Mark 7

Farrasi nyer krinen vanten rrute ta Isrrel, err rrō rrutōn rruan ne lingsenean mwena mwenar temtō nyer nga ge myarin. Te lolor telōn rru e Yafukon.

1Ngate Farrasi worhu krinen vanten ne wuhuran ne lingsenean err me Jerrusalem, err me kukur tiliuti Iyesu.

2Te ete lhe mwenan vanten worhu err rrō yen betamyee, te verar te mleng nga ho, tebyan ge err rrlōn hagwo verar bo ho rrutōn mwenar rruan ne lingsenean ge myarin.

3Farrasi nyer, krinen vanten rrute ta Isrrel, err rrō rrutōn rruan ne lingsenean mwena mwenar temtō nyer myarin. Mwi yi nga en rruan ge a mōn. Ge he efe lōn hagwo verar rrutōn mwenar rruan ne hagwo veran eve mō bwe, tōlō ngrengre en yen.

4Ge he efe yel metenen ōrr ne fofooan, efe la mōl me bsaō, tōlō ngrengre efe yen. Te mwenar rruan mōn be lol. Mwe yen mwenar rruan worhu ne hagwo blaye ne myunan, bwelalaa, te blaye ge ma rrwene an ne metarrye ge brras. Ge li nge, be rruan ge rrō rrwene vanten rrō mgal lon meta Yafukon.

5Ngate Farrasi ge nyer le krinen vanten ne wuhuran ne lingsenean, ete whu Iyesu ge, “Tebyan ha nge mwenam vanten nyer err rrlō rrō rrutōn mwenangken rruan ge temtō ne ken nyer myarin err rrō whure, ken ne? Lon mwenangken rruan, verar ma mleng nga ho, te em rrō yen.”

6Ngate Iyesu te fe byane nyer ge, “Be fetinan, myarin, bone ge Brrofet Asaya te surkrine rral ge Yafukon te sene me nen, nge ma lhe gimi ge a, ge mim be vanten ne bulurral nga ho. Gimi mim rrō fe sese, te tōlō ngrengre mi rrwene. Nge te surkrine ge Yafukon me fe lon mwenan Tuuankon ge,

“ ‘Vanten ge nyer a, em rrō tengne ni lon lun bongor nga,

te lon lolor mu rru en ōrr ge te mnii.

7 Em rrō tengne ni tebyan ōrrmwee nga.

Bone ge em rrō whure vanten nyer em rrō fe ge tolo Yafukon nge a,

te be rrinrrinan mwenan vanten nga.’ “ Asaya 29:13

8Te Iyesu te fe ge, “Gimi mim lingilngi lingsenean ge Yafukon te sene, te gimi mim rrō rrutōn rruan mwenan vanten nga.”

9Te te fe byane nyer mōn ge, “Tōlō knon, mim rrō rrme he mwenami yekyaan ge te wu mōn bwe. Te mim rrō lngilngi lingsenean ge Yafukon te ling sene ho burr. Te gimi mim rrō rrme he rruan ge nyer le te knon? Ehee! Mim rrō rrutōn mwenami rruan ge nyer nga. Mim teya yekyaan worhu rrwu ho. Mwi yi le nge, mim rrō haryelyele lingsenean mwena Yafukon tebyan ge emi halkete mwenami rruan ge nyer nga.

10 “Na rrwene eve ahuhubsi hu. Myarin, Mosis te fe ge,

“ ‘Gimi mi tengne tōmōmi te rahemi.’ “ Yel Metenen 20:12; Titrronami 5:16

te nge te fe mōn ge,

“Vanten ge rrō sur hakbe ne temyan a rahen,

emi toō kabnu.” Yel Metenen 21:17; Lefitikas 20:9

11 “Te gimi mi rrlō rrō rrutōn wuhuran ge a ge mwena Mosis. Mim rrō kilhi wuhuran ge a, te mim rrō whure vanten nyer mwi yi a, ‘He vanten hu e fe byane temyan a rahen, “Nam rrō rrme he na sene sese wor te hu byane gōmōrō, ge eb roōne gōmōrō. Te lonle ge a sese ge nyer a bya lon rruan ne Koban.” ‘ “ #7:11 Koban be sevyaran hu ge vanten rrō welwele an sese, te ge rrwu nan rrō a ne Yafukon. Ma rrwene ge vanten te hu tōlō ngrengre eba rrwene sese te hu ne tebyan ge be mwena Yafukon rru burr. Koban be sevyaran kon ge rrō vya ne Yafukon. “ ‘ “Tebyan ge ni nam sene sevyaran ge a byane Yafukon burr, ma rrwene ge tōlō ngrengre na nga roōne gōmōrō.” ‘ “

12 “Te tōlō yi le. Rruan ge le be kokoo rral an nga ho, ge mu rru gro nyer ge efe lōn nga sene hilngir ge eb roōne temyar a raher.

13 “Te mwenami wuhuran rrō ktu meye tolo Yafukon. Te sese be lol mōn bwe mwi yi a, nge mim rrō rrwene.”

Rruan hakbe nyer rrō houre lon lolon vanten, te em rrō rrwene vanten tōlō mgal lon meta Yafukon.

14Ngate Iyesu te je vanten nyer. Err me ne nge mōl mōn, te te fe byane nyer ge, “Gimi bonga, mi rongta sene ha ge na fe, te emi rongtakya.

15-16 “Sese ge mu rru vre, ge rrō vya lon teban vanten, tōlō ngrengre eba rrwene vanten eb lōn e mgal lon meta Yafukon. Te sese ge rrō houre lon lolon vanten, ge le nge rrō rrwene vanten tōlō mgal lon meta Yafukon.”

