ယဟ 2

လွင် ဇဝ် ယေဆူ ဘူင် တဲး အိုမ် ဘဲန် အိုမ် မာငုန်

1ဝါယ် အန် တီ အူယ် ဆီငဲ၊ န့ မိုဝ်း ဘ့လွယ် ခတ် ခဲင် မိူင် ခါနာ အီ ကွယ် ခဲင် အိူင် ဂါလီလေ။ ဘော မာ ဇဝ် ယေဆူ တး ဟူမ် ခတ် တီ။ 2ဂေ ဟဲ့ ဘာင် ဘော ဇဝ် ယေဆူ ဘော ဒီဘဲ အန်၊ တဲး ဘော ဂေ တး။ 3ဒေါ အန် တီ ဂေ ဟဲ့ ဒျီင် တူတ့် အိုမ် မာငုန်၊ အာဝ် ဟူ မိုဝ်း။ မာ ဇဝ် ယေဆူ ဝီ ကာလာင် ဒီ ဇဝ် ယေဆူ တဝ်း၊ “အိုမ် မာငုန် ဂေ ဟဲ့ တူတ့်။”

4အန် ဝီ တဝ်း၊ “အိုယ် မာ၊ ကွဲ့ စ်ု အုဝ် ဘူင် မာဆေ။ ဇဝ်ဖြာ ညှမ် တဲး အုဝ် ဘူင် ဇိုဝ် မှဝ်။”

5မာ အန် ယီ ဟာဝ် ကာလာင် ဂြုဝ်း ဒီ ဒဲစေန့် ခဲင် ကာင်။ အန် တဝ်း၊ “ဆေ အန် စ်ု ဘေ ဘူင် ဇိုဝ် မှဝ်၊ တဲး ဘေ ဘူင် ပါယ် တီ။”

6ခဲင် ကာင် တီ ယီ မိုဝ်း ပြဲန့် တာင် ဒဝ် ဘူင့်။ ဂေ ဘူင် ပြဲန့် တီ တာ မာဝ်။ ဂေ ဒူအီ အာယူဒါ တာ ပြဲန့် တီ ဘာယ် ဘဲန် မျုဝ် ဘဲန် မျုဝ်၊ တဲး န့ ဆီငါ၊ တဲး န့ ဒူပ် ဒါရာ။ ပြဲန့် တီ ဒွန် ဘူင့် ပွိုန် ဟပ် အိုမ် ကာဘက် ဖွုန် ဖန် ပုင်။

7ဇဝ် ယေဆူ ဝီ တဝ်း ဒီ ဒဲစေန့် တွိုန်၊ “တဲး ဘေ တဝ့် အိုမ်၊ ဟပ် ခဲင် ပြဲန့် တီ၊ တဲး ကော နုဝ့် ဒွန် ဘူင့်။” ဂေ ဝီ ဘူင် ပါယ် တီ။

8ဂေ ဟဲ့ ဟွတ့် ဘူင်၊ အန် ဝီ တဝ်း၊ “ဒေါ တီ နီ၊ ဘေ ပ့လက် အိုမ် တီ ခေါ အီ စဲက်၊ တဲး ဒါ အီ ဘဲန် ဟြုဝ် ဝီ စိမ်။”

9ဂေ ဟဲ့ ဟွတ့် ဘူင် ပီ စ်ု ဇဝ် ယေဆူ၊ ဟြုဝ် တွိုန် ဝီ စိမ် အိုမ် တီ။ န့ ယီ ဟဲ့ ဘဲန် အိုမ် မာငုန်။ ဟြုဝ် တွိုန် တူ နပ်၊ န့ ဒွိုမ် မုး အိုမ် ပီ ဟပ် ဂေ ခဲင် ပြဲန့် တွိုန်။ ဂေ ဒဲစေန့် အီ တဝ့် လှုဝ် အိုမ် ခဲင် ပြဲန့် တွိုန်၊ ဂေ ယီ နပ်။ ဟြုဝ် တွိုန် ဝီ ဒဲ့ ကာညူမ် အီ ခတ် တွိုန်၊ တဝ်း ဒီ အန်၊ 10“ဒွန် အီ တဲး ခဲတ့် ဒျီင် အိုမ် မာငုန် အီ မွှိုမ် ဒီ အာတ့်။ ဟဲ့ ဟွတ့်၊ ဝါယ် ခဲတ့် ဟဲ့ ဒျီင် ကိူန်၊ ဂေ ဝီ ဒွါ အိုမ် မာငုန် အီ တူ ဘော မွှိုမ်။ မဲ ယီ ဟဲ့ အုန် အိုမ် မာငုန် အီ မွှိုမ် ကာဆဝ်၊ ဒွါ ခဲတ့် ဒျီင် ဒေါ တီ နီ။”

