Lug 23

Jesu tumoy Piladɨ

(Matɨyo 27:2,11-14; Marg 15:1-5)

1Kan nɔm kɨbɨge jɨbɨge sayge daa orɨn̰ge dan̰ Jesu tumoy Piladɨ. 2Kan sayge sige kɔl cayi yege hɨn̰: «Ni way ungo gɨ kɛ le te mɔndɛ te wɔɔ gɨ da kalaŋ kana bɨ, narge gɨ kan na gɨ bɔyɛ hɔgɛ lambo bɨn̰ kɨlma gɨ gumu Sejar gɨ ba-dɔɔ cay ƴaa di Rɔm naŋ bɨ, ban ye gɨ ɗi ban mayi naa kɨlma Kɨris ban gɨ Kumu naa dorii le nee bɨ.» 3Ɨni na, Piladɨ ɨngɨrii ye hɨn̰: «Kɛ, ji na kɨlma gɨ da Jubɨn̰əŋ le ga?» Jesu dɨbii cay nee yeyi hɨn̰: «Na ji-bandi ba yɔ dan̰ kɨbɨn̰ han̰.» 4Piladɨ yen̰ ka-cay ka-bɔgɛ kɨbar nɔm, dan̰ dɨmdɨrdi kalaŋ le hɨn̰: «Ɨŋ wa kɔl pɨna gɨ ƴom cay ungo gɨ kɛ le naŋ.» 5Ama kan ƴomge osɨ yege hɨn̰: «Ban gosɨr kalaŋ dan̰ gɨle kɔl koyi, a cay gɨsəŋ ga Jude gaŋ nɔm. Ban ay toy na a cay gɨsəŋ ga Galile gaŋ bɨrɨŋ andɨn̰ a cay ƴaa-di-gumu di Jerusalɛm dɨŋ kɛ.»

Jesu tumoy Ɛrɔd

6Kɨɗɨn̰ ga Piladɨ je kɔl gɨ nee le na, ban ɨngɨrge ye hɨn̰: «Kɛ, ungo gɨ kɛ le, na gɨ a cay gɨsəŋ ga Galile gaŋ ga?» 7Kɨɗɨn̰ ga ban je gɨ Jesu naa ungo gɨ sayga a cay gɨsəŋ ga Ɛrɔd naa ba-dɔɔ na, ban gɨyii gusi kɨya wa ban kalɨn̰ ma, wɔlɛdi gɨ nee le, ban woy a Jerusalɛm bɨ. 8Kɨɗɨn̰ ga Ɛrɔd sol Jesu na gusi moy tɔgɨ. Ban gey sɔlɛ Jesu na jɨne hayi, kɨya wa an̰ toy a boy wɔlɛdi gɨ ban ba je kɔl gɨ kan ye ojɨn̰ cayi na, ban ɨrɨm kuduroy gɨ ni sɔlɛ Jesu a te lɔɔ hɨnga ga ɗɨn̰ cɨn̰-kɨɗɨn̰ pɨna bii ɗe ay na sol. 9Na hɨn̰ wo̰ ma Ɛrɔd ɨngɨrii kɔl kondɨ. Ama Jesu dɨbii kɔl pɨna cay nee naŋ. 10Ka-cay ka-bɔgɛ kɨbar nɔm, dan̰ ka-gɨlɨn̰ kalaŋ gasɨn̰-kɔl gɨ da Moyis ɨrege nee, poyge kɔl dan̰ togɨyge sige cayi. 11Ɨni na, Ɛrɔd dan̰ asɨgarn̰əŋ kayi sogiige bɨ, sɨlayge laan̰ hɨnga naŋ bɨ, dobiige badɨge ga jɨran̰daŋ tɔgɨ gusi. Bɨ kan say gɨygi gusi Piladɨ. 12Ɛrɔd dan̰ Piladɨ ga tumɔ na ka-baa dan̰ gusɨge le, wɔlɛdi gɨ nee le, kan bɨle ka-pɔgɨn̰ɛ.

