LUKASI 12

Mufahamisho wa unafiki

(Mat 10:26-27)

1Moni v̄ale v̄uka v̄ungulidzana mialifu na mialifu ya wanadamu, ha namuna amba ata wakogaɗana. V̄ale Insa arenge umurongo, aambia ɗe maswihaɓa yahe: «Kaɓula ya trongo piya, namudzifahamishe na ilalive ya Mafarisayo, ilio amba ɗe unafiki. 2Kav̄u ata yadzama kaitsov̄enuha, wala siri kaitsojulihana. 3Iyo ɗe imana, piya mwazirongoa shidzani, zitsokilihana heuni, na izo mwazivongona mav̄ani, zitsotrangaziwa utroju.»

Mbani ɗe astahiki ariwe?

(Mat 10:28-31)

4«Nisumuambiani wanyu wandzani wangu: musuriye watru waangamidzao umwili, amwesa ɓaanda ya v̄ale kawashindri fanya trongo itsokao yotsi. 5Ɓadi nitsomueledzani uwo mwalazimu mumuriye: namuriye uwo alio amba ɓaanda aula, ana ushindzi wa uvutsa mutru moni na umoro wa Djahanama. Ha kweli nisumuambiani, uwo ɗe mwalazimu mumuriye! 6Hali maveru matsano kayaudziwa ha kima ya roɓo mbili? Ne kav̄u ata moja hari mwayo liɗelwao na Mungu. 7Ɓadi ata zinyole shitswani hanyu, zihasiɓilwa piyazo. Ɓas mwasuriye; wanyu muna thamani rahana wengi wa maveru.»

Zahusu wamukuɓali Insa, na wao wamuhara

(Mat 10:32-33; 12:32; 10:19-20)

8«Nisumuambiani amba mutru yotsi atsonikuɓalio mbeli za wanadamu, uMwana wa Mwanadamu|Mwana wa Mwanadamu atsomukuɓali wajau mbeli za zimalayika za Mungu. 9Ɓadi uwo atsoniharao mbeli za wanadamu, atsoharwa mbeli za zimalayika za Mungu. 10Na yotsi atsorongoao luha kinyume na uMwana wa Mwanadamu, atsoswamihiwa; ɓadi uwo atsokufuruo iRoho Ndzitwaharifu, katsopara muswamaha ata idahari.

11Wakati mutsov̄ingwao moni na Nyumba za Uswali, au mbeli za makizi-mbeli, au tsena mbeli za madhwamana, mwasushange na inamuna mutsodziwaniao, au na izo mutsozirongoao. 12Mana wakati uwo kamwe iRoho Ndzitwaharifu itsomujudzani zalazimu murongowe.»

Mufano wa tadjiri mujinga

13Hari mwa idunia ile v̄wa mutru amuambia Insa: «Fundi, muambiye mwananyangu aãnise na wami umwaratha watru.»

14Ɓadi Insa amudjiɓu: «Ɓaɓa, mbani ɗe anilisha nike munamuzi wanyu, au muãnisa mali wanyu?» 15Amwesa awaambia piyawo: «Namufahamu, mudzitahadharishe na kula uv̄endzopara, mana uhayati wa mwanadamu kaulawana na uwengi wa imali yahe.»

16Amwesa awatolea mufano unu: «Shamba la mutru tadjiri lika limuv̄a mavuna ha uwengi. 17Akofikiri rohoni na udziambia: ‹V̄anu nifanye jeje? Ne tsisina v̄ahali v̄wa ugamisa mavuna yangu.›

18Ɓas, arongoa: ‹iTrongo nitsoifanyao, nitsokomoa kanya zangu, niwahe zangina ɓole zazidi; v̄av̄o nitsogamisa piya mavuna#12:18 mavuna: iShigiriki v̄anu isurongoa aina ya mbia kayaparihana hatru hunu. Shifarantsa isurongoa blé, Shingudja isurongoa nafaka. yangu na mali zangu. 19Amwesa nitsoambia nafusi yangu: «Av̄asa una ãkiɓa ya mali ha uwengi itsohuv̄ingao maha na maha; ɓasi v̄av̄o v̄umua, uɗye na unwa, tsena ufurahi.» ›

20Ɓadi Mungu amuambia: ‹Wa mujinga! Uku v̄anu kamwe na iroho yaho utsotsahwayo. Ɓas izo wazigamisa, zitsoka za mbani?›

21Iyo ɗe iheli ya mutru adzingulidziao mali ha iwaye yahe, ɓila waye tsi tadjiri mbeli za Mungu.»