11ပီ ဘူင် ဇဝ် ယေဆူ တီ၊ န့ မုး ဒေါ ဂုဝ် ဒီ ကာစုး အန် ဒီ ဘူင် အီ မွှိုမ် အာမ် ကာဆဝ်။ ဒေါ အန် တီ အန် ကွယ် ခဲင် မိူင် ခါနာ အီ ကွယ် ခဲင် အိူင် ဂါလီလေ။ ပီ ဘူင် အန် တီ၊ န့ တဲး အီ နပ် လွင် အာဖုင် ဒင်ခုဝ် အန်။ ဟဲ့ ဟွတ့်၊ ဒီဘဲ အန် ကော ညှိုမ် အန်။

လွင် ဇဝ် ယေဆူ လိုပ် ခဲင် ဟုဝ် ဇဝ်ဖြာ

12ဝါယ် အန် တီ ဇဝ် ယေဆူ ဝီ လူင် မိူင် ကာပေနာရိုမ်။ ဘော မာ အန် ဂေ ဝါ အန်၊ ဘော ဒီဘဲ အန် ဟာဝ် ရိုမ် ဒူပ် အန်။ ဂေ ယီ တူ ကွယ် လှေန့် ခဲင် မိူင် တီ။

13ဒေါ အန် တီ အာခြာဝ် ဒီ ဘူင် ဂေ ဘ့လွယ် ဟဲ့ ကာတတ် ဒီ ဇမ်။ န့ မုး ဘ့လွယ် လှုဝ်း ဂေ ဒူအီ အာယူဒါ ဇဝ်ဖြာ ဒေါ ကာလုဝ်း အန် ကာင် ဂေ။ ခုဝ်၊ ဇဝ် ယေဆူ ဟုဝ့် ခဲင် မိူင် ယေရူဆာလဲမ်။ 14အန် ဟဲ့ ဟွတ့် ဇမ်၊ အန် ဟာဝ် လိုပ် ခဲင် ဟုဝ် ဇဝ်ဖြာ။ န့ မိုဝ်း ဒူအီ အီ ယွင့် မက် အာလူင့် ဘော မာဘူ ဂေ မာဘ့လူယ်။ န့ ဘော မိုဝ်း ဒူအီ လာယ် ကာရဝ်း ကာဂူ ရွိုန်၊ ဂေ ဘောကာဂ့လျီတ် ကွယ် ခဲင် ဝဲင် ဟုဝ် ဇဝ်ဖြာ။ 15ပန် တီ အန် ဝီ ဒိုဝ်း မ့ပူင့် ဝန်၊ ညွန် ဘော မက် ဘော မာဘူ လေး ခဲင် ဟုဝ် ဇဝ်ဖြာ။ အန် ဘော စုဝ့် ကာဘ့လျီ့ ကာစှူင့် ဂေ ဒူအီ အီ လာယ် ကာရဝ်း ကာဂူ ရွိုန်။ အန် ဘော ဟုး ဘြတ် ရွိုန် ပီ အုန် ဂေ။ 16အန် ဝီ တဝ်း ဒီ ဂေ ဒူအီ အီ ယွင့် မာဘ့လူယ်၊ “ဒိုဝ်း လေး ကြုဝ် ဘေ ဟာဝ်၊ ကွဲ့ ဘူင် တဲး ကာင် ဂုန့် အုဝ် ဝီ ဘဲန် ကာလး။”

