ဒေါ ဂုဝ် 18

လွင် အာမူ အာမာတ် ဇဝ်ဖြာ တး ဒူင် ကွယ် အာဘြာဟမ်

1ဝါယ် အန် တီ အာဘြာဟမ် တွိုန် ဝီ ကွယ် ဒီ ဟေ ထေရေပ် ဒူင် စိူဝ် မမ်ရေ။ န့ ဇမ် အူ ဆီငဲ၊ အန် ကွယ် ဒီ အာတ့် ထိုပ် ဘိက် အန်။ န့ မုး ဒေါ ကာတဲ ဆီငဲ ဒေါ ကာဟွာ့ ကာဆဝ်။ ဒေါ အန် တီ ဇဝ်ဖြာ ဝီ တး ကာပ့လုး ဒီ အန်။ 2ဒေါ ကွယ် အန် ဒီ အာတ့် ထိုပ် ဘိက် အန်၊ အန် ဝီ ယွတ် ရူပ်၊ န့ မိုဝ်း ဒါ အူယ် ဝီ အီ ကွယ် ဒီ အာတ့် အန်။

3အန် ဟဲ့ ဟွတ့် ယိုဝ် ဂေ၊ အန် ဝီ ယိတ့် အူ ဇေန့်၊ ဟာဝ် ရွုး ဂေ၊ တဝ်း၊ “အိုယ် ဘေ ဇဝ်၊ ဆေ ဘေ ကာဝေ အုဝ်၊ ကွဲ့ တဲး ဘေ ကာလုဝ်း အုဝ်၊ အီ မုး ဒဲစေန့် ဘေ ဇဝ်။ 4တဲး ဘေ ခ့ဝါင် အုဝ် ဒိုဝ်း အိုမ် အီ စဲက်၊ တဲး ယေ ပွိုန် ဒီ ဘာယ် ပ့လဝ် ဘေ။ ဟဲ့ ဟွတ့်၊ တဲး ဘေ ဒီလှဝ် နာ ခြိုမ် ဟေ တီ အာဒါ အူ ကာစန်။ 5ဒေါ အန် တီ အုဝ် ဒီ ဟာဝ် ဒိုဝ်း ဒွါ ပီ ဒီ ဟူမ် အီ စဲက် ဒီ ဘေ၊ တဲး ဘေ ဝီ မိုဝ်း ပ့လူမ်။”

ဂေ ဝီ တဝ်း၊ “အိုဝ်၊ တဲး မဲ ဘူင် ပါယ် တီ။”

6ဟဲ့ ဟွတ့်၊ အန် ဟာဝ် ဟဲ ဟဲ၊ လိုပ် ခဲင် ထိုပ် ဘိက် အီ မုး ဒူင် ကွယ် နာင် ဆာရာ။ အန် တဝ်း ဒီ နာင်။ “တဲး မဲ ပီခြန် ဒိုဝ်း ကာပဲ့ ခဝ်ချုင် အူယ် ဆီလယ့်၊ တဲး မဲ ဟပ် အိုမ်၊ ကာဝ်ု ဘဲန် ခါမုန်။”

7ဟဲ့ ဟွတ့်၊ အန် ဟာဝ် ဒူင် ကွယ် မာမက်၊ ရဝ်း ဂွန် မာမက် အီ ဒီတဲတ်၊ အီ စှိတ်၊ ဒွါ ဒီ ဒဲစေန့် အန်၊ တဲး အန် ပီခြန် ဒီ ဘူင် ဟာပ်။ 8ပန် တီ အန် ဝီ ဒိုဝ်း အိုမ် ပူ မာမက် ဘော အိုမ် ပူ မာမက် အီ ပြာင် ဘော ဟာပ် ယင် မက် ပီ ဒင် အန်၊ ဘ့လေး တူတ့် ဒွန် မျုဝ်၊ တဲး ဂေ ဟူမ်။ အာဘြာဟမ် ယီ ယွတ် လိုမ်လာ ဂေ ဒေါ ဟူမ် ဂေ။

9ဟဲ့ ဟွတ့်၊ ဂေ ဒီမွှတ် အန် တဝ်း၊ “မှဝ် အီဘိုန့် မဲ အီ စိူဝ် နာင် ဆာရာ။း”

အန် တဝ်း၊ “အန် ကွယ် ခဲင် ထိုပ် ဘိက် တီ။”

