Lukas 15
15
Te ferloerne xoof
Mateus 18.10-14
1Eene taach, sin fiil xtayer kaseerer un anere layt mit en xlechte naame ticht pay Yeesus khom fer en aan se heere. 2Ti fariseyer un ti Kesets mayster hon Yeesus kritiseyert, am saan:
— Tee man fermixt sich mit layt woo en xlechte naame hon un tuut sokaar mit tëne ese. #Lk 5.29-30
3Tan hot Yeesus tii paraapel fertseelt:
4— Wën yemant fon aych hunert xeef hot un ferleyert eene, meecht eyer em net suuche keen? Soo, lost eyer ti anere noyn un noyntsich uf em khamp un keet te ferloerne xoof suuche pis eyer en fint. 5Wën eyer en fine tuut, kept eyer aarich froo un khomt tsurik mit tëm xoof uf te xulre. 6Soo wii eyer hëm khomt, ruuft eyer sayn froynte un nachparx layt un saat: “Frayt aych mit mich wayl ich hon mayne ferloerne xoof kefun.”
7— Wayl ich saan aych tas kraat soo aach mee frayt paseere tuut im himel weche ëne sinter woo en nay leewe aanfange tuut als weche noyn un noyntsich kuute layt woo tas net neetich hon.
Te ferloerne nikel
8Yeesus saat wayter:
— Wën en fraa woo tseen silwerne nikle hot un eene ferleyert, keet se en suuche, net? Macht se en lamp aan, kheyert es haus un suuch mit acht pis se te nikel fint. 9Un, wën se en fint, laat se sayn froyntiine in un nachparx layt un saat: “Frayt aych mit mich wayl ich hon mayne ferloerne nikel kefun.”
10— Also, ich saan aych tas soo aach em Hërkot sayn ëngle sich fraye tuun weche ëne sinter woo en nay leewe aanfëngt.
Ti paraapel fom ferloerne soon
11Un Yeesus saat wayter:
— En man hat tswaay puuwe kehat. 12Te yingste fon tëne saat fer sayne fater: “Papa, kep mich mayn teel fon te ërepxaft.” — Un eyer hot tëne ti ërepxaft ferteelt.
13Phaar taache tëm noo, hot te yingste soon ales samer kerof was sayn waar, un is noo en wayt lant kerees un tort hot eyer ales was er hat fertsotelt, in en leewe oone reechle. 14— Te puup hat xon ales aus kep kehat, wan in tëm lant en kroose hunger te tsu khom is, un er hot fiil neetichkheete mit kemach. 15Tan, hot eyer sich aan kextelt als knecht fon en man fon tëm lant, un tee hot em uf sayne khamp kexikt ti xwayn uf pase. 16Too, wolt eyer sich sat ese mit te xwayn sayn frese. Awer, net mool tas hot eyer se ese kriit. 17Tan, is eyer mool in sich kefal un saat: Wii fiil aarwater fon mayne fater hon kenuuch proot un ich sin too am ferhungere! 18Ich xtaye uf un keen pis mayne fater un saan tëm: “Papa, ich hon keeche te himel un keeche tich sinte kemach. 19Ich sin xon nime weyert tayne soon kenënt kewe; pehantel mich als ëne fon tayne knechte.” 20Un, is uf kextii, un is noo sayne fater kang.
— Wan te puup noch wayt am khome waar, hot sayne papa em kesiin. Hot em ketauert un is kelaaf, hot em umkeaaremt un kekhust. 21Un te soon saat tëm: “Fater, ich hon keeche te himel un keeche tich sinte kemach; sin xon nime weyert tayne soon kenënt kewe!”
22— Awer te fater saat fer sayn tiiner: “Pringt xnel tas peste tsaych, tuut em klayte, tuut tëm en ring an te finger un santaale an ti fiis. 23Pringt aach tas fete khalep un xlacht es. Meyer ese mitsamer un fraye uns, 24wayl tee mayne soon waar toot un is witer peleept, waar ferloer un is kefun kep.”
Un hon kes un hon sich kefrayt.
25— Also, te elste soon waar uf em khamp; un wii eyer tsurik am khome waar un is tichter ans haus khom, hot er musik un tanseray keheyert. 26Hot ëne fon te tiiner keruuf un froot was tas weyer. 27— Te tiiner saat tëm: “Tayne pruuter is tsurik khom, un tayne fater hot kexikt tas khalep xlachte wayl eyer em mit kesuntheet tsurik kriit hot”.
28— Te elste soon, unwilich, wolt net rin keen; te fater is raus kang un wolt em peruiche. 29Tee hot, awer, fer sayne fater keantwort: “Soo fiile yoore tuun ich tich tiine oone nii een eensichst fon tayne ortnunge se tiskuteere, un host mich noch net mool en kaprit kep fer mit mayn froynte se fayre. 30Wan, awer, tee tayne soon khomt, woo tayn aychentum aus kep hot mit huure, xikst tuu tas fete khalep xlachte!”
31— Tan, hot te fater keantwort: “Mayne soon, tuu pist imer pay mich; ales was mayn is, is tayn. 32Awer, es waar neetich tas mer kefayert hete un uns kefrayt hete, wayl tee tayne pruuter waar toot un is witer peleept, waar ferloer un is kefun kep.”
Currently Selected:
Lukas 15: NTHunsrik
Highlight
Share
Copy
Want to have your highlights saved across all your devices? Sign up or sign in
2022 Sociedade Bíblica do Brasil
