Mark 13
13
Lon giri wobung, jenjenan eb fulvi tan ge fyan ge li.
1Bone ge err rrō ling bari yelan metenen imkon ge rrlam Jerrusalem, err rrō yel bya ran bukōkō hu rrlam, san nge Bukōkō ne Olif, mwenan vanten ne ōman hu, te whu, “Vanten ne Wuhuran, ō lhe bwe. Verr lamlam ge nyer a, te im lamlam nyer ne imkon ge rrlam Jerrusalem a, me fyaa ge me fyaa.”
2Ngate Iyesu te fe ge, “Ōm rrō lhe im lamlam nyer ne imkon ge rrlam Jerrusalem a, verr nan nyer eb goo bonga. Te te hu eb lōn nga rru en meyete tebyan ge vanten ne balan worhu efe tukuku.”
3Telōn ve myarin, tesu a ran Bukōkō ge a Olif. Iyesu te taa nga hbōn rru ran bukōkō en tahi ōrr ge te konon e imkon ge rrlam Jerrusalem, te nge te rrō lhe imkon ge rrlam a. Bone ge le, Bita, Jemes, Jon, te Antrru, tesu me lhe.
4Ngate tesu whu Iyesu ge, “Kabria, ō fe me ne gemya mōn, sese ge nyer a, efe tamtamtee nange? Te myarrmyarr ha nge eb hubsine ge rengete eba knon e ge sese ge nyer a eb tamtamtee?”
5Ngate Iyesu te fe byane nyer ge, “Emi rrmerrme, te emi lōne rrmane ge vanten te hu eb koōne rraltaōrr ge nge be Mesaya byane gimi.
6 “Tebyan ge vanten eve lol efe me, te efe me rrō susur fyan sang. Te efe rrō fe ge, ‘Ni nge, nam be Mesaya,’ te efe rvi vanten eve lol.
7 “Te lumi eb lōn myorr bone ge emi rongtane ge balan nyer mo ho nga fyaasi ne ken, te rral e balan ge mo ho hatin metene ken. Sese ge nyer le eb tamtamtee nyer bwe, te ge le tōlō e #13:7 Giri wobung be renge sese bonga eb nong te Mesaya eb la mōl. Lehean 6-19; Tanyel 2giri wobung bwe nge le.
8 “Te vanten nyer efe rrō bal byane vanten rrute, te vere nyer efe rrō bal byane vere mnimnii nyer. En ōrr mnimnii nyer ran tan ge fyan rur eb rrō gnyi, te fyasi eb rru ran vere worhu. Sese ge nyer le mwe yen ge yamyarr hu, mwe nga nga rrō rongtane jenjenan ne linglingan. Jenjenan ge nyer a mwe yen ge rrō tang bari jenjenan ne giri wobung.
Ōrrmwee ne jenjenan eba me, te vanten mwena Iyesu nyer emi fyarr eb hel, te emi fe rral ge rrwu a ne Iyesu byane vanten bonga.
9 # Mat 10:17-20; Luk 12:11-12 “Te gimi emi terfon sene gimi. Nyer efe hale gimi te efe rrya gimi bya lon #13:9 Suran be kukuran hu ge vanten ne lingsenean nyer em rrō rongtane sarōan nyer, tebyan ge he vanten hu te kbwiti lingsenean o surketean ne vere. suran te efe fngifngi gimi lon imkon kakae ne tamtamyaōan. Te emi fyarr en mō ne yafu lamlam ne vere nyer, te metan king ne vere nyer tebyan ge mim be mweneng vanten ho. Bone ge emi rrō fyarr lon metar, emi fe rral ge rrwu a byane nyer tebyang.
10 “Vanten ne suutoan nyer ne rral ge rrwu ne Iyesu, efe suuto byane buluim bonga ne vere bonga ran tan ge fyan ge li bwe, lo giri wobung sirr.