17ဒေါ အန် တီ ဂေ ဒီဘဲ အန် ဝီ လှုဝ်း ပီ ဒဲမ် အုန် ခဲင် ဘပ် ဇဝ်ဖြာ။ န့ တဝ်း လွင် ဇဝ် ယေဆူ၊ “အုဝ် ရွက့် ကာဆဝ် ဟုဝ် ဇဝ်ဖြာ။ အုဝ် ခမ် ယမ် ဒီ ရွက့်။”

18ဂေ ဒူအီ အာယူဒါ ဝီ မှာန့် အန် ဘျ ပွုန် အန်။ ဂေ တဝ်း၊ “တဲး မဲ ဘျ နာ မွှိုမ် အာမ် ကာဆဝ် အူ မျုဝ် အီ တဲး ယေ နပ် မဲ မိုဝ်း ပွုန် ဒီ ဘူင် ဇိုဝ် တီ။”

19ပန် တီ ဇဝ် ယေဆူ ဝီ တဝ်း၊ “တဲး ဘေ ဘူင် တဲး ဟုဝ် နီ ကာပျာတ့် လိုဝ် တူတ့်။ အူယ် ဆီငဲ အုဝ် ဒီ ဝီ ဆမ် တဲး န့ ဟွတ့်။”

20ဂေ ဒူအီ အာယူဒါ ဝီ တဝ်း၊ “ယေ ဟဲ့ ဆမ် ဟုဝ် တီ၊ အာဒါ ဖွုန် ဂိုဝ် ဒီ ဒဝ် ဆီနမ် ကော ဟွတ့်။ မဲ ယီ တဝ်း၊ ‘အူယ် ဆီငဲ ဟဲ့ ပွိုန် ဝီ ဆမ် ဟုဝ် တီ၊ တဲး န့ ဟွတ့်။’” 21ဒေါ ကာလာင် ဇဝ် ယေဆူ လွင် ဟုဝ် တီ၊ အန် ကာလာင် လွင် ဒုဝ် ဘူင့် အန်။ န့ မုး ဒုဝ် ဘူင့် အန် အီ ပီ ဟုဝ် ဇဝ်ဖြာ တီ။ 22ဝါယ် အန် တီ ဇဝ် ယေဆူ ဟီ ဟွတ့် ယမ်၊ ဟီ ဟွတ့် ဝီ ယိတ့် ဝီ အိမ်၊ ဂေ ဒီဘဲ အန် ဝီ လှုဝ်း ဂြုဝ်း တီ ပီ ကာလာင် ဇဝ် ယေဆူ ဒီ ဂေ။ ဒေါ အန် တီ ဂေ ဝီ ညှိုမ် ဆီချာ ဂြုဝ်း ဇဝ်ဖြာ ပီ ဒဲမ် အုန် အန် ခဲင် ဘပ် ဇဝ်ဖြာ။ ဂေ ဘော ညှိုမ် ဘော ဂြုဝ်း ဇဝ် ယေဆူ ပီ ဒွိုမ် ကာလာင် အန် ဒီ ဂေ။

23ဒေါ ကွယ် ဇဝ် ယေဆူ ခဲင် မိူင် ယေရူဆာလဲမ်၊ ဒေါ ဘူင် ဂေ ဘ့လွယ် တွိုန်၊ န့ မိုဝ်း ဒူအီ ကိူန် အီ ညှိုမ် အန် ကူပ် ဘူင် အန် နာ မွှိုမ် အာမ် ကာဆဝ်။ န့ တဲး အီ နပ် အာဆေ အန် မုး။ 24ဇဝ် ယေဆူ ယီ တူ တဲး ဂေ နပ် နဝ်း အန် ကူပ် နပ် အန် နဝ်း ဒူအီ ဒွန် အီ။ 25အန် တူ လုဝ် အာဆေ ကာလာင် ဒီ အန် လွင် အီ ဟဝ်။ အန် ဟဲ့ နပ် ရာင် အန် မာဆေ ပီ ထာင် ဂေ ဒွန် အီ ခဲင် နဝ်း ဂေ။

Currently Selected:

ယဟ 2: pce

Highlight

Copy