Bɔyɛ kɔl tɨma cay Jesu

13Piladɨ te ka-cay ka-bɔgɛ kɨbar nɔm, dan̰ ka-dɔrɛ tumoyi kalaŋ, dan̰ kalaŋ ga cay ƴaa-di-gumu dɨŋ. 14Bɨ ban yege hɨn̰: «Kɨŋ ɨrgan̰ dan̰ ungo gɨ kɛ bəŋ bɨ, kɨŋ ye gɨ ban naa ba mɔndɛ kalaŋ. Bɨ sɨlagɨŋ, ɨŋ-bandi ɨŋ ɨngɨrii kɔl cɨndɨgɨŋ, ama ɨŋ waa kɔl pɨna gɨ ƴom cayi, ojɨn̰ cay kɔl gɨ kɨŋ boy sii a cayi le naŋ. 15Ɛrɔd kalɨn̰ ma, waa kɔl gɨ ƴom cayi naŋ, kɨya wa ban gɨygi bɨnagɨŋ. Aŋ yəgɨŋ, ungo gɨ kɛ le, laa hɨnga ga ɨsɨni pɨna ga ojɨ tɨma naŋ. 16Naa hɨn̰ wo̰ na, ɨŋ kɨya somdi dan̰ bɨraw bɨ, ɨŋ kɨya ɗoyi daa.» 17[Dan̰ ɨlge, ɨlge, kɨɗɨn̰ ga kan na laage kɨdɨrɛ gɨ ni Pakɨ na, ojɨ gɨ Piladɨ kɨya dɔrɛ ba dangay pɨna dɨbi daa.]

18Ama kan beege noyge pɨna wɨlalɨn̰ge yen̰ge hɨn̰: «Dɨɗiigɨŋ coŋ! Ɗagɨŋ Barabas daa bɨni.» 19Barabas le, na ungo gɨ kan ƴomiige dɨbige dangay dɨŋ, kɨya gɨ ban dɨbɨ do̰ a cay ƴaa-di-gumu dɨŋ bɨ, kɨya gɨ ban dɨɗɨ ungo bɨ. 20Piladɨ gɨsɨ gɨ ni ɗɔ Jesu daa, na hɨn̰ wo̰ ma ban jɨga yege kɔl ɗaŋ coŋ. 21Ama kalaŋ nɔm dege sɨle jɨn̰ nee nee yen̰ge hɨn̰: «Dɨɗii na dɨɗe a cay sɨya-gɨ-dagɨli gɨŋ, dɨɗii na dɨɗe a cay sɨya-gɨ-dagɨli gɨŋ.» 22Piladɨ jɨga yege ɗaŋ coŋ gɨ ni tɨba sɨbɨdi, yege hɨn̰: «Na ɨsɨna di wa ma ungo gɨ kɛ le lee ga? Ɨŋ wa kɔl gɨ ɨsɨni pɨna gɨ ojɨ tɨmaydi naŋ. Ɨŋ kɨya somdi dan̰ bɨraw bɨ, ɨŋ kɨya ɗoy daa.» 23Ama kan ƴomge osɨ wɨlalge yen̰ge hɨn̰: «Dɨɗiigɨŋ na dɨɗe a cay sɨya-gɨ-dagɨli gɨŋ. Noyge di ye hu hu hu jɨn̰ nee nee le, ƴee hɨnga bɨge.» 24Ɨni na, Piladɨ yege hɨn̰: «Hɨnga ga kɨŋ ba ɨngɨr le, ɨŋ kɨya lɔɔ bɨgɨŋ.» 25Piladɨ dor ban gɨ kan dɨbiige dangay dɨŋ kɨya do̰ di ban dɨbɨ bɨ, kɨya tɨma di ban dɨɗɨ bɨ le, daa. Bɨ ban bɨge ban gɨ kan ba ɨngɨriige le. Bɨ ban dobɨ Jesu kobɨge, ɗe kan na leeyi hɨnga kage ga kuduroyge na ojɨ le.