11 “Te bone ge efe hale gimi, te efe rrya gimi bya lon suran, lumi eb lōn myorr, te emi lōn rrinrrin tam tebyan ha nge emi fe byane nyer. Te emi fe rral ha ge Nin Myuran Kon eb sene byane gimi konon e lon ge nga le. Tebyan ge eb lōn ve gimi nge emi susur, a Nin Myuran Kon nge eb sur tere gimi.
12 “Lon jenjenan ne giri wobung ge le, vanten hu eb sene taalan barite bya lon veran vanten ge nyer le, ge efe toō kabnu eb myarr, tebyan ge mwi rrinkete ni rru. Te vanten hu eb sene mwenan terere barite e vya, ge efe toō kabnu eb myarr. Te terere nyer mōn, efe kilhi nyer te efe hel byane temyar te raher, te efe sene nyer mōn bya te efe toō kakabnu nyer, tebyan mwenar rrinketean ne ni.
13 # Mat 10:22 “Vanten nyer lor eb aa bya gimi nga bho tebyang. Te he ge hu e fyarr eb hel lon mwenan rrinketean tere mwenan jenjenan eb tongve giri wobung, Yafukon eb nga halku nge metenen mwenan hakbean. Eba rrwene ge nge tōlō ngrengre e vya lon ōrr ne jenjenan.”
Emi rrinkete tolo Iyesu nga.
14 # Tan 9:27; 11:31; 12:11 Ngate Iyesu te hobyarron mwenan sarōan. Bu ten ne vanten ge nyer ge em rrō rongtane, efe rrwekya ge efe yekya sene ha ge rrō fe. Sarōan ge a mwena Iyesu, te fe, “Sese hu ge tōlō wu rru ge tōlō wu rru, sese ge le eb aa bya Yafukon te gimi. Eb rru en ōrr hu ge tōlō e milin. Te eba rrwene ge nyer ge em ho fyaasi ne nge, efe mkumku mtenen. Te ge nyer ge em ho Jerrusalem, te ge nyer ge em ho lon brrofens ne ōrr Jerrusalem, san nge Jutia, efe mkumku te efe a lulu ran bukōkō nyer.
15 # Luk 17:31 “Te vanten hu ge eb rrō ngangaō vere bon man im, tōlō ngrengre eb nga vya lon man im te vya rrya hilngin.
16 “Te vanten hu ge eb rru lon mwenan ōrr lonōrr, tōlō ngrengre eb nga la mōl bya lon man im, te vya ktu mwenan arrlirrli. Ge nyer a, efe mkumku nga metenen sese ge a.
17 “Ee, ge nyer, ran wobung ge nyer le, yamyarr ge em hol ho, te yamyarr nyer ge em rrō fyahuu, efe rongne eb hakbe ge eb hakbe ten.
18 “Mi tamtamyaō ge sese ge nyer le eb lōn tongve gimi lon renge myalaa.
19 # Tan 12:1; Leh 7:14 “Tebyan ge ran wobung ge nyer le, rongne mwe hakbean ge rrlam eba rrwe ge eb saavi rongne mwe hakbe an bonga lon tang baritean ne tan ge fyan ge a ma me tongve ge lonle. Te rongne mwe hakbe an te hu mōn eb lōn nga yen.
20 “He Yafukon bō tōlōn taaru wobung worhu nga me, ne ren hakbe ge eb nga rrwe a, lo ge vanten te hu eb lōn nga wu. Te taaru wobung worhu nga me rrbyan ge mwenan vanten nyer ge te hrene nyer ho burr ge em be mwenan ge ho.
21 “Te ena sur mōle mōn byane gimi, mi rrmerrme! He vanten hu e fe byane gimi ge, ‘Mi lhe, Mesaya nge a!,’ a he e fe, ‘Nge nge i!,’ emi lōn rrinkete.
22 “Vanten worhu efe konkone ge em be Mesaya ho, a em be brrofet ho, te efe rrwene sese worhu ge eb hubsine mwenar helan, te efe rrwene sese worhu ge vanten nyer efe non metenen mōn. Efe rrwene eb yi le tebyan ge efe konku vanten nyer, te efe rrwekya ge efe konku vanten ge nyer ge Yafukon te hrene nyer ho burr, ge em be mwenan ge. Te efe lōn yekya ge efe nga rrwene tebyan ge Yafukon mu rru goro nyer.
