Akte 6
6
Siwe hilfer fer ti aphostle
1En tsayt tëm noo, is ti kemaynte kewakst un te numer fon Yeesus sayn aanhënger is imer kreeser kep, un tii woo aus Israël kroos ketsoo waare hon aankefang sich peklaache keeche tii woo in Israël kroos kewakst waare. Te klaach waar tas ti witfraae fon te kriichixe net yeete taach tepay ketseelt am kewe waare fer ti teelung fom kelt. 2Tan hon ti tswelef aphostle te kanse krupe kesamelt un saate:
— Is net richtich tas meyer net em Hërkot sayn wort aan saan fer iwer kelt se reete. 3Tesweche, priiter, suucht aus unich aych siwe kuute mëner, fol fom Hayliche Kayst un wisheet, un meyer kewe tëne tii aarwat ap. 4Soo khëner meyer selepst unser tsayt wayter ans kepeet hënge un an ti aarwat fer Hërkot sayn wort aan saan.
5Al hon tsuu kesaat mit tee foerxlaach fon te aphostle. Tan hon se Stefan aus kesuuch, en man fol klaawe un fom Hayliche Kayst, un aach Filip, Prokoro, Nikanoor, Timon, Parmenas un Nikolau fon Antiokia, woo khee yut waar, awer hot fer ti yutentum iwer ketreet kehat. 6Tii mëner sin pis pay ti aphostle kenom kep, woo kepeet hon un hon ti hënt iwer tëne sayne khop kehal.
7Un soo is Hërkot sayn wort wayter ferprayt kep. In Yeruusalëm is te krupe fon Yeesus sayn aanhënger imer kreeser kep, un waar kroos te numer fon te yute priister woo te kristliche klaawe aan kenom hon.
Stefan khomt in ti katee
8Stefan, en man woo fiil keseechent waar fon Hërkot un fol macht, hot kroose wunere kemach unich em folek. 9Awer, phaar mitkliiter fon te “Sinakook fon te Fraye Mëner”, fon te yute woo fon te xtet Sireene un Alexantria khom waare, hon sich keeche Stefan kextelt. Tii un anere yute fon te rechioon fon Silisia un fon te prowins Aasia hon aankefang mit Stefan se tiskutiire. 10Awer, Hërkot sayne Kayst hot soo fiil wisheet kep fer Stefan, tas niks mee keeche kexproch khont kewe iwer ales was eyer kexproch hot. 11Tan hon se phaar layt petsaalt fer se saan:
— Meyer hon tee man keheyert fluuche aus xpreche keeche Mooses un keeche Hërkot!
12Soo hon se tas folek, ti fiirer un ti Kesets mayster uf kehetst. Tëm noo hon se Stefan kefang un hon em foer te Hooche Konseel kenom. 13Tan hon se phaar layt keprung fer liye iwer iim. Tii layt hon kesaat:
— Tee man heyert net uf se xpreche keeche unser hayliche Thëmpel un keeche Mooses sayn Kesets. 14Meyer hon em keheyert wii eyer saat tas tee Yeesus fon Nasarëë te Thëmpel niter rayse teet un ti kanse kewoonheete woo Mooses uns kep hot ferënere.
15Al tii woo in te xtup fom Hooche Konseel kesitst hon, hon xtaar Stefan aan kekukt un hon kesiin tas tëm sayn kesicht aus kesiin hot wii es kesicht fon en ëngel.
Currently Selected:
Akte 6: NTHunsrik
Highlight
Share
Copy
Want to have your highlights saved across all your devices? Sign up or sign in
2022 Sociedade Bíblica do Brasil
