Yohan 5

En laame wërt keheelt

1Too tenoo, waar en yute fest, un Yeesus is pis Yeruusalëm kang. 2Tort kepts en tanke woo fier inkënk hot un xteet ticht am Xoofe Toer. Uf hepreeyx wërt tee tanke “Peteesta” kenënt. 3-4Ticht an te inkënk fom tanke hon fiil kranke kelee: plinte un laame. [Tii hon kewaart pis tas waser sich peweecht hot, wayl tsayt tsu tsayt is en ëngel fom Hër runer khom un hot tas waser kexitelt. Te eyerxte woo too tenoo in te tanke rin kang is, is heel kep fon yeete krankheet.] 5Unich tëne waar en man woo xon acht un traysich yoore krank waar. 6Yeesus hot te man kesiin laye un, wayl eyer wust tas te man xon soo lang krank waar, hot er kefroot:

— Wilst tuu heele?

7Te man hot keantwort:

— Hër, ich hon nimant fer mich in te tanke tuun wën tas waser sich peweecht. Yeetes mool woo ich fersuuche in te tanke keen, keet en anere kranke foer.

8Too saat Yeesus:

— Xtay uf, hool tayn pet un kee!

9Im selwiche momënt, waar te man heel, hot sayn pet kehool un hot aan kefang se keen. Tas is am samstach paseyert. 10Tesweche hon ti yute fiirer tëm kesaat:

— Hayt is samstach, un unser Kesets kept khee erlaupnis tas tuu tayn pet too rom traast an tëm taach.#Ne 13.19; Jr 17.21

11Te man hot keantwort:

— Te man woo mich keheelt hot, hot kesaat: “Hool tayn pet un kee.”

12Tii hon kefroot:

— Weyer is te man woo tich tas mache kexikt hot?

13Tee wust awer net weyer tas kemach hat, wayl Yeesus waar fort kang weche te fiile mënxe woo tort waare.

14Xpeeter hiin, hot Yeesus te man aan ketrof am hoof fom Thëmpel un saat iwer tee:

— Heyer! Tuu pist yets heel. Khee sinte mee mache, tas net noch was xlimres paseyert mit teyer.

15Te man is fon tort pis pay ti yute fiirer kang fer saan tas es Yeesus waar weyer em keheelt hat. 16Too hon se aan kefang Yeesus yachte wayl tee te man am samstach keheelt hat.

17Too saat Yeesus fer tii:

— Mayn Fater xaft pis yets, un ich xafe aach.

18Un, wayl Yeesus tas kesaat hat, wolte ti yuter fiirer em mit ale kewalt umpringe. Wayl Yeesus hat net ploos tas kesets fom samstach net rexpekteyert, awer hot aach kesaat tas Hërkot sayn fater weyer, un soo, hot eyer sich selwich wii Hërkot kemach.

Hërkots Soon sayn autoriteet

19Too saat Yeesus iwer tii:

— Ich fersichre es aych tas tas woer is: te Soon khan niks aus sich mache, wayl tee macht ploos was eyer te Fater mache siit. Ales was te Fater macht, macht te Soon aach, 20wayl te Fater liipt te Soon un tsaycht tëm ales was eyer am mache is. Un tsaycht tëm noch kreeser tings wii tas, un teyer kept erxtaunt. 21Wayl soo wii te Fater ti toote witer peleept un kept tëne leewe, soo kept aach te Soon leewe weem eyer wil. 22Te Fater xulkeyert nimant, awer hot fer te Soon ti kans macht kep fer se xulkeere 23tas se al te Soon rexpekteere, soo wii se te Fater rexpekteere. Weyer te Soon net rexpekteyert, rexpekteyert aach net te Fater, woo em kexikt hot.

24— Ich fersichere es aych tas tas woer is: weyer mayn wërter aan heyert un klaapt an tee woo mich kexikt hot, hot es eewiche leewe un kept net xulkeyert, awer hot te toot xon hinerloss un hot xon es eewiche leewe kriit. 25Ich fersichere es aych tas tas woer is: ti uertsayt khomt, un ti is xon khom, woo tii toote em Hërkot sayn Soon sayn xtim heere, un tii woo es aan heere wëre leewe. 26Soo wii te Fater ti kwel fom leewe is, soo hot eyer aach em Soon ti macht kep fer ti kwel fom leewe sin. 27Un tee hot em Soon autoriteet kep fer se xulkeere, wayl tee te Soon fom Man is.

28— Ferwunert aych net too triwer, wayl ti uertsayt in am khome woo al ti toote em Soon fom Man sayn xtim heere 29un fon sayn kreewer raus khome. Al tii woo kuutes ketuun hon tuun witer peleepe un wayter leewe, un tii woo xlechtes ketuun hon tuun witer peleepe un kewe konteneyert.#Dn 12.2

Tsayer fer Yeesus

30Yeesus hot wayter mit tëne kexproch. Tee saat:

— Ich khan kaar niks mache aus mayn aychne wile, awer ich xulkeere tëm noo was mayn Fater saat. Mayn xulkamënt is kerecht wayl ich mache net mayne aychne wile, awer te wile fon tëm woo mich kexikt hot.

31— Wën ich fer mich selwer tsaye kewe teet, tan hete mayn wërter kaar khee weyert. 32Awer is en anere woo tsaye tuut fer mich, un ich wees tas tee ti woerheet saat fon meyer. 33Teyer hot tings froe kexikt fer Yohan, un te tsayer woo tee kep hot is woer.#Yo 1.19-27; 3.27-30 34Ich prauch awer nimant als tsayer, awer ich saan tas tings tas teyer keret kept.

35— Yohan waar wii en lamp woo keprënt un keklënst hot, un en tsaytlang waart teyer froo mit tëm sayn licht. 36Ich hon awer en tsaychnis uf mayn sayt woo xtërker is wii em Yohan sayne: is tas tings woo ich mache, woo mayn Fater mich mache kexikt hot. Tas xpiilt tsayer fer mich un pewayst tas te Fater mich kexikt hot. 37Te Fater woo mich kexikt hot, xpiilt aach tsayer fer mich. Teyer hot nii tëm sayn xtim keheyert un hot em net perseenlich kesiin.#Mt 3.17; Mk 1.11; Lk 3.22 38Tëm sayn wërter sin net in ayer hërts wayl teyer net klaapt an tee wo eyer kexikt hot. 39Teyer lërnt ti Hayliche Xrifte wayl teyer tënkt teet in tëne eewich leewe fine. Un kraat tii Xrifte tsayche noo meyer hiin. 40Awer teyer wolt net tsu mich khome fer leewe hon.

41— Ich sin net truf aus fon te mënxe keloopt kewe. 42Un teyer, ich khëne aych un wees tas teyer net te Hërkot ufrichtich liipt. 43Ich sin khom mit em Fater sayn autoriteet, un teyer hot mich net uf kenom. Awer wën yemant khomt mit sayn aychne autoriteet, tee tuut teyer kuut uf nëme. 44Wii khënt teyer klaawe, wën teyer truf aus sayt fer fon te anere keloopt kewe un fersuucht net te loop kriin woo ploos te eensichste Hërkot kewe khan? 45Teyer praycht awer net se tënke tas ich es sin woo aych pay em Fater aan kept; weyer aych aan kept is Mooses, woo tee is an weem teyer konfians hot. 46Wën teyer an Mooses klaawe teet, teet teyer aach an mich klaawe, wayl tee hot kexrip fon mich. 47Awer, wën teyer net klaapt an was tee kexrip hot, wii wolt teyer klaawe an was ich saan?

Currently Selected:

Yohan 5: NTHunsrik

Highlight

Copy