Mark 11
11
Iyesu be King.
1Ngate, bukōkō hu san nge Olif te rru fyaasi ne ōrr Jerrusalem. Te vere wa te ru ge saarō nge Betfas te Betani, terō ho fyan en tahi Bukōkō ge a Olif. Bone ge Iyesu te mwenan vanten nyer err rrō a fyaasi ne ge he en tamtee Jerrusalem, fyaasi ne ōrr Betfas te Betani ran Bukōkō ne Olif, Iyesu te hutamne vanten te e ru. Terō rrumō ne nyer, te te fe byane nyerō ge,
2 “Emrō a bsaō ge mu rru en mō ne ken. Bone ge emrō a tamtee besaō, emrō lhe tongki vivi hu ge mu tuturr rru ge vanten te hu tōlō mkukya ran bwe. Emrō tirrku awa nan, te emrō halen me li.
3 “Te ge he vanten hu eb rrō whu he, ‘Mōrōm rrō mha nge le?’ Emrō fe ge, ‘Yafu ma rrmelole. Te eb lōn ve myarin, emya nga hal mōle me.’ “
4-5Ngate, vanten mwena Iyesu nyerō terō vya te vya lhe tongki vivi ge a mwe fyarr rru en tahi hal, bon taō ne im hu besaō ge a. Bone terō rrō tirrku awa nan, worhu ge err fyarr ho fyaasi, ete whu nyerō ge, “Mōrōm rrō mha nge le, mōrōm rrō tirrku tongki vivi ge a tebyan ha?”
6Vanten mwena Iyesu nyerō terō surmōl byane nyer ge, “Yafu ma rrmelole. Te eb lōn ve myarin, emya nga hal mōle me.” Ngate, ge nyer ge err fyarr ho fyaasi le, ete rrmane ge ge nyerō a terō vya.
7Terō halen tongki vivi ge a byane Iyesu, te err koōne mwenar arrlirrli ran, te Iyesu te taa ran.
8Vanten te e lol err sine mwenar arrlirrli to hal, a worhu err ta ra gbul nga, te err sine nyer to hal tebyan ge err rrinkete ge Iyesu be king mwenan Ju nyer.
9Bone ge Iyesu te rrō yel bya Jerrusalem, vanten err ve lol ge err rrō rrumō, a ge nyer ge err rrō rrutō Iyesu, err rrō ii bya mre te err rrō fe,
“Yihaa, monomnoan byane ge hu ge rrō me! Yafukon rrō tarvya ge hu ge rrō me lon myayan! Sam 118:26
10“Yafukon eb tarvya limhian ge rrō me lon buluim ma King Tefit, ge be temyangken! Yihaa! Gimi ge mim ho mre krine Yafukon emi mnomno Iyesu!”
11Ngate, Iyesu te tamtee Jerrusalem, te te yel konon nga bya lon hereere ne imkon ge rrlam Jerrusalem. Te te lhe sese bonga lon imkon. Te tebyan ge yal te a burr, nge te la mōl bya Betani krinen mwenan vanten ge err ve 12 ho. Te err vya fwerr en ōrr ge a.
Yafukon lon mwe jeene vanten bonga efe singrrur byanen.
12En tabungbung ran wobung sōn, err yel metenen ōrr Betani, te myar te kte Iyesu.
13Nge te lhe liye hu, ge rate te e lol, te rru le, san nge li fik, te te vya he ne lhe wote nyer. Te bone ge te me fyaasi ne, nge te lhe rate nyer nga, tebyan ge telōn ve rengete ge he ne ba.
14Ngate Iyesu te fe byane li fik ge a ge, “Te hu eb lōn nga yen ram mōn.” Te mwenan vanten nyer, err rongtane mōn ge te fe rral ge a.
15Bone ge err me Jerrusalem, mōl mōn, Iyesu te yel konon bya lon hereere ne imkon ge rrlam Jerrusalem mōn. Bone ge Iyesu te la mōl mōn bya lon hereere ne imkon, te te lhe ge nyer ge err rrō foone sese, a ge err rrō gye sese nyer. Te rrwene ge Iyesu telōne kwarr tebyan, te te korkuku ge nyer ge err rrō fofoo lon imkon ge a. Te te klerrfufune byarr nyer mwenan vanten ne haryelyele buverr an ne ōrr Rrom te rrō a ran buverr ne ōrr Isrrel. Te te klerrfufune atataa mwenan vanten rrute ge err rrō foone mar nyer ge he en nga rrwene fnefnean ne nyer byane Yafukon.
16Telōne rrmane ge te hu ne rrya sese ne fooan te hu, te ne yel taa rru lon hereere ne imkon ge rrlam Jerrusalem.