10အန် ဇဝ် ဝီ တဝ်း၊ “ပေါ အူ ဆီနမ် ဟီ နုဝ့်၊ အုဝ် ဒီ ဝီ တး ဒူင် ကွယ် မဲ။ ဒေါ အန် တီ အီဘိုန့် မဲ အီ စိူဝ် နာင် ဆာရာ၊ အန် ဒီ မိုဝ်း ဂွန် အီမာယ် အူ ဝီ။”

နာင် ဆာရာ ယီ ယိုဝ် ဂြုဝ်း တီ ဒေါ ကွယ် အန် ဒီ ခူပ် မာလုဝ်း ခဲင် ထိုပ် ဘိက် အီ မုး ဒီ ပန် ဒူင် ကွယ် အူယ် ဇဝ် တွိုန်။ 11အာဘြာဟမ် ဂါယ် နာင် ဆာရာ ဟဲ့ ကတ် ကာဆဝ်။ နာင် ဆာရာ အာဝ် ဟူ မိုဝ်း ခြိုင် ကာပ့လု၊ အာဝ် ဟူ နပ် ဒီ မိုဝ်း ဂွန်။ 12ခုဝ် အန် တီ၊ နာင် ဆာရာ ဝီ ကာညး ခဲင် နဝ်း အန်။ အန် တဝ်း၊ “ဒေါ တီ နီ၊ အာဆာက် အုဝ် ဟဲ့ ကိူန်။ အုဝ် အာဝ် ဟူ မိုဝ်း နဝ်း ဆီ နှိုမ်။ ဘော အီမာယ် အုဝ် ဟဲ့ ကတ် ကာဆဝ်။”

13ဇဝ်ဖြာ ဝီ ကာလာင် ဂြုဝ်း ဒီ အာဘြာဟမ် တွိုန် တဝ်း၊ “မှဝ် မ့ပါယ် ပီ ကာညး နာင် ဆာရာ တဝ်း၊ ‘အုဝ် တူ နပ် ဒီ မိုဝ်း ဂွန် ဒေါ ကိူန် အာဆာက် အုဝ် ခဲ့ နီ။’ 14န့ တူ မိုဝ်း မာဆေ၊ ပီ တူ ပွိုန် ဘူင် ဇဝ်ဖြာ။ အုဝ် တဝ်း ပေါ အူ ဇေန့်၊ အူ ဆီနမ် ဟီ နုဝ့်၊ အုဝ် ဒီ ဝီ တး ဒီ နီ။ ဒေါ အန် တီ နာင် ဆာရာ ဒီ မိုဝ်း ဂွန် အီမာယ်။”

15ပန် တီ နာင် ဆာရာ ကာလုဝ် တဝ်း၊ “အုဝ် တူ ကာညး။” အန် ဘော မိုဝ်း နဝ်း ယုဝ်။

အန် ဇဝ် ဝီ တဝ်း၊ “အာဝ် မှာန် ပီ တဝ်း မဲ၊ မဲ ဟဲ့ ကာညး။”

16ပန် တီ ဂေ အူယ် ကာဒင် တွိုန်၊ ဂေ ဝီ ယိတ့် ဟာဝ် ဒူပ် န့တေန့် အီ ဇမ် မိူင် ဆုဝ်ဒူမ်။ အာဘြာဟမ် ဘော ဟာဝ် တိုယ် ဂေ။

လွင် အာဘြာဟမ် ဆာခိုဝ် ဒါင် ဒူအီ ခဲင် မိူင် ဆုဝ်ဒူမ်

17ဇဝ်ဖြာ ယီ တဝ်း၊ “အုဝ် တူ ပွိုန် ချြီင် ဒီ အာဘြာဟမ် ပီ ဒီ ဘူင် အုဝ်။ 18အုဝ် ဟဲ့ ဟွတ့် ဒွါ ကာဒိက် ဆတ်ဇာ ဒီ အန် တဲး အန် ဘဲန် အာမျုဝ် ဒူအီ ကိူန်၊ အာမျုဝ် ဒူအီ အီ မိုဝ်း ပ့လူမ်။ အုဝ် ဟဲ့ ဟွတ့် တဝ်း၊ ကူပ် ညှိုမ် အန်၊ အုဝ် ဒီ မွင့်ကာရာ တဲး ဒူအီ ဒွန် မျုဝ် ဒဲင် ကာဒါယ် နီ။ 19အုဝ် မိူဝ် ဟဲ့ တဲး အန် နပ် တူတ့် လွင် အုဝ်၊ တဲး အန် ဝီ မာနုဝ် ဂေ လှုက်လှာန် အန်၊ တဲး ဂေ ဒူပ် ဇဝ်ဖြာ၊ တဲး ဂေ ဘူင် အီ မှာန် အီ မွှိုမ်။ ပါယ် တီ အုဝ် ဒီ ပဲ ဒီ ဘူင် တဲး န့ ဘဲန် တူတ့် ဒွန် မျုဝ် ပီ ဒွါ အုဝ် ကာဒိက် ဆတ်ဇာ ဒီ အန်။”