17Ngate, bone ge Iyesu te yel metenen vanten ge nyer le, te a lon im. Te mwenan vanten nyer ete whu ge eb surfyaara tabarryean ge a.

18Te Iyesu te surfyaara byane nyer ge, “Mwi yi be? Gimi mōn, mirr rrlō yekya? Sese ge mu rru vre, ge rrō a lon teban vanten, tōlō ngrengre eba rrwene vanten eb lōn e mgal lon meta Yafukon.

19 “Sese ge nyer le, tōlō rrō vya lon lolon, te rrō a lon teban nga. Ngate, rrō houre metenen tablin, te rrō a lon ōrr ne siyeyel.” Lon susuran ge nyer le, Iyesu mu surfyaara ge meyee bonga ma mgal nga ho lon meta Yafukon.

20Te Iyesu rrō fe mōn ge, “Sese ge nyer ge rrō houre lon lolon vanten, ge le nge rrō rrwene vanten tōlō mgal lon meta Yafukon.

21 “Tebyan ge rrinrrinan hakbe mo ho lon lolon vanten, sese hakbe nyer rrō tamtee mwe yen: # 7:21 Rruan hakbe ge le rrō fulvi nonon womalmal ge meleng rrō byul krinen vehen, rrinrrinan ne rruan ge a, te sarōan ne rruan ge a, te sese bonga ne rruan hakbe ge a. vya krinen vehen o vya krinen meleng an, laaan, toō kabnu vanten an,

22 “vya krinen vehen o meleng mwenan vanten ge te mnii ge mwe ye rru burr, rruan ne lol myarr, rruan ne lol hakbe, rruan ne tehar an, vanten ge rruan hakbe mu rru lon lolon ngamto nga, rruan ne yekor an, rruan ne kintiyu an, rrinfweyefye an te vanten rrō suune nge, te vanten rrō rrwene rrinrrinan ge tōlō knon.

23 “Rruan hakbe ge nyer le, rrō houre lon lolon vanten, te em rrō rrwene vanten tōlō mgal lon meta Yafukon.”

Iyesu ma rrmelole ge vanten bonga efe rrinkete nge, eb lōn ve ta Isrrel nyer nga.

24Ngate, Iyesu te yel metenen ōrr Kalili, te te a en ōrr ge be fyaasi ne besaō ge nyerō a, Taea te Saeton. Nge te a rru lon im hu, te lōne rrmelole ge vanten nyer efe yekya ge te a rru en ōrr ge le, te telōn e ngrengre he ne lu.

25Ngate, vehen hu ge mwenan teere vehen sōnhal hu te rru ran,

26vehen ge a, telōn me lon buluim ne ōrr Isrrel, nge te hoter Fonisia lon besaō ge Sirria. Te bone ge te rongtane rral e Iyesu, byaho nga, nge te me, te singrrur mō ne nge, te rreng byanen ge e vya korku sōnhal metenen mwenan teere vehen.

27Te Iyesu te fe ge, “Teere ta Isrrel nyer efe yen eve mō bwe. Tōlō wu ne ge eba ktu meyee an terere nyer te koōne an byanen kuli nyer.”

28Te vehen ge a te surmōl, te fe ge, “Yafu, ge le be fetinan, te kuli nyer mōn, em yekya efe yen hivi betamyee ge an terere nyer ge mo goo ho fyan byarr ne yenan.”

29Ngate, Iyesu te fe byanen ge, “Tebyan rral mōl ge ōm fe, ma kya fō la mōl bya ran mwenam vere. Sōnhal mwe yel metenen mwenam teere vehen burr.”

30Ngate bone ge vehen ge a te la mōl bya ran mwenan vere, nge te lhe ge mwenan teere vehen te fwerr kii nga rru ran tōnyōn. Sōnhal te yel metenen burr.

Iyesu te kone vanten hu ge te e bror rru te telōn rrō susur kii.

31Ngate Iyesu te yel metenen vere kukur ne ōrr Taea, te nge te yel tere ōrr ge rrlam ge san nge Saeton. Te te rrō rrutōn hal ge bya tongve Tee Kakre Kalili ge mwe le rru lon ōrr hu rrlam ge san nge Tekabolis.

32Ngate, vanten nyer ne ōrr ge a, ete ktu vanten hu me nen, ge te e bror rru, te telōn rrō susur kii mōn. Ete whu Iyesu ge eba wrene veran ran vanten ge le te e wu mōl.

33Ngate Iyesu te ktu vanten ge le nga hbōn. Terō vya hatin metenen vanten nyer. Ngate te lngi bokon veran nyerō lon bulun rralnyen nyerō, te te kiibi, ngate te tongve myan.

34Ngate te tangya bya mre lon tōngtōng, te te rvi myain te fe byanen vanten ge a ran tolon ge Arramaek, “Efata.” Ge rrō fe ge, “Ō mrrur.”

35Ngate, byaho nga, rralnyen vanten ge le te mrrur. Te myan te mrara, te te susur kii.

36Ngate, Iyesu te fe byane nyer ge, “Gimi mi lōn fe sese ge a byanen vanten nyer.” Te bone ge Iyesu te rrnyorrnyo nyer, te err nga tababa rral nan mōn bwe.

37Ge nyer ge err rongtane, err non metenen, te err rrō fe ge, “Yuboo, sese bonga ge rrō rrwene mu wu ten ge mu wu ten! Vanten ge te e bror, mo rongta, te vanten ge telōn rrō susur, mu susur.”

Currently Selected:

Mark 7: mmg

Highlight

Copy