Lukas 9
9
Te tswelef aphostle sayn misioon
Mateus 10.5-14; Markus 5.7-13
1Yeesus hot sayn tswelef aphostle samer keruuf un hot tëne macht un autoriteet kep fer ti kanse temoone fort yaan un ti krankheete heele. 2Tan hot eyer se kexikt fer em Hërkot sayne Raych aan saan un ti kranke kesunt mache. 3Un saat tëne:
— “Nëmt niks mit iwer te weech: khee xtok, khee traache thax, khee proot, khee kelt un aach khee tswete punx. 4Wën teyer an en xtat aan khomt, playpt uf tëm plats woo teyer uf kenëmt kept pis teyer fon too wayter reest. 5Awer, wën teyer net kuut ap kehool kept, keet klaych aus tee xtat, xitelt te xtaap fon ayre fiis ap wën teyer too raus keen tuut, als sinaal keeche ti layt”.
6Tan, hon ti tswelef sich uf weech kemach un sin torich ti kanse pewoonte plets kang ti kuute naychkheete am aan saan un ti layt iweraal am heele.
Herootes sayn tswayfel
Mateus 14.1-12; Markus 6.14-29
7Herootes, te kowerneyer fon Kalilëya, hot fon ales was am paseere waar xpreche keheyert un wust net was eyer tënke solt. Wayl phaar hon kesaat tas Yohan Te Taafer, noch mool peleept weyer, 8un anere saate tas Eliias tsum foerxayn khom weyer, un noch anere tas ëne fon te alte profëte peleept weyer. 9Awer, Herootes saat:
— Ich selepst hon kexikt em Yohan te khop ap hake. Weyer, tan, meecht tee man sin fon weem ich tas tings xpreche heere?
Un Herootes wolt Yeesus khëne lërne.
Yeesus tuut en kroos folek neere
Mateus 14.13-21; Markus 6.30-44; Yohan 6.1-14
10Ti aphostle sin tsurik khom un hon fer Yeesus fertseelt ales was se kemach hate. Tan hot er se mit iim kehool, un sin aleen pis tas plats Petsayta kang. 11Awer tas folek hot tas se wise kriit un sin tëne noo kang. Un Yeesus hot se ap kehool, hot iwich em Hërkot sayne Raych kexproch un hot keheelt tii woo keheelt muste kewe.
12Waar nacht am kewe, un tesweche hon ti tswelef aphostle fer Yeesus kesaat:
— Xik tas folek fort. Ti khëne pis an ti pewoonte plets keen un plantaaje hayser woo too ticht rom sin un tort khëne se etwas fine fer se ese un plats fer iwer nacht se playwe, wayl tas plats soo unpewoont is.
13Awer, Yeesus antwort:
— Kept teyer selepst tëne se ese.
Ti tisiple hon kesaat:
— Meyer hon ploos finef proote un tswaay fix. Wilst tuu hon tas meyer ese khaafe keen fer tas kanse folek?
14Too waare unkefeyer finef tausent mëner. Yeesus saat fer sayn tisiple:
— Xikt tas folek sich hiin setse in krupe fon unkefeyer fineftsich layt.
15Ti tisiple hon tas soo kemach un hon ti layt sich al setse kexikt. 16Tan hot Yeesus ti finef proote un ti tswaay fix kehool, hot noo em himel kekukt un hot tas fer Hërkot ketankt. Tëm noo, hot er tas proot un ti fix in xtiker keproch un hot se ap kep fer ti tisiple tas tii se ferteele solte unich em folek. 17Al hon kes un sin sat kep, un ti tisiple hon noch tswelef khërep fol kemach mit te xtiker woo iwerich keplip sin.
Pheeter sayn aus xprooch
Mateus 16.13-19; Markus 8.27-29
18Een mool waar Yeesus aleen, am peete, un ti tisiple sin ticht pay em khom. Tan froot eyer:
— Weyer saat tas folek tas ich weyer?
19Tii hon keantwort:
— Phaar saan tas tuu Yohan Te Taafer, pist; anere, tas tuu Eliias pist; un anere, tas tuu ëne fon te alte profëte pist, woo peleept is.
