Mark 10
10
Ling hōhōōan lon buluim tōlō wu rru.
1Ngate Iyesu te yel metenen ōrr Kalili, te te vya ran vere ge nyer ne ōrr Jutia en tahi Wehal Jotan. Te vanten te e lol ete krugoro nge mōl mōn. Nge te whure nyer mōn te yen ge te rrō rrwerrwene ngamto nga.
2Bone ge le nga mōn, Farrasi worhu err sau me, te err rrō rrwekya he ne murr lon rral ge nge te rrō fe. Err fe byanen ge, “Ō fe me ne gemya, he he vanten hu eba lngilngi mwenan tarirr, rruan ge le ma kbwiti lingsenean rru, o tōlō kbwiti lingsenean?”
3Ngate Iyesu te whu nyer ge, “Lingsenean ha nge Mosis te sene byane gimi?”
4 # Tit 24:1-4; Mat 5:31 Err fe byanen ge, “Mosis te rrmane ge he vanten hu mwe yekya ge eb sene tuuan te hu ge ten lingling hōhōōan byanen. Te eb nga hutamku mwenan tarirr sirr.”
5Te Iyesu te fe byane nyer, “Mosis te rrhu lingsenean ge le tebyan ge bwetemi te hel.
6 # Tang 5:2 “Lon tang baritean, bone ge Yafukon te rrō rrwene tan ge fyan ge li, Tuuankon me fe,
“ ‘Yafukon te rrwene vanten te e ru,
meleng te vehen.’ Tang Baritean 1:27
7-8 “Tebyan sese ge le, nge rrō rrwene ge meleng eba lngilngi temyan a rahen, te eb byulti mwenan tarirr, te ebrō me e hu nga lon ribii.
“ ‘Sese ge le nge, ma rrwene ge tōrō rrlō nga e ru,
te mōrō me e hu nga lon ribii.’ Tang Baritean 2:24
9 “Tebyan ōman mwena Yafukon, ha ge Yafukon myu byulsine, vanten ne tan ge fyan te hu tōlō ngrengre eb nga ling hōhōō ne.”
10Bone ge err la mōl bya lon im, vanten mwena Iyesu nyer ete whu nge mōn ne rrinrrinan ne lingling hōhōōan.
11 # Mat 5:32; 1 Korr 7:10-11 Ngate te fe byane nyer ge, “Yafu hu ge rrō hukuku mwenan tarirr te bya rrō yene vehen ge te mnii, rrō rrwene mwe hakbe byanen mwenan vehen ge tamō.
12 “Te he yamyarr hu ge rrō hukuku man faim te bya rrō yene meleng ge te mnii, rrō rrwene mwe hakbe byanen man faim. Rruan ge le tōlō knon.”
Lon vanten eba mrom ne Iyesu eb yen terere.
13Bone ge sarōan ne lingling hōhōōan te nong, vanten worhu mōn ete rrya mwenar terere nyer me ne Iyesu ge he ne wrene veran rar. Te mwenan vanten nyer err sur te hel ge nor te hel byane vanten nan nyer.
14Bone ge Iyesu te lhe rryi le, lon te fri ne mwenan vanten nyer, te te fe byane nyer ge, “Mi rrlōn surgoro terere ge nyer le. Mi rrmane nyer efe me ne ni, tebyan limhian mwena Yafukon be mwenan ge em yi le.
15 # Mat 18:3 “Nam rrō fe fetinan byane gimi, vanten hu ge lolon ma mrom ne limhian mwena Yafukon mwe yen terere ge nyer a, ma kya e vya lon limhian mwena Yafukon. Te ge he lolon eb lōne mrom ne limhian mwena Yafukon eb yen terere ge nyer a, eb lōn vya lon limhian mwena Yafukon.”
16Ngate Iyesu te kii goro terere ge nyer a, te wrene veran rar te te tarvya nyer.
Yafukon nga mwe yekya eb sene myuran ge mu rru ngamto. Ken tōlō ngrengre yi rrwene.