Te gɨyəŋ di tɨma

(Matɨyo 27:32; Marg 15:21)

26Kɨɗɨn̰ ga kan tolge Jesu orɨn̰ge danayi ɨni na, kan jɨbɨn̰ge dan̰ ungo gɨ pɨna wo̰ gɨ teeyige Simo. Ban na ungo gɨ kan wooyge a cay ƴaa-di-gumu di Sirɛn dɨŋ, gɨ sayga na ƴaa di caa gɨŋ. Kan ƴomiige dan̰ dɔnɔ gɨ ban na aya sɨya-gɨ-dagɨli gɨ da Jesu kɨban̰ kardi. 27Dɨmdɨrdi kalaŋ ga somge cay ƴaa di nee dɨŋ le, kobɨge kardi Jesu. A duroyge kandɨ ga pɨna, ɨlege kol cayi ten̰ge kuduroyge. 28Jesu bɨle cɨndi solge bɨ, yege hɨn̰: «Kandɨ ga Jerusalɛm, ɨlegɨŋ kol canɨ naŋ. Ama ɨlgɨŋ na kɨya cay gusɨgɨŋ kogɨŋ bɨ, karɨndɨgɨŋ bɨ. 29Sɨlagɨŋ! Wɔlɛn̰əŋ kɨya caga gɨ kan kɨya yɔɔ hɨn̰: “Tumoy wolwa woy, kɨya cay kandɨ ka-madɨri bɨ, kandɨ ga wɔɔge karɨn̰aŋ cay pɨna naŋ bɨ, ga karɨn̰aŋ sa kobɨn̰dɨge naŋ bɨ.” 30Ɨni na, kalaŋ kɨya yon̰ orun̰əŋ hɨn̰: “Laydaŋ gɨŋ cayni bɨ, kɨdɨbɛrɛŋ wɨsanigɨŋ bɨ.”#23:30 Ayge na duroy: Osée 10:8. 31Hɨn̰ gɨ kan na laa danaŋ ɨŋ-bandi hɨya gɨ bɨra hɨn̰ wo̰ na, kɛ kɨŋ-gandi ga kɨŋ woy hɨn̰ sɨya gɨ hay wo̰ le, kɛ kogɨŋ kɨya wɔyɛ na mɨna ga?»#23:31 Hɨya gɨ bɨra le, ni kɨya ɓale aye gɨsɨn̰ na dan̰ ungo gɨ laa hɨnga ga ɨsɨni naŋ, bɨ sɨya gɨ hayi le, ni kɨya aye gɨsɨn̰ na dan̰ ungo gɨ lee hɨnga ga ɨsɨni bɨ. Kɔl le duroy kɨya wɔyɛ na hɨn̰ wo̰: Hɨn̰ gɨ kan na laa danaŋ ɨŋ-bandi gɨ ba laa hɨnga ga ɨsɨni naŋ hɨn̰ wo̰ na, kɛ kɨŋ ka-lɔɔ hɨnga ga ɨsɨni le na wa ba kɨya andaŋ caygɨŋ ɨni ga? 32Kan orɨn̰ge dan̰ kalaŋ ga pɨna ga ka-kuduroy-ɨndɨwa won̰ge sɔɔ kɨya dɨɗɨge danayi nee bɨ.