20ပန် တီ ဇဝ်ဖြာ ဝီ ကာလာင် ဂြုဝ်း ဒီ အာဘြာဟမ် တဝ်း၊ “ဂေ ဒူအီ အီ ကွယ် ခဲင် မိူင် ဆုဝ်ဒူမ် ဂါယ် မိူင် ဂုဝ်မုဝ်၊ ဂေ ဟဲ့ ဆီနန် ဆီနိူင်။ မှာပ် ဂေ မိူဝ် ဟဲ့ ကိူန် ကာဆဝ်။ 21အုဝ် ဒီ လူင် ဒူင် ကွယ် ဂေ၊ ယွတ် ယုဝ် ဟဲ့ မှာန် ပီ ထူမ် အုဝ် လွင် ပီ ဆီနန် ဆီနိူင် ဂေ။ ဆေ အာဝ် မှာန် အုဝ် ဒီ ဘော နပ်။”

22ဇဝ်ဖြာ ဟဲ့ ဟွတ့် ကာလာင် ပါယ် တီ ဂါယ် ဒူအီ အာ ဝီ အီ ဘော ဟာဝ် ရိုမ် ဒူပ် အာဘြာဟမ် တွိုန်၊ ဂါယ် လာယ် ကာဂဝ်း အန်၊ ဟာဝ် ဒူပ် န့တေန့် အီ ဇမ် မိူင် ဆုဝ်ဒူမ်။ ဇဝ်ဖြာ ယီ ကွယ် ဒီ အာတ့် အာဘြာဟမ်။ 23အာဘြာဟမ် ယီ ဟာဝ် ကာတတ် အန် ဇဝ်။ အန် တဝ်း၊ “မဲ ဇဝ်၊ န့ ဟဲ့ မှာန်၊ မဲ ခြာမ် ဒီ ပျာတ့် ဝဲန် ဒူအီ အီ မိုဝ်း နဝ်း ဆိူဝ် နဝ်း မှာန် ဒီ ရိုမ် ဒူပ် ဒူအီ အီ ဘူင် မှာပ် ဆေဆေ။း 24ဆေ န့ မိုဝ်း ဒူအီ နဝ်း ဆိူဝ် နဝ်း မှာန် ဖန် ဂိုဝ် ဝီ၊ မဲ ဆီ ပျာတ့် ဝဲန် တူတ့် ဂေ ဘောကာဂ့လျီတ်။း ကူပ် မိုဝ်း ဒူအီ နဝ်း ဆိူဝ် နဝ်း ဖန် ဂိုဝ် ဝီ၊ တဲး မဲ ကာဝေ ဒူအီ ဘော မိူင်။ 25ကွဲ့ ဘူင် တဲး ဘော ဒူအီ တူ မွှိုမ် ဘော ဒူအီ မွှိုမ် စှိုမ် ဒီ ရိုမ် အာဆာက် ဂေ။ ကွဲ့ တဲး ဒူအီ မွှိုမ် လုဝ် ခမ် ပီ ဒူအီ တူ ဒူပ် မဲ ဇဝ်။ မဲ မုး ဒါ အီ ဆုင်ဖျာတ် ဒါရာ ဒီ ဒူအီ ဒွန် အီ ဒဲင် ကာဒါယ် နီ။ မဲ လုဝ် ဆုင်ဖျာတ် နာ မှာန်။”

26ပန် တီ ဇဝ်ဖြာ ဝီ တဝ်း၊ “ဆေ အုဝ် ဘော ယိုဝ် ဒူအီ မွှိုမ် အာဒါ ဖန် ဂိုဝ် ဝီ၊ အုဝ် ဒီ ဘော ဝဲန် မှာပ် ဂေ ဒွန် အီ ခဲင် မိူင်၊ ကူပ် မိုဝ်း ဂေ။”

