YUHANI 13
13
Insa asuhosa yimindru ya maswihaɓa yahe
1Na kaɓula ya umusherehio wa Unahanizi wa Mutupio|unahanizi, Insa aka ajua amba uwakati wahe madza uka uwaswili wa ulawa ulemenguni v̄anu, andre ha Ɓaɓa. Na ɓaanda av̄endza watru wahe waka ulemenguni, awav̄endze ata mupaka mwiso.
2Na v̄ale, wakati wa shahula ya mahariɓi, Iɓilisa madza aka atria rohoni ha Yudasi Iskarioti, mwana wa Simoni, ifikira ya umuv̄iria nyuma. 3Insa akojua amba Ɓaɓa atria piya zitrongo mihononi hahe, amba alawa ha Mungu, amwesa akorudi ha Mungu. 4Ɓas, ahimi hari mwa muɗyio ule, atoa kandzu yahe, arenge shitamba aifungu trengaju. 5Atria maji moni na shiya, amwesa aandrisa uhosa yimindru ya maswihaɓa yahe, na uyiv̄angua ha ishitamba ile aka aifunga trengaju.
6Ɓas awaswili ha Simoni Monye, na waye amuambia: «Wawe Raɓi ɗe unihosao yimindru!»
7Insa amudjiɓu: «Trongo niifanyao kusuielewa av̄asa, ɓadi mbeli oho utsoelewa.»
8Monye amuambia: «Ata hata, kav̄u suku utsonihosao yimindru!»
Sa ile Insa amudjiɓu: «Neka tsahuhosa, kusina fungu na wami.»
9Simoni Monye amuambia: «Raɓi, ɓasi v̄av̄o tsi ɗe yimindru tu, ɓadi na yimihono na ishitswa.»
10Wakati ule Insa amuambia: «Mutru amohoa ahisa, uɓaki tu ɗe waye uhosa yimindru, mana piya umwili wahe wa murahafu. Na wanyu mwa warahafu, ɓadi tsi piyanyu.» 11Mana akojua uwo akoja amuv̄iriye nyuma, iyo ɗe imana arongoa: «Tsi piyanyu mulio warahafu.»
12Ɓaanda awahosa yimindru, atria kandzu yahe, arudi aketsi, amwesa awaambia: «Saɓu muelewa itrongo namufanyianiyo? 13Musunihira Fundi, na Raɓi, tsena muna haki, mana wami ɗe wizo zile. 14Na ha izo, neka tsimuhosoni yimindru, wami Raɓi amma Fundi, imulazimuni wajau muhosane yimindru wanyu na wanyu. 15Mana tsimuv̄ani mufano, pare mufanye mauri ɗe iheli namufanyiani. 16Kweli, nisumuambiani ha kweli, murumizi tsi muɓole rahana murumisa wahe, wala mutru av̄elehwa tsi muɓole rahana ule amuv̄eleha. 17Mwamojua trongo zizo, v̄av̄o mwa rahani neka musuzitria ndziani.
18Tsisumurongoani piyanyu; wami ujua wao nawatsahua. Ɓadi ilazimu uMuangishio utsimidzihe amba: ‹Mutru akoɗya dipe v̄umoja na wami, anigaushia.›
19Nisumujudzani trongo iyo rangu av̄asa, kaɓula raha kayahidjiri, pare yamohidjiri, muamini amba wami ɗe wami. 20Kweli, nisumuambiani ha kweli, monyewe urenga mutru namuv̄eleha, uwo asunirenga ɗe wami; na monyewe unirenga, asurenga Uwo aniv̄eleha.»
Insa asujudza amba atsov̄iriwa nyuma
(Mat 26:20-25; Mar 14:17-21; Luk 22:21-23)
21Ɓaanda arongoa zile, Insa ahafiliha iroho, amwesa ajudza ha dhwahiri: «Kweli, nisumuambiani ha kweli, moja mengoni mwanyu atsoniv̄iria nyuma.»
22Ɓas, yamaswihaɓa waangaliana wao na wao, kawakojua amba akomurongoa mbani. 23Moja hari mwa maswihaɓa yahe alio amba Insa akomuv̄endza ha kusudi, aka aketsi ɓavuni na waye. 24Simoni Monye amuv̄eleshedzea ãlama amudzise Insa amba uv̄i ɗe amurongoao.
25Swihaɓa lile amunyamia Insa, amudzisa: «Raɓi, uwo mbani?»
26Insa amudjiɓu: «Ɗe uwo nitsomuv̄ao likutru ɓaanda nalipatsidza.» Ɓas apatsidza likutru, amuv̄alo Yudasi, mwana wa Simoni Iskarioti. 27Urenga yahe likutru, na Shetwani amungia kamwe.
Ɓas Insa amuambia: «Trongo wendrao uifanye, ifanye ha uharaka.» 28Kav̄waka ata mutru hari mwa muɗyio ule v̄ale aelewa imana akomuambia trongo ile. 29Iv̄o Yudasi aka musika-muzeti wa marike, wasalia wakofikiri amba v̄ale Insa akomuambia anunuwe izo zawalazimu ya uMusherehio, au akomuambia av̄e mwana shitru zimasikini. 30Yudasi ɓaanda arenga likutru la dipe, alawa kamwe. Na v̄ale uku uka ungia.
Insa asuv̄a watru wahe ãmuri pia
31Ɓaanda Yudasi alawa v̄ale, Insa arongoa: «Av̄asav̄anu uMwana wa Mwanadamu|Mwana wa Mwanadamu atukuziwa, na Mungu atukuziwa haheju. 32Neka utukufu wa Mungu uv̄enulwa ha uMwana, Mungu wajau atsov̄enua utukufu wa uMwana hahe waye Mungu, tsena atsouv̄enua tsi hale.
33Wana wangu, raha tsa v̄umoja na wanyu hari mwa wakati mushashi. Mutsonizunguha, na mauri ɗe inamuna naambia Mayahudi amba: ‹V̄ahanu wami nendrao, wanyu kamushindri uja›, nisumuambianiyo wajau av̄asa.
34Nisumuv̄ani ãmuri pia tsini: Namuv̄endzane wanyu na wanyu. Mauri ɗe inamuna namuv̄endzani, wanyu wajau namuv̄endzane wanyu na wanyu. 35Ini ɗe inamuna wanadamu piya watsojuao amba wanyu maswihaɓa yangu: neka muna mahaɓa wanyu na wanyu.»
Insa asujudza amba Monye atsomuhara
(Mat 26:31-35; Mar 14:27-31; Luk 22:31-34)
36Sa ile Simoni Monye amudzisa: «Raɓi, usendra hav̄i?»
Insa amudjiɓu: «V̄ahali nendrao, kushindri niɗunga av̄asa, ɓadi utsoniɗunga mbeli oho.»
37Monye amuambia: «Raɓi, mana trini tsishindri nahuɗunga av̄asa? Wami tsa tayari ya ufa ha siɓaɓu ya wawe.»
38Insa adjiɓu: «Amba wa tayari ya ufa ha siɓaɓu ya wami? Kweli, nisuhuambia ha kweli, kukuyi kalitsoyeha kaɓula ya wawe unihara mara traru.»
Currently Selected:
YUHANI 13: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
