LUKASI 8

Watruwashe wakomuɗunga Insa

1Ɓaanda ya v̄ale Insa akwendra hari mwa kula ɗago, rangu ɓole ata titi, na ujudza iHaɓari Ndjema ya Utawalizi wa Mungu. Na watru kumi na waili wale waka na waye. 2V̄uka na ɓaãdhwi ya watruwashe waka wazihiriwa madjini ya peu na maradhi. Na wao ɗe Mariama akohiriwa wa Magidala, alio amba aka atolewa mazetwani saɓa; 3Yuhana, mutrumushe wa Kuza, murumizi muɓole wa Hirudu; Suzana; na wangina wengi walio amba wakomusaidi Insa na maswihaɓa yahe ha zimali zawo.

Mufano wa mutru ayelao ha utsanya

(Mat 13:1-9; Mar 4:1-9)

4Suku, dunia ya watru ika ingulidzana na wasalia wengi walawa hari mwa malago yangina, wamujilia Insa. Ɓas, awatolea mufano unu: 5«V̄uka mutsanyizi-maela, alawa akondrotsanya. Utsanya yahe, ɓaãdhwi ya maela yapuliha ndziani; yatseresewa na mindru, na yasalia yaɗyiwa na nyunyi za hawani. 6Yasalia yapuliha v̄ahanu kawe. Yamomea yahanya, mana kayakopara urutuɓa. 7Yasalia tsena yapuliha hari mwa malavu ya miɓa. Malavu ya miɓa yale yahuwu v̄umoja na yao, yayafinikia. 8Na yangina tsena yapuliha hari mwa trotro ndjema. Umea yawo yatrendre, yadza mavuna ata mara miya.»

Amohisa urongoa zile, Insa ahedza liji, arongoa: «Kula mwendza makio ya ukia, nakiye.»

iMana ata Insa akosomedza ha urumia mifano

(Mat 13:10-17; Mar 4:10-12)

9Sa ile maswihaɓa yahe yamudzisa imana ya mufano ule. 10Ɓas, adjiɓu: «Wanyu mudjaãliwa ujua siri za Utawalizi wa Mungu, ɓadi wasalia wajudziwazo ha mifano, ile

‹wamoangalia, wasuone,

na wamokia, wasuelewe.› »

iMana ya umufano wa mutsanyizi-maela

(Mat 13:18-23; Mar 4:13-20)

11«Ɓasi tsini imana ya mufano ule: yaMaela, uwo ɗe urongozi wa Mungu. 12Yao yapuliha ndziani, ɗe wale wakiao, amwesa Iɓilisa uja utoa rohoni hawo urongozi ule, pare wasuamini, wasuhuyiwe. 13Yao yapuliha hari mwa kawe, ɗe wale wamokia urongozi ule, waurengao ha furaha, ɓadi kausisi mizi. Wao uamini hari mwa muda ata wamodjereɓiwa, wao ulisha. 14Yao yapuliha hari mwa malavu ya miɓa, ɗe wale ɓaanda wakia urongozi ule, wao uendra na trongo zawo: yimifikirisho, zingutadjiri, na zingunafasi za lidunia lini uɓala pumu urongozi ule, ha heli ya uka amba wao udza mbia, ɓadi kaziketsi ata zadzinya. 15Yao yapuliha hari mwa itrotro ndjema, ɗe wale wakia urongozi ule ha roho ndjema yarahara, wao uusika, amwesa ustahamili ata wadze mavuna.»

Mufano wa kombe la matra

(Mar 4:21-25)

16«Kav̄usi ata mutru ɓaanda apatsa kombe, alifinikiao shiya, au alitriao vuvuni mwa shitrandra, ɓadi waye ulitria hari mwa shihetsi-kombe, ile pare wale wangiao, waone heu. 17Mana kav̄usi yadzama kaitsov̄enuha, wala ya siri kaitsojulihana, yatolwa heuni. 18Ɓasi namudzifahamishe na inamuna muvulikiao; mana uwo aliona, atsov̄olwa, ɓadi uwo kasina, ata iyo afikirio amba anayo, ne atsotolewayo.»

