Yohan 12

Yeesus in Petanye

Mateus 26.6-13; Markus 14.3-9

1Seks taache foer te Oostre, is Yeesus noo tas plats Petanye kang, woo Lasarus kewoont hot, tee woo eyer witer peleept hat. 2Too hon se en nachts ese prepareyert fer Yeesus. Marta waar am helfe petiine, un Lasarus waar eene fon tëne woo mit tëm am tix kesetst hon. 3Tan, hot Maria en kleesye fon en aariche tayre perfum kehool, fon phuer nart kemach. Tii hot te perfum an Yeesus sayn fiis kexut un hot se mit sayn hoer ketrokent; un tas kanse haus hot sich perfumeyert.#Lk 7.37-38 4Awer, Yuutas Iskariotes, te tisipel woo Yeesus hinerkeen teet, saat:

5— Tee perfum is mee wii tray hunert silwerne nikle weyert#12.5 Ver Yohan 6.7, nota.. Warom is tee net ferkhaaf kep, un tas kelt fer ti aarme kexënkt kep?

6Yuutas hot tas kesaat, net wayl tee ti aarme taure teet, awer wayl eyer en xpits puup waar. Tee hot ti kelt thax uf kepast un hot ti kewoonheet imer fon tëm raus hoole.

7Tan hot Yeesus keantwort:

— Los Maria in ruu! Tii sol tas uf heepe fer te taach fon mayn peëertichung. 8Ti aarme sin imer pay aych, awer ich wëre net imer pay aych sin.#Dt 15.11

Plaan fer Lasarus umpringe

9Fiil layt hon se wise kriit tas Yeesus in Petanye waar. Tan, sin se pis tort hiin kang net ploos weche tëm, awer aach fer Lasarus siin, te man woo Yeesus witer peleept hat. 10Tan, hon ti xëfe fon te priister resolweyert Lasarus aach umpringe; 11wayl, weche tëm, waare fiil yute sayn fiirer inxtich am lose un an Yeesus am klaawe.

Yeesus keet in Yeruusalëm rin

Mateus 21.1-11; Markus 11.1-11; Lukas 19.28-40

12Am anere taach, hot tas kroose folek woo uf es Oostre Fest kang waar keheyert saan tas Yeesus am aan khome waar in Yeruusalëm. 13Tan, hon se phalme rayse kehool un sin em pekeechne kang, am xraaye:

— Hosana fer Hërkot!

Tas Hërkot seechne sol tee woo khomt

im Hër sayn naame!

Tas Hërkot te Kheenich fon Israël seechent!#Sl 118.25-26

14Yeesus hot en eeselche kesuucht un hot em kerit, wii ti Hayliche Xrifte saan:

15“Folek fon Yëruusalem, khee pang hon!

Kuk! Too khomt ayre Kheenich,

en eeselche am rayte!”

16In tee keleechenheet, hon ti tisiple tas net ferxtan. Awer wii Yeesus xon tsurik kang waar noo em Hërkot sayn kloor, hon se traan ketënkt tas tas kexrip waar iwer tee un aach tas es tas waar was paseyert waar.

17Tas kroose folek woo pay Yeesus waar wii eyer Lasarus raus keruuf hot fon sayn kraap un en noch mool peleept hat, hot ti naychkheet ferteelt iwer tas woo paseyert waar. 18Un tas folek is Yeesus pekeechne kang, wayl ti layt se wise kriit hon tas tee te wuner kemach hat. 19Tan, hon ti fariseyer ëne fer te anere kesaat:

— Meyer sin niks am fertiine! Kukt! Tii sin al mit tee welt am keen!

Phaar woo khee yute sin keen Yeesus uf suuche

20Unich em folek woo noo Yeruusalëm kang waar fer es Fest mit hale, waare phaar woo khee yute waare. 21Tii sin mit Filip xpreche kang, woo fon te xtat Petsayta in Kalilëya waar, un hon ferlangt:

— Hër, meyer wole Yeesus aan trefe.

22Filip is tas fer Antrëas saan kang, un ti tswaay sin mit Yeesus xpreche kang. 23Too, hot eyer keantwort:

— Ti tsayt is khom tas ti kloor fom Soon fom Man reweleyert kept. 24Ich fersichere aych tas tas woer is: wen en weetse khorn net in ti eyert kexmis kept un net xtërept, is tee ploos en weetse khorn. Awer, wën eyer xtërept, wërt eyer fiil weets kewe. 25Weyer sayn leewe liipt, wërt net tas waare leewe hon; awer, weyer sich net aan krayft an sayn leewe uf tee welt, wërt tas waare leewe kriin fer imer.#Mt 10.39; 16.25; Mk 8.35; Lk 9.24; 17.33 26Weyer mich tiine wil, khom mich noo; un, woo ich sin, too wërt aach mayne tiiner sin. Un mayne Fater wërt eere al tii woo mich tiine.

