LUKASI 16
16
Mufano wa musika-mali mudjandja
1Insa aambia tsena maswihaɓa yahe: «V̄uka tadjiri akana musika-mali, aja asalitiwa hahe amba akomenya mali zahe. 2Ɓas, amuhiri, amuambia: ‹Trongo trini niikiao yahuhusu? Nionese ihisaɓu ya inamuna uendresao imali yangu, mana kutsojua tsena waka musika-mali wangu.›
3Ɓas, musika-mali ule adziambia: ‹Nifanye trini, na murumisa wangu asunitoa hari mwa ihazi ya uendresa mali zahe? Hali nendre nalime, tsishindri, nafanye akrimasikini, nisuona haya. 4Ɓas, nisujua trongo nitsoifanyao, ile pare watru wanikariɓise hawo namotolwa hari mwa ihazi yangu.›
5V̄ale ahiri moja-moja wendza deni ha umurumisa wahe. Adzisa wa handra: ‹Murumisa wangu asuhutsaha kisaje?›
6Amudjiɓu: ‹Ziv̄imo miya za matra.›
Sa ile amuambia: ‹Renga ikiritasi ya ihisaɓu ya deni yaho, uketsi haraka, uangihe amba hamsini.›
7Amwesa aambia wangina: ‹Ẽhẽ wawe, usutsahwa kisaje?›
Ule amudjiɓu: ‹Ziv̄imo miya za tsohole.›
Ɓas, amuambia tsena: ‹Renga ikiritasi yaho, uangihe amba thamanini.›
8Wakati ule murumisa ule asifu djukuma tsi muaminifu wahe ule ha siɓaɓu ya iãkili airumia. Mana uwatru wa lidunia lini wana ãkili mbeli za wanyawo rahana wao walio wa iheu. 9Ɓasi wami nisumuambiani, namudzifanyiye wandzani ha imali ya lidunia lini, ile pare zamomulawiani, murengwe hari mwa makao ya daima.
10Monyewe uka muaminifu hari mwa trongo ititi, waye uka muaminifu hari mwa iɓole; na mutru karahatsiha hari mwa trongo ititi, waye karahatsiha hari mwa iɓole. 11Ɓasi neka kamwaka waaminifu hari mwa zimali kazarahatsishiha za lidunia lini, mbani ɗe atsomudhwaminishaoni zile zilio za kweli? 12Na neka kamwaka waaminifu hari mwa za munyanyu, mbani atsomuv̄aoni zanyu?
13Kav̄u murumizi ashindrao arumishe warumisa waili, mana au atsoenga umoja, av̄endze umoja, au atsofungana na umoja, umoja amuoneye. Kamushindri murumishia Mungu v̄umoja na mali.»
14Watru wa ishama ya Mafarisayo ukia yawo piya trongo zile, iv̄o wakov̄endza marike, wamutseshea. 15Ɓadi Insa awaambia: «Wanyu watru watsahao waonehane amba warahara mbeli za wanadamu, ɓadi Mungu ujua roho zanyu. Mana iyo iliona sheo mbeli za uwanadamu, ilaãnishiha mbeli za Mungu.»
Insa asutoa misomo yangina
(Mat 11:12-13; 5:31-32; Mar 10:11-12)
16«Wakati wa iSharia na yimiangishio ya yimitrume uka ata upara Yahaya. Rangu v̄av̄o Utawalizi wa Mungu ujudziwa, na kula mutru asurumia nguvu ile aungiye. 17Ɓadi ndzangu zaidi uwingu na ishiv̄andre ya tsi uv̄ira, raha na trundra moja ya iSharia uzimiha.
18Mutru yotsi afunguao mushe wahe amwesa afungiye wangina, uwo asuzani, na yotsi afungiao mutrumushe afungulwa na mume wahe, asuzani.»
Hadisi ya tadjiri na masikini akohiriwa Lazaro
19«V̄uka mutru tadjiri akopindra vao dzuzuri lakana range ya muzambarau, tsena lafanyiwa ha mauzi mambamba ya kitani; kula suku akoẽshi ha uzuri, tsena hari mwa masterehi. 20V̄uka na mutru masikini akohiriwa Lazaro, akolala mulongoju ha tadjiri ule. Aka ajaya zondra hari mwa piya umwili wahe, 21amwesa akotumainia aɗye ɗe zikenye zakopuliha mezani ha tadjiri ule; ata mbwa zakoja na uhomba zondra zahe.
22Masikini ule aja afu; ɓas, malayika zimuv̄ingi ake v̄umoja na Iɓrahima. Tadjiri ule aja afu wajau, adzihwa. 23Ha uwafu hule adzua yamatso, na hari mwa uutungu akanawo, rangu mbali amuono Iɓrahima, na Lazaro v̄umoja na waye. 24Ashelemedza: ‹Iɓrahima, Ɓaɓa, niv̄orehe, umuv̄elehe Lazaro apahise itsa ya isha yahe majini, aje anihombese ulimi, mana nisuondesheha jengeni v̄anu.›
25Iɓrahima amudjiɓu: ‹Mwana wangu, nahana amba upara ndjema zaho wakati waka hayi, na Lazaro aka apara ɗe yamaondo. Ɓas av̄asa waye a v̄anu hari mwa utrulivu, na wawe usuondesheha. 26Amwesa raha, v̄wa ngama ɓole ɓaina ya wasi hunu na wanyu oho, ile pare wao watsotsahao walawe hunu waje hanyu oho, au walawe oho warijiliye hunu, wasushindre.›
27Tadjiri ule amuambia: ‹Ɓas, nisuhumia Ɓaɓa, umuv̄elehe Lazaro andre muraɓani ha ɓaɓangu, mana tsina wananyangu watruɓaɓa watsano. 28Muv̄elehe ile awatoleye ushahidi, pare wasuje wajau hari mwa v̄ahanu v̄wa matreso v̄anu.›
29Ɓadi Iɓrahima amudjiɓu: ‹Wana yimiangishio ya Musa na ya yimitrume; nawawavulishiye.›
30Arongoa tsena: ‹Tsi namuna iyo Ɓaɓangu Iɓrahima, ɓadi neka mutru hari mwa uwafu andre hawo, v̄av̄o watsendra toɓa.›
31Ɓadi Iɓrahima amudjiɓu: ‹Neka kawasuvulishia yimiangisihio ya Musa na ya yimitrume, kawatsoamini wala ukana v̄uwajilia mutru aregea hayi ha ulawa hari mwa uwafu.› »
Currently Selected:
LUKASI 16: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
