Lug 8

Kalaŋ ga ba beege Jesu

1Kardi nee na Jesu gor dan̰ cay ƴaa ga gɨmdəŋ gɨmdəŋ, dan̰ cay karɨn̰ ƴaa ƴaa teen̰ bɛrnɛ Kɔl-gɨ-Ɗari gɨ da dɔɔ-ƴaa di da Kumu. Ka-aye-cay-tɨbayi ga mɔjɨ-cayge-sɔɔ le beeyige, 2bɨ kandɨ ga pɨna ga ban tay turnɔ ga ɨsɨndəŋ kuduroyge bɨ, dor hɔmɨn̰ɛ gusɨge bɨ le, beeyige. Kandɨ ga nee le gusondɨge ba kɛ: Mari di kan tooge Magɨdala di turnɔ ga ɨsɨndəŋ won̰ jurgum andaŋ kudurɔ coŋ bɨ, 3Jani di ni tam Suja gɨ ba sɔlɛ duroy ƴaa di da Ɛrɔd bɨ, Sujan dan̰ kandɨ ga ɗaŋ ga ka-lɔɔ ɗarwa dan̰ ka-aye-cay-tɨbayi Jesu dan̰ hɨnga wɔɔdɨge bɨ.

Kɨradi-kɔl gɨ ojɨ cay ba gɨse

(Matɨyo 13:1-9; Marg 4:1-9)

4Dɨmdɨrdi kalaŋ saygage cay ƴaa ga gɨmdəŋ gɨmdəŋ nɔm, dayaŋge gusi Jesu ɨni na, ban ay kɨradi-kɔl yege hɨn̰: 5«Ba yage gɨ pɨna wo̰ andaŋ or kɨya gɨse. Kɨɗɨn̰ ga ban ɨre wɨje gasi gɨse duroy yage koyi gɨŋ na, gasi gɨse ga pɨna andaŋ kobi bugoŋ bongi gɨyəŋ gɨŋ. Ka-gɔrɛ gɨyəŋ ɗodɨrdege bɨ, cɨɗəŋ ɨrgage diige bɨ. 6Ga pɨna bugoŋ a cay gɨsəŋ ga wan̰ dan̰ oru. Kɨɗɨn̰ ga gasi gɨse le andaŋ na hay kuyɔm kɨɗɨn̰dɨge gaŋ, kɨya wa sarnayge jala naŋ. 7Ga pɨna bugoŋ duroy gɨsɨm gaŋ. Kɨɗɨn̰ ga gasi gɨse le andaŋ na, gɨsɨm le kalɨn̰ ma andaŋ danage pɨna bɨ say malge ƴee cayge. 8Ama ga ɗaŋ bugoŋ na a cay gɨsəŋ ga ɗari gaŋ, andaŋ bɨ malgɨ bɨ dor cayge bɨ. Cayge pɨna na cɨndɨge won̰ aru nee.» Ɨni na, Jesu ye dan̰ tumoyi di daa hɨn̰: «Ungo gɨ sɨmayi na wɨya nee na kuɗa gɨ ban ɨrɨm cay kɔl gɨ ban ba je le.»

Kɨya wa ma Jesu ye kɔl dan̰ kɨradi ga

(Matɨyo 13:10-13; Marg 4:10-12)

9Ka-aye-cay-tɨbay Jesu ɨngɨriige te kɨradi-kɔl le age na sol duroy. 10Ban jɨga dɨbɨge cay nee hɨn̰: «Kɨŋ-gandi na, Kumu bɨgɨŋ gɨyəŋ gɨ ni solɨn̰ hɨnga ga woy kɨɗɨn̰ wɔsɛdɨge gaŋ ga ojɨ cay dɔɔ-ƴaa di da Kumu. Ama kan ga doŋ na kan yege kɔl na dan̰ kɨradi kɨya hɨn̰ wo̰ na: “Kan kɨya sɔlɛ-hɨnga ga ɨŋ lee dan̰ cɨndɨge, ama kan kɨya sɔlɛ duroy naŋ, kan kɨya jɔɔ kɔl gɨ ɨŋ ye dan̰ sɨmayge ama kan kɨya sɔlɛ kɨradi naŋ.”#8:10 Sɨlagɨŋ: Esaïe 6:9.

