LUKASI 5

Maswihaɓa ya handra ya Insa

(Mat 4:18-22; Mar 1:16-20)

1V̄uka suku Insa aka wangoni mwa lidzia la maji la Genesareti. Dunia ya watru ika imuzingidzia ivulikiye urongozi wa Mungu. 2Aono wangoni mwa lidzia laka mbili zilio amba walozi wazo waka washuku wahose wavu zawo. 3Sa ile ahea hari mwa moja yaka ɗe ya Simoni, amuambia atsengeleye mwanapav̄i ha uɓaushia ishiv̄andre ya tsi, amwesa aketsi, na rangu lakani v̄ale ɗe akosomedza idunia.

4Ata wakati amalidza ulagua, amuambia Simoni: «Tsengelea maji male hule, mushukidze wavu zanyu pare mulowe fi.»

5Wakati ule Simoni amudjiɓu: «Fundi, rifanya hazi piya uuku, wala karapara itsokao yotsi. Ɓadi ha iv̄o waniambia, nitsoshukidza uwavu.»

6Ɓas, uushukidza yawo, usiki fi ha uwengi, ata wakorandruha. 7Sa ile washeudza wanyawo waka hari mwa laka imoja, ile waje wawasaidi. Wale waja, wajadza laka mbili zile, ata zika kariɓu na urora.

8Wakati Simoni Monye aona trongo zile, avundzu malondro mbeli za Insa, amwesa amuambia: «Mutukufu, nilawiye, mana wami muãswifu.» 9Mana ushangavu uka umusiki, waye na piya watru waka na waye, ha siɓaɓu ya ulozi waka waufanya. 10Na ɗe ha inamuna ile wajau ɗe waka wanyahe wa Simoni, Yakoɓu na Yuhani wana wa Zuɓudu.

Ɓadi Insa amuambia Simoni: «Usuriye, rangu v̄anu utsoloa wanadamu.» 11Ɓas, wahedza laka zawo, amwesa walishi piya trongo zawo, wamuɗungu.

Insa asuzihira muenefu

(Mat 8:1-4; Mar 1:40-45)

12V̄uka suku, Insa aka hari mwa ɗago. V̄umujilia mutru akana uwaɗe wa uwenefu piya umwili. Umuona yahe Insa, areme uso v̄otsi, amwesa amufanyia mamilio yanu: «Mutukufu, neka utsaha, utsoshindra unitwaharishe.»

13Ɓas, Insa av̄eleha umuhono, amuɓamba, amwesa arongoa: «Nisutsaha, twaharishiha.» Sa na isa ile uwenefu umuɓaushia.

14Amwesa amuambia: «Usuambiye mutru atsokao yotsi trongo zini, ɓadi endra wadzionese ha Mutolezi-Masadaka, tsena utowe sadaka ha uɗunga izo zaãmurishiwa na Musa, ile ike ushahidifu mbeli za watru.»

15Ɓas, v̄ale sifa za Insa zakwendra na uenea. Dunia ha uwengi yakoja imuvulishiye na uzihiriwa mawaɗe yawo. 16Ɓadi Insa akodzivura hari mwa v̄ahali v̄wadzitenga, afanye mamilio.

Insa asuzihira shirewe

(Mat 9:1-8; Mar 2:1-12)

17Suku, Insa akosomedza. Watru wa ishama ya dini ya Mafarisayo na Mafundi ya Sharia waka walawa hari mwa piya yamalago ya Galilaya, ya Yudeya, na Yerusalemu, waka waketsi v̄ale. Na ushindzi wa Mola wakov̄enuha ha mazihiro. 18Ɓas, v̄uja watru wav̄inga shirewe hari mwa ɗalo. Wakozunguha ndzia wamuv̄inge mbeli za Insa. 19Ha iv̄o kawakojua v̄ahanu watsomuv̄irisao ha siɓaɓu ya idunia, wahea utroju, wamushukidza na liɗalo hari mwa v̄ahali waka wav̄uɓua, hari-hari na idunia mbeli za Insa.

