Yohan 7
7
Yeesus un sayn priiter
1Too tenoo, is Yeesus noo Kalilëya kang; tee wolt net in te Yutëya rom keen wayl ti yute fiirer fon tort wolte em umpringe. 2Awer te yute sayn fest, woo Laap Hiite Fest heest, waar ticht.#Lv 23.34-43; Dt 16.13-15 3Too hon em Yeesus sayn priiter fer tee kesaat:
— Kee too fort noo Yutëya tas tayn aanhënger siin was tuu am mache pist. 4Wayl weyer pekhant kewe wil sol net ferxtekle was eyer am mache is. Wëns tuu tas tings machst, tan sole se tich al khëne.
5Pis em Yeesus sayn priiter hon net an tee keklaapt.
6Yeesus hot keantwort:
— Mayn tsayt is noch net khom, awer fer aych past yeete tsayt. 7Ti welt khan aych net hase, awer mich hast se, wayl ich saan tas was ti welt macht xlecht is. 8Keet teyer uf tas fest, awer ich keen net, wayl mayn tsayt is noch net khom.
9Yeesus hot tas kesaat un is in Kalilëya keplip.
Yeesus uf em Laap Hite Fest
10Wii sayn priiter uf es fest kang sin, is Yeesus aach kang, awer tee hot tas heelich kemach, oone sich fer nimant tsayche. 11Ti yute fiirer hon em uf em fest kesuucht un hon kefroot:
— Woo is tee man?
12Pay em folek waare fiil layt woo iwer tee ti reet kehal hon. Phaar hon kesaat:
— Tee is kuut.
Anere hon kesaat:
— Eyer is net kut! Tee tuut ti layt hinerkeen.
13Awer nimant hot ufrichtich fon tëm kexproch, wayl ti hate al pang fon te yute fiirer.
14Wii tas fest xon in te heleft waar, is Yeesus in te Thëmpel kang un hot aan kefang untericht hale. 15Ti yute fiirer hon sich ferwunert un hon kesaat:
— Wii wees tee soo fiil, wën er net kelërnt hot?
16Yeesus saat:
— Was ich aych lërne khomt net fon meyer, awer khomt fom Hërkot, woo mich kexikt hot. 17Weyer em Hërkot sayne wile mache wil wees op was ich unterichte fom Hërkot khomt ore op ich aus mich xpreche. 18Weyer in sayne aychne naame xprecht wil keloopt kewe. Awer weyer loop kriin wil fer tee woo em kexikt hot, tee is eyerlich, un is niks falxes an tëm. 19Es waar Mooses weyer aych es Kesets kep hot, ore net? Awer nimant fon aych keet tëm Kesets noo. Warom wolt teyer mich umpringe?
20Tas folek hot keantwort:
— Tuu pist tomineyert fon en temoon! Weyer wil tich umpringe?
21Too saat Yeesus:
— Ich hon en wuner kemach, un teyer sayt al ferwunert too temit. 22Teyer pexnayt en puupche pis am samstach wayl Mooses tas aych mache kexikt hot. Awer, in te woerheet, waar es net Mooses woo aan kefang hot mit te pexnaytung, awer ti patriarke.#Lv 12.3a; Gn 17.10b 23Fer net keeche em Mooses sayn Kesets keen, pexnayt teyer en puupche, pis am samstach. Warom tan, wërt teyer soo pees mit meyer wën ich en mënx kans kesunt mache am samstach?#Yo 5.9 24Lost noo se xulkeere torich was ti layt aus siin un xulkeyert mit justis.
Is Yeesus te Mesias?
25Phaar layt woo in Yeruusalëm kewoont hon, hon kefroot:
— Is tee net te man woo se umpringe wole? 26Kukt mool! Tee is am xpreche fer weyer es heere wil, un nimant saat etwas keeche tee! Meechte ti autoriteete es wërklich wise tas tee te Kristus is? 27Awer, wën te Kristus khomt, wërt nimant wise woo er heyer is; un meyer wise woo er heyer is.