Jesu dor te kɨradi-kɔl gɨ da gasi gɨse

(Matɨyo 13:18-23; Marg 4:13-20)

11«Sɨlagɨŋ te kɨradi-kɔl le ba kɛ: Gasi gɨse le na kɔl gɨ da Kumu. 12Gasi gɨse ga bugoŋ bongi gɨyəŋ le, gɨlɨn̰ na dan̰ kalaŋ ga je kɔl gɨ da Kumu dan̰ sɨmayge. Ama kɨɗɨn̰di ga nee gaŋ le bɨ haban̰ ɨrga dor kɔl gɨ da Kumu le cɔd kuduroyge coŋ, naŋ na kan na gɨ da bɔgɛ kuduroyge cay nee wan̰ pɔɗɛ. 13Gasi-gɨse ga bugoŋ a cay gɨsəŋ ga wan̰ dan̰ oru le, gɨlɨn̰ na dan̰ kan ga jege kɔl gɨ da Kumu bɨ ƴeege dan̰ gusi-mɔwa hage, ama kɔl gɨ da Kumu le bɨga sarnay kuduroyge naŋ. Kɨya wa kan beege kuduroyge cay nee na lam wo̰ bɨ, kɨɗɨn̰ ga hɨnga ga ni gɨwase na andaŋ cayge ɨni na, kan dɨbɨ aye kudurɔ koge coŋ. 14Gasi-gɨse ga bugoŋ duroy gɨsɨm gaŋ le, gɨlɨn̰ na dan̰ kan ga jege kɔl gɨ da Kumu bɨ, beege kuduroyge cay nee bɨ, ama ɨrɨme a cay hɨnga ga cay gɨsəŋ gaŋ bɨ, tabɨlaŋ wɔɔ gursu bɨ, gusi-mɔwa ga cay gɨsəŋ gaŋ bɨ, ba ƴɔmɛ kuduroyge narge malge te aye kudurɔ koge gaŋ coŋ. 15Gasi gɨse ga bugoŋ cay gɨsəŋ ga ɗari gaŋ le, gɨlɨn̰ na dan̰ kan ga ƴeege kɔl gɨ da Kumu dan̰ kuduroyge ga kuɗa bɨ, ɨrege kɛgɛgɛ cay tɨbayge kɨya ƴɔɔge bɨ, dɨbɨn̰ge-ɗugoyge bɨrɨŋ andɨn̰ hɨnga bɨge.

Kɨradi-kɔl gɨ ojɨ cay lamba

(Marg 4:21-25)

16«Ungo tala tɨwa lamba dɨŋ ɨmbɨ ungo cay nee naŋ bɨ, dɨba te gasɨlaŋ gaŋ naŋ bɨ. Ama ban ɗoo na kɨɗɨn̰ ɗɔdo gaŋ ɗe kalaŋ ga na andaŋ duroy ƴaa dɨŋ na solɨn̰ge kɨɗɨn̰ arɨn̰. 17Hɨnga nɔm ga woy kɨɗɨn̰ wɔsɛdɨge gɨŋ haw kɛ le, wɔlɛ gɨ ɗaŋ kan kɨya dɔrɛ toyge daa, hɨnga nɔm ga haw kɛ woy kɨɗɨn̰ ɓurɔŋgɛdɨge gaŋ le, wɔlɛ gɨ ɗaŋ kan kɨya andɨn̰ dan̰ koldɨge doŋ. 18Ɗagɨŋ muɗɔlɛ a cay gusɨgɨŋ gɨŋ ojɨ cay kɔl gɨ kɨŋ ba je. Kɨɗɨn̰ ga ungo na ɨran̰ dan̰ hɨnga kobi na, Kumu kɨya bii kamdɨge cay nee jɨn̰ tumɔ tumɔ. Ama kɨɗɨn̰ ga ungo na ɨran̰ dan̰ hɨnga kobi naŋ na, Kumu kɨya dɔrɛ ga dḛ ga ban ɨrɨm gɨ ɗi na orɨn̰ le.»

Jesu ƴoyi dan̰ karmii

(Matɨyo 12:46-50; Marg 3:31-35)

19Jesu ƴoyi dan̰ karmii ɨrgage age na wayi, ama waage kɨɗɨn̰ ga ni orɨn̰ gusi naŋ kɨya gɨ dɨmdɨrdi kalaŋ ƴeege kɨɗɨn̰. 20Kalaŋ yeyge hɨn̰: «Ƴon̰ dan̰ karmɨn̰ ɨrege doŋ kan geyge solɨn̰.» 21Ama Jesu yege hɨn̰: «Na kan ga ba jege kɔl gɨ da Kumu bɨ ayge leen̰ gɨye bɨ le, kan ma na ƴonɨ dan̰ karmɨnɨ.»