Wadjemazahe wa Insa ɗe wav̄i?

(Mat 12:46-50; Mar 3:31-35)

19Mayahe na wananyahe wa Insa waja wamupare, ɓadi kawashindra wamukuruɓia ha siɓaɓu ya idunia. 20Sa ile aambilwa: «Mayaho na wananyaho wa v̄ondze oho, wasutsaha wahuone.»

21Ɓadi adjiɓu: «Mayangu na wananyangu ɗe wao wavulishiao urongozi wa Mungu, tsena wautriao ndziani.»

Insa asuɗaridza pev̄o kali

(Mat 8:23-27; Mar 4:35-41)

22Suku, Insa apashia djahazi na maswihaɓa yahe. Awaambia: «Narishiye nyambo ya lidzia.» Ɓas, walawa. 23Wakati wakotreka, Insa asindzia. V̄uhimi pev̄o yendza nguvu dziani v̄ale; lidjahazi lakongiliwa na maji, ata waka hari mwa hatwari.

24Sa ile maswihaɓa yahe watsengelea wamumidze. Wamuambia: «Fundi, Fundi, risuangamia!»

Ahimi, ashemea ipev̄o na yamaluja, yatrulia, na ishiwari ilala. 25Amwesa awaambia: «Uaminifu wanyu wa hav̄i?»

Wasikwa na faza na ushangavu ata wakoambiana: «Unu mutru mbani unu aãmurishao ata pev̄o na maji, na wizo zisumutuĩ!»

Insa asuzihira mutru akotreswa na madjini ya peu

(Mat 8:28-34; Mar 5:1-20)

26Ɓaanda ya v̄ale wapahwa hari mwa iɓandari ya Magerasi, maswa na iGalilaya. 27Wakati Insa ashuka v̄otsi, v̄umujilia mutruɓaɓa wa shi ɗagoni v̄ale, akana mazetwani. Ina mida mengi kakopindra, wala kakoketsi ɗagoni, ɓadi mahaɓurini. 28Wakati amuona Insa, alatsa keme, adzivutsu mindruni hahe, amwesa arongoa ha ji lendza nguvu: «Usutsaha unifanyiye trini Insa, Mwana wa Mungu Monyewe Uju rahana Uju? Nisuhutafadali, usunionde.» 29Arongoa zile mana Insa aka ãmurisha djini la peu lile limulawiye, ha iv̄o lakoka na umusika rangu hale, ata yakotsonga amba akoziwa ha ufungwa ha silisili na utratriwa shuma mindruni. Ɓadi waye akorumbua zifungo zile, akov̄ingwa na shetwani ile mav̄adzani.

30Wakati ule Insa amudzisa: «Dzina laho mbani?»

Adjiɓu: «Wami uhiriwa Malijio», mana akana mazetwani ha uwengi. 31Amwesa mazetwani yale yamumia Insa asuyav̄elehe yandra Uzimu.

32Na mulimani v̄ale, v̄uka ɓangwe ɓole la mav̄uruku, lakorundria. Ɓas, mazetwani yale yamumia Insa ayalishe yangiliye mav̄uruku yale. Na waye ayakuɓalia. 33Mazetwani yale yalawia mutru ule, yangilia mav̄uruku yale. Sa ile ɓangwe lile lireme mbio lishuku shilimani v̄ale, lingia moni na dzia la maji lile, liangamia.