17Bone ge Iyesu te rrō yel mōn, vanten hu te mku me nen, te singrrur en mō nan. Te te whu, “Vanten ne Wuhuran ge rrwu, ena rrwene ha nge ena ktu myuran ge mu rru ngamto?”
18Ngate Iyesu te fe byanen ge, “Tebyan ha nge ōm rrō fe ge nam bu; vanten te hu tōlō wu bu rru. Yafukon hobōn nga, nge mu wu.
19 “Ōm keya lingsenean mwena Yafukon nyer ge me fe,
“ ‘Fō lōn toō kabnu vanten,
fō lōn fwerr krinen vehen a meleng mwenan vanten ge te mnii,
fō lōn laa,
fō lōn fe rral ge tōlō e fetinan bya ran vanten sōn,
fō lōne rrwene rral e konkon an ge fō rrhare vanten sōn,
te fō rongtafyan tōmōm a rahem.’ “ Yel Metenen 20:12-16; Titrronami 5:16-20
20Te vanten ge a te surmōl te fe, “Vanten ne Wuhuran, bone ge ni narr ve terere nga rru, ma me tongve ge lonle ge a, nam tewene sese bonga ge lingsenean mwena Yafukon rrō fe.”
21 Iyesu te ter konone nge lon lol jejee, te te fe byanen, “Ōm rronrron e sese hu ma nga rru bwe. Fō a, te fō foone hilngim bonga, te fō sene buverr nan byanen lol hanglam nyer. Ge he efō rrwene sese ge li, hilngim eve lol lon tōngtōng, ngate fō me rrutōng.”
22Bone ge vanten ge a te rongtane te yi le, non te e yo tebyan ge te rongtane te hakbe. Ngate te yel metenen lon rongnean te hakbe, tebyan ge hilngin te e yel ten.
23Ngate Iyesu te lhe mwenan vanten nyer, te te fe byane nyer, “Eb hel byanen vanten ge hilngin be yel ho, e vya lon limhian mwena Yafukon.”
24 Mwenan vanten nyer err non metenen tolon nyer. Te Iyesu te fe mōn ge, “Mweneng terere nyer, mwe hel ge vanten e vya fyan limhian mwena Yafukon.
25 “A eb hel mōn bwe ge vanten ge hilngin mo ho e vya rru fyan limhian mwena Yafukon. Eb saavi ge kamel eb hil lon bulu atutur ne ul.”
26Err non metenen mōn bwe, te err rrō whuwhu nyer ge, “Ge he eb yi le lo eb nga yi be ne gemya ge hilngimya mwe rranga rru? Si nge eba ktu myuran ge mu rru ngamto?”
27 Iyesu te ter konone nyer, te te fe, “Vanten tōlō ngrengre eb halku nge hobōn. Yafukon nga mwe yekya eba rrwene, tebyan ge sese te hu tōlō hel e Yafukon. Nge ma kya eba rrwene sese bonga.”
28Te Bita te fe mōn byanen ge, “Ō lhe, gemya myate lngilngi sese bonga tebyam, te myarr rrutōm.”
29Ngate Iyesu te surmōl te fe, “Fetinan, nam rrō fe byane gimi, vanten ge ema lngilngi mwenar vere, te taalar, te mwenar metahal nyer, raher te temyar, mwenar terere nyer, te ar tan tebyang, te tebyan rral ge rrwu ne Iyesu,
30 “efe homnen gogonean eb lam mōn bwe lon ge a. Efe homnen gogonean ne im nyer, helar, metahal nyer, raher, teere nyer, te tan nyer 100 mere ran ge te ho burr. Te jenjenan eba me krinen gogonean ge nyer a mōn. Vanten worhu ge nyer lor sa rral ge rrwu, efe rrwene byane nyer. Te efe nga ktu myuran ge mu rru ngamto lon ge ma nga rrō me bwe.
31 # Mat 20:16; Luk 13:30 “Te vanten lol ge em bemō ho lon ge a, efe nga me eve te tebyan ge lor sa ni te rral ge rrwu, a vanten lol ge em be te ho lon ge a, efe nga me eve mō.”
Iyesu te sene mwenan myuran te yen wuluwul ge mo fooku vanten lam an metene jenjenan, ge he ene ktu tebyan mwenar rruan hakbe.