Kal gɨ gumu gɨ duroŋ le, Jesu narii

(Matɨyo 8:18,23-27; Marg 4:35-41)

22Wɔlɛ gɨ pɨna wo̰, Jesu nay boy koburo gɨ gumu gɨŋ dan̰ ka-aye-cay-tɨbayi. Ban yege hɨn̰: «Haɗanagɨŋ kaŋ ga gumu ana orgɨŋ jɨn̰ kɨwa gɨ nii gɨŋ.» Bɨ kan orge. 23Kɨɗɨn̰di ga kan ɨre haɗɨge na, Jesu ba woy kuŋ. Kɨɗɨn̰di ga nee gaŋ le bɨ, kal gɨ gumu ay te duroŋ a cay kaŋ ga gumu gaŋ, lee gɨ mɛw say bugoŋ duroy koburo gɨ gumu gɨŋ walɨn̰ tɨlɛj baa mɨnde gɨ koburo gɨ gumu le, ni kɨya ɗɨrmɨn̰ danage. 24Ka-aye-cay-tɨbay Jesu ɨrgage mɨnde gusi lɨbiige yeyge hɨn̰: «Ba-gɨlni hɨnga, Ba-gɨlni hɨnga, na kɨya mundoŋ gɨŋ.» Jesu say lɨbɨ te kuŋ gaŋ bɨ, al kal dan̰ mɛw ga sayge le. Kɨɗɨn̰ ga nee gaŋ le bɨ, kal gɨ duroŋ le sogii bɨ, mɛw ga say le kalɨn̰ ma jɨga ɨre dugo ɗɨngɨrɨŋ ban̰di nee bɨ. 25Jesu jɨga yen̰ ka-aye-cay tɨbayi hɨn̰: «Kɨya wa ma magɨŋ gɨl aye kudurɔ kogɨŋ naŋ ga?» Hundɔrɔ leege ama kɔl gɨ ba kayge yɔd le, lee gɨ kan ɨngɨrge gusɨge ye hɨn̰: «Ungo gɨ kɛ le na ungo gɨ mɨna ma kal dan̰ kaŋ kalɨn̰ ma jege kɔl kɨbi kɨɗɨn̰ ga ban ay noyi bɨge wo̰ ga?»

Jesu tay turnɔ ga ɨsɨni kuduroy ungo

(Matɨyo 8:28-34; Marg 5:1-20)

26Kɨɗɨn̰ ga Jesu dan̰ ka-aye-cay-tɨbayi haɗɨge kuray gɨ gumu taa taa bugoŋge a cay gɨsəŋ ga Gerasa gaŋ ga bɨle cɨndɨge bɨn̰ cay gɨsəŋ ga Galile na, 27ban gɨsɨn duroy koburo gɨ gumu taa taa gɨŋ dugo bɨ, ungo gɨ pɨna wo̰ gɨ tumɔ som a cay ƴaa-di-gumu di nee le, turnɔ ga ɨsɨndəŋ woy a kuduroy andaŋ yalii. Ay toy na jɨne wo̰, ungo le dɨba badɨge gusi naŋ bɨ, wɨya ƴen̰ naŋ bɨ, ama kɨɗɨn̰ wɔyɛdi na boy umboŋ kamɨn̰aŋ ga kan pay duroy garma gɨŋ. 28Kɨɗɨn̰ ga ban sol Jesu hug bɨ na, ban gay gɔsɛ bɨ ba bib tumoyi bɨ ye dan̰ tumoyi di daa pəŋ ye hɨn̰: «Jesu, Kurɨn̰-Kumu gɨ ɗɨn̰ cay hɨnga nɔm na wa ma mɨn̰ gey gusɨnɨ ga? Ɨŋ olɨn̰ gɨləŋ mɨrɨn̰tɨn̰i naŋ.» 29Kɨya wa Jesu ay noy bɨn̰ turnɔ di ɨsɨni di woy kuduroyi le, ɗe na andaŋ coŋ. Daa daa turnɔ di ɨsɨni le gɨsɨn cay ungo le bɨ. Kan saɗɨdɨdɨge kobi dan̰ tɨbayi dugo dan̰ mɔrɨyɔŋ age na amii, ama ban adɨrde hɨnga ga ni saɗe ga ani ani bɨɗal bɨɗal bee coŋ bɨ, turnɔ di ɨsɨni le orɨn̰ danayi jɨn̰ caa gɨŋ. 30Jesu ɨngɨrii hɨn̰: «Gusondɨn̰ na waŋ ga?» Ban dɨbii cay nee yeyi hɨn̰: «Gusoŋnɨ na “Kondɨwayge”.» Kɨya gɨ turnɔ ga ɨsɨni kondɨ woyge a kuduroyi. 31Bɨ turnɔ ga ɨsɨndəŋ le oliige gɨ ban na gɨ tayge bogɨge duroy umboŋ gɨ ɗɨgi mɨrɨg gɨ kagadi unɔ gɨŋ naŋ.

