ, “ꤢꤪ꤬, ꤙꤢꤧ꤬ꤡꤢꤩ꤬, ꤠꤢꤧ꤭ ꤗꤥ꤬ ꤔꤢꤧ꤬ ꤔꤣꤧ꤬ꤗꤢ꤬ ꤔꤢꤧ꤬ ꤞꤤꤑꤢꤩ꤭ꤘꤢꤦ꤬ꤟꤣꤧ꤯”
ꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤗꤢꤧꤡꤢꤧ꤬ꤚꤣꤧ ꤠꤢꤧ꤭ ꤞꤤꤗꤤ꤬ꤘꤢꤨ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤤ꤮꤯”
17ꤓꤥ꤭ꤚꤣꤧ꤬ ꤢ꤬ ꤘꤣꤧꤟꤣꤧ꤭ ꤕ꤫ꤥ꤬ ꤜꤢꤨ꤭ ꤞꤥ꤭ꤖꤥꤒꤣ꤬ꤖꤥ ꤔꤢꤧ, “ꤖꤢꤩ꤭ꤛꤥ꤭ꤟꤢ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤋꤢꤨ꤭ꤏꤛꤤꤗꤥ꤬, ꤔꤢꤧ꤬ ꤗꤥ꤬ ꤠꤢꤧ꤭ ꤟꤢꤧ꤭?”
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤜꤢ꤭ ꤘꤣꤧꤟꤣꤧ꤭ ꤜꤢꤨ꤭ ꤔꤢꤧ, “ꤔꤢꤧ꤬ ꤗꤥ꤬ ꤠꤢꤧ꤭ ꤟꤢꤧ꤭?” ꤔꤣꤧ꤬ ꤞꤥ꤭ꤖꤥꤟꤣꤧ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢ꤬ ꤗꤥ꤬ ꤜꤢꤨ꤭ꤞꤤꤕꤜꤢꤪ꤬ ꤒꤥ꤬꤯ ꤚꤣꤧ꤬ ꤢ꤬ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬, ꤔꤢꤧ꤬ ꤞꤤꤑꤢꤩ꤭ ꤜꤢꤪ꤭ ꤒꤢꤩ꤬ꤕꤝꤢ꤭ꤒꤣ꤬ꤡꤣ꤬, ꤠꤢꤧ꤭ ꤗꤥ꤬ ꤔꤢꤧ꤬ ꤔꤣꤧ꤬ꤗꤢ꤬ ꤔꤢꤧ꤬ ꤞꤤꤑꤢꤩ꤭ ꤟꤣꤧ,” ꤢ꤬ ꤟꤢꤩ ꤜꤢꤨ꤭ ꤟꤢꤨꤔꤣꤧ꤬,
ꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩ ꤜꤢꤨ꤭ ꤔꤢꤧ, “ꤗꤢꤧ ꤙꤥ꤬ꤢꤩ꤬ꤙꤥ꤬ꤥ꤭ꤚꤣꤧ ꤠꤢꤧ꤭ ꤞꤤꤗꤤ꤬ꤘꤢꤨ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤤ꤮꤯ 18ꤠꤢꤧ꤭ ꤟꤢꤩꤡꤢꤪꤡꤢꤪ ꤔꤢꤧ꤬, ꤙꤣꤧ ꤔꤢꤧ꤬ ꤔꤢ꤬ꤡ꤫ꤢꤩ꤬ꤕꤢ꤬ ꤢ꤬ꤋꤢꤩ꤭, ꤔꤢꤧ꤬ ꤚ꤫ꤢꤧ꤬ꤓꤢꤧ꤬ꤙꤢꤩ ꤚꤣꤧꤘꤢꤦ꤬ ꤔꤢꤧ꤬ꤟꤢꤪꤓꤢꤪ, ꤔꤢꤧ꤬ ꤞꤤꤛ꤫ꤢꤦ꤬ꤡꤝꤢ ꤙꤣꤧꤒꤢꤩ꤭꤮ ꤔꤣꤧ꤬ ꤔꤢꤧ꤬ ꤡꤝꤢꤙꤢꤩ꤯ ꤗꤢ꤬ꤔꤢꤧꤚꤣꤧ꤬ ꤏꤢ꤮ ꤔꤢꤧ꤬ ꤗ꤫ꤥ꤬ꤖꤚ꤫ꤢꤩ꤬ꤟꤣꤧ ꤕꤢ꤭ꤔꤣꤧ꤬, ꤔꤢꤧ꤬ ꤊ꤫ꤢꤦ꤬ ꤙꤢꤪꤓꤢꤩ꤬ ꤔꤢꤧ꤬ ꤊꤢꤨꤋꤢꤨ꤬ ꤔꤣꤧ꤭ꤋꤥ ꤕꤢ꤭꤯ ꤢꤨ꤭ ꤊ꤫ꤢꤦ꤬ ꤡꤢꤪ꤭ꤊꤜꤢꤪ꤬ꤗꤢ꤬ ꤔꤢꤧ꤬ ꤊꤢꤨꤋꤢꤨ꤬ ꤚꤣꤧ꤬ ꤢꤨ꤭ ꤊ꤫ꤢꤦ꤬ ꤡꤢꤪ꤭ꤡꤝꤢ ꤔꤢꤧ꤬ ꤘꤣ ꤜ꤫ꤢꤩ꤬ꤥ꤬ ꤘꤣ ꤔꤢꤧ꤬ ꤞꤤꤛ꤫ꤢꤦ꤬ ꤡꤝꤢ ꤒꤥ꤬ ꤔꤣꤧ꤬ ꤕꤢ꤭꤯” 19ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩ ꤜꤢꤨ꤭ ꤟꤢꤨꤣꤧ꤭ ꤔꤣꤧ꤬ꤗꤢ꤬, ꤢ꤬ ꤞꤤ ꤟꤢꤩꤜꤥ꤭ ꤜꤢꤨ꤭ ꤔꤢꤧ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤊ꤫ꤢꤦ꤬ ꤞꤣꤧ꤭ ꤟꤢꤨꤒꤢꤩ꤭ ꤕꤢ꤭ ꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤜꤤ꤭ꤢ꤬ꤒꤣꤧ꤬ꤋꤢꤩ꤭ ꤊ꤫ꤢꤦ꤬ ꤥ꤬ꤜꤥ꤭ꤓꤢꤧ꤬ ꤟꤢꤨꤒꤢꤩ꤭ ꤕꤢ꤭ ꤢ꤬ꤑꤢꤩ꤭ꤔꤣꤧ꤬ ꤖꤢꤧ꤯ ꤓꤥ꤭ꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩ ꤜꤢꤨ꤭ ꤔꤢꤧ, “ꤋꤚꤝꤢ꤭ ꤠꤢꤧ꤭ꤋꤛꤢ꤭꤯”
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤘꤣ ꤢ꤬ꤚꤥ꤬ꤒꤣꤧ꤬ꤟꤢꤩ꤬
20ꤙꤣꤧ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤗꤢꤧꤊꤢ꤬ꤋꤛꤢ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤗꤢꤧꤓ꤫ꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤘꤣ ꤢ꤬ ꤗꤥ꤬ꤚꤣꤧ ꤜꤢꤨ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤋꤚꤝꤢ꤭ꤊꤣꤧ꤭ ꤛꤢꤩ꤬ꤞꤤ꤭ꤋꤛꤢ꤭꤯ (ꤢ꤬ ꤗꤢ꤬ ꤖꤚꤢꤩ꤬ ꤘꤣ ꤢ꤬ ꤥ꤬ ꤒꤣꤧ꤬ꤒꤢꤩ꤬ꤚꤢꤩ꤭ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤙꤣꤧ ꤛꤢꤩ꤬ꤞꤤ꤭ ꤢꤩ꤬ꤏꤢꤩ꤬ꤢꤩ꤬ ꤗ꤫ꤢꤪ꤬ꤟꤢꤩ ꤢ꤬ꤋꤢꤩ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧ, ꤚꤣꤧ꤬ ꤢ꤬ ꤘꤣꤧꤟꤣꤧ꤭ ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬, ꤢꤨ꤭ꤕꤢꤩ꤭ ꤊ꤫ꤢꤦ꤬ꤚꤢꤩ꤭ ꤤ꤬ꤏꤢꤩ꤭ꤒꤢ꤭ꤊꤢꤧ꤭ ꤔꤢꤧ꤬ ꤕꤢ꤭ ꤕꤢꤩ꤭?” ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧ꤯ ꤣꤧ꤭ꤗꤢ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤞꤣꤧ꤭ꤜꤢ꤭ꤟꤤꤒꤥ꤬ ꤢ꤬ꤋꤢꤩ꤭)#ꤛꤥ꤭ꤟꤢ꤬ ꤁꤃:꤂꤅ 21ꤙꤣꤧ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤗꤢꤧꤓ꤫ꤣꤧ꤬ ꤜꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤘꤣꤧꤟꤣꤧ꤭ ꤛꤢꤩ꤬ꤏꤛꤢꤨ ꤔꤢꤧ, “ꤙꤢꤧ꤬ꤡꤢꤩ꤬, ꤢ꤬ꤊꤣꤧ꤭ꤜꤢꤩ꤭, ꤢ꤬ ꤊ꤫ꤢꤦ꤬ ꤓꤝꤢ꤭ꤓꤢꤧ꤬ꤊꤣꤧ꤭ ꤟꤢꤨꤒꤢꤩ꤭ ꤕꤢ꤭?” ꤢ꤬ ꤘꤣꤧꤟꤣꤧ꤭ ꤛꤢꤩ꤬ꤏꤛꤢꤨ ꤟꤢꤨꤔꤣꤧ꤬꤯
22ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤠꤢꤧ꤭ ꤊꤢꤩ꤬ ꤞꤤꤛ꤫ꤢꤦ꤬ ꤔꤢꤪ꤭ꤥ꤬ꤞꤣꤧ꤭ꤖꤚꤢꤩ꤬ ꤒ꤫ꤥ꤬ ꤜꤢꤨ꤭ ꤘꤣ ꤠꤢꤧ꤭ ꤟꤢꤧ꤭ꤕꤢ꤭ ꤊꤢꤩ꤬ꤟꤢꤩꤚꤣꤧ꤬, ꤡꤢꤨꤘꤢꤦ꤬ ꤠꤢꤧ꤭ ꤖꤢꤧ꤯ ꤔꤣꤧ꤬ꤗꤢ꤬ ꤔꤢꤧ꤬ ꤒꤢꤩ꤬ꤗꤢꤩ꤬ ꤗ꤫ꤢ꤬ꤒꤥ꤬, ꤔꤢꤧ꤬ ꤒꤢꤩ꤬ꤗꤢꤩ꤬ ꤗꤢ꤬ ꤔꤢꤧ꤬ ꤙꤢꤩ꤬ ꤋꤚꤝꤢ꤭ꤊꤣꤧ꤭ ꤠꤢꤧ꤭ ꤖꤢꤧ,” ꤢ꤬ ꤟꤢꤩ ꤜꤢꤨ꤭ ꤟꤢꤨꤔꤣꤧ꤬꤯ 23ꤘꤣ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩ ꤟꤢꤨꤣꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭, ꤍ꤫ꤥ꤬ ꤜꤥ꤭ꤕꤣꤧ꤬ꤏꤤ꤭ꤡꤝꤢ ꤙꤢꤪ꤭ꤙꤛꤢ꤬ꤜꤢꤪ꤭ ꤘꤣ ꤕ꤫ꤥ꤬ꤠ꤫ꤢꤧ꤬ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤢ꤬ꤊꤜꤢꤩ꤭ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤔꤣꤧ꤬ꤒꤣ꤬ꤖꤚꤢꤩ꤬ ꤢ꤬ ꤞꤣꤧ꤭ꤒꤥ꤬ ꤟꤢꤩꤔꤣꤧ꤭꤯, ꤢ꤬ ꤟꤢꤩ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬꤯ ꤗꤢ꤬ꤔꤢꤧꤚꤣꤧ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤟꤢꤩ ꤔꤢꤧ ꤢ꤬ ꤞꤣꤧ꤭ꤒꤥ꤬ ꤟꤢꤨꤔꤣꤧ꤬ ꤗ꤫ꤢ꤬ꤒꤥ꤬꤯ ꤢ꤬ ꤟꤢꤩ ꤔꤢꤧ, “ꤠꤢꤧ꤭ ꤊꤢꤩ꤬ ꤞꤤꤛ꤫ꤢꤦ꤬ ꤔꤢꤪ꤭ꤥ꤬ꤞꤣꤧ꤭ꤖꤚꤢꤩ꤬ ꤒ꤫ꤥ꤬ ꤜꤢꤨ꤭ ꤘꤣ ꤠꤢꤧ꤭ ꤟꤢꤧ꤭ꤕꤢ꤭ ꤊꤢꤩ꤬ꤟꤢꤩꤔꤣꤧ꤬ ꤚꤣꤧ꤬ ꤡꤢꤨꤘꤢꤦ꤬ ꤠꤢꤧ꤭ ꤖꤢꤧ, ꤔꤣꤧ꤬ꤗꤢ꤬ ꤔꤢꤧ꤬ ꤒꤢꤩ꤬ꤗꤢꤩ꤬ ꤗ꤫ꤢ꤬ꤒꤥ꤬,” ꤢ꤬ ꤟꤢꤩ ꤟꤢꤨꤔꤣꤧ꤬ ꤖꤢꤧ꤯