17Ngate te whure vanten nyer ge, “Mwi yi be, mirr rrlō yekya ge Yafukon rrō fe lon mwenan Tuuankon ge,
“ ‘Mweng imkon, mwe jene an rru ge be im ne tamtamyaōan mwenan vanten nyer ne vere bonga ran tan ge fyan ge li.’ Asaya 56:7
Te gimi mim kilhi ma me e ōrr ne lu an ge rrwu mwenan vanten ne laaan nyer!” Jeremaya 7:11
18Ngate hae brris nyer, te vanten ne wuhuran ne lingsenean err rongtane tolon. Te err rrō teene hal ge he en toō kabnu tebyan mwenan wuhuran. Te lur te rrō myorr ne nge, tebyan vanten ge rrlam err rrō rrinkete tolon nyer burr, te err rrō non metenen mwenan wuhuran. Te rrwene ge err rrlōn yekya ge he en toō kabnu.
19Bone ge te a rrō e tarariu ten, Iyesu krinen mwenan vanten nyer ete lngilngi ōrr Jerrusalem.
Mwenangken rrinketean eba gsi bu rru e Yafukon.
20Lon wowobung ne wobung sōn, bone ge err rrō rrutōn hal bya Jerrusalem mōn, ete lhe li fik ge a mōn ge Iyesu te sur te hel byanen. Li fik ge a te grō te tongve libwite nyer fyan.
21Bita te rrinmōle ha ge Iyesu te sur byane li fik ge a, te te fe byane Iyesu te fe, “Ō lhe, Vanten ne Wuhuran! Li fik ge ōrr sur te hel byanen, te ma grō!”
22Ngate Iyesu te surmōl byane nyer te fe, “Mwenami rrinketean eb rru ra Yafukon.
23 # Mat 17:20; 1 Korr 13:2 “Nam rrō fe fetinan byane gimi. He gimi ge hu he mwenan rrinketean eb hel e fe byane bukōkō ge a ge, ‘Ō ku neng te vya koōne neng lon tee,’ he mwenan rrinrrinan eb lōn ve ru, te eb rrinkete ha nge rrō fe, Yafukon eba rrwene eb yen mwenan rrinketean.
24 “Tebyan sese ge le, nam rrō fe byane gimi ge, bone ge mim rrō whu sese hu lon tamtamyaōan, mi rrinkete ge mim kutu sese nan rru burr. Yafukon eb sene sese ha ge mim wuhune.
25-26 # Mat 6:14-15 “Te bone ge mim rrō tamtamyaō, te he vanten hu te rrwene te hakbe byane gimi, emi rrumyune nge. Te tōmōmi ge mu rru mre eb rrumyune rruan hakbe ge mim tewene ho.”
Yafukon te sene Iyesu me lon mwenan helan.
27Ngate, err yel metenen li fik, te err me mōn Jerrusalem te err yel konon nga bya lon hereere ne imkon ge rrlam Jerrusalem. Bone ge Iyesu te rrō yel lon imkon ge a, hae brris nyer, vanten ne wuhuran ne lingsenean nyer, te elta nyer err me biiri nge.
28Te ete whu nge ge, “Ōm kutu helan tene si nge ōm rrō rrwene rruan ge nyer a? Te si nge mwe sene helan ge ōm rrō rrwene sese ge nyer a lon imkon ge rrlam?”
29 Iyesu te surmōl byane nyer te fe, “Ena whu gimi ne wuhuan hu bwe. Te he mi sene rral konon e wuhuan ge a, lo ge ena fe tene si nge nam kutu helan ge a, nge nam rrō rrwene sese ge nyer a.
30 “Mi fe me ne ni. Jon te ktu helan tene si nge te rrō rrno vanten nyer? Helan ge le, te metene Yafukon, o tenen vanten nga? Emi fe me ne ni eve mō bwe.”
31Ngate, err rrō susur e nyer ge, “Eyi fe ha? Ge he yi fe helan ge le ma metene Yafukon, lo ge nge e fe, ‘Tebyan ha nge mirr rrlōn rrinkete Jon?’ “
32Ge he yi fe, “Helan ge le ma metene vanten nyer, lo ge vanten nyer lor eba fri tam ne ken.” Yafu ge nyer a, ge err surmōl byane Iyesu, lur te rrō myorr tebyan ge vanten bonga ete kya ho ge Jon te e brrofet hu mwena Yafukon.
33Ulmyorrmyorr ge a, te rrwene err nga fe byane Iyesu ge, “Myarr rrlō yekya.” Ngate Iyesu te fe byane nyer ge, “Tebyan ge mirr rrlō fe rral konon nan me ne ni, ni mōn, ena rrlōn fe mweneng helan ge nam rrō rrwene sese ge nyer a ne, ge ma metene si.”
Currently Selected:
Mark 11: mmg
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