32Ngate, Iyesu te mwenan vanten nyer err rrō rrutōn hal bya Jerrusalem. Iyesu te rrō rru rrumō ne nyer, te nyer err rrō non metenen tebyan ge err yekya ge vanten worhu ne ōrr Jerrusalem efe rrwene eb hel byane Iyesu, te Iyesu rrō yel konon bya en. Te vanten nyer ge err rrō rrutōn me, lur te rrō myorr. Mōl mōn Iyesu te hol mehare mwenan vanten ge err ve 12, te te saarōne sese ge efe nga rrwene byanen.
33Nge te rrō fe, “Mi rongtafyang, yim rrō a ran kōkō Jerrusalem en ōrr ge efe sene Terere Mleng Gentin Vanten bya lon veran hae brris nyer, te vanten ne wuhuran ne lingsenean mwena Yafukon nyer. Efe yiyine nge, te efe sene rral konon ge nge, eb myarr. Mōl mōn, efe sene nge bya lon veran ge nyer ge err rrlō e ta Isrrel, vanten ta Rrom nyer.
34 “Ngate vanten ge nyer le, efe feene, te efe kiibine, efe finghi eb hel ge eb hel ne afnghii, te efe toō kabnu. Te ran wobung sul nan, nge eb myur mōl mōn, te eb totor.”
35Ngate terere mwena Sebeti, Jemes te Jon, terō sau Iyesu me. Te terō fe, “Vanten ne Wuhuran, lomyarō mwe jeene fō rrwene sese ge myarō whu neng ne.”
36Iyesu te whu nyerō te fe, “Lomrō mwe jeene ha nge ena rrwene byane gōmōrō?”
37Nyerō terō fe, “Bone ge fō nga rrō taa ran mwenam arrorrokon lon helan ge rrlam ne mwenam limhian, lomyarō mwe jeene ge efō rrmane ge emyarō tataa krine neng, ge sōn ran bamtō ne neng, a ge sōn ran bamwir ne neng.”
38 # Luk 12:50 Iyesu te surmōl te fe, “Mōrō rrlō yekya ha nge mōrōm rrō whu. Mwi yi be, mōrōm ngrengre emrō myun lon bwelaye ne we ne rongne mwe hakbean ge ni ena myun lon? Te mōrōm ngrengre tontonan ne jenjenan ge ni ena yel tere?”
39Ngate terō fe byane Iyesu ge, “Myarōm ngrengre.” Mōl mōn, Iyesu te fe byane nyerō ge, “Ge le be fetinan, gōmōrō mōrōm yekya emrō myun lon bwelaye ne we ne rongtane mwe hakbean ge ena myun lon, te mōrōm yekya emrō loo ne looan ne jenjenan ge ni ena loo ne.
40 “Te ni narr rrlō e vanten ge ena hrene ge si eb tataa en bamtō ne ni, a si eb tataa en bamwir ne ni. Yafukon nga eb nga sene ōrr ge te nangnangne rru burr byanen ge nyer ge te hrene rru burr me myarin.”
41Bone ge mwenan vanten rrute ge err ve 10 ho, err rongtane wuhuan ge a, lor te fri ne Jemes te Jon.
42 # Luk 22:25-26 Te rrwene Iyesu te je krukru nyer me ne nge, te te fe, “Mim yekya rru burr rruan mwenan vanten nyer ge err rrlō rrinkete Yafukon. Yim lehe yafu lamlam ge em ho mre ran vanten ge err rrlō e Ju, em rrō rrwene mwe hel byane nyer. Te ema rrwene ge em ho fyan mwenar helan.
43 # Mat 23:11; Mak 9:35; Luk 22:26 “A lon tobol e gimi, mwenami rruan eba mnimnii. Ge hu ge lon mwe jeene eba me e yafu ne vanten rrute, mwenan rrinrrinan eba me fyan te eba me e vanten ne ōman mwenan vanten rrute.
44 “He hu ge lon mwe jeene ge eb taavi vanten rrute, nge eba me e vanten ne ōman mwenan vanten rrute.