24ꤖꤚꤢꤩ꤬ ꤚꤢ꤭ꤗꤢꤚꤢ꤭ꤒꤢꤩ꤭ ꤒꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤗꤢ꤬ ꤠꤢꤧ꤭ ꤘꤣ ꤢ꤬ ꤓꤝꤢ꤭ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤖꤢꤧ, ꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤜꤢꤪ꤭ ꤜꤢꤪ꤭ ꤒꤢꤩ꤬ꤗꤢꤩ꤬ꤓꤝꤢ꤭ꤓꤢꤧ꤬ ꤢ꤬ꤔ꤫ꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤚꤢ꤭ꤗꤢꤚꤢ꤭ꤒꤢꤩ꤭ ꤖꤢꤧ꤯ ꤢ꤬ ꤒꤢꤩ꤬ꤟꤢꤩꤏꤥ꤬ꤜꤥ꤭ ꤕ꤫ꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ꤒꤥ꤭ ꤜꤢꤪ꤭ ꤖꤢꤧ ꤔꤣꤧ꤬ ꤕꤢꤩ꤬ ꤞꤤꤑꤢꤩ꤭꤯
ꤒꤢꤩ꤬ꤟꤢꤩꤙꤢꤩ꤬ ꤘꤣꤋꤛꤢ꤭ ꤒꤣꤧ꤬ꤘꤢꤦ꤬
25ꤊꤢꤨꤔ꤫ꤢꤧ꤬ꤣꤧ꤭, ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤗꤢꤩ꤬ꤒꤢꤩ꤬ ꤘꤣ ꤢ꤬ꤚꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤥ꤬ꤢꤩꤜꤥ꤬ꤕꤢ꤬꤯ ꤊꤢꤩ꤬ ꤚꤢ꤭ꤗꤢꤚꤢ꤭ꤒꤢꤩ꤭ ꤜꤢꤪ꤭ ꤜꤢꤪ꤭ ꤢ꤬ ꤗꤢꤩ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤟꤢꤩꤔꤣꤧ꤬ꤗꤢ꤬, ꤠꤢꤧ꤭ ꤒꤣꤧ꤬ꤔꤢꤩ꤬ ꤔꤢꤧ ꤟꤢꤩ꤬ꤋꤢꤨ꤬ꤣꤧ꤭ ꤒꤣ꤬ꤙꤢ꤬ꤜꤢꤪ꤭ ꤡꤣꤧꤔꤣꤧ꤬, ꤜ꤫ꤢꤩ꤬ꤘꤢꤧ꤬ꤜꤤ꤬ ꤢ꤬ꤜ꤫ꤢꤩ꤬ꤥ꤬ ꤕ꤫ꤥ꤬ꤕꤢ꤬ ꤡꤣꤧꤒꤥ꤬ ꤟꤣꤧ꤯
Currently Selected:
ꤛꤥ꤭ꤟꤢ꤬ 21: eky-Kali-MM
Highlight
Share
Copy
Want to have your highlights saved across all your devices? Sign up or sign in
Wycliffe USA