Jesu a cay sɨya-gɨ-dagɨli gɨŋ

(Matɨyo 27:33-44; Marg 15:22-32)

33Kɨɗɨn̰ ga kan bugoŋge a kɨɗɨn̰ ga kan teege naa «isi ca» gaŋ na, kan gagɨliige a cay sɨya-gɨ-dagɨli gɨŋ daa, dan̰ ka-kuduroy-ɨndɨwa won̰ge sɔɔ a cay sɨya-gɨ-dagɨli koge gɨŋ bɨ. Pɨna a cay kobi gɨ bara gɨŋ bɨ, pɨna a cay kobi gɨ masa gɨŋ bɨ. 34[Ɨni na, Jesu ye hɨn̰: «Banɨ, ɗa kuduron̰ jala jɔm cayge kɨya wa hɨnga ga kan lee le, kan sɨla toyge naŋ.»] Bɨ kan lobɨge badɨge kayi nɔm gosɨnɨn̰ge gusɨge dan̰ te gɨyəŋ gɨ da jɨbe ɓɛlɛ. 35Kalaŋ ɨrege kɨɗɨn̰ ga nee gaŋ le, kɨya sɔlɛge bɨ, ka-cay Jubɨn̰əŋ asiige yege hɨn̰: «Ban poɗɨ kalaŋ ga ɗaŋ. Ma hɨn̰ gɨ ban na Kɨris ban gɨ Kumu dorii leen̰ cɨndi na, ɗa ɗe ban poɗɨ gusi bɨ na!» 36Asɨgarn̰əŋ kalɨn̰ ma sogige bɨ. Sayge ɨrgage mɨnde gusi dan̰ cɛrɛ di suru gɨ dasi dobɨge bii 37bɨ yege hɨn̰: «Hɨn̰ gɨ ji na kɨlma gɨ da Jubɨn̰əŋ na, pɨɗa gusɨn̰ kon̰ bɨ na!» 38Kan walge kɔl a boy sɨya gɨ habɨli gɨŋ dege cay sɨya-gɨ-dagɨli gɨŋ daa yege hɨn̰: «Na kɨlma gɨ da Jubɨn̰əŋ.»

39Ba kuduroy-ɨndɨwa gɨ pɨna, gɨ kan gagɨlige a cay sɨya-gɨ-dagɨli koyi gɨŋ danayi le yagɨdi yeyi hɨn̰: «Haj! Ji na Kɨris ban gɨ Kumu dorii le naŋ ga? Pɨɗa gusɨn̰ kon̰ gaŋ bɨ, pɨɗani danan̰ bɨ na!» 40Ama ban gɨ ɗaŋ le, san̰ danayi yeyi hɨn̰: «Kɛ ji hɨndara Kumu naŋ ga? Kɔl gɨ kan boy can̰ le, ma kan boy cayi bɨ naŋ ga? 41Kɔl gɨ kan boy cayna le, na dan̰ gɨyəŋdi hayi. Kɨya wa kan boyge ojɨn̰ na cay gɨye-lɔɔdɨna. Ama ban na, ban laa hɨnga ga ɨsɨni pɨna naŋ.» 42Ban gɨ ba son̰ dan̰ mɨgay le, yen̰ Jesu hɨn̰: «Jesu, kɨɗɨn̰ ga ji kɨya caga kɨya dɔɔ-ƴaa cay gɨsəŋ gaŋ na, ɨrɨm kɨya canɨ.» 43Jesu dɨbi nee yeyi hɨn̰: «Aŋ yen̰ daa waŋ na cɨndi: Labɨde ji kɨya sɔmɛ danaŋ a Paradɨs.»

Jesu ma

(Matɨyo 27:45-56; Marg 15:33-41)