20Uona yahe uaminifu wawo, Insa arongoa: «Ɓaɓa, madhambi yaho yaswamihiwa.»

21Sa ile Mafundi ya Sharia na Mafarisayo waandrisa udzisana ha urongoa: «Unu mutru trini akufuruo? Mbani ashindroswamihio madhambi neka tsi Mungu weke?»

22Insa ɓaanda akojua fikira zawo, arenge umurongo, awadzisa: «Manatrini ata mudzidzisao trongo zizo rohoni? 23Iv̄i ɗe ilio ndzangu ya urongoa: ‹Madhambi yaho yaswamihiwa›, au: ‹Hima, wendre›? 24Ɓadi namujuwe amba shiv̄andreju mwa tsi uMwana wa Mwanadamu ana ushindzi wa uswamihi yamadhambi.» Amwesa amuambia shirewe ule: «Hima, urenge liɗalo laho, wendre dzaho haho.» 25Ɓas sa na isa ile, mutru ule ahimi matsoni hawo v̄ale, arenge ɗalo lile aka alilalia, amwesa andre ɗagoni hahe ha umutukuza Mungu. 26Watru waka v̄ale piya wasikwa na ushangavu, tsena wamutukuza Mungu. Ha zifaza waka nazo, wakorongoa: «Riono trongo za ãdjaɓu leo.»

Insa asumuhira Lawi amuɗunge

(Mat 9:9-13; Mar 2:13-17)

27Ɓaanda ya v̄ale Insa alawa, aono muliv̄isa-latete akohiriwa Lawi, aketsi moni na inyumba ya hazi yahe. Amuambia: «Niɗunge.» 28Ɓas, alishi piya, ahimi, amuɗungu.

29Amwesa Lawi amufanyia karamu ɓole ɗagoni hahe. Maliv̄isa-latete wengi na watru wangina wakoɗya v̄umoja na wao. 30Watru wa ishama ya Mafarisayo na Mafundi ya Sharia yawo wakonguruma na uambia maswihaɓa yahe: «Manatrini muɗyao na unwa v̄umoja na maliv̄isa-latete na wendza taɓia mbi?»

31V̄ale Insa arenge umurongo, awaambia: «Tsi ɗe wendza unono watsahao twaɓiɓu, ɓadi ɗe wawaɗe. 32Tsaja nahira warahara, ɓadi ɗe maãswifu wandre toɓa.»

Misomo ju la itrongo ya ufunga

(Mat 9:14-17; Mar 2:18-22)

33Suku, watru wamuambia Insa: «Maswihaɓa ya Yahaya na ya ishama ya Mafarisayo ufunga na uswali wakati mwengi, ɓadi yaho maswihaɓa yasuɗya na unwa.»

34Ɓas, awadjiɓu: «Hali wanyu ushindra ufungisa wandzani wa ɓwana-harusi wakati alio na wao? 35V̄utsoja suku amba watsorengewa ɓwana-harusi; v̄av̄o watsofunga suku zizo.»

36Awav̄a tsena mufano: «Kav̄usi mutru arandruao shipandre hari mwa nguo pia, aireme hari mwa nguo yaɗuha. Mana neka ɗe namuna iyo, atsorandrua inguo pia ile, na ishipandre pia airenga, kaitsolingana na inguo ile yaɗuha. 37Wala kav̄u mutru arengao trembo lajemwa av̄asa, alitriye moni na ziya zaɗuhwa za ngwezi. Mana neka ɗe namuna iyo, litrembo la av̄asa lile litsopasua ziya za ngwezi zile, litrihe, na ziziya ziangamiye. 38Ɓadi ilazimu trembo lajemwa av̄asa litrilwe moni na ziya za ngwezi pia. 39Wala kav̄u ata mutru ahisonwao trembo la hale, atsahao la av̄asa, mana waye urongoa: ‹La hale ɗe lidjema.› »

Currently Selected:

LUKASI 5: swb

Highlight

Copy