20Yeesus froot:
— Un teyer? Weyer tënkt teyer tas ich sin?
Pheeter antwort:
— Te Mesias woo Hërkot kexikt hot.
Yeesus xprecht iwich sayne toot un sayn peleepung
Mateus 16.20-28; Markus 8.31—9.1
21Tan hot Yeesus ti tisiple ferpot tas fer yemant se saan. 22Un saat wayter:
— Te Soon fom Man mus fiil layte mit mache. Eyer kept ap kextoost fon te yute sayn fiirer, fon te priister sayn xëfe un fon te Kesets mayster. Kept toot kemach un, am trite taach, wërt eyer peleept.
23Tëm noo saat eyer fer ti kanse layt:
— Wën yemant mayne aanhënger sin wil, mus sayn aychne interese ferkese un mus fërtich sin fer yeete taach sayn krayts uf nëme un mit mich keen. 24Wayl, weyer sayn aychne interese foer tsiit kriit nii es wërkliche leewe; awer weyer fon sich selepst ferkest weche mich, tee kriit es wërkliche leewe. 25Was hot tas fer weyert yemant ti kans welt kriin, awer es wërkliche leewe ferleere un fernicht kewe? 26Wayl, wën yemant sich fon mich xeemt un fon mayn untericht, tan wërt te Soon fom Man sich aach fon tëm xeeme, wën tee aan khomt in sayn kloor un im Fater sayn kloor un fon te hayliche ëngle. 27Ich fersichre aych tas too hier phaar layt sin woo net xtërwe eep se em Hërkot sayne Raych siin.
Yeesus, Mooses un Eliias
Mateus 17.1-13; Markus 9.2-13
28Unkefeyer en woch tëm noo wii Yeesus tas tings kesaat hot, hot eyer Pheeter, Yohan un Tiaako kehool un is uf te përich kang fer se peete. 29Wii eyer am peete waar, hot sayn kesicht sich ferënert, un sayn tsaych is aarich ways un klënsich kep. 30Uf mool, sin too tswaay mëner tsum foerxayn khom un hon aankefang mit Yeesus se xpreche. Waare Mooses un Eliias, 31woo umkekrayst waare mit en himlixe xayn. Tii hon kexproch iwich te toot woo, tëm noo em Hërkot sayne wile, Yeesus mit mache mist in Yeruusalëm. 32Pheeter un sayn khameraate waare tiif am xloofe, awer sin wach kep un hon Yeesus sayn kloor kesiin un ti tswaay mëner woo pay iim waare. 33Wan ti tswaay mëner wech keen wolte, saat Pheeter:
— Mayster, wii kuut tas meyer too sin! Meyer xtele tray hite uf: een fer tich, aner fer Mooses un noch aner fer Eliias.
Pheeter wust net was eyer am saan waar. 34Tee waar noch am xpreche, wan en wolek khom is un hot se ketekt. Ti tisiple hon pang kriit wan ti wolek runer uf tii khom is. 35Un fon te wolek is en xtim khom, woo saat:
— Tas is mayne Soon, mayne aus kesuuchte. Heyert was tee saat!
36Wan ti xtim uf keheyert hot, hon se kesiin tas Yeesus aleen waar. Ti tisiple hon sich ruych kehal un toomols hon se fer nimant fertseelt iwich was se kesiin hate.
Ti heelung fon en puupche
Mateus 17.14-20; Markus 9.14-29
37Am neekste taach sin se fom përich runer kang, un en kroos folek hot Yeesus pekeechent. 38Too hot en man woo unich em folek waar aankefang se xraaye:
— Mayster, ich pite fer mayne soon, mayne eensichste soon! 39En xlechte kayst krayft iim, un, pletslich, xraayt tas khint un fangt aan krëmfe se kriin un se xaume aus em munt. Te kayst ferkweelt em un lost em, uf khee aart, loos. 40Ich hon xon fer tayn tisiple ferlangt tas se te xlechte kayst aus xtoose solte, awer tii hon tas net kemach kriit.
41Yeesus antwort:
— Xlechte layt un oone klaawe! Pis wan playwe ich mit aych? Pis wan mus ich aych aus hale?