23 “Mi terfon sene gimi! Giri wobung ge a, tōlō me bwe, te narr surfyaara rru burr byane gimi.”
Iyesu eb la mōl tebyan mwenan vanten nyer.
24 # Joel 2:10, 31; 3:15; Leh 6:12; Esi 32:7 Iyesu te hobyarron mwenan hōwōōwōan te fe, “Bone ge wobung nyer ne rongtane mwe hakbe an ge rrlam eb nong,
“ ‘Yal eba me e bung melemleng,
ōl eb lōn nga kor,
25 # Leh 6:13; Joel 2:10 meho nyer lon tōngtōng efe goo,
te helan nyer ge mo ho lon tōngtōng mere,
Yafukon eba gnyine nyer te efe roō metenen ōrr ge err ho en.’ Asaya 13:10; 34:4
26 # Tan 7:13; Leh 1:7 “Ngate, bone ge nga le nga, Terere Mleng Gentin Vanten eb tamtee lon sirōrō krinen mwenan helan te mwenan ōrr renren ge rrlam ge mo kor bu ten, eb byōrhe ōrr.
27 “Te nge eb hutamne mwenan abhyobhyorkon nyer, te efe holkrukru mwenan vanten nyer ge Yafukon te hrene ho en ōrr bonga ran tan ge fyan, a lon tōngtōng, ge efe me ne nge.”
28Ngate Iyesu te fe mōn byane nyer ge, “Mi ktu wuhuran te hu metenen tabarryean ne liye ge a, li fik. Bone ge gōrōte nyer rrō roroō te rate nyer rrō vivi ne, gimi emi yekya ge rrar rrō ktekte ōrr.
29 “Mwi yi nga en ge bone ge mim rrō lhe sese ge nyer a rrō tamtamtee, emi yekya ge mwenan lamōlan rrō ktekte ōrr.
30 “Nam rrō fe fetinan byane gimi, vanten nyer ge e myumyur nga ho bwe lonle ge a, efe lōn myarrmyarr bonga bwe tō ge sese ge a eb tamtee.
31 “Ōrr ge mre long tōngtōng te tan ge fyan ge a ebrō hlahlal, te tolong ge a eb lōn e hlal wobung te hu.
Lomi eb ren nga bho, te uumyarr sene lamōlan mwena Iyesu.
32 # Mat 24:36 “Vanten te hu tōlō yekya wobung te liyal ne sese ge nyer a eb tamtee. Abhyobhyorkon nyer, te Terere Mleng mwena Yafukon ge be hu nga, nyer err rrlō yekya, Teta Yafukon nga mwe yekya.”
33Ngate Iyesu te haasine mwenan susuran, te te fe, “Emi uumyarr sene sese ge nyer a, te lomi eb ren, tebyan ge mi rrlō kya ge sese ge nyer a eb tamtamtee bone ge be.
34 # Luk 12:36-38 “Lamōlan mwenan Terere Mleng Gentin Vanten, mwe yen sarōan ne vanten hu ge eb yel bya hatin. Bone ge rrō yel metenen mwenan ōrr besaō, me fe ōman byane mwenan vanten ne ōman hōhōō nyer ha ge efe nga rrwene. Te te fe byane vanten ge te rrō tetergoro myarryahal ge eb rrō uumyarr sene.
35 “Gimi mōn emi uumyarr sene lamōlan mwena yafu ne im, tebyan ge mi rrlō yekya bone ge be nge eb tamtee, beha en tarariu hu, a beha lon tablibung hu, a beha bone ge to nyer efe rrō rrrer, a beha fyan ōrr ren.
36 “Nge eba me belbel ten. Tōlō wu ne ge gimi emi fwerr bo ho bone ge eb la mōl me.
37 “Ha ge nam rrō fe byane gimi, a nam rrō fe byane vanten bonga mōn ge, ‘Lomi eb ren nga bho!’ “
Currently Selected:
Mark 13: mmg
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