44Tɨwa baa lam wo̰ gɨ kɨya ɨnwa ɨni na, kɨɗɨn̰ buyoŋ ɨndi tɨlɨm cay gɨsəŋ gaŋ nɔm bɨrɨŋ gɨsɨn̰ gɨ tɨwa yawraŋ. 45Dɨlɨm wosɨ cɨn̰ tɨwa. Ɨni na, badɨge ga kan boyɨn̰ge te kɨɗɨn̰ ga woy dan̰ cɨndɨge duroy ƴaa-di-da-Kumu dɨŋ le, sagaŋ car duroy nee. 46Jesu dor noy daa, dan̰ tumoyi di daa ye hɨn̰: «Banɨ, ɨŋ ɗen̰ turnonɨ duroy kobɨn̰ gɨŋ.»#23:46 Ayge na duroy: Psaumes 31:6. Kɨɗɨn̰ ga ban ye kɔl gɨ nee le ɨni na, ban hɨmbɨ. 47Kɨɗɨn̰ ga gumu gɨ da asɨgar gɨ da kalaŋ ga Rɔm ba sol hɨnga ga ba lee gusɨge le hɨn̰ wo̰ ɨni na, ban hɨram Kumu ye hɨn̰: «Hɨnde, ungo gɨ kɛ le, na ungo gɨ dan̰ naji toy hayi.» 48Kalaŋ nɔm ga ba dayge cayge kɨya sɔlɛ-hɨnga a kɨɗɨn̰ gaŋ ga nee le, solge hɨnga ga ba lee gusɨge le ɨni na, jogɨge dan̰ tɔgɛ kuduroyge rab rab dan̰ cɨn̰-n̰age. 49Jesu ka-pogɨn̰i nɔm dan̰ kandɨ ga ba kobɨge kardi ayɨn̰ toy a Galile le, ɨrege sɛdɨ solge hɨnga ga ba lee gusɨge le.

Kan ɨmgege Jesu

(Matɨyo 27:57-61; Marg 15:42-47)

50-51Bɨ ga ma, ungo gɨ pɨna wo̰, gɨ gusondi na Jɨsɛb, ban na ungo gɨ a cay ƴaa-di-gumu di da Jubɨ di toge Arimate. Bara gɨ nee le, na ungo gɨ a duroy ka-bɔyɛ kɔl ga da Jubɨ. Ban na ungo gɨ kuɗa bɨ, ungo gɨ dan̰ durɔ ɗɨngar bɨ. Ban bugoŋ pɨna dan̰ ka-bɔyɛ kɔl cay kɔl gɨ kan boyge le naŋ bɨ, cay hɨnga ga kan ba lee le naŋ bɨ. Ban bee kuduroy cay dɔɔ-ƴaa di da Kumu di ba kɨya caga le. 52Bara gɨ nee le, say or gusɨn̰ Kɨlma Piladɨ ɨngɨrii gɨ ban na bii gundi Jesu. 53Ban say dor gundi Jesu a cay sɨya-gɨ-dagɨli gɨŋ dugo bɨ, nɔngɨrii dan̰ bagɨda ga kɨledɨge osɨ bɨ, orɨn̰ danayi dɨbii boy umboŋdi kamɨn̰aŋ ga kan hɨrmege a gasbi garma gɨŋ gɨ cay pɨna kan dɨbɨge gundi ungo nee naŋ. 54Na wɔlɛ gɨ kan ƴomɨn̰ge cay tɨbayge, kɨya wa wɔlɛ gɨ ni dorɨn̰ gɨlale kɨya aye toy.

55Kandɨ ga saygage dan̰ Jesu a cay gɨsəŋ ga Galile dɨŋ le, kobɨge kardi Jɨsɛb bɨrɨŋ orɨn̰ge solɨn̰ge cay kamɨn̰aŋ bɨ, solɨn̰ge kɛ kan na dɨbɨ gundi Jesu boy umboŋ gɨŋ na mɨna ga? 56Kandɨ ga nee le, kardi nee na bɨlege cayge jogɨge ɨndi, kɨya ƴomɨn̰ cay tɨbay hɛɗɨmɛ ga ɗo̰ tɨna dan̰ ɨdɨr gɨ ni bɔgɛ cay gun gɨŋ.

Ɨni na kan ƴomge gusɨge dan̰ wɔlɛ gɨ ni dɔrɛ gɨlale hɨn̰ gɨ gasɨn̰-kɔl gɨ da Moyis ba ojɨ le.

Currently Selected:

Lug 23: gab

Highlight

Copy