Musukane hamu na zamulazimuni

(Mat 6:25-34)

22Ɓasi Insa aambia maswihaɓa yahe: «Iyo ɗe imana nimuambiaoni, musudzitriye hamu na maẽsha yanyu na iyo mutsoɗyao, wala umwili wanyu na iyo mutsopindrao. 23Mana maẽsha ɓorwa rahana shahula, na umwili ɓorwa rahana nguo. 24Namufikiri ya mahwayi; yao kayataɓu, wala kayavunu, kayana v̄ahanu v̄wa ugamisa zitru, wala kayana kanya, na Mungu uyalisa. Ɓasi ha mara ngav̄i muliona thamani raha na zinyunyi! 25Mbani hari mwanyu ha ihamu yahe, ashindrao aengedze wala ukana mwana trundra hari mwa uumuri wahe? 26Ɓasi neka amba trongo titi kamusuishindra, manatrini mudzitriao hamu na zangina?

27Namuangaliye mafulera namuna yatsangao; yao kayafanya hazi, wala kayasono. Ɓadi nisumuambiani amba ata Sulaimana hari mwa piya utukufu wahe, ne kakopindrisiwa mauri moja hari mwao. 28Ɓasi neka Mungu upindrisa ha namuna iyo ɗavu lilio malavuni leo ini, meso litsovutswao moroju, v̄av̄o ha mara ngav̄i zaidi atsomupindrisaoni? Uaminifu wanyu wa mushashi halisi! 29Ɓasi wanyu, musudzisonge na izo mutsoɗyao na unwa; musuke na hamu. 30Mana piya trongo izo, watru kawaji Mungu ɗe wadzisongao nazo. Ɓadi Ɓaɓanyu asujua amba izo zisumulazimuni. 31Namudzishahilise raɓuzi na Utawalizi wa Mungu, amwesa trongo izo mutsov̄olwazo wajau.»

Misomo yapatana na utadjirifu mbeli za Mungu

(Mat 6:19-21)

32«Usuriye mwana ɓangwe, mana Ɓaɓanyu aono ndjema amuv̄eni uUtawalizi. 33Namuudze mali zanyu, zifaida muzitowe zaka. Namudzifanyiye mifuko ya marike kayikomoha, utadjirifu kaushashiha pev̄oni v̄ahanu mwidzi kav̄ukuruɓia, wala ɓiɓi kalimenye. 34Mana v̄ahanu utadjirifu wanyu ulio, ɗe v̄ahanu roho zanyu zitsokao.»

Waaminifu wa Kristi nawadzitayarishe na uregea yahe

(Mat 24:45-51)

35«Namudzihaze yimikandra marengani hanyu, na mahombe yanyu yapatswe. 36Na wanyu, namuke mauri watru walindrao murumisa wawo aregeye ulawa harusini, ile pare wamuɓuliye wakati atsoremao umulongo amba awaswili. 37Waɓarikishiha warumizi walio amba murumisa wawo wakati atsowaswilio, awapare amba wa hashiri. Nisumuambiani ha kweli, atsodzikaza, atsowakariɓisa mezaju, atsotsengea awayelesheye. 38Neka amba awaswili hari-hari ya uku au alifadjiri, waɓarikishiha warumizi wale wamoparihana amba wa hashiri. 39Ɓadi namujuwe ha uzuri, amba na djeli monyewe inyumba akojua isa mwidzi atsojao, atsogogea wala katsolisha nyumba yahe yavundzwa. 40Ɓasi wanyu wajau, namuke hazahaza, mana uMwana wa Mwanadamu atsoja wakati kamutsoufikiria.»