Tan saat eyer fer te man:
— Pring tayne soon mool heyer.
42Wii tas puupche ticht am khome waar, hot eyer en aanxlaach kriit, un te temoon hot em uf te potem kexmis. Tan hot Yeesus en ortnung kep fer te xlechte kayst, hot tas puupche keheelt un hot em fer sayne fater ap kep. 43Un al hon sich ferwunert mit em Hërkot sayn kroos macht.
Yeesus xprecht noch mool fon sayne toot
Mateus 17.22-23; Markus 9.30-32
Al waare ferwunert mit was Yeesus am mache waar, un eyer saat fer sayn tisiple:
44— Ferkest net was ich aych saan tuun: te Soon fom Man wërt ap kep in te mënxe sayn hënt.
45Awer tii hon tas net ferxtan, wayl was tii wërter petayte solte waar tëne ferxtekelt kep tas se es net ferxteen khënte. Un ti hate pang fer noch etwas se frooe fer Yeesus.
Weyer is te importanteste
Mateus 18.1-5; Markus 9.33-37
46Ti tisiple hon aan kefang se tiskuteere iwich weyer fon tëne te importanteste weyer. 47Awer, Yeesus wust was ti am tënke waare. Tan hot eyer en khint kehool un hot es uf sayn sayte kextelt. 48Tan saat eyer:
— Tee woo, wayl eyer mich noo keet, tas khint aan hoolt, is mich am aan hoole; un weyer mich aan hoolt, is tee woo mich kexikt hot am aan hoole. Also, tee woo te kleenste unich aych is, tee is te importanteste.
Weyer net keeche aych is, halt mit aych
Markus 9.38-41
49Yohan saat:
— Mayster, meyer hon en man kesiin woo temoone aus xtoost mit te kraft fon tayne naame, awer meyer hon em ferpot tas se mache wayl er net fon unsere krupe is.
50Tan saat Yeesus fer Yohan un fer ti anere tisiple:
— Tuut em net ferpote, wayl weyer net keeche aych is, halt mit aych.
Ti samaritaaner hoole Yeesus net ap
51Wii ti tsayt am khome waar fer Yeesus noo em himel keen, hot eyer resolweyert noo Yeruusalëm keen. 52Tan hot eyer phaar tisiple kexikt foer keen. Uf em weech sin se an en kleen xtetche aan khom fon te rechioon fon Samariia fer en plats se prepareere woo Yeesus playwe khënt. 53Awer ti pewooner fon tëm plats wolte Yeesus net ap hoole wayl se kesiin hon tas eyer noo Yeruusalëm am keen waar. 54Wan sayn tisiple Tiaako un Yohan tas kesiin hon, hon se kesaat:
— Wilst tuu hon tas meyer fayer fom himel runer khome xike fer ti layt se fernichte?
55Awer, Yeesus, sich noo tëne am rom wëne, hot se kexteyert. 56Tan sin eyer un sayn tisiple noo en aner xtetche kang.
Phaar layt woo wolte Yeesus noo keen
Mateus 8.18-22
57Wii Yeesus un sayn tisiple uf em weech waare, saat en man fer Yeesus:
— Ich sin fërtich fer tich noo se keen uf yeete plats woos tuu hiin keest.
58Tan saat Yeesus:
— Ti fukse hon sayn hoole, un ti feel sayn niste. Awer te Soon fom Man hot net woo ruue.
59Tan saat Yeesus fer en anere man:
— Khom mit mich.
Awer tee antwort:
— Hër, los mich eyerxt tsurik keen fer mayne fater se peërtiche.
60Yeesus saat:
— Los ti toote sayn toote peërtiche. Awer tuu, kee un saa em Hërkot sayne Raych aan.
61En anere man saat:
— Ich keen tich noo, awer eyerxt los mich apxiit fon mayn familye mache.
62Yeesus antwort:
— Weyer ti eyert aanfangt se tsakre un tsurik kukt, tiint net fer em Hërkot sayne Raych.
Currently Selected:
Lukas 9: NTHunsrik
Highlight
Share
Copy
Want to have your highlights saved across all your devices? Sign up or sign in
2022 Sociedade Bíblica do Brasil