32Ɨni na, a cay garma gɨ nee gɨŋ le, ɨre amge gɔsɨyɔŋn̰əŋ dan̰ kondige nee ɗe na diige hɨnga. Turnɔ ga ɨsɨndəŋ le olge Jesu, ban na ɗage age na or kuduroy gɔsɨyɔŋn̰əŋ le. Bɨ ban ay noy bɨge gɨ kan na ɨra. 33Ɨni na, turnɔ ga ɨsɨndəŋ le, dege kɨɗɨn̰ andaŋ gusi ungo le orge kuduroy gɔsɨyɔŋn̰əŋ gaŋ le. Kɨɗɨn̰ ga nee le bɨ, kondɨwa da gɔsɨyɔŋn̰əŋ le sayge dan̰ gɨre gɨ daa ɗiriri bɨ, laydaŋge ɗurɔm ɗurɔm duroy kuray gɨ gumu taa taa gɨŋ sɨn̰ge kaŋ madɨrdɨn̰ge nɔm kɨbɨge. 34Kɨɗɨn̰ ga kalaŋ ga ka-ame gɔsɨyɔŋn̰əŋ le, solge hɨnga ga ba pɨde le na, kan gɨrege orge yon̰ kalaŋ ga a cay ƴaa-di-gumu dɨŋ bɨ, yen̰ge kalaŋ ga a cay gulɔŋn̰əŋ gaŋ bɨ, kol hɨnga ga nee le. 35Kalaŋ andaŋge kɨya sɔlɛ-hɨnga ga ba pɨde le. Kan ɨrgage bugoŋge gusi Jesu bɨ, wayge ungo gɨ turnɔ ga ɨsɨndəŋ ba andaŋ gusi le som dugo tumoyi. Ban dobɨ badɨge bɨ cɨndi ɨre ɗɛrɛrɛ nee bɨ, ɨni na hundɔrɔ leege. 36Kan ga ba solge hɨnga ga nee dan̰ tɨdɨge le, dorge kol gɨyəŋ gɨ ungo gɨ tumɔ turnɔn̰əŋ ga ɨsɨndəŋ ba woy kuduroy le ba wan̰ pɔɗɛ. 37Ɨni na, kalaŋ nɔm ga a cay gɨsəŋ ga Gerasa gaŋ hundɔrɔ gɨ gumu baa toyge bɨ, olge Jesu gɨ ban na saa ɗa cay gɨsəŋ kage coŋ. Jesu nay duroy koburo gɨ gumu taa taa gɨŋ kɨya jɔgɛ. 38Ungo gɨ tumɔ turnɔn̰əŋ ga ɨsɨndəŋ ba andaŋge kuduroy coŋ le, ol Jesu yeyi hɨn̰: «Kɔgɨɗɔ, ɗaŋ aŋ som danan̰.» Ama Jesu dɨbii cay nee yeyi hɨn̰ 39«Jɨga ɨra a tan̰ bɨ, ya kol hɨnga nɔm ga Kumu ba lee danan̰ le.» Ɨni na, ungo le or a cay ƴaa-di-gumu dɨŋ yɔ kol hɨnga nɔm ga Jesu ba lee danayi le.

Jesu poɗɨ tama bɨ lɨbɨ tɨrmin̰ Jayrus bɨ

(Matɨyo 9:18-26; Marg 5:21-43)

40Kɨɗɨn̰ ga Jesu jɨga Galile na, kondɨwadi kalaŋ yaliige kɨya gɨ kan nɔm amiige 41Bɨ ga ma ungo gɨ pɨna wo̰ andaŋ cayge. Gusɔŋdi na Jayrus, ban na ba-sɔmɛ a cay ƴaa-daye-di-da-Jubɨn̰əŋ. Ban baa tumoy Jesu olii ɗe ban na or tayi, 42kɨya wa turmoy woy kɨbɨ tɨma dɨŋ. Na turmoyi di pɨna kəɗ kəɗ, ɨlgedo ɓal mɔjɨ-cay-sɔɔ. Kɨɗɨn̰ ga Jesu ba ɨre or jɨn̰ da Jayrus na, dɨmdɨrdi kalaŋ jəngɨdiige te gɨyəŋ gɨŋ.

