Yohan 16

1Un Yeesus saat noch:

— Ich saan tas, tas teyer net ayre klaawe neewe lost. 2Teyer wërt fon te sinakooke raus kextoost, un khomt ti tsayt woo yeete ëne woo aych umpringt tënke tuut tas eyer em Hërkot sayne wile am tuun is. 3Tii wëre tas tings mache wayl se net te Fater khëne un net mich. 4Awer, ich saan tas aych, tas wen tas tings paseere tuut, teyer traan tënke tuut tas ich tas aych xon kesaat hat.

Em Hayliche Kayst sayn aarwat

Un Yeesus saat wayter:

— Ich saat tas net eenter, wayl ich noch pay aych waar. 5Awer, yets keen ich ticht pay tee woo mich kexikt hot. Un nimant fon aych froot mich: “Woo keest tuu hiin?” 6Awer, wayl ich tas kesaat hon, is ayer hërts fol traurichkheet kep. 7Ich saan ti woerheet wën ich saan tas es peser is fer aych tas ich keen. Wayl, wën ich net keen, khomt te Hilfer net; awer, wën ich keen, tuun ich en fer aych xike. 8Wen te Hilfer khomt, tuut tee ti layt fon te welt iwerlaychte tas sii en ferkheyert itee hon iwer ti sinte un was richtich un kerechtich is un aach fom Hërkot sayne xulkament. 9Ti layt fon te welt sin ferkheyert iwich ti sinte wayl se net an mich klaawe; 10sin ferkheyert iwich was richtich is un kerechtich, wayl ich keen noo em Fater, un teyer wërt mich nime siin. 11Un ti layt sin aach ferkheyert iwer te xulkament, wayl tee woo an tee welt xikt is xon xulkeyert.

12— Ich hon noch fiil tings fer aych se saan, awer teyer khënt tas yets net ferxteen. 13Awer, wën te Kayst fon te Woerheet khomt, tuut eyer ti kans woerheet aych lërne. Tee Kayst xprecht net aus sich selwer, awer wil saan ales was er keheyert hot un saat aych aan ales was paseere sol. 14Tee kriit se wise was ich aych se saan hon un saat tas fer aych, un soo pringt tee kloor fer mich. 15Ales was te Fater hot, is mayn. Tesweche saat ich tas te Kayst se wise kriit was ich tëm saan wil un tuut tas fer aych pekhant mache.

Traurichkheet un frayt

16Un Yeesus saat:

— Klaych siit teyer mich nime; awer klaych tëm noo, siit teyer mich witer.

17Phaar fon sayn tisiple hon khomenteyert:

— Was meecht tee saan wole? Eyer fersichert: “Klaych siit teyer mich nime, awer toch, klaych tëm noo, siit teyer mich witer”. Un saat aach: “Is wayl ich pay mayne Fater keen”. 18Was mënt tas “klaych tëm noo”? Meyer ferxteen net was tas saan wil.

19Yeesus, am wise tas tii wolte em aus froe, saat:

— Ich hon fersichert tas teyer mich klaych net mee siin tuut. Is es net, filaycht, too triwer woo teyer ëne em anere am froe sayt? 20Wayl ich fersichere aych tas tas woer is: teyer tuut prile un traurich kewe, awer ti layt fon te welt kewe froo. Teyer wërt traurich, awer fon tee traurichkheet khomt ti frayt. 21Wen en fraa an ti xtun khomt fer sayn khint uf ti welt se pringe, kept se traurich, wayl ti xtun fer layte mit se mache khom is. Awer, soo wii tas khint uf ti welt khomt, kept ti fraa soo froo tas se kaarnet mee an sayn layte tënke tuut. 22Soo paseyert tas aach mit aych: Yets sayt teyer traurich, awer ich khome aych noch mool siin. Tan kept teyer fol mit frayt, un nimant khan aych tii frayt wech hoole.

23— Wen tee taach khomt, tuut teyer mich niks froe. In woerheet saan Ich aych: Wen teyer was fer te Fater ferlange tuut, wil tee es aych in mayne naame kewe. 24Pis yets het teyer niks ferlangt in mayne naame; ferlangt un teyer wërt es kriin, tas ayer frayt komplët sin sol.

Ap kewine fon te Welt

25Un Yeesus macht xlus, am saan:

— Tas tings tuun ich aych saan torich fikuure; khomt ti xtun woo ich net mee torich ferklaychnise xpreche, awer xpreche kans klaar iwich te Fater. 26An tëm taach, ferlangt teyer tings in mayne naame; un ich saan aych tas ich weche aych em Fater aanhale. 27Wayl te aychne Fater aych liipt, un teyer het mich keliipt un het keklaapt tas ich fom Hërkot khom sin. 28Ich sin fom Fater khom un sin in ti welt khom; tëm noo, lose ich ti welt tsurik un keen noo em Fater.

29Sayn tisiple saate:

— Yets xprechst tuu kans klaar un penutst khee fikuur. 30Yets, wise meyer tas tuu ales weest un prauchst net tas yemant tich was froe tuut; tesweche, klaawe meyer tas, in fakt, tuu fom Hërkot khom pist.

31Yeesus antwort tëne:

— Klaapt teyer yets? 32Ti xtun khomt un is xon too, woo teyer ausnaner ferxtraut kept, yeete ëne noo sayn haus un lost mich aleen; awer toch, sin ich net aleen, wayl te Fater is pay mich. 33Tas tings hon ich aych kesaat tas teyer friite torich mich het. Uf te welt, macht teyer petriipunge mit; awer khënt kuute muut hon; ich hon ti welt kephakt.

Currently Selected:

Yohan 16: NTHunsrik

Highlight

Copy