41Sa ile Monye amuambia: «Raɓi, mufano uwo usuriambiawo ɗe wasi, au watru piya?»

42Raɓi arongoa: «Uv̄i ɗe murumizi mwaminifu mwendza hikima murumisa wahe atsomudjukumisao muraɓa wahe, ile av̄e warumizi wanyahe zahula wakati wahetsiwa? 43Aɓarikishiha murumizi uwo wakati murumisa wahe atsojao, atsomuparao amba ashahiliha na hazi zahe. 44Ha kweli nisumuambiani, atsomudjukumisa piya mali zahe. 45Ɓadi neka murumizi ule asudziambia: ‹Murumisa wangu asuhoma uja›, ɓas asuandrisa uɓuɓua wanyahe watruɓaɓa na watrumama, na uɗya, unwa, na ulewa, 46murumisa wahe atsoja suku kasuilindrilia, na sa ilio amba kasuijua; atsomuãdhiɓu ha kusudi, amuhetsi v̄umoja na watru tsi waaminifu.

47Na umurumizi akojua mav̄endzeleo ya murumisa wahe ɓadi kadzitayarisha uɗunga mav̄endzeleo yale, uwo atsoremwa zifungo ɓole. 48Ɓadi uwo kakojua, amwesa akofanya trongo zastahiki zifungo, atsoremwa zifungo kiasi. Uwo av̄olwa nyengi, atsotsahwa nyengi, na uwo adjukumisiwa nyengi, atsozidishiwa utsahwa.»

Insa kasutria usalama, ɓadi mufaraka

(Mat 10:34-36)

49«Tsija nitriye moro shiv̄andreju mwa tsi. Ɓasi kiasi natsov̄endza ike amba madza uvudzwa! 50V̄wa muɓaĩsho nalazimu niɓaĩshiwe; ɓasi kiasi nasongeha iroho ata ike amba ufanyishiha! 51Musufikiri amba tsija ha uv̄inga usalama shiv̄andreju mwa tsi? Tsi wiyo nisumuambiani, ɓadi mufaraka. 52Mana ulawa v̄anu, neka watru wa watsano hari mwa muraɓa, watsoanyisana, wararu kinyume na waili, na waili kinyume na wararu. 53V̄utsoka mufaraka ɓaina ya ɓaɓa na mwana mutruɓaɓa wahe, ɓaina ya mwana mutruɓaɓa na ɓaɓahe, ɓaina ya mama na mwana mutrumushe wahe, ɓaina ya mwana mutrumushe na mayahe, ɓaina ya nyadza na nyadzahe, na ɓaina ya mutrumushe na nyadzahe.»

Uelewa imana ya uwakati

(Mat 16:2-3)

54Amwesa aambia raha idunia ile: «Mwamoona vingu lahidza jua la utswa, wanyu urongoa kamwe amba v̄usuja vua, na iyo uja sahe. 55Na neka pev̄o isuvuma ulawa swihilini, wanyu urongoa amba v̄utsoka hari, na iyo uka kweli. 56Wanyu wanafiki! Wanyu ushindroelewa zihali za ishiv̄andre ya tsi na za uwingu. Ɓasi manatrini ata kamusushindra mwaelewa wakati unu?»

Musomo hari mwa umuafikiano

(Mat 5:25-26)

57«Manatrini kamusunamua wanyu wenyewe izo zilio haki? 58Neka v̄wa mutru ahushitaki ata musendra hari mwa mahakama, fanya djitihadi muafikiane rangu ndziani, ha uria waye uhuv̄inga mbeli za hakimu, na hakimu uhuv̄eleha ha kumsera, na kumsera uhutria shiv̄ani. 59Nisuhuambia amba kutsolawa v̄av̄o, ata mupaka uliv̄e ishiroɓo ya mwiso utsahwao nayo.»

Currently Selected:

LUKASI 12: swb

Highlight

Copy