45 “Tebyan ge Terere Mleng Gentin Vanten, tōlō me tebyan ge vanten nyer efe ōm mwenan, te nge ma me tebyan ge nge eb ōmne nyer. Te eb sene mwenan myuran eb yen wuluwul ge mo fooku vanten lam an metenen jenjenan ge he ene ktu tebyan mwenar rruan hakbe.”
Rrinkete Iyesu an nga eba rrwene fō ktu myuran.
46Ngate Iyesu te mwenan vanten nyer err tongve ōrr Jerriko. Bone ge ete lngilngi besaō ge rrlam a, vanten err ve lol err rrō rrutōn. Te bone ge err rrō yel, rrol hu te taa rru en siriri hal, san nge Batimeyas, terere mwena Timayas. Ngamto nga, te rrō nungnung buverr metenen vanten nyer.
47Bone ge Batimeyas te rongtane ge Iyesu ta Nasarret te rrō yel me fyaasi ne, nge te rrō je bya mre te rrō fe, “Iyesu! Terere mleng mwena Tefit! Ō lol hane ni!”
48Te vanten err lam err sur te hel ge nor te hel byanen, te err fe ge eb rru rongrong. Te nge te ii bya mre mōn bwe, te rrō fe, “Terere mwena Tefit, ō lol hane ni!”
49 Iyesu te fyarr, te fe, “Mi je nge me.” Ngate err je rrol ge a te err fe byanen, “Ō kwarr! Ō totor, nge rrō je neng.”
50Rrol ge a te koōne mwenan arrlirrli, te te rrōrr bya mre, ngate te me ne Iyesu.
51Ngate Iyesu te fe, “Ōm temelole ha nge ena rrwene byane neng?” Vanten ge a te fe, “Vanten ne Wuhuran, long mwe jeene ge fō rrwene ni ena teter mōl.”
52Ngate Iyesu te fe byanen, “Ō vya, mwenam rrinketean ma rrwene ge ōm wu mōl.” Byaho nga, nge te teter mōl, te te rrutō Iyesu to hal.
Currently Selected:
Mark 10: mmg
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
Mark 10
10
Ling hōhōōan lon buluim tōlō wu rru.
1Ngate Iyesu te yel metenen ōrr Kalili, te te vya ran vere ge nyer ne ōrr Jutia en tahi Wehal Jotan. Te vanten te e lol ete krugoro nge mōl mōn. Nge te whure nyer mōn te yen ge te rrō rrwerrwene ngamto nga.
2Bone ge le nga mōn, Farrasi worhu err sau me, te err rrō rrwekya he ne murr lon rral ge nge te rrō fe. Err fe byanen ge, “Ō fe me ne gemya, he he vanten hu eba lngilngi mwenan tarirr, rruan ge le ma kbwiti lingsenean rru, o tōlō kbwiti lingsenean?”
3Ngate Iyesu te whu nyer ge, “Lingsenean ha nge Mosis te sene byane gimi?”
4 # Tit 24:1-4; Mat 5:31 Err fe byanen ge, “Mosis te rrmane ge he vanten hu mwe yekya ge eb sene tuuan te hu ge ten lingling hōhōōan byanen. Te eb nga hutamku mwenan tarirr sirr.”
5Te Iyesu te fe byane nyer, “Mosis te rrhu lingsenean ge le tebyan ge bwetemi te hel.
6 # Tang 5:2 “Lon tang baritean, bone ge Yafukon te rrō rrwene tan ge fyan ge li, Tuuankon me fe,
“ ‘Yafukon te rrwene vanten te e ru,
meleng te vehen.’ Tang Baritean 1:27
7-8 “Tebyan sese ge le, nge rrō rrwene ge meleng eba lngilngi temyan a rahen, te eb byulti mwenan tarirr, te ebrō me e hu nga lon ribii.
“ ‘Sese ge le nge, ma rrwene ge tōrō rrlō nga e ru,
te mōrō me e hu nga lon ribii.’ Tang Baritean 2:24
9 “Tebyan ōman mwena Yafukon, ha ge Yafukon myu byulsine, vanten ne tan ge fyan te hu tōlō ngrengre eb nga ling hōhōō ne.”