Yeesus saat sayne toot aan

27Yeesus hot wayter kesaat:

— Yets sin ich en kroos petriipung am xpiire. Was sol ich saan? Meecht ich saan: Fater, pefray mich fon tee xtun fon phayn? Nee! Wayl, is fer tii xtun mit mache tas ich khom sin. 28Fater, reweleyer ti kloor fon tayne naame!

Tan is fom himel en xtim runer khom, woo saat:

— Ich hon se xon reweleyert un tuun se noch mool reweleere.

29Tas kroose folek woo too waar hot ti xtim keheyert un saat tas es en tuner kewees weyer. Anere hon fersichert tas en ëngel mit Yeesus kexproch het. 30Awer, ëyer saat:

— Waar net weche mich woo ti xtim khom is, awer weche aych. 31Ti xtun is khom tas tii welt julkeyert wërt, un tee woo an ti welt xikt wërt aus kextoost. 32Un, wën ich fon te eyert kehoop kewe, wërt ich ti kanse layt an mich aan tsiye.

33Tee saat tas fer se wayse uf was fer aart eyer xtërwe teet.

34Tas folek hot kefroot:

— Unser Kesets saat tas te Kristus fer imer leewe tuut. Wii saat teyer tas te Soon fom Man fon te eyert kehoop kewe mus? Weyer is tee Soon fom Man?#Sl 110.4; Is 9.7; Ez 37.25; Dn 7.14

35Yeesus hot keantwort:

— Tas licht playpt noch en pisye mee pay aych. Leept ayer leewe soo lang wii teyer tas licht noch hot, tas ti tunkelheet net uf mool uf aych falt. Weyer in te tunkelheet keet wees net woo hiin eyer keet. 36Soo lang wii teyer tas licht hot, klaapt an tas licht tas teyer im licht leewe khënt.

Tas folek klaapt net

Wii Yeesus tas kesaat hat, is eyer fort kang un hot sich ferxtekelt fom folek. 37Tii hon kesiin kehaat Yeesus ti kanse wunere mache, awer hon net an tëm keklaapt, 38tas sich in hale teet was te profët Isaiias saat:

“Hër, weyer hot an unser mensaaj keklaapt?

Un weyer hot kesiin tas es te Hër waar

woo tas am mache waar?”#Is 53.1 (LXX)

39Khonte net klaawe wayl, wii Isaiias saat:

40“Hërkot hot tëne ti aue plint kemach

un hot tëne sayn sin tsuu kemach,

tas se neet siin, un net ferxteen,

un net sich noo tëm wëne,

un keheelt kewe fon tëm.”#Is 6.10 (LXX)

41Isaiias saat tas wayl eyer ti kloor fon Yeesus kesiin hat un hot iwer Yeesus kexproch.

42Awer, fiil yute fiirer hon toch an Yeesus keklaapt, hon tas awer net unich em folek kesaat, tas ti fariseyer se net aus te sinakook fort yaae teere. 43Ti sin liiwer keloop kep fon te layt als keloopt kewe fon Hërkot.

Yeesus sayn wërter tuun julkeere

44Yeesus saat in hat xtim:

— Weyer an mich klaapt, klaapt net ploos an mich, awer aach an tee woo mich kexikt hot. 45Weyer mich siit, siit aach tee woo mich kexikt hot. 46Ich sin uf ti welt khom als licht tas tee woo an mich klaapt net in te tunkelheet playwe sol. 47Wen yemant mayn mensaaj aan heyert un tuut se net praktiseere, tuun ich em net julkeere. Wayl ich sin khom fer ti welt se rete, net fer se julkeere. 48Weyer mich ap xtoost un net mayn mensaaj aan nëmt hot xon weyer iim julkeere tuut. Ti wërter woo ich kesaat hon wëre te richter sin fon tëm persoon am letste taach.

49— Ich hon net in mayne aychne naame kexproch, awer te Fater, woo mich kexikt hot, is weyer mich ortnet was ich saan un aan saan sol. 50Ich wees tas sayne kepoote tas eewiche leewe kept. Was ich saan is kraat was mayne Fater mich kexikt hot saan.

Currently Selected:

Yohan 12: NTHunsrik

Highlight

Copy