27အာဘြာဟမ် တွိုန် ဝီ တဝ်း၊ “အိုယ် မဲ ဇဝ်၊ အုဝ် ဟဲ့ ယ ဒီ ကာလာင် ဂြုဝ်း ဒီ မဲ၊ မာလဲ အုဝ် ပီ ကာပုး ဂေ ဘြဝ် ငဝ်၊ အာဝ် ကာအာပ် တဝ်း မာဆေ။ 28ဆေ န့ ယီ မိုဝ်း ဒူအီ နဝ်း ဆိူဝ် နဝ်း မှာန် အာဒါ ဖွုန် ဂိုဝ် ဒီ ဖန် ဝီ၊ မဲ ဒီ ဘော ဝဲန် ဂေ ဘော မိူင်၊ တဲး ဂေ စှိုမ် တူတ့်။း”

အန် ဇဝ် ဝီ တဝ်း၊ “ဆေ အုဝ် ယိုဝ် ဖွုန် ဂိုဝ် ဒီ ဖန် ဝီ၊ အုဝ် တူ ပျာတ့် ဝဲန် ဂေ ဘော မိူင်။”

29အန် ဝီ ကာလာင် ဂြုဝ်း ဒီ အန် ဇဝ် ပေါ အူ ဇေန့် တဝ်း၊ “ဆေ န့ ဘော မိုဝ်း ဒူအီ ဖွုန် ဂိုဝ် ဝီ။း”

ဇဝ်ဖြာ ဝီ တဝ်း၊ “အုဝ် တူ ဘူင် မာဆေ၊ ဆေ န့ မိုဝ်း ဒူအီ နဝ်း ဆိူဝ် နဝ်း မှာန် အာဒါ ဖွုန် ဂိုဝ် ဝီ။”

30အန် ဝီ တဝ်း၊ “မဲ ဇဝ်၊ ကွဲ့ တဲး မဲ ရူ ဒီ အုဝ်၊ ဆေ အုဝ် ကာလာင် ပေါ အူ ဇေန့်။ မာလဲ၊ ဆေ န့ ဒီ ဘော မိုဝ်း ဒူအီ အူယ် ဂိုဝ် ဝီ။း”

အန် ဇဝ် တဝ်း၊ “အုဝ် တူ ဘူင် မာဆေ၊ ဆေ အုဝ် ယိုဝ် ဒူအီ နဝ်း ဆိူဝ် နဝ်း မှာန် အာဒါ အူယ် ဂိုဝ် ဝီ။”

31အာဘြာဟမ် ဝီ တဝ်း၊ “အိုယ် မဲ ဇဝ်၊ အုဝ် ဟဲ့ ယ ကာလာင် ဂြုဝ်း ဒီ မဲ။ ဆေ န့ ဘော မိုဝ်း ဒူအီ နဝ်း ဆိူဝ် နဝ်း မှာန် အာ ဂိုဝ် ဝီ။း”

အန် ဇဝ် ဝီ တဝ်း၊ “ဆေ အုဝ် ယိုဝ် ဒူအီ နဝ်း ဆိူဝ် နဝ်း မှာန် အာ ဂိုဝ် ဝီ၊ အုဝ် တူ ပျာတ့် ဝဲန် ဂေ ဘော မိူင် ကူပ် မိုဝ်း ဂေ။”

32အန် ဝီ တဝ်း၊ “မဲ ဇဝ်၊ ဆေ အုဝ် ကာလာင် ပေါ အူ ဇေန့်၊ ကွဲ့ တဲး မဲ ရူ ဒီ အုဝ်။ ဆေ န့ ဒီ မိုဝ်း ဒူအီ ဂိုဝ် ဝီ။း”

အန် ဇဝ် တဝ်း၊ “ဆေ န့ မိုဝ်း ဒူအီ နဝ်း ဆိူဝ် နဝ်း မှာန် ဂိုဝ် ဝီ၊ အုဝ် တူ ပျာတ့် ဝဲန် ဂေ ဘော မိူင်။”

33ဟဲ့ ဟွတ့် ကာလာင် ပါယ် တီ ဇဝ်ဖြာ ဝီ လေး ဒူင် ကွယ် အာဘြာဟမ်။ အာဘြာဟမ် မိူဝ် ဝီ ဝေန့် ဒူင် ကွယ် အန်။

Currently Selected:

ဒေါ ဂုဝ် 18: pce

Highlight

Copy

Want to have your highlights saved across all your devices? Sign up or sign in

Learn More About Palaung, Ruching Bible