10Bone ge err la mōl bya lon im, vanten mwena Iyesu nyer ete whu nge mōn ne rrinrrinan ne lingling hōhōōan.
11 # Mat 5:32; 1 Korr 7:10-11 Ngate te fe byane nyer ge, “Yafu hu ge rrō hukuku mwenan tarirr te bya rrō yene vehen ge te mnii, rrō rrwene mwe hakbe byanen mwenan vehen ge tamō.
12 “Te he yamyarr hu ge rrō hukuku man faim te bya rrō yene meleng ge te mnii, rrō rrwene mwe hakbe byanen man faim. Rruan ge le tōlō knon.”
Lon vanten eba mrom ne Iyesu eb yen terere.
13Bone ge sarōan ne lingling hōhōōan te nong, vanten worhu mōn ete rrya mwenar terere nyer me ne Iyesu ge he ne wrene veran rar. Te mwenan vanten nyer err sur te hel ge nor te hel byane vanten nan nyer.
14Bone ge Iyesu te lhe rryi le, lon te fri ne mwenan vanten nyer, te te fe byane nyer ge, “Mi rrlōn surgoro terere ge nyer le. Mi rrmane nyer efe me ne ni, tebyan limhian mwena Yafukon be mwenan ge em yi le.
15 # Mat 18:3 “Nam rrō fe fetinan byane gimi, vanten hu ge lolon ma mrom ne limhian mwena Yafukon mwe yen terere ge nyer a, ma kya e vya lon limhian mwena Yafukon. Te ge he lolon eb lōne mrom ne limhian mwena Yafukon eb yen terere ge nyer a, eb lōn vya lon limhian mwena Yafukon.”
16Ngate Iyesu te kii goro terere ge nyer a, te wrene veran rar te te tarvya nyer.
Yafukon nga mwe yekya eb sene myuran ge mu rru ngamto. Ken tōlō ngrengre yi rrwene.
17Bone ge Iyesu te rrō yel mōn, vanten hu te mku me nen, te singrrur en mō nan. Te te whu, “Vanten ne Wuhuran ge rrwu, ena rrwene ha nge ena ktu myuran ge mu rru ngamto?”
18Ngate Iyesu te fe byanen ge, “Tebyan ha nge ōm rrō fe ge nam bu; vanten te hu tōlō wu bu rru. Yafukon hobōn nga, nge mu wu.
19 “Ōm keya lingsenean mwena Yafukon nyer ge me fe,
“ ‘Fō lōn toō kabnu vanten,
fō lōn fwerr krinen vehen a meleng mwenan vanten ge te mnii,
fō lōn laa,
fō lōn fe rral ge tōlō e fetinan bya ran vanten sōn,
fō lōne rrwene rral e konkon an ge fō rrhare vanten sōn,
te fō rongtafyan tōmōm a rahem.’ “ Yel Metenen 20:12-16; Titrronami 5:16-20
20Te vanten ge a te surmōl te fe, “Vanten ne Wuhuran, bone ge ni narr ve terere nga rru, ma me tongve ge lonle ge a, nam tewene sese bonga ge lingsenean mwena Yafukon rrō fe.”
21 Iyesu te ter konone nge lon lol jejee, te te fe byanen, “Ōm rronrron e sese hu ma nga rru bwe. Fō a, te fō foone hilngim bonga, te fō sene buverr nan byanen lol hanglam nyer. Ge he efō rrwene sese ge li, hilngim eve lol lon tōngtōng, ngate fō me rrutōng.”
22Bone ge vanten ge a te rongtane te yi le, non te e yo tebyan ge te rongtane te hakbe. Ngate te yel metenen lon rongnean te hakbe, tebyan ge hilngin te e yel ten.
23Ngate Iyesu te lhe mwenan vanten nyer, te te fe byane nyer, “Eb hel byanen vanten ge hilngin be yel ho, e vya lon limhian mwena Yafukon.”
24 Mwenan vanten nyer err non metenen tolon nyer. Te Iyesu te fe mōn ge, “Mweneng terere nyer, mwe hel ge vanten e vya fyan limhian mwena Yafukon.