28Wii eyer am unterichte waar uf em hoof fom Thëmpel, hot Yeesus in hat xtim kesaat:
— Meecht teyer mich wërklich khëne un wist fon woo ich khome? Ich sin net khom aus mayn aychne wile. Tee woo mich kexikt hot is te waare, awer teyer khënt em net. 29Awer, ich khëne iim, wayl ich khome fon tëm un sin fon tëm kexikt kep.
30Too wolte se Yeesus fange, awer nimant hot tas kemach wayl tëm sayn xtun noch net khom waar. 31Awer, fiil layt woo unich em folek waare hon an tëm keklaapt un hon kefroot:
— Wën te Kristus khome tuut, meecht tee kreesere wunere mache wii tee man am mache is?
Soltaate kexikt fer Yeesus se fange
32Ti fariseyer hon tas folek keheyert tas tings am xpreche iwich Yeesus, un tesweche hon tii un ti xëfe fon te priister ti soltaate kexikt fer em se fange.
33Yeesus saat:
— Ich playwe ploos mee en pisye hii pay aych un tan keen ich tsurik pay tee woo mich kexikt hot. 34Teyer wërt mich suuche un wërt mich net fine, wayl khënt net hiin uf tas plats woo ich hiin keen.
35Too, hon ti yute fiirer aan kefang unich sich se saan:
— Woo meecht tee hiin tas meyer en net fine khëne? Meecht eyer woone keen pay ti yute in auslant? Meecht eyer unterichte keen fer ti woo khee yute sin? 36Was meecht te saan wole wii eyer fersichert hot: “Teyer wërt mich suuche un wërt mich net fine, wayl khënt net hiin uf tas plats woo ich hiin keen”?
Ti kwel fom leewente waser
37Te letste taach fom fest waar te importanteste. An tëm taach hot Yeesus sich uf kextelt un saat in hat xtim:
— Wën yemant torxt hot, khom tsu mich un trink.#Lv 23.36 38Wii ti Hayliche Xrifte saan: “Fluse fon leewent waser wëre xtroome aus em hërts fon wëm an mich klaapt.”#Ez 47.1; Zc 14.8
39Yeesus waar iwich te Hayliche Kayst am xpreche, tee woo kep wëre sol fer tii woo an tëm klaawe. Tii layt hate noch net te Hayliche Kayst kriit kehat, wayl Yeesus noch net tsurik waar pis an Hërkot sayn kloor.
Tas folek teelt sich
40Fiile layt woo tii wërter keheyert hon, saate:
— Tee man is wërklich te Profët!
41Anere saate:
— Te is te Kristus!
Un noch anere layt hon kefroot:
— Awer, meecht te Kristus fon Kalilëya khome? 42Ti Hayliche Xrifte saan tas te Kristus en nookhomer fon Dawii sin sol un in Petleheem uf ti welt khome sol, woo Dawii kewoont hot.#2Sm 7.12; Mq 5.2
43Too hot tas folek sich keteelt weche tëm. 44Phaar wolte Yeesus fange, awer nimant hot tas kemach.
Ti yute fiirer klaawe net
45Ti soltaate sin tsurik uf tas plats woo ti xëfe fon te priister un ti fariseyer waare, un ti hon kefroot:
— Warom het teyer net tee man keprung?
46Tii hon keantwort:
— Nii hot yemant kexproch wii tee!
47Tan hon ti fariseyer fer ti soltaate kesaat:
— Meecht teyer aach hinerkang kep sin? 48Hot, filaycht, en autoriteet ore en fariseyer an tëm keklaapt? 49Ti layt woo net ti Kesets khëne sin fon Hërkot ferfluucht.
50Awer, Nikoteemus, woo eene fon tëne waar un woo selich mool mit Yeesus kexproch hat, saat: #Yo 3.1-2
51— Unser Kesets noo, khëne meyer net en man konteneere oone tëm eyerxt aan heere un auskluuche was tee kemach hot.
52Tii hon kefroot:
— Pist tuu aach, filaycht, fon Kalilëya? Xtuteyer ti Hayliche Xrifte un tan siist tuu tas fon Kalilëya nii en profët tsum foerxaym khom is.
Currently Selected:
Yohan 7: NTHunsrik
Highlight
Share
Copy
Want to have your highlights saved across all your devices? Sign up or sign in
2022 Sociedade Bíblica do Brasil