34Uona yawo trongo zile, watsunga-mav̄uruku wale watrala, wandre wajudze haɓari ile ɗagoni na hari mwa yamazamba. 35Ata v̄ale watru wakwendra waone trongo zile zahidjiri. Waja wamupara Insa, waono mutru ule mazetwani yamulawia, aketsi mindruni hahe amba apindri, tsena akana ziãkili zahe hodari. Sa ile waremwa na faza. 36Watru waona trongo zile wakati zakohidjiri, wawatolea hadisi namuna mwendza mazetwani ule azihiriwa. 37Ɓasi piya watru wa liɓavu la Magerasi wamumia Insa awalawiye v̄ale, mana waka wasikwa na faza ɓole. Sa ile Insa apashia tsena lidjahazi, aregea dzahe.

38Mutru ule aka atolewa yamazetwani, amia aɓaki na Insa. Na Insa kamukuɓalia, ɓadi amuambia: 39«Regea haho, warongowe izo Mungu ahufanyia.» Ɓas, aregea dzahe, amwesa ajudza hari mwa piya liɗago zile Insa amufanyia.

uMwana mutrumushe wa Yairus, na mutrumama aɓamba inguo ya Insa

(Mat 9:18-26; Mar 5:21-43)

40Uregea yahe nyambo ya lidzia, Insa alahikiwa na dunia ya watru, mana piyawo wakomulindra. 41Na v̄ale v̄umujilia mutruɓaɓa akohiriwa Yairus, aka dhwamana wa iNyumba ya Uswali. Adzivutsu mindruni hahe na umurayi andre ɗagoni hahe, 42mana umwana mutrumushe moja-moja wahe akana maha kumi na mili jauleni, akojofa.

Uendra yahe hule, idunia yakomusera. 43Na moni v̄ale v̄uka mutrumushe akovuja damu ikana muda wa maha kumi na mili, na waye aka atowo piya mali yahe ha yamatwaɓiɓu, wala kav̄u ata moja ashindra amuzihira. 44Amutsengelea Insa mengoni, aɓamba itsa ya inguo yahe. Sa na isa ile, mushukio wa damu wahe ule uzia.

45Wakati ule Insa adzisa: «Mbani ɗe aniɓamba?»

Ɓaanda piyawo wakohana, Monye na wale waka na waye warongoa: «Fundi, idunia ihuzingidzia, tsena ihusere, amwesa usudzisa amba mbani ahuɓamba!»

46Ɓadi Insa adjiɓu: «V̄wa mutru aniɓamba, mana tsikia ushindzi zanilawia.»

47Mutrumama ule iv̄o afahamu amba ajulihana, aja adzivutsu mindruni hahe ha udridrima, amwesa arongoa mbeli za piya watru wale imana ata amuɓamba, na inamuna aangala sa na isa ile. 48Ɓasi Insa amuambia: «Mama, uaminifu waho uhuhuyi, endra ha usalama.»

49Raha akolagua, v̄uja mutru alawa ha dhwamana wa inyumba ya uswali, arongoa: «Mwana mutrumushe waho afu; usumutaãɓishe tsena Fundi.»

50Ɓadi Insa ukia yahe trongo zile, amuambia dhwamana wa inyumba ya uswali: «Usuriye, amini tu, na waye atsov̄ona.»

51Uwaswili yahe ɗagoni hule, kalisha ata mutru angia na waye neka tsi ɗe Monye, Yuhani na Yakoɓu, v̄umoja na ɓaɓahe na mayahe wa umwana. 52Watru piya waremwa na shililo na majitso ha siɓaɓu ya waye. Sa ile Insa arongoa: «Mwasulile, waye kafa, ɓadi asindzia.»

53Na wao wakomutseha ɓaanda wajua amba afu. 54Ɓadi amusiki umuhono, amwesa arongoa ha nguvu: «Mwana wangu, hima!» 55Roho yahe imuregea, ahimi sa na isa ile. Ɓas, Insa aãmurisha av̄olwe shahula aɗye. 56V̄ale wadjemazahe wa umwana mutrumushe ule washanga. Ɓadi awaɓalidza wasuambiye mutru atsokao yotsi trongo zile zahidjiri.

Currently Selected:

LUKASI 8: swb

Highlight

Copy