25 “A eb hel mōn bwe ge vanten ge hilngin mo ho e vya rru fyan limhian mwena Yafukon. Eb saavi ge kamel eb hil lon bulu atutur ne ul.”
26Err non metenen mōn bwe, te err rrō whuwhu nyer ge, “Ge he eb yi le lo eb nga yi be ne gemya ge hilngimya mwe rranga rru? Si nge eba ktu myuran ge mu rru ngamto?”
27 Iyesu te ter konone nyer, te te fe, “Vanten tōlō ngrengre eb halku nge hobōn. Yafukon nga mwe yekya eba rrwene, tebyan ge sese te hu tōlō hel e Yafukon. Nge ma kya eba rrwene sese bonga.”
28Te Bita te fe mōn byanen ge, “Ō lhe, gemya myate lngilngi sese bonga tebyam, te myarr rrutōm.”
29Ngate Iyesu te surmōl te fe, “Fetinan, nam rrō fe byane gimi, vanten ge ema lngilngi mwenar vere, te taalar, te mwenar metahal nyer, raher te temyar, mwenar terere nyer, te ar tan tebyang, te tebyan rral ge rrwu ne Iyesu,
30 “efe homnen gogonean eb lam mōn bwe lon ge a. Efe homnen gogonean ne im nyer, helar, metahal nyer, raher, teere nyer, te tan nyer 100 mere ran ge te ho burr. Te jenjenan eba me krinen gogonean ge nyer a mōn. Vanten worhu ge nyer lor sa rral ge rrwu, efe rrwene byane nyer. Te efe nga ktu myuran ge mu rru ngamto lon ge ma nga rrō me bwe.
31 # Mat 20:16; Luk 13:30 “Te vanten lol ge em bemō ho lon ge a, efe nga me eve te tebyan ge lor sa ni te rral ge rrwu, a vanten lol ge em be te ho lon ge a, efe nga me eve mō.”
Iyesu te sene mwenan myuran te yen wuluwul ge mo fooku vanten lam an metene jenjenan, ge he ene ktu tebyan mwenar rruan hakbe.
32Ngate, Iyesu te mwenan vanten nyer err rrō rrutōn hal bya Jerrusalem. Iyesu te rrō rru rrumō ne nyer, te nyer err rrō non metenen tebyan ge err yekya ge vanten worhu ne ōrr Jerrusalem efe rrwene eb hel byane Iyesu, te Iyesu rrō yel konon bya en. Te vanten nyer ge err rrō rrutōn me, lur te rrō myorr. Mōl mōn Iyesu te hol mehare mwenan vanten ge err ve 12, te te saarōne sese ge efe nga rrwene byanen.
33Nge te rrō fe, “Mi rongtafyang, yim rrō a ran kōkō Jerrusalem en ōrr ge efe sene Terere Mleng Gentin Vanten bya lon veran hae brris nyer, te vanten ne wuhuran ne lingsenean mwena Yafukon nyer. Efe yiyine nge, te efe sene rral konon ge nge, eb myarr. Mōl mōn, efe sene nge bya lon veran ge nyer ge err rrlō e ta Isrrel, vanten ta Rrom nyer.
34 “Ngate vanten ge nyer le, efe feene, te efe kiibine, efe finghi eb hel ge eb hel ne afnghii, te efe toō kabnu. Te ran wobung sul nan, nge eb myur mōl mōn, te eb totor.”
35Ngate terere mwena Sebeti, Jemes te Jon, terō sau Iyesu me. Te terō fe, “Vanten ne Wuhuran, lomyarō mwe jeene fō rrwene sese ge myarō whu neng ne.”
36Iyesu te whu nyerō te fe, “Lomrō mwe jeene ha nge ena rrwene byane gōmōrō?”
37Nyerō terō fe, “Bone ge fō nga rrō taa ran mwenam arrorrokon lon helan ge rrlam ne mwenam limhian, lomyarō mwe jeene ge efō rrmane ge emyarō tataa krine neng, ge sōn ran bamtō ne neng, a ge sōn ran bamwir ne neng.”
