MATIYO 15

Misomo ya Insa yahusu zimila

(Mar 7:1-13)

1Ɓas, watru wa ishama ya dini ya Mafarisayo na Mafundi ya Sharia wamujilia Insa ulawa Yerusalemu, wamuambia: 2«Manatrini maswihaɓa yaho yatadio imila ya wadzaɗe watru? Mana wao kawatwaharisha yimihono wamondroɗya.»

3Awadjiɓu: «Ẽhẽ wanyu, manatrini mutadio iãmuri ya Mungu ha uɗunga mila yanyu? 4Mana Mungu arongoa: ‹Muhishimu ɓaɓaho na mayaho.› Tsena: ‹Mutru atsomuapizao ɓaɓahe au mayahe, atsolazimu aulawe.› 5Ɓadi wanyu musurongoa: mutru amuambiao ɓaɓahe au mayahe: imali nitsoshindrao nihusaidiye nayo, tsiitamania Mungu, 6v̄av̄o mususomedza amba tsi paka amuhishimu tsena ɓaɓahe au mayahe. Ha izo, wanyu ulatsa urongozi wa Mungu ha siɓaɓu ya mila yanyu. 7Wanyu wanafiki! Mutrume Izaya akana haki wakati akojudza ju lanyu urongozi unu ashukidziwawo:

8‹Umati unu unihishimu ha malomo,

ɓadi roho yawo ya mbali na wami.

9Uniãɓudu yawo kaina faida,

iv̄o yimisomo wayitoao ãmuri za shiuɓinadamu.› »

Misomo yahusu zinagisio mwanadamu

(Mar 7:14-23)

10Amwesa Insa ahiri idunia, aiambia: «Namuvulishiye, tsena muelewe: 11Shitru inagisio mwanadamu, tsi ɗe ile ingiao hanyoni, ɓadi ɗe ilawao hanyoni.»

12Ɓas, maswihaɓa yahe yamujilia, yamuambia: «Saɓu ujua amba watru wa ishama ya Mafarisayo watukiwa rohoni iv̄o wakia urongozi waho ule?»

13Adjiɓu: «Kula shimea kayataɓulwa na Ɓaɓangu alio mbinguni, itsorurumulwa. 14Namuwalishe tu! Wao wafa-matso wav̄ingao wafa-matso. Na neka mufa-matso asuv̄inga mufa-matso, watsopuliha wao waili moni na ngama.»

15Monye amuambia: «Rieledze mufano ule.»

16Insa arongoa: «Wanyu wajau ne raha kamusuelewa? 17Kamusuelewa amba kula ingiao hanyoni, ushuka moni na imimba, amwesa yendre ilawa? 18Ɓadi iyo ilawao hanyoni, ula rohoni, na iyo ɗe inagisio mutru. 19Mana rohoni ɗe v̄ulawao fikira za peu, za uula, za uzindzi, za shahawa za peu, za uwidzi, ushahidi wa trambo, na ushirikina, 20izo ɗe zinagisio mwanadamu; ɓadi mutru uɗya wala katwaharisha yimihono, iyo kainagisi mutru.»

Uaminifu wa mutrumama Mukanaani

(Mar 7:24-30)

21Amwesa Insa alawa v̄ale, andre hari mwa liɓavu la Tiro na Sidoni. 22Na v̄ale v̄wa mutrumama Mukanaani alawa mukaɓala ule, aja ha ushelemedza: «Mutukufu, Mwana wa Daudu, niv̄orehe! Mwana mutrumushe wangu asikwa ha kusudi na shetwani.»

23Ɓadi Insa kamudjiɓu ata shitru. Sa ile maswihaɓa yahe yaja yamumia: «Fundi, muambiye andre dzahe, mana asuriɗunga na ulatsa keme!»

24Adjiɓu: «Tsav̄elehwa ha watru wangina neka tsi ɗe ha wa umuraɓa wa Israila, wapotea mauri maɓariɓari.»

25Ɓadi mutrumama ule aja avundzu malondro mbeli zahe, amuambia: «Mutukufu, nisaidi.»

26Insa amudjiɓu: «Tsi ndjema mutru urenga shahula ya wanatsa, aiv̄e mbwa.»

27Sa ile mutrumama ule amuambia: «Kweli Mutukufu, ɓadi mbwa uɗya kenye zipuliao v̄otsi ulawa mezaju ha wanyewezo.»

28Ɓas Insa amuambia: «Mama, uaminifu waho muhodari! V̄av̄o naike mauri ɗe inamuna utsahao.» Sa na isa ile kamwe mwana mutrumushe wahe ule av̄ono.

Insa asuzihira wawaɗe wengi

29Insa alawa v̄ale, av̄iri wangoni na iƁahari ya Galilaya|Ɓahari ya Galilaya, ahea uju na mulima, aketsi. 30Ɓas, dunia ya watru imujilia v̄ale v̄umoja na magoɓo, wafa-matso, wendza zifeli, maɓuɓu, na wawaɗe wengi wangina; walishwa mindruni ha Insa, awazihira. 31V̄ale idunia yakoshanga halisi iv̄o wakoona amba maɓuɓu yakolagua, wendza zifeli wakopara unono, magoɓo yakorengelea uendra, na wafa-matso wakoona. Ha izo, wakomutukuza Mungu wa Israila.

Insa asulisa watru wazidi alifu nne

(Mar 8:1-10)

32Amwesa Insa ahiri maswihaɓa yahe, awaambia: «Nisuv̄oreha watru wanu, mana ina suku traru rangu walio v̄anu na wami, ne kawana shitru ya uɗya. Tsisutsaha nawalisha warudi na ndza, ha uria wasuje wavuliha ndziani.»

33Maswihaɓa yale yamuambia: «Padzaju v̄anu rilio, hav̄i ɗe ritsoparao shahula ya ukurisa dunia ɓole mauri ɗe ini?»

34Ɓas, Insa awadzisa: «Madipe mangav̄i ɗe mulio nayo?»

Wadjiɓu: «Saɓa, na wana fi.»

35Sa ile aambia idunia ile iketsi v̄otsi. 36Amwesa arenge madipe saɓa yale na zifi, amuhimidia Mungu, ayakutrua, ayav̄a maswihaɓa yahe waãnisiye idunia. 37Piyawo waɗyi ata wakura, amwesa wav̄ingi mahanga saɓa yajadzwa na magudru yaka yaɓaki. 38Watru wakoɗya v̄ale waka wapara alifu nne, ɓila uhisaɓu watruwashe na uwanatsa. 39Amwesa ɓaanda av̄eleha watru malagoni hawo, Insa apashia lidjahazi, andre hari mwa umukaɓala wa Magadani#15:39 Magadani: Leo watru kawasujua v̄ahanu ɗago lini laka. V̄wa ɓaãdhwi ya zio za Shigiriki zirongoao Magidala..

Currently Selected:

MATIYO 15: swb

Highlight

Copy