43A duroy dɨmdɨrdi kalaŋ ga nee le, tama di pɨna wo̰ woy duroyge. Tama di nee le, kɨbar gɨ ɨsɨni or gusoo gɨloo-cɨn̰ ɓal ɨlge mɔjɨ-cay-sɔɔ. Hɨndi mondɨ hɨnga wɔɔdo nɔm a da ka-gasɨɗe, ama ba gasɨɗe pɨna kalɨn̰ ma ɓala kɨya pɔɗɔɔ naŋ.

44Hɨndi gay duroy kalaŋ ɨrgan̰ jɨn̰ kardɨ Jesu bɨ, cɨl kɨbɨ badɨge kayi bɨ, kɨɗɨn̰di ga nee gaŋ le bɨ, kɨbar le ɨre dugo. 45Jesu ɨngɨr hɨn̰: «Na waŋ ba ɨsɨbəŋ ga?» Kan nɔm man̰ge kɨbɨge. Ɨni na, Pɨyɛr yeyi hɨn̰: «Ba-gɨlni hɨnga, kɛ dɨmdɨrdi kalaŋ ga nɨwɨrin̰ge bɨ dayaŋge gusɨn̰ jɨŋ jɨŋ ɗan̰ kɨɗɨn̰ ga ni dɔrɛ habe naŋ le kɛ, ji sɨla naŋ ga?» 46Ama Jesu dɨbɨge cay nee yege hɨn̰: «Ɨŋ sol gɨ ungo pɨna ɨsɨbəŋ, kɨya wa ɨŋ sol gɨ tɔgɨ andaŋ gusɨnɨ coŋ.» 47Tama le ba sol gɨ hɨndi kɨya ɓale wɔsɛ guso naŋ ɨni na, hɨndi ɨrga dan̰ hundɔrɔ say jag jag baa tumoy Jesu. Bɨ dor te hɨnga ga ba loo gɨ hɨndi ba cɨlɨn̰ kɨbɨ badɨge ga da Jesu tumoy kalaŋ nɔm bɨ, pɔɗɛ gɨ hɨndi ba way kɨɗɨn̰di ga nee gaŋ le bɨ. 48Jesu yo hɨn̰: «Turmonɨ, aye kudurɔ kɛ poɗɨne. Ɨra dan̰ gusi-dɔbɛ.»

49Kɨɗɨn̰ ga Jesu ɨre ye kɔl ƴee na, ba-ƴɔbɛ gɨ pɨna wo̰ sayga a da ba-sɔmɛ cay ƴaa-daye-di-da-Jubɨn̰əŋ ɨrga andaŋ cayge yen̰ Jayrus hɨn̰: «Tɨrmon̰ le ma ɨni, gɨlale Ba-gɨlni hɨnga le naŋ ɨni.» 50Ama Jesu je kɔl gɨ kan ba ye le bɨ, yen̰ Jayrus hɨn̰: «Hundɔrɔ naŋ, bɨga kuduron̰ canɨ ƴɔbɨ, hɨndi kɨya pɔɗɛ.» 51Kɨɗɨn̰ ga kan bugoŋge a da Jayrus na, ban narɨn̰ kalaŋ pɨna pɨna ɔrɛ ƴen̰ danayi, ama naran̰ Pɨyɛr, Ja̰, Jag bɨ, turmɔ le ba dan̰ ƴɔɔ naŋ. 52Kalaŋ nɔm ga ba ɨrege nee le, ɨlege bɨ, teege kuduroyge kɨya cay turmɔ le. Ɨni na, Jesu yege hɨn̰: «Ɨlegɨŋ naŋ. Hɨndi mara naŋ, hɨndi woy na kuŋ.» 53Ama kalaŋ sogiige, kɨya wa kan sol gɨ turmɔ le ma. 54Ɨni na, Jesu andaŋ a kɨɗɨn̰ ga tɨmbali le won̰ nee bɨ, ƴom kɔbɔ yo dan̰ tumoyi di daa ye hɨn̰: «Turmonɨ, saa te kuŋ gaŋ daa!» 55Kɨɗɨn̰di ga nee gaŋ le bɨ, turnɔɔ jɨga guso bɨ, hɨndi de say daa. Ɨni na, Jesu ay noy bɨge gɨ kan na boo hɨnga ga ni dɔɔ. 56Kɔl kay turmɔ kando le yɔd, ama Jesu ay noy bɨge gɨ kan na gɨ yon̰ ungo pɨna wo̰ koldi naŋ.

Currently Selected:

Lug 8: gab

Highlight

Copy