38 # Luk 12:50 Iyesu te surmōl te fe, “Mōrō rrlō yekya ha nge mōrōm rrō whu. Mwi yi be, mōrōm ngrengre emrō myun lon bwelaye ne we ne rongne mwe hakbean ge ni ena myun lon? Te mōrōm ngrengre tontonan ne jenjenan ge ni ena yel tere?”
39Ngate terō fe byane Iyesu ge, “Myarōm ngrengre.” Mōl mōn, Iyesu te fe byane nyerō ge, “Ge le be fetinan, gōmōrō mōrōm yekya emrō myun lon bwelaye ne we ne rongtane mwe hakbean ge ena myun lon, te mōrōm yekya emrō loo ne looan ne jenjenan ge ni ena loo ne.
40 “Te ni narr rrlō e vanten ge ena hrene ge si eb tataa en bamtō ne ni, a si eb tataa en bamwir ne ni. Yafukon nga eb nga sene ōrr ge te nangnangne rru burr byanen ge nyer ge te hrene rru burr me myarin.”
41Bone ge mwenan vanten rrute ge err ve 10 ho, err rongtane wuhuan ge a, lor te fri ne Jemes te Jon.
42 # Luk 22:25-26 Te rrwene Iyesu te je krukru nyer me ne nge, te te fe, “Mim yekya rru burr rruan mwenan vanten nyer ge err rrlō rrinkete Yafukon. Yim lehe yafu lamlam ge em ho mre ran vanten ge err rrlō e Ju, em rrō rrwene mwe hel byane nyer. Te ema rrwene ge em ho fyan mwenar helan.
43 # Mat 23:11; Mak 9:35; Luk 22:26 “A lon tobol e gimi, mwenami rruan eba mnimnii. Ge hu ge lon mwe jeene eba me e yafu ne vanten rrute, mwenan rrinrrinan eba me fyan te eba me e vanten ne ōman mwenan vanten rrute.
44 “He hu ge lon mwe jeene ge eb taavi vanten rrute, nge eba me e vanten ne ōman mwenan vanten rrute.
45 “Tebyan ge Terere Mleng Gentin Vanten, tōlō me tebyan ge vanten nyer efe ōm mwenan, te nge ma me tebyan ge nge eb ōmne nyer. Te eb sene mwenan myuran eb yen wuluwul ge mo fooku vanten lam an metenen jenjenan ge he ene ktu tebyan mwenar rruan hakbe.”
Rrinkete Iyesu an nga eba rrwene fō ktu myuran.
46Ngate Iyesu te mwenan vanten nyer err tongve ōrr Jerriko. Bone ge ete lngilngi besaō ge rrlam a, vanten err ve lol err rrō rrutōn. Te bone ge err rrō yel, rrol hu te taa rru en siriri hal, san nge Batimeyas, terere mwena Timayas. Ngamto nga, te rrō nungnung buverr metenen vanten nyer.
47Bone ge Batimeyas te rongtane ge Iyesu ta Nasarret te rrō yel me fyaasi ne, nge te rrō je bya mre te rrō fe, “Iyesu! Terere mleng mwena Tefit! Ō lol hane ni!”
48Te vanten err lam err sur te hel ge nor te hel byanen, te err fe ge eb rru rongrong. Te nge te ii bya mre mōn bwe, te rrō fe, “Terere mwena Tefit, ō lol hane ni!”
49 Iyesu te fyarr, te fe, “Mi je nge me.” Ngate err je rrol ge a te err fe byanen, “Ō kwarr! Ō totor, nge rrō je neng.”
50Rrol ge a te koōne mwenan arrlirrli, te te rrōrr bya mre, ngate te me ne Iyesu.
51Ngate Iyesu te fe, “Ōm temelole ha nge ena rrwene byane neng?” Vanten ge a te fe, “Vanten ne Wuhuran, long mwe jeene ge fō rrwene ni ena teter mōl.”
52Ngate Iyesu te fe byanen, “Ō vya, mwenam rrinketean ma rrwene ge ōm wu mōl.” Byaho nga, nge te teter mōl, te te rrutō Iyesu to hal.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.