LUKASI 3
3
Maĩdhwa ya Yahaya Muɓaĩshizi
(Mat 3:1-12; Mar 1:1-8; Yuh 1:19-28)
1uMwaha wa kumi na tsano wa iyezi ya Kaiswara Tiɓeriusu, Pontiusu Ɓilatusa aka atawala iYudeya, Hirudu akoendresa iGalilaya, mwananyahe Filiɓusa yimikaɓala ya Iturea na Trakoniti, na Lisaniasa iAɓileni. 2Tsena, Anasi na Kayafasi waka ɗe Matolezi Maɓole ya Masadaka. Uwo ɗe uwakati urongozi wa Mungu wamushukia Yahaya, mwana wa Zakariya, padzaju. 3Andre hari mwa piya yimikaɓala djirani na uMuro wa Jurdani, akoĩdhia watru wandre toɓa pare madhambi yawo yaswamihiwe, toɓa yashadidishiwa na umuɓaĩsho ha maji. 4Mauri ɗe iheli v̄waangihwa moni na ishio yav̄inga ya marongozi ya mutrume Izaya:
«Lini ɗe liji la mutru ashelemedzao padzaju:
‹Namutayarishe indzia ya Mola,
namuondzowe v̄ahanu atsov̄irao.
5Kula goɓea litsofitsiwa,
na kula ngu na kula mulima utsoɗarisiwa.
Zandra gori zitsoondzolwa,
na zindzia mbovu zitsorengeledzewa.
6Tsena, piya wanadamu watsoona ukombozi wa Mungu.› »
7Ɓas, akoambia idunia yakoja iɓaĩshiwe ha maji: «Wanyu kaɓila za nyoha zendza sumu! Mbani ɗe amuambiani amba mutsoshindra mutrale ihadhaɓu ijao? 8Namuv̄enuwe mavuna yastahiki watru wandra toɓa, wala musuketsi mwadziambia amba: ‹Wasi rina Iɓrahima amba mudzaɗe watru.› Mana nisumuambiani, ata hari mwa yamawe yanu, ne Mungu ushindrotoa zilembwe za Iɓrahima. 9Na v̄anu madza lisoha lilishwa miziju mwa yimiri. Kula muri kauv̄a mavuna mema utsokatrwa, uvutswe moroju.»
10iDunia ile imudzisa: «V̄av̄o rifanye trini?»
11Awadjiɓu: «Monyewe ukana nguo mbili, naanyise na ule kasina ata hata, na uwo aliona shahula, nafanye namuna ɗe wiyo iyo.»
12V̄ale tsena v̄umujilia maliv̄isa-latete, ile waɓaĩshiwe ha maji. Wamudzisa: «Fundi, wasi rifanye trini?»
13Awadjiɓu: «Mwasuliv̄ise yazidi iyo mwaãmurishiwa.»
14Madjeshi wajau waja wamudzisa: «Ẽhẽ wasi, ilazimu rifanye trini?»
Awadjiɓu: «Musuv̄osheye atsokao yotsi shitru yahe, wala mususingidziye mutru trambo, ɓadi mutoshehe na umushahara wanyu.»
15Ɓaanda watru waka ju la ulindra na tama ɓole, na kula mutru akodzidzisa rohoni yahusu Yahaya, neka waye tsi ɗe Kristi, 16awaambia piyawo: «Wami nisumuɓaĩshani ha maji. Ɓadi v̄usuja mwendza ushindzi rahana wami, alio amba tsastahiki ata uɓulia ngwe za kaɓwa zahe. Na waye atsomuɓaĩshani ha iRoho Ndzitwaharifu, na ha moro. 17Mihononi hahe asiki utseo wahe, ile atenge liguru na zitrundra, azigamise kanyani. Ɓadi atsovudza liguru moni na moro kauzimiha ha daima.» 18Ɓas ha marongozi mengi yangina, ɗe Yahaya akoĩdhia watru na uwajudza iHaɓari Ndjema.
19Ɓadi wakati dhwamana Hirudu arudisiwa na Yahaya ha siɓaɓu ya trongo yahe na Hirudiyati, mutrumushe wa mwananyahe, na zitrendrwa mbovu nyengi zangina azifanya, 20ɗe v̄ahanu waye Hirudu aengedza mbovu yangina ha umutria Yahaya shiv̄ani.
Muɓaĩsho wa Insa
(Mat 3:13-17; Mar 1:9-11)
21V̄ale piya watru wakoɓaĩshiwa, Insa wajau aɓaĩshiwa. Na wakati aka hari mwa mamilio, uwingu uɓuha, 22na iRoho Ndzitwaharifu imushukia ha mufano wa shukuru. Amwesa v̄ulawa ji mbinguni, lirongoa: «Wawe ɗe uMwana wangu muv̄endzewa; wami ujiv̄iwa halisi na wawe.»
iNasaɓa ya Insa
(Mat 1:1-17)
23Insa akana mukaɓala wa maha thalathini wakati aandrisa zihazi zahe. Namuna watru wakofikiri, aka mwana wa Yusufu. Na Yusufu waye aka mwana wa Heli,
24mwana wa Matati,
mwana wa Lawi,
mwana wa Melki,
mwana wa Yanai,
mwana wa Yusufu,
25mwana wa Matatiasa,
mwana wa Amosi,
mwana wa Nahumu,
mwana wa Hesli,
mwana wa Nadjayi,
26mwana wa Mahati,
mwana wa Matatiasa,
mwana wa Shemeyi,
mwana wa Yuseku,
mwana wa Yuda,
27mwana wa Yuhanana,
mwana wa Resa,
mwana wa Zuruɓaɓeli,
mwana wa Salatiyeli,
mwana wa Niri,
28mwana wa Maliki,
mwana wa Adi,
mwana wa Kusamu,
mwana wa Elmadama,
mwana wa Heri,
29mwana wa Yushua,
mwana wa Eliezeri,
mwana wa Yurimu,
mwana wa Matati,
mwana wa Lawi,
30mwana wa Simeona,
mwana wa Yuda,
mwana wa Yusufu,
mwana wa Yunamu,
mwana wa Eliakimu,
31mwana wa Meleya,
mwana wa Mena,
mwana wa Matatha,
mwana wa Nathani,
mwana wa Daudu,
32mwana wa Isayi#3:32 Isayi: Au: Yesi.,
mwana wa Uɓedi,
mwana wa Ɓuazi,
mwana wa Salmuna#3:32 Salmuna: V̄wa ɓaãdhwi ya zio za Shigiriki za shi hale zirongoao, Sala.,
mwana wa Nashunu,
33mwana wa Aminadaɓu,
mwana wa Admini,
mwana wa Arni,
mwana wa Hasruna,
mwana wa Ɓeresi,
mwana wa Yuda,
34mwana wa Yaãkuɓu,
mwana wa Isiaka,
mwana wa Iɓrahima,
mwana wa Tera,
mwana wa Nahori,
35mwana wa Seradji,
mwana wa Rehu,
mwana wa Ɓelegi,
mwana wa Eɓeri,
mwana wa Sala,
36mwana wa Kainamu,
mwana wa Arfaksadi,
mwana wa Shemu,
mwana wa Nuhu,
mwana wa Lameki,
37mwana wa Metusela,
mwana wa Henoki,
mwana wa Yaredi,
mwana wa Mahalaleli,
mwana wa Kainani,
38mwana wa Enoshi,
mwana wa Sethi,
mwana wa Adamu,
mwana wa Mungu.
Currently Selected:
